使徒行傳

第一章.

1 Kyi-toh yü iao Ge meng-du mông Ge sing-t‛in, jü-zih ge ze Kæn-læn sæn-zông, feng-fu ge ze Yia-lu-sæh-lang teng-de Sing-Ling kông-lôh, ing-hyü m kyi-nyih we peh Sing-Ling kông-lôh; ziu Sing-Ling z-‛eo we teh-djôh neng-kön tso te-tsing tao di-ts-gyih.
9 Sing-t‛in ts-‛eo liang-ke t‛in-s t‛ong-ts meng-du, Yia-su iao tse-le.
12 Meng-du cün-tao Yia-lu-sæh-lang, jü-de tao-kao, ziu kæn Mô-di-ô de Yiu-da tso s-du.

1 基督 爲 要 佢 門徒 望 佢 昇天，聚集 佢 在 橄欖 山上，吩咐 佢 在 耶路撒冷 等待 聖靈 降落，應許 無 幾日 會 畀 聖靈 降落；受 聖靈 時候 會 得着 能幹 做 對證 到 地之極。
9 昇天 之後 兩個 天使 通知 門徒，耶穌 要 再來。
12 門徒 轉到 耶路撒冷，聚隊 禱告，就 揀 馬提亞 代 猶大 做 使徒。

DI-O-FI-LO, ngô sia zin-deo keh-peng shü, kông Yia-su ky‛i-deo ih-ts‛ih su tso su kao-hyüing,
2 dzih tao Ge k‛ao Sing-Ling feng-fu kæn-shün-keh s-du ts-‛eo sing-zông t‛in keh nyih.
3 Ge ziu næn yi-‛eo yüong hyü-to k‛ôh-zih-keh bing-kyü hyin-c‛ih Ge z weh-cün-le, s-zih nyih li-min yin-c‛ih peh s-du, teh ge-he kông Zông-ti koh z-kön:
4 teh s-du jü-zih z-‛eo, coh-fu ge-he, “Feh iao li-k‛e Yia-lu-sæh-lang, teng-tao Vu-ts‛ing su ing-hyü, ziu-z ng-he zin-deo t‛ing-djôh Ngô kông-keh:
5 ing-yü Iah-‛ön z yüong shü ‛ang si-li; tsih-z ng-he m kyi-nyih ‛eo we ziu Sing-Ling-keh si-li.”

提阿非羅，我 寫 前頭 箇本 書，講 耶穌 起頭 一切 所 做 所 教訓，

2 直 到 佢 靠 聖靈 吩咐 揀選个 使徒 之後 昇上 天 箇 日。

3 佢 受 難 以後 用 許多 確實个 凭據 顯出 佢 是 活轉來，四十 日 裏面 現出 畀 使徒，搭 佢許 講 上帝 國 事幹：

4 搭 使徒 聚集 時候，囑咐 佢許，“不 要 離開 耶路撒冷，等到 父親 所 應許，就是 爾許 前頭 聽着 我 講个：

5 因爲 約翰 是 用 水 行 洗禮；只是 爾許 無 幾日 後 會 受 聖靈个 洗禮。”

6 Ge-he jü-zih, ziu meng Ge kông, “Cü, yin-ze z-‛eo Ng iao wæn-we koh-kô peh Yi-seh-lih nying feh?”
7 Yia-su teh ge-he kông, “Nyih-ts teh z-‛eo z Vu-ts‛ing yüong Z-kyi gyün-ping cü-ding, feh-z peh ng-he hyiao-teh.
8 Tsih-z Sing-Ling ling-djôh ng-he, ng-he ziu we teh-djôh neng-kön: ping-ts‛ia ze Yia-lu-sæh-lang, t‛ong Yiu-t‛a, Sæh-mô-li-ô, dzih tao di-keh zing-deo, we peh Ngô tso te-tsing.”

6 佢許 聚集，就 問 佢 講，“主，現在 時候 爾 要 還回 國家 畀 以色列 人 不？”

7 耶穌 搭 佢許 講，“日子 搭 時候 是 父親 用 自己 權柄 註定，不是 畀 爾許 曉得。

8 只是 聖靈 臨着 爾許，爾許 就 會 得着 能幹：并且 在 耶路撒冷，統 猶太，撒馬利亞，直到 地个 盡頭，會 畀 我 做 對證。”

9 Keh shih-wa kông wön, ge-he wæ ze-teh mông, Yia-su ziu sing-zông; yiu yüing tsih-djôh Ge peh ge-he mông-feh-djôh.
10 Yia-su sing-zông z-‛eo, ge-he dziao t‛in ts‛ing-ting ze-teh mông, yiu liang-ke nying tsiah bah i-zông gyi ze ge-he pin;
11 kông, “Ng-he Kô-li-li nying, tsa-sang dziao t‛in gyi-teh mông? Keh-yü Yia-su bih-ke¹⁾ ng-he zông t‛in, tsiao ng-he mông-djôh Ge zông t‛in, tsiang-le ah we z-t‛ih le.”

9 箇 說話 講 完，佢許 還 在𡍲 望，耶穌 就 昇上；有 雲 接着 佢 畀 佢許 望不着。

10 耶穌 昇上 時候，佢許 朝 天 青盯 在𡍲 望，有 兩個 人 撯 白 衣裳 徛 在 佢許 邊；

11 講，“爾許 加利利 人，怎生 朝 天 徛𡍲 望？箇位 耶穌 別去 爾許 上 天，照 爾許 望着 佢 上天，將來 也 會 是僣 來。”

12 Meng-du ziu jong Kæn-læn sæn cün tao Yia-lu-sæh-lang, keh sæn teh Yia-lu-sæh-lang lin-gying, tsang ön-sih-nyih su tseo-keh lu-dzing.
13 Kyi-zin tao-gao, ziu tseo-zông ge-he su djü-keh leo zông; yiu Pi-teh, Ngô-kôh, Iah-‛ön, Ön-teh-lih; wæ-yiu Fi-lih teh To-mô, Pô-to-lo-ma teh Mô-t‛a, Ô-leh-fi-keh n-ts Ngô-kôh, teh Si-meng ts‛ing-hwu Ze-lo-ti; wæ-yiu Ngô-kôh-keh hyüong-di Yiu-da.
14 Ge-he teh kyi-ke nyü-nying, wæ-yiu Yia-su-keh nyiang Mô-li-ô teh Yia-su hyüong-di, dong-sing-‛eh-i feh hyih tao-kao.

12 門徒 就 從 橄欖 山 轉 到 耶路撒冷，箇 山 搭 耶路撒冷 連近，爭 安息日 所 走个 路程。

13 既然 到爻，就 走上 佢許 所 住个 樓 上；有 彼得，雅各，約翰，安得烈；還有 非立 搭 多馬，巴多羅買 搭 馬太，亞勒非个 兒子 雅各，搭 西門 稱呼 銳羅底; 還有 雅各个 兄弟 猶大。

14 佢許 搭 幾個 女人，還有 耶穌个 孃 馬利亞 搭 耶穌 兄弟，同心合意 不 歇 禱告。

15 KEH z-‛eo jü-zih-keh meng-du mao ih-pah nyin nying: Pi-teh gyi ze tông-cong, kông,
16 “Cong-yü hyüong-di, Sing-Ling t‛ôh Da-bih k‛eo-li yü-sin kông, (ta-ling k‛ô Yia-su cü-ts-keh Yiu-da,) keh shü ing-ke ing-nyin,
17 Ge sön ngô-he ts-nen, jü-de tsih-tsông keh tsih-veng.
18 (Ge yüong fi-nyi-ts-ze ma din; ge tih-lôh di, du lih-k‛e, du-dziang tu liu-c‛ih.
19 T‛ong djü ze Yia-lu-sæh-lang-keh nying tu hyiao-teh; su-i peh keh-ky‛iu din t‛u-ming kông Ô-kah-da-mô, ziu-z Hyüih-din i-s.)
20 S-p‛in yiu sia-lôh, ‘Ge-keh oh ing-ke pin k‛ong-di, m nying djü:’ [S. 69. 25.] wæ-yiu kông ‘Ge-keh tsih-veng, bih-nying hao tsih-ziu.’ [S. 109. 8.]
21 Su-i Cü Yia-su ze ngô-he cong-yiang le-k‛e z-‛eo,
22 jong Iah-‛ön ‛ang si-li ky‛i, dzih tao Ge bih-k‛e ngô-he sing-zông t‛in keh nyih, keh-sih teh ngôh-he dziang jü-de-keh nying, tsong iao ih-ke teh ngô-he jü-de tso Ge tse-weh-keh te-tsing.”

15 箇 時候 聚集个 門徒 毛 一百 廿 人：彼得 徛 在 當中，講，

16 “眾位 兄弟，聖靈 托 大闢 口裏 預先 講，（帶領 揢 耶穌 主子个 猶大，）箇 書 應該 應驗，

17 佢 算 我許 之內，聚隊 執掌 箇 職份。

18 （佢用非義之財 買 田；佢 跌落 地，肚 裂開，肚腸 都 流出。

19 統 住在 耶路撒冷个 人 都 曉得；所以 畀 箇丘 田 土名 講 亞革大馬，就是 血田 意思。）

20 詩篇 有 寫落，‘佢个 屋 應該 變 空地，無 人 住：’[S. 69. 25.] 還有 講 ‘佢个 職份，別人 好 接受。’ [S. 109. 8.]

21 所以 主 耶穌 在 我許 中央 來去 時候，

22 從 約翰 行 洗禮 起，直 到 佢 別去 我許 昇上 天 箇 日，箇些 搭 我許 長 聚隊个 人，總 要 一個 搭 我許 聚隊 做 佢 再活个 對證。”

23 Ge-he ziu kyü-zông liang-ke nying, ih-ke z Iah-seh ts‛ing-hwu Pô-sæh-pô, yi ts‛ing-hwu Yiu-z-tu, ih-ke z Mô-di-ô.
24 Ge-he ziu tao-kao, kông, “Cü, væn-pah nying-keh sing ng tu hyiao-teh, keh liang-ke nying, Ng nô-ih-ke kæn-shün, gyiu Ng sih-lih ge,
25 hao tsih-ziu keh bæn-z teh s-du-keh tsih-veng, ing-yü Yiu-da væn-ze sih-gao keh tsih-veng, tao z-keh di-fông k‛e.”
26 Ge-he ziu côh-kyiu; côh-djôh Mô-di-ô; ziu teh zih-ih-ke s-du sön-tsing ze-nen.

23 佢許 就 舉上 兩個 人，一個 是 約瑟 稱呼 巴撒巴，貤 稱呼 猶士都，一個 是 馬提亞。

24 佢許 就 禱告，講，“主，凡百 人个 心 爾 都 曉得，箇 兩個 人，爾 哪一個 揀選，求 爾 設立 佢，

25 好 接受 箇 辦事 搭 使徒个 職份，因爲 猶大 犯罪 失爻 箇 職份，到 自个 地方 去。”

26 佢許 就 捉鬮；捉着 馬提亞；就 搭 十一個 使徒 算進 在內。

第二章.

1 S-du bi Sing-Ling c‛ong-mön kông bih-c‛ü t‛u-wa, yiu-sih c‛ü-siao ge yiu-sih ts‛ing-tsæn ge.
14 Pi-teh teh ge bin-ming, kông s-du z k‛ao Sing-Ling-keh neng-kön kông bih-c‛ü t‛u-wa, yi kông Yia-su z weh-cün-le sing t’in, s-lôh Sing-Ling, z Mi-se-ô z Zông-ti su sih-lih, yüong zing-tsih teh gyi-z tso bing-kyü, yi tsiao Zông-ti ding-kyü-keh ts-i ting ze zih-z-kô:
37 ‛ang si-li peh hyü-to siang-sing-keh nying.
41 Ge-he yüong zing-e-keh sing jü-de siang-t‛ong: s-du tso hyü-to zing-tsih, Zông-ti me-nyih kô-ts‛eo Ge-keh kao-we.

1 使徒 被 聖靈 充滿 講 別處 土話，有些 取笑 佢 有些 稱讚 佢。
14 彼得 搭 佢 辯明，講 使徒 是 靠 聖靈个 能幹 講 別處 土話，貤 講 耶穌 是 活轉來 昇天，賜落 聖靈，是 彌賽亞 上帝 所 設立，用 神蹟 搭 奇事 做 凭據，貤 照 上帝 定規个 旨意 釘 在 十字架：
37 行 洗禮 畀 許多 相信个 人。
41 佢許 用 仁愛个 心 聚隊 相通：使徒 做 許多 神蹟，上帝 每日 加湊 佢个 教會。

NG-SHING-TSIH yi-kying tao, meng-du tu dong-sing-‛eh-i jü-de ze-teh.
2 Hweh-zin yiu jong t‛in le-keh sing-hyiang, ziang do fong c‛ü-ku, c‛ong-mön ge-he su zo-keh oh.
3 Ge-he ziu mông-djôh k‛eo-zih ziang ho-kwông, ts‛ô-kô-ts‛ô feng-k‛e, ding ze kôh-nying-keh deo-zông.
4 Ge-he tu bi Sing-Ling c‛ong-mön, kông bih-c‛ü t‛u-wa, tsiao Sing-Ling su s-peh ge-he k‛eo-ze.

五旬節 已經 到，門徒 都 同心合意 聚隊 在𡍲。

2 忽然 有 從 天 來个 聲響，像 大 風 吹過，充滿 佢許 所 坐个 屋。

3 佢許 就 望着 口舌 像 火光，叉加叉 分開，停 在 各人个 頭上。

4 佢許 都 被 聖靈 充滿，講 別處 土話，照 聖靈 所 賜畀 佢許 口才。

5 Keh z-‛eo yiu gyin-sing Yiu-t‛a nying tæn-kôh ze Yia-lu-sæh-lang, jong t‛in-‛ô kôh-koh le.
6 Yü keh sing-hyiang cong-nying ziu wu-le; ing-yü t‛ing-djôh meng-du tsiao ge-he kôh-c‛ü t‛u-wa ze-teh kông, ziu kying-nga.
7 Tu kying-hôh hyi-gyi, jü-de kông, “Keh-sih ze-teh kông-keh ky‛i feh-z tu z Kô-li-li nying?
8 yin-ze ngô-he kôh-nying t‛ing z-keh peng-di shih-wa, z tsa-sang?
9 Ziu-z P‛ô-di-ô, Mi-t‛a, Yi-læn-keh nying, djü ze Mi-su-po-da-mi, Yiu-t‛a, Kô-p‛ô-to-kô, Peng-tu, Ô-si-ô,
10 Feh-lü-kô, Bông-fi-li-ô, Yi-gyih, Ku-li-na lin-gying-keh Lü-pi-ô di-ka, wæ-yiu jong Lo-mô le-keh, yiu-sih z Yiu-t‛a nying, yiu-sih z zih Yiu-t‛a kao-keh,
11 Kah-li-ti teh Ô-læh-pah nying, tu t‛ing ge-he tsiao ngô-he-keh kôh-c‛ü t‛u-wa kông Zông-ti-keh da neng.”
12 Cong-nying tu hyi-gyi, nyi-‛oh-peh-kyüih, jü-de kông, “Keh z zah-m i-s?”
13 Yiu-sih c‛ü-siao kông, “Ge-he z sing-tsiu ky‛üoh-cü.”

5 箇 時候 有 虔心 猶太 人 耽擱 在 耶路撒冷，從 天下 各國 來。

6 爲 箇 聲響 眾人 就 護來；因爲 聽着 門徒 照 佢許 各處 土話 在𡍲 講，就 驚訝。

7 都 驚𢞕 希奇，聚隊 講，“箇些 在𡍲 講个 豈 不是 都 是 加利利 人？

8 現在 我許 各人 聽 自个 本地 說話，是 怎生？

9 就是 帕提亞，米太，以攔个 人，住在 米所波大米，猶太，加帕多家，本都，亞細亞，

10 弗呂家，旁非利亞，以及，古利奈 連近个 呂彼亞 地界，還有 從 羅馬 來个，有些 是 猶太 人，有些 是 入 猶太 教个，

11 革哩底 搭 亞拉伯 人，都 聽 佢許 照 我許个 各處 土話 講 上帝个 大能。”

12 眾人 都 希奇，疑惑不決，聚隊 講，“箇 是 倽某 意思？”

13 有些 取笑 講，“佢許 是 新酒 喫醉。”

14 Pi-teh teh zih-ih-ke s-du gyi-ky‛i, ao-hyiang teh ge-he kông, “Yiu-t‛a nying, teh væn-pah tæn-kôh ze Yia-lu-sæh-lang-keh nying, keh z-kön ng-he iao hyiao-teh, iao ts-si t‛ing ngô shih-wa.
15 Ng-he ts‛e keh-sih nying z tsiu ky‛üoh-cü; feh-z tsiu-cü; ing-yü z-‛eo tsih-yiu z ts‛u.
16 Keh ziu-z sin-ts Iah-z su kông;
17 ‘Zông-ti z-t‛ih kông, Lôh-kyiah nyih-ts, Ngô we s-lôh Ngô-keh Ling peh væn-ming: ng-he-keh n-nô, ziu we kông sin-ts shih-wa, ng-he-keh ‛eo-sang we mông-djôh gyi-z, ng-he-keh lao-nying-kô we tso mong:
18 Ngô we s-lôh Ngô-keh Ling peh Ngô-keh nu-boh, Ngô-keh ô-deo, keh z-‛eo ge-he ziu we kông sin-ts shih-wa.
19 Ngô yi we hyin-c‛ih dziao-deo ze t‛in, gyi-z ze di; hyüih, teh ho, teh in.
20 Cü-keh yü-nyin kwông-ming-keh nyih-ts vong le ts-zin, nyih-deo we pin heh-ön, nyüih-liang we pin hyüih-‛ong.
21 Væn-pah gyiu Cü ming-deo cü-ts we teh-djôh kyiu.’ [Iz. 2. 28-32.]

14 彼得 搭 十一個 使徒 徛起，噢響 搭 佢許 講，“猶太人，搭 凡百 耽擱 在 耶路撒冷个 人，箇 事幹 爾許 要 曉得，要 仔細 聽 我 說話。

15 爾許 㥒 箇些 人 是 酒 喫醉；不是 酒醉；因爲 時候 只有 巳 初。

16 箇 就是 先知 約珥 所 講；

17 ‘上帝 是僣 講，落腳 日子，我 會 賜落 我个 靈 畀 萬民：爾許个 兒囡，就 會 講 先知 說話，爾許个 後生 會 望着 奇事，爾許个 老人家 會 做 夢：

18 我 會 賜落 我个 靈 畀 我个 奴僕，我个 丫頭，箇 時候 佢許 就 會 講 先知 說話。

19 我 貤 會 顯出 兆頭 在 天，奇事 在 地；血，搭 火，搭 煙。

20 主个 預言 光明个 日子 朆 來 之前，日頭 會 變 黑暗，月亮 會 變 血紅。

21 凡百 求 主 名頭 主子 會 得着 救。’ [Iz. 2. 28-32.]

22 “Yi-seh-lih nying, yüong t‛ing keh shih-wa: Nô-sæh-læh-keh Yia-su, Zông-ti ze ng-he min-zin ming-ming su sih-lih, yüong zing-tsih, dziao-deo teh gyi-z tso bing-kyü, ziu-z Zông-ti ze ng-he cong-yiang t‛ôh Ge su tso, ng-he z-kyi ah hyiao-teh;
23 Geo tsiao Zông-ti su ding-kyü su yü-sin hyiao-teh-keh ts-i, kao-fu ng-he, ng-he yüong vu-fæh cü-ts-keh siu ting-s;
24 Zông-ti ka-gao Ge s-keh k‛u-ts‛u, peh Ge weh-cün-le; ing-yü s feh neng dziang vôh-lao Ge.
25 Da-bih ts-tin Ge, kông, ‘Ngô mông-djôh Cü dziang ze Ngô min-zin; Ge ze Ngô jing-siu-pin, peh Ngô fe yiao-dong:
26 su-i Ngô sing hwön-hyi, Ngô k‛eo-zih tsæn-mi; ping-ts‛ia Ngô nyüoh-sing ze veng-mo wæ-yiu sô-mông:
27 ing-yü Ng fe peh Ngô-keh ling-weng lôh ze ing-s, ah fe peh Ng sing-zin Cü-ts læn-wu.
28 Weh-ming-keh lu Ng yi-kying ts-tin Ngô; ah we peh Ngô ze Ng-keh min-zin yiu mön-coh-keh kao-hying.’ [S. 16. 8-11.]

22 “以色列 人，用 聽 箇 說話：拿撒拉个 耶穌，上帝 在 爾許 面前 明明 所 設立，用 神蹟，兆頭 搭 奇事 做 凭據，就是 上帝 在 爾許 中央 托 佢 所 做，爾許 自己 也 曉得；

23 佢 照 上帝 所 定規 所 預先 曉得个 旨意，交付 爾許，爾許 用 無法 主子个 手 釘死；

24 上帝 解爻 佢 死个 苦楚，畀 佢 活轉來；因爲 死 不 能 長 縛牢 佢。

25 大闢 指點 佢，講，‘我 望着 主 長 在 我 面前；佢 在 我 順手邊，畀 我 𣍐 搖動：

26 所以 我 心 歡喜，我 口舌 讚美；并且 我 肉身 在 墳墓 還有 奢望：

27 因爲 爾 𣍐 畀 我个 靈魂 落 在 陰司，也 𣍐 畀 爾 聖善 主子 爛腐。

28 活命个 路 爾 已經 指點 我；也 會 畀 我 在 爾个 面前 有 滿足个 高興。’ [S. 16. 8-11.]

29 “Cong-yü hyüong-di, nyiang ngô teh ng-he fông-tæn kông tsu-tsong Da-bih z-kön, ge s-‛eo tsông-hao, ge-keh veng-mo tao jü-kying wæ ze ngô-he-keh di-fông.
30 Ge kyi-zin tso sin-ts-nying, yi hyiao-teh Zông-ti teh ge væh-tsiu-ku, kông ‛eo-le jong ge-keh ‛eo-de iao kyü-zông Kyi-toh hao zo ge zo-yü;
31 ge yü-sin hyiao-teh, ziu kông-tao Kyi-toh tse-weh z-kön, kông Ge-keh ling-weng feh lôh ze ing-s-li, Ge-keh nyüoh-sing ah fe læn-wu.
32 Keh-yü Yia-su, Zông-ti yi-kying peh Ge weh-cün-le, ngô-he tu z Ge-keh te-tsing.
33 Su-i Yia-su yi-kying kyü-zông ze Zông-ti-keh jing-siu-pin, ping-ts‛ia jong Vu-ts‛ing siu-li tsih-ziu su ing-hyü-keh Sing-Ling, ziu peh ng-he su mông-djôh su t‛ing-djôh-keh s-lôh-le.
34 Da-bih vong zông t‛in; dæn-z ge kông, ‘Cü teh ngô-keh Cü kông, Hao zo ze Ngô jing-siu-pin,
35 teng-tao Ngô peh Ng dziu-dih tso Ng-keh dæh-kyiah-teng.’ [S. 110. 1.]
36 Su-i, t‛ong Yi-seh-lih nying hao k‛ôh-zih hyiao-teh, ng-he su ting-s ze zih-z-kô-zông keh-yü Yia-su, Zông-ti z sih-lih Ge tso Cü tso Kyi-toh.”

29 “眾位 兄弟，讓 我 搭 爾許 放膽 講 祖宗 大闢 事幹，佢 死後 葬好，佢个 墳墓 到 如今 還 在 我許个 地方。

30 佢 既然 做 先知人，貤 曉得 上帝 搭 佢 罰咒過，講 後來 從 佢个 後代 要 舉上 基督 好 坐 佢 坐位；

31 佢 預先 曉得，就 講到 基督 再活 事幹，講 佢个 靈魂 不 落 在 陰司裏，佢个 肉身 也 不 爛腐。

32 箇位 耶穌，上帝 已經 畀 佢 活轉來，我許 都 是 佢个 對證。

33 所以 耶穌 已經 舉上 在 上帝个 順手邊，并且 從 父親 手裏 接受 所 應許个 聖靈，就 畀 爾許 所 望着 所 聽着个 賜落來。

34 大闢 朆 上 天；但是 佢 講，‘主 搭 我个 主 講，好 坐 在 我 順手邊，并且

35 等到 我 畀 爾 讎敵 做 爾个 蹋腳凳。’ [S. 110. 1.]

36 所以，統 以色列 人 好 確實 曉得，爾許 所 釘死 在 十字架上 箇位 耶穌，上帝 是 設立 佢 做 主 做 基督。”

37 Ge-he ih t‛ing-djôh, c‛ôh-sing næn-ku, ziu meng Pi-teh teh gyi-yü s-du, kông, “Cong-yü hyüong-di, ngô-he ing-ke tsa tso-fæh?”
38 Pi-teh teh ge-he kông, “Ng-he kôh-nying yüong hwe-ke, vong Yia-su Kyi-toh-keh ming-deo ziu sô-ze-keh si-li; ziu we s Sing-Ling peh ng-he.
39 Ing-yü keh ing-hyü z ing-hyü ng-he, lin ng-he-keh n-nô, teh væn-pah yün-c‛ü-keh nying, ziu-z Cü ngô-he-keh Zông-ti su dziao-le-keh.”
40 Pi-teh yi yüong hyü-to shih-wa tso te-tsing ky‛ün ge-he, kông, “Ng-he z-kyi yüong teh-djôh kyiu, t‛eh-c‛ih keh zia-ôh-keh si-de.”

37 佢許 一 聽着，戳心 難過，就 問 彼得 搭 其餘 使徒，講，“眾位 兄弟，我許 應該 怎 做法？”

38 彼得 搭 佢許 講，“爾許 各人 用 悔改，奉 耶穌 基督个 名頭 受 赦罪个 洗禮；就 會 賜 聖靈 畀 爾許。

39 因爲 箇 應許 是 應許 爾許，連 爾許个 兒囡，搭 凡百 遠處个 人，就是 主 我許个 上帝 所 召來个。”

40 彼得 貤 用 許多 說話 做 對證 勸 佢許，講，“爾許 自己 用 得着 救，脫出 箇 邪惡个 世代。”

41 Hwön-hyi t‛ing ge shih-wa cü-ts tu ziu si-li: keh nyih kô-ts‛eo-keh su-moh mao sæn-ts‛in nying.

41 歡喜 聽 佢 說話 主子 都 受 洗禮：箇 日 加湊个 數目 毛 三千 人。

42 Ge-he kyin-ku pao-siu s-du-keh kao-hyüing, dziang jü-ze siang-t‛ong, p‛ah ping tao-kao.
43 Cong-nying tu p‛ô-gyü; s-du tso hyü-to zing-tsih teh gyi-z.
44 Siang-sing cü-ts tu jü-de, yiang-yiang meh-z tu siang-t‛ong;
45 ma-gao sæn-nyih teh ho-veh, tsiao kôh-nying-keh yüong-dziang feng peh ge-he.
46 Me-nyih dong-sing-‛eh-i ze sing-din, yi ze u-li p‛ah ping, kao-hying tsing-sing ky‛üoh,
47 tsæn-mi Zông-ti, cong pah-sing hwön-hyi ge-he, Cü peh teh-kyiu-keh nying nyih-nyih kô-ts‛eo ze kao-we.

42 佢許 堅固 保守 使徒个 教訓，長 住在 相通，𤖼 餅 禱告。

43 眾人 都 怕懼；使徒 做 許多 神蹟 搭 奇事。

44 相信 主子 都 聚隊，樣樣 物事 都 相通；

45 賣爻 產業 搭 貨物，照 各人个 用場 分 畀 佢許。

46 每日 同心合意 在 聖殿，貤 在 塢裏 𤖼 餅，高興 真心 喫，

47 讚美 上帝，眾 百姓 歡喜 佢許，主 畀 得救个 人 日日 加湊 在 教會。

第三章.

1 Yü ih-ke pa-kyiah i jün-yü, hyü-to nying le mông ge, su-i Pi-teh djün dao-li peh ge,
12 Pi-teh kông, pa-kyiah feh-z k‛ao ge teh Iah-‛ön-keh neng-kön jün-yü, z k‛ao-djôh Yia-su ming-deo:
13 tsah-væh ge yü ge ting Yia-su ze zih-z-kô.
17 Ge-he yü feh ming-bah ting Ge s, ziu ing-nyin Zông-ti su ding-kyü-keh ts-i teh sing-shü:
19 ky‛ün ge-he hwe-ke siang-sing teh-kyiu.

1 爲 一個 跛腳 醫 全備，許多 人 來 望 佢，所以 彼得 傳 道理 畀 佢，
12 彼得 講，跛腳 不是 靠 佢 搭 約翰个 能幹 痊癒，是 靠着 耶穌 名頭：
13 責罰 佢 爲 佢 釘 耶穌 在 十字架。
17 佢許 爲 不 明白 釘 佢 死，就 應驗 上帝 所 定規个 旨意 搭 聖書：
19 勸 佢許 悔改 相信 得救。

SING z ts‛u, tao-kao z-‛eo, Pi-teh teh Iah-‛ön jü-de zông sing-din,
2 Yiu ih-ke nying sang c‛ih ziu pa-kyiah, nyih-nyih bi nying kông-le, fông ze sing-din meng-k‛eo, (keh meng ao Mi-meng,) iao gyiu tseo-tsing sing-din-keh nying sô-s.
3 Ge mông-djôh Pi-teh teh Iah-‛ön iao tseo-tsing sing-din, ziu gyiu ge-he sô-s.
4 Pi-teh teh Iah-‛ön ts‛ing-ting mông ge, kông, “Ng mông ngô-he.”
5 Keh nying ziu mông ge-he, siang yiu zah-m hao teh-djôh.

申 時 初，禱告 時候，彼得 搭 約翰 聚隊 上 聖殿，

2 有 一個 人 生 出 就 跛腳，日日 被 人 扛來，放 在 聖殿 門口，（箇 門 噢 美門，）要 求 走進 聖殿个 人 捨賜。

3 佢 望着 彼得 搭 約翰 要 走進 聖殿，就 求 佢許 捨賜。

4 彼得 搭 約翰 青盯 望 佢，講，“爾 望 我許。”

5 箇 人 就 望 佢許，想 有 倽某 好 得着。

6 Pi-teh kông, “Kying-ts, nying-ts, ngô m-yiu; tsih-z ngô su yiu ziu peh ng: k‛ao-djôh Nô-sæh-leh Nying Yia-su Kyi-toh-keh ming-deo ng hao nang-ky‛i tseo.”
7 Ziu ky‛in ge jing-tsih siu, bæh ge nang-ky‛i; ge-keh kyiah teh kyiah-tsang lih-k‛eh ngang-tsang.
8 Ge t‛iao-ky‛i gyi-gyi, tseo-tseo; teh ge-he jü-de tseo-tsing sing-din, tseo-tseo, t‛iao-t‛iao, tsæn-mi Zông-ti.

6 彼得 講，“金子，銀子，我 無有；只是 我 所 有 就 畀 爾：靠着 拿撒勒 人 耶穌 基督个 名頭 爾 好 玍起 走。”

7 就 牽 佢 順隻 手，拔 佢 玍起；佢个 腳 搭 腳㬹 立刻 硬掙。

8 佢 挑起 徛徛，走走；搭 佢許 聚隊 走進 聖殿，走走，跳跳，讚美 上帝。

9 Cong pah-sing mông-djôh ge ze-teh tseo ze-teh tsæn-mi Zông-ti:
10 yi hyiao-teh ge z su-zông zo ze sing-din Mi-meng-k‛eo t‛ao-væn cü-ts; ziu ting kying-hyin, hyi-gyi ge su p‛ong-djôh z-kön.
11 Keh i-hao-keh pa-kyiah bæh-lao Pi-teh teh Iah-‛ön, cong pah-sing ting hyi-gyi, diao-le tao Su-lo-meng-keh lông-oh mông ge-he.

9 眾 百姓 望着 佢 在𡍲 走 在𡍲 讚美 上帝：

10 貤 曉得 佢 是 素常 坐 在 聖殿 美門口 討伐 主子；就 頂 驚險，希奇 佢 所 碰着 事幹。

11 箇 醫好个 跛腳 拔牢 彼得 搭 約翰，眾 百姓 頂 希奇，趒來 到 所羅門个 廊屋 望 佢許。

12 Pi-teh mông-djôh, ziu teh pah-sing kông, “Ng-he Yi-seh-lih nying, tsa-sang hyi-gyi keh z-kön? tsa-sang ts‛ing-ting mông ngô-he, ziang ngô-he yüong z-keh neng-kön z-keh gyin-sing, peh keh nying we tseo?
13 Z Ô-pah-læh-hön, Yi-sæh, Ngô-kôh-keh Zông-ti, ngô-he tsu-tsong-keh Zông-ti, Ge yüong-wa Z-keh Nu-boh Yia-su, ziu-z ng-he su ka-zông, Pi-læh-to ding-kyü iao fông Ge z-‛eo ng-he tông-min su in-ky‛i.
14 Ng-he in-ky‛i keh-yü sing-zin tsing-dzih Cü-ts, fæn-cün gyiu sih-fông ih-ke hyüong-siu peh ng-he;
15 sæh-gao weh-ming-keh keng-nyün; Zông-ti peh Ge jong s-nying cong-yiang weh-cün-le: yin-ze ngô-he z Ge-keh kyin-tsing.
16 Z Ge-keh ming-deo ing-yü ngô-he siang-sing Ge ming-deo, peh ng-he su mông-djôh su hyiao-teh-keh nying gyin-ky‛i-le: ziu-z jong Ge le-keh siang-sing-keh sing peh keh nying ze ng-he cong-nying min-zin jün-yü.

12 彼得 望着，就 搭 百姓 講，“爾許 以色列 人，怎生 希奇 箇 事幹？怎生 青盯 望 我許，像 我許 用 自个 能幹 虔心，畀 箇 人 會 走？

13 亞伯拉罕，以撒，雅各个 上帝，我許 祖宗个 上帝，佢 榮華 自个 奴僕 耶穌，就是 爾許 所 解上，彼拉多 定規 要 放 佢 時候 爾許 當面 所 厭棄。

14 爾許 厭棄 箇位 聖善 正直 主子，反轉 求 釋放 一個 兇手 畀 爾許；

15 殺爻 活命个 根源；上帝 畀 佢 從 死人 中央 活轉來：現在 我許 是 佢个 見證。

16 是 佢个 名頭 因爲 我許 相信 佢 名頭，畀 爾許 所 望着 所 曉得个 人 健起來：就是 從 佢 來个 相信个 心 畀 箇 人 在 爾許 眾人 面前 痊癒。

17 “Yin-ze, hyüong-di, ngô hyiao-teh ng-he tso keh z-kön z yü feh ming-bah, ng-he-keh kwön-fu ah z-t‛ih:
18 tsih-z Zông-ti t‛ôh Ge cong sin-ts-nying k‛eo-li yü-sin kông, Kyi-toh iao ziu næn, Ge ko-zin ing-nyin.
19 Su-i ng-he yüong hwe-ke ky‛i-zia kyü-tsing, hao peh ng-he-keh ze du-gao, jong Cü su le ön-yü-keh nyih-ts hao tao;
20 ping-ts‛ia hao ts‛a yü-sin su djün peh ng-he-keh Yia-su Kyi-toh le.
21 Ge pih iao ze t‛in-zông, teng-tao wæn-we væn-veh z-‛eo, ziu-z Zông-ti jong zao t‛in-di yi-le t‛ôh Ge cong sing-zin sin-ts-nying k‛eo-li su kông.

17 “現在，兄弟，我 曉得 爾許 做 箇 事幹 是 爲 不 明白，爾許个 官府 也 是僣：

18 只是 上帝 托 佢 眾 先知人 口裏 預先 講，基督 要 受 難，佢 果然 應驗。

19 所以 爾許 用 悔改 起謝 舉證，好 畀 爾許个 罪 塗爻，從 主 所 來 安慰个 日子 好 到；

20 并且 好 差 預先 所 傳 畀 爾許个 耶穌 基督 來。

21 佢 必 要 在 天上，等到 還回 萬物 時候，就是 上帝 從 造 天地 以來 托 佢 眾 聖善 先知人 口裏 所 講。

22 Mo-si teh ngô-he tsu-tsong kông, ‘Cü ng-he-keh Zông-ti ‛eo-le jong ng-he hyüong-di cong-yiang we kyü-zông ziang ngô ih-ke Sin-ts-nying peh ng-he; Ge yiang-yiang teh ng-he su kông, tu iao t‛ing Ge.
23 Væn-pah feh k‛eng t‛ing keh Sin-ts-nying cü-ts, pih iao jong pah-sing cong-yiang djü-mih ge.’ [Sm. 18. 15, 19.]
24 Wæ-yiu jong Sæh-meo-z ih-dzih lôh-le, væn-pah su kông-keh sin-ts-nying tu yü-sin ts-tin keh nyih-tsy.
25 “Ng-he z sin-ts-nying-keh ‛eo-de, tsih-ziu Zông-ti teh ngô-he tsu-tsong, su sih-lih-keh iah; ziu-z teh Ô-pah-læh-hön su kông, ‘T‛in-‛ô zoh-veng tu ze-ü ng-keh ‛eo-de we teh-djôh foh-ky‛i.’ [Ts. 22. 18.]
26 Yin-ze Zông-ti yi-kying kyü-zông Z-keh Nu-boh Yia-su, sin ts‛a Ge le s foh-ky‛i peh ng-he, ziu-z peh ng-he kôh-nying tön-gao z-keh ze-ôh.”

22 摩西 搭 我許 祖宗 講，‘主 爾許个 上帝 後來 從 爾許 兄弟 中央 會 舉上 像 我 一個 先知人 畀 爾許；佢 樣樣 搭 爾許 所 講，都 要 聽 佢。

23 凡百 不 肯 聽 箇 先知人 主子，必 要 從 百姓 中央 除滅 佢。’ [Sm. 18. 15, 19.]

24 還有 從 撒母耳 一直 落來，凡百 所 講个 先知人 都 預先 指點 箇 日子。

25 “爾許 是 先知人个 後代，接受 上帝 搭 我許 祖宗，所 設立个 約；就是 搭 亞伯拉罕 所 講，‘天下 族份 都 在於 爾个 後代 會 得着 福氣。’ [Ts. 22. 18.]

26 現在 上帝 已經 舉上 自个 奴僕 耶穌，先 差 佢 來 賜 福氣 畀 爾許，就是 畀 爾許 各人 斷爻 自个 罪惡。”

第四章.

1 Yiu-t‛a nying-keh kwön-fu ky‛i-‛eng Pi-teh teh Iah-‛ön kwæn ze pæn-vông.
5 Sing-p‛ön z-‛eo, Pi-teh fông-tæn kông, pa-kyiah z k‛ao Yia-su ming-deo i jün-yü, yi kông, Yia-su ts-nga m-yiu Kyiu-Cü,
13 ge kying-ka Pi-teh teh Iah-‛ön, feh iao yüong Yia-su ming-deo djün dao-li,
23 yü-ts kao-we tao-kao.
31 Zông-ti peh ge-he su jü-zih-keh di-fông yiao-dong tso bing-kyü, Ge t‛ing ge-keh tao-kao: s Sing-Ling peh ge, peh ge jü-de siang-e, jü-de siang-pông, hao kyin-ku kao-we.

1 猶太 人个 官府 氣恨 彼得 搭 約翰 關 在 班房。
5 審判 時候，彼得 放膽 講，跛腳 是 靠 耶穌 名頭 醫 痊癒，貤 講，耶穌 之外 無有 救主，
13 佢 警戒 彼得 搭 約翰，不 要 用 耶穌 名頭 傳 道理，
23 爲之 教會 禱告。
31 上帝 畀 佢許 所 聚集个 地方 搖動 做 凭據，佢 聽 佢个 禱告：賜 聖靈 畀 佢，畀 佢 聚隊 相愛，聚隊 相幫，好 堅固 教會。

Ge-he teh pah-sing kông z-‛eo, tsi-s, teh kwön sing-din cü-ts, teh Sæh-t‛u-ke nying tseo-le;
2 yü keh liang-ke s-du kao-hyüing pah-sing, k‛ao-djôh Yia-su s-ku-tse-weh, sing-li ting næn-ku.
3 Ziu dong-siu k‛ô ge-he, kwæn ze pæn-vông teng-tao t‛in-nyiang; ing-yü z-‛eo yi-kying æn-gao.

佢許 搭 百姓 講 時候，祭司 搭 管 聖殿 主子，搭 撒土該 人 走來；

2 爲 箇 兩個 使徒 教訓 百姓，靠着 耶穌 死過再活，心裏 頂 難過。

3 就 動手 揢 佢許，關 在 班房 等到 天亮；因爲 時候 已經 晏爻。

4 Dæn-z t‛ing dao-li cü-ts yiu hyü-to siang-sing; su-moh mao ng-ts‛in.

4 但是 聽 道理 主子 有 許多 相信；數目 毛 五千。

5 DI-NYI nyih ge-he kwön-fu, tsiang-lao, doh-shü-nying,
6 wæ-yiu da tsi-s Ô-nô, teh Ke-ô-fæh, Iah-‛ön, Ô-lih-sæn-da, teh da tsi-s-keh zoh-cong, tu jü-zih ze Yia-lu-sæh-lang:
7 peh keh liang-ke s-du gyi ze tông-cong, bön-meng ge-he, kông, “Ng-he k‛ao zah-m gyün-ping, zah-m ming-deo, tso keh z-kön?”

5 第二日 佢許 官府，長老，讀書人，

6 還有 大 祭司 亞那，搭 該亞法，約翰，亞歷山大，搭 大祭司个 族眾，都 聚集 在 耶路撒冷：

7 畀 箇 兩個 使徒 徛 在 當中，盤問 佢許，講，“爾許 靠 倽某 權柄，倽某 名頭，做 箇 事幹？”

8 Pi-teh bi Sing-Ling c‛ong-mön, teh ge-he kông, “Ng-he pah-sing-keh kwön teh Yi-seh-lih tsiang-lao,
9 kying-nying ziah yü ngô-he hyiang bing-nying su tso-keh hao-z bön-meng ngô-he tsa-sang peh ge jün-yü;
10 ng-he cong-nying teh Yi-seh-lih pah-sing tu ing-ke hyiao-teh, z k‛ao-djôh Nô-sæh-leh Nying Yia-su Kyi-toh-keh ming-deo, ng-he su ting ze zih-z-kô-zông, Zông-ti peh Ge weh-cün-le, z k‛ao-djôh Ge keh nying neng-keo jün-yü gyi ze ng-he min-zin.
11 Ge ziu-z ng-he ky‛i-oh lao-s su tön-gao-keh zih-deo, yi-kying tso oh kôh-deo deo ih-kw‛e zih-deo.
12 Kyiu-sing feh ze-ü bih-nying: ing-yü t‛ong-t‛in-‛ô nying-keh cong-yiang m-yiu bih-ke ming-deo s-lôh-le, peh ngô-he hao k‛ao-djôh ge teh-djôh kyiu.”

8 彼得 被 聖靈 充滿，搭 佢許 講，“爾許 百姓个 官 搭 以色列 長老，讀書人，

9 今日‛ 若 爲 我許 向 病人 所 做个 好事 盤問 我許 怎生 畀 佢 痊癒；

10 爾許 眾人 搭 以色列 百姓 都 應該 曉得，是 靠着 拿撒勒 人 耶穌 基督个 名頭，爾許 所 釘 在 十字架上，上帝 畀 佢 活轉來，是 靠着 佢 箇 人 能彀 痊癒 徛 在 爾許 面前。

11 佢 就是 爾許 起屋 老司 所 斷爻个 石頭，已經 做 屋 角頭 頭 一塊 石頭。

12 救星 不 在於 別人：因爲 統天下 人个 中央 無有 別個 名頭 賜落來，畀 我許 好 靠着 佢 得着 救。”

13 Ge-he mông-djôh Pi-teh teh Iah-‛ön fông-tæn kông, hyiao-teh ge z m ‛ôh-veng-keh ts‛u-nying, ziu hyi-gyi; yi nying-teh ge-he z keng Yia-su-keh.
14 Dæn-z mông-djôh i-hao-keh nying jü-de gyi-teh, ziu m-kao hao pôh ge.
15 Ziu feng-fu ge-he tseo-c‛ih da-dông, jü-de siang-liang, kông,
16 “Keh liang-ke nying ngô-he tsa bæn-fæh? Ge-he yiu ming-sing-keh gyi-z tso-ku, djü ze Yia-lu-sæh-lang-keh nying tu hyiao-teh; ngô-he ah feh neng kông m-yiu.
17 Dæn-z sang-teh keh z-kön kah-nga yiang-k‛e pah-sing cong-yiang, ngô-he hao djong-djong p‛eng ge, feh hyü ge yüong keh ming-deo tse kao-hyüing nying.”
18 Ziu ao ge-he le, kying-ka ge-he hyiao yüong Yia-su-keh ming-deo kông dao-li kao-hyüing.

13 佢許 望着 彼得 搭 約翰 放膽 講，曉得 佢 是 無 學問个 粗人，就 希奇；貤 認得 佢許 是 跟 耶穌个。

14 但是 望着 醫好个 人 聚隊 徛𡍲，就 無較 好 駁 佢。

15 就 吩咐 佢許 走出 大堂，聚隊 商量，講，

16 “箇 兩個 人 我許 怎 辦法？佢許 有 明性个 奇事 做過，住 在 耶路撒冷个 人 都 曉得；我許 也 不 能 講 無有。

17 但是 省得 箇 事幹 格外 揚去 百姓 中央，我許 好 重重 噴 佢，不 許 佢 用 箇 名頭 再 教訓 人。”

18 就 噢 佢許 來，警戒 佢許 𠏕 用 耶穌个 名頭 講 道理 教訓。

19 Pi-teh teh Iah-‛ön ziu we-teh ge-he, kông, “T‛ing ng-he ku-yü t‛ing Zông-ti, ng-he ts‛eng ze Zông-ti min-zin z feh-z?
20 Ing-yü ngô-he su mông-djôh su t‛ing-djôh, feh-teh-feh kông.”

19 彼得 搭 約翰 就 回答 佢許，講，“聽 爾許 過于 聽 上帝，爾許 忖 在 上帝 面前 是 不是？

20 因爲 我許 所 望着 所 聽着，不得不 講。”

21 Cong pah-sing yü keh tso-ku z-kön tu kyü yüong-wa peh Zông-ti, su-i kwön-fu wa-sön-feh-c‛ih tsa-sang hao væh ge; ziu tse p‛eng ge, fông ge.
22 Yüong gyi-z i-hao cü-ts, yiu s-zih to shü.

21 眾 百姓 爲 箇 做過 事幹 都 歸 榮華 畀 上帝，所以 官府 畫算不出 怎生 好 罰 佢；就 再 噴 佢，放 佢。

22 用 奇事 醫好 主子，有 四十 多 歲。

23 Keh liang-ke s-du fông-c‛ih ts-‛eo, ziu tseo-tao kao-yiu su-ze, peh tsi-s-tsiang teh tsiang-lao su kông shih-wa tu t‛ong-ts ge-he.
24 Ge-he t‛ing-djôh ziu dong-sing-‛eh-i do sing-ing hyiang Zông-ti kông, “Cü, Ng z Zông-ti, zao t‛in, di, he, teh ge li-min-keh væn-veh:
25 Ng t‛ôh Ng nu-boh Da-bih-keh k‛eo-li kông, ‘Bih-koh zao yün-ku tsang-nao? pah-sing zao yün-ku bah-lôh wa-sön?
26 Si-zông kyüing-wông tu nang-ky‛i, cü-‛eo moh-pah jü-zih, iao ti-dih Cü teh Ge-keh Kyi-toh.’ [S. 2. 1, 2.]
27 Ing-yü Hyi-leh teh Peng-tiu Pi-læh-to, bih-koh-nying teh Yi-seh-lih pah-sing, ko-zin jü-zih iao ti-dih Ng su fu-yiu sing-zin-keh Nu-boh Yia-su;
28 hao tso-zing Ng-keh siu Ng-keh ts-i yü-sin su ding-kyü z-kön.
29 Yin-ze gyiu Ng, Cü, mông p‛eng ngô-he cü-ts shih-wa; s-peh Ng-keh nu-boh fông-tæn djün Ng-keh dao-li;
30 long-c‛ih Ng-keh siu i bing, t‛ôh Ng sing-zin-keh Nu-boh Yia-su-keh ming-deo tso-c‛ih zing-tsih teh gyi-z.”

23 箇 兩個 使徒 放出 之後，就 走到 教友 所在，畀 祭司長 搭 長老 所 講 說話 都 通知 佢許。

24 佢許 聽着 就 同心合意 大 聲音 向 上帝 講，“主，爾 是 上帝，造 天，地，海，搭 佢 裏面个 萬物：

25 爾 托 爾 奴僕 大闢个 口裏 講，‘別國 倽 緣故 爭鬧？百姓 倽 緣故 白落 畫算？

26 世上 君王 都 玍起，諸侯 牧伯 聚集，要 抵敵 主 搭 佢个 基督。’ [S. 2. 1, 2.]

27 因爲 希律 搭 本丟·彼拉多 別國人 搭 以色列 百姓，果然 聚集 要 抵敵 爾 所 傅油 聖善个 奴僕 耶穌；

28 好 做成 爾个 手 爾个 旨意 預先 所 定規 事幹。

29 現在 求 爾，主，望 噴 我許 主子 說話；賜畀 爾个 奴僕 放膽 傳 爾个 道理；

30 隆出 爾个 手 醫 病，托 爾 聖善个 奴僕 耶穌个 名頭 做出 神蹟 搭 奇事。”

31 Tao-kao-ku, ge-he jü-zih-keh di-fông dong-ky‛i-le; cong-nying bi Sing-Ling c‛ong-mön, fông-tæn kông Zông-ti-keh dao-li.

31 禱告過，佢許 聚集个 地方 動起來；眾人 被 聖靈 充滿，放膽 講 上帝个 道理。

32 CONG siang-sing-keh nying tu dong-sing-‛eh-i; m-yiu ih-ke peh z-kyi su yiu sön z-ke; ge-he yiang-yiang meh-z tu siang-t‛ong.
33 S-du yüong do neng-kön te-tsing Cü Yia-su tse weh-cün-le: yiu do eng-yü ling-djôh cong-nying.
34 Ge-he cong-yiang m-yiu ih-ke ky‛üih-siao-dziang-tön cü-ts: ing-yü væn-pah yiu din-di oh-yü cü-ts tu ma-gao, do-le su ma-keh kô-din,
35 fông ze s-du kyiah-zin; ziu tsiao kôh-nying-keh yüong-dziang feng peh ge.

32 眾 相信个 人 都 同心合意；無有 一個 畀 自己 所 有 算 自个；佢許 樣樣 物事 都 相通。

33 使徒 用 大 能幹 對證 主 耶穌 再 活轉來：有 大 恩惠 臨着 眾人。

34 佢許 中央 無有 一個 缺少長短 主子：因爲 凡百 有 田地 屋宇 主子 都 賣爻，馱來 所 賣个 價錢，

35 放 在 使徒 腳前；就 照 各人个 用場 分 畀 佢。

36 Yiu ih-ke Li-vi nying, c‛ih ze Kyü-pi-lu, ming-z Iah-si, s-du ts‛ing-hwu ge Pô-nô-pô, (fæn-c‛ih-le ziu-z ‘ky‛ün-hwa cü-ts’ keh i-s;)
37 ge yiu din ma-gao, kô-din do-le, fông ze s-du kyiah-zin.

36 有 一個 利未 人，出 在 居比路，名字 約西，使徒 稱呼 佢 巴拿巴，（翻出來 就是 ‘勸化 主子’ 个 意思；）

37 佢 有 田 賣爻，價錢 馱來，放 在 使徒 腳前。

第五章.

1 Ô-nô-nyi-ô teh Sæh-fi-læh iao hong-p‛in Pi-teh, Pi-teh tsah-væh ge, ge ziu tih-tao di s-gao,
12 gyi-yü s-du tso hyü-to zing-tsih,
14 kô-ts‛eo siang-sing:
17 s-du tse kwæn ze kæn-lao,
19 dæn-z t‛in-s ta ge c‛ih, feng-fu ge ming-ming djün-dao peh cong-nying:
21 ze sing-din kao-hyüing,
29 ze kong-we kông dao-li, ge-he ziu wa-sön sæh ge,
34 yü Kô-mô-lih ky‛ün ge ziu feh sæh Pi-teh teh Iah-‛ön,
40 tsih-s bi tang, ziu hwön-hyi, me-nyih djün-dao.

1 亞拿尼亞 搭 撒非喇 要 嗊騙 彼得，彼得 責罰 佢，佢 就 跌倒 地 死爻，
12 其餘 使徒 做 許多 神蹟，
14 加湊 相信：
17 使徒 再 關 在 監牢，
19 但是 天使 帶 佢 出，吩咐 佢 明明 傳道 畀 眾人：
21 在 聖殿 教訓，
29 在 公會 講 道理，佢許 就 畫算 殺 佢，
34 爲 迦瑪列 勸 佢 就 不 殺 彼得 搭 約翰，
40 即使 被 打，就 歡喜，每日 傳導。

Yiu ih-ke nying ming-z Ô-nô-nyi-ô, teh ge ts‛i-ts Sæh-fi-læh, ma-gao sæn-nyih;
2 kô-din s-‛ô liu kyi-feng, ts‛i-ts z dong-sing-keh; do kyi-feng fông ze s-du kyiah-zin.
3 Pi-teh kông, “Ô-nô-nyi-ô, Sæh-dæn tsa-sang ying-yiu ng-keh sing, peh ng hong-p‛in Sing-Ling, s-‛ô liu-lôh din-kô?
4 Din ze-teh, ky‛i feh-z ng-keh din? yi-kying ma-gao, ky‛i feh-z ng tso cü? Ng sing-li tsa-sang zeng keh nyin-deo? Ng, feh-z hong-p‛in nying, z hong-p‛in Zông-ti.”
5 Ô-nô-nyi-ô t‛ing-djôh keh shih-wa, ziu tih-tao, ky‛i dön-gao: t‛ing-djôh cü-ts tu ting p‛ô-gyü.
6 Kyi-ke ‛eo-sang ziu ky‛i-le, ping-lin ge, kông-c‛ih nga-min ön-tsông.

有 一个 人 名字 亞拿尼亞，搭 佢 妻子 撒非喇，賣爻 產業；

2 價錢 私下 留 幾分，妻子 是 同心个；馱 幾分 放 在 使徒 腳前。

3 彼得 講，“亞拿尼亞，撒但 怎生 引誘 爾个 心，畀 爾 嗊騙 聖靈，私下 留落 田價？

4 田 在𡍲，豈 不是 爾个 田？已經 賣爻，豈 不是 爾 做 主？爾 心裏 怎生 存 箇 念頭？爾，不是 嗊騙 人，是 嗊騙 上帝。”

5 亞拿尼亞 聽着 箇 說話，就 跌倒，氣 斷爻：聽着 主子 都 頂 怕懼。

6 幾個 後生 就 起來，殯殮 佢，扛出 外面 安葬。

7 Ku mao ke-pön z-zing, ge ts‛i-ts ah tsing-le; wæ feh hyiao-teh keh z-kön.
8 Pi-teh ziu teh ge kông, “Keh din ng-he z ma tah-liao kô-din feh? t‛ong-ts ngô.” Ge kông, “Z-keh; z keh kô-din.”
9 Pi-teh teh ge kông, “Ng-he tsa-sang dong-sing-‛eh-i siang s-s Cü-keh Ling? Ön-tsông ng dziang-fu cü-ts-keh kyiah yi-kying tao meng-k‛eo, ah iao kông ng c‛ih.”
10 Keh nyü-nying lih-k‛eh tih-tao ge-keh kyiah-zin, ky‛i ziu dön-gao: keh-sih ‛eo-sang tsing-le, mông-djôh ge yi-kying s-gao, ziu kông ge c‛ih, ön-tsông ze ge dziang-fu pin.
11 ‛Eh kao-we teh væn-pah t‛ing-djôh cü-ts tu ting p‛ô-gyü.

7 過 毛 個半 時辰，佢 妻子 也 進來；還 不 曉得 箇 事幹。

8 彼得 就 搭 佢 講，“箇 田 爾許 是 賣 𡍲料 價錢 不？通知 我。”佢 講，“是个；是 箇 價錢。”

9 彼得 搭 佢 講，“爾許 怎生 同心合意 想 試試 主个 靈？安葬 爾 丈夫 主子个 腳 已經 到 門口，也 要 扛 爾 出。”

10 箇 女人 立刻 跌倒 佢个 腳前，氣 就 斷爻：箇些 後生 進來，望着 佢 已經 死爻，就 扛 佢 出，安葬 在 佢 丈夫 邊。

11 合 教會 搭 凡百 聽着 主子 都 頂 怕懼。

12 S-du ze pah-sing cong-yiang tso hyü-to zing-tsih teh gyi-z. Siang-sing cü-ts tu ih-sing jü-zih ze Su-lo-meng-keh lông-oh.
13 Gyi-yü m-nying yiu tæn tso-de; dæn-z pah-sing tu tseng-djong ge-he.
14 Siang-sing kyü-voh Cü-keh kah-nga to-ky‛i-le; nön-nyü yiu hyü-to;
15 ge-he zing-ts kông-c‛ih bing-nying tao ka-zông, fông ge ze c‛ing-teng teh p‛u-pæn, sô-mông Pi-teh tseo-ku, ge-keh ing ‛oh-tsia we ing-djôh kyi-ke.
16 Deo-ky‛ün zing-li yiu hyü-to nying tseo-tao Yia-lu-sæh-lang, peh bing-nying teh bi we-u kyü mo-næn cü-ts ta le; tu i hao.
17 DA tsi-s teh ge tso-de cü-ts (ziu-z Sæh-t‛u-ke-keh tông), ting ky‛i-‛eng ky‛i-le,
18 dong-siu k‛ô s-du, kwæn ge ze kæn-lao.
19 Dæn-z Cü-keh t‛in-s yia-li le k‛e kæn-lao-keh meng, ta ge c‛ih, kông,
20 “Ng-he k‛e, gyi ze sing-din, keh weh-ming-keh dao-li tu t‛ong-ts pah-sing.”
21 Ge-he t‛ing-djôh ziu ky‛i-tsao tseo-tsing sing-din, kao-hyüing.

12 使徒 在 百姓 中央 做 許多 神蹟 搭 奇事。相信 主子 都 一心 聚集 在 所羅門个 廊屋。

13 其餘 無人 有 膽 佐隊；但是 百姓 都 尊重 佢許。

14 相信 歸服 主个 格外 多起來；男女 有 許多；

15 佢許 甚至 扛出 病人 到 街上，放 佢 在 春凳 搭 鋪板，奢望 彼得 走過，佢个 影 或者 會 荫着 幾個。

16 頭圈 城裏 有 許多 人 走到 耶路撒冷，畀 病人 搭 被 穢污 鬼 磨難 主子 帶 來；都 醫 好。

17 大 祭司 搭 佢 佐隊 主子（就是 撒土該个 黨），聽 氣恨 起來，

18 動手 揢 使徒，關 佢 在 監牢。

19 但是 主个 天使 夜裏 來 開 監牢个 門，帶 佢 出，講，

20 “爾許 去，徛 在 聖殿，箇 活命个 道理 都 通知 百姓。”

21 佢許 聽着 就 起早 走進 聖殿，教訓。

Da tsi-s teh ge tso-de cü-ts tseo-le, ziu jü-zih kong-we teh Yi-seh-lih nying cong tsiang-lao, ts‛a nying tao kæn-lao ta ge-he le.
22 Ts‛a-yüoh tseo-tao, ze kæn-lao-li zing ge feh djôh; ziu cün-le, we-pao kông,
23 “Kæn-lao, ngô-he mông-djôh lao-k‛ao kwæn-so, kwön-siu cü-ts gyi ze meng-k‛eo: meng k‛e-gao, li-min ih-ke nying tu zing-feh-djôh.”
24 Da tsi-s, kwön sing-din cü-ts, teh cong tsi-s-tsiang, t‛ing-djôh keh shih-wa, ziu nyi-‛oh, keh z-kön feh-ts tsiang-le we tsa-sang.
25 Yiu ih-ke nying le t‛ong-ts ge-he, kông, “Ng-he kwæn ze kæn-lao-keh nying gyi ze sing-din, kao-hyüing pah-sing.”

大祭司 搭 佢 佐隊 主子 走來，就 聚集 公會 搭 以色列 人 眾 長老，差 人 到 監牢 帶 佢許 來。

22 差役 走到，在 監牢裏 尋 佢 不 着；就 轉來，匯報 講，

23 “監牢，我許 望着 牢靠 關鎖，管守 主子 徛 在 門口：門 開爻，裏面 一個 人 都 尋不着。”

24 大 祭司，管 聖殿 主子，搭 眾 祭司長，聽着 箇 說話，就 疑惑，箇 事幹 不知 將來 會 怎生。

25 有 一個 人 來 通知 佢許，講，“爾許 關 在 監牢个 人 徛 在 聖殿，教訓 百姓。”

26 Kwön sing-din teh ts‛a-yüoh ziu k‛e ta s-du le; feh-z ngang tso, sang-teh pah-sing yüong zih-deo p‛ang ge s.
27 Ta-tao, peh ge-he gyi ze kong-we min-zin; da tsi-s ziu meng ge-he, kông,
28 “Ngô-he ky‛i feh-z nyin-kying ng-he feh-k‛o yüong keh ming-deo kao-hyüing? ng-he fæn-cün peh ng-he-keh kao ‛ang-pin Yia-lu-sæh-lang, iao peh keh Nying-keh hyüih kyü tao ngô-he sing-zông.”

26 管 聖殿 搭 差役 就 去 帶 使徒 來；不是 硬 做，省得 百姓 用 石頭 砰 佢 死。

27 帶到，畀 佢許 徛 在 公會 面前；大 祭司 就 問 佢許，講，

28 “我許 豈 不是 嚴禁 爾許 不可 用 箇 名頭 教訓？爾許 反轉 畀 爾許个 教 行遍 耶路撒冷，要 畀 箇 人个 血 歸 到 我許 身上。”

29 Pi-teh teh cong s-du we-teh, kông, “I-jing Zông-ti hao-jü i-jing nying z ing-ke.
30 Ngô-he tsu-tsong-keh Zông-ti yi-kying peh Yia-su weh-cün-le, ziu-z ng-he kwa ze jü-zông su sæh-gao.
31 Zông-ti kyü Ge zông ze Z-keh jing-siu-pin tso Kyüing-wông tso Kyiu-cü, hao s-peh Yi-seh-lih nying hwe-ke teh-djôh sô-ze-keh eng-tin.
32 Ngô-he yü keh z-kön tso kyin-tsing, Zông-ti su s-peh i-jing Ge cü-ts-keh Sing-Ling ah yü keh z-kön tso kyin-tsing.”

29 彼得 搭 眾 使徒 回答，講，“依順 上帝 好如 依順 人 是 應該。

30 我許 祖宗个 上帝 已經 畀 耶穌 活轉來，就是 爾許 掛 在 樹上 所 殺爻。

31 上帝 舉 佢 上 在 自个 順手邊 做 君王 做 救主，好 賜畀 以色列 人 悔改 得着 赦罪个 恩典。

32 我許 爲 箇 事幹 做 見證，上帝 所 賜畀 依順 佢 主子个 聖靈 也 爲 箇 事幹 做 見證。”

33 Ge-he t‛ing-djôh ziu c‛ôh-sing næn-ku, siang-liang iao sæh ge-he.
34 Dæn-z yiu ih-ke Fæh-li-se nying, ming-z Kô-mô-lih, z kao leh-fæh-keh sin-sang, cong pah-sing su tseng-djong, ziu ze kong-we cong-yiang gyi-ky‛i, feng-fu ts‛a-yüoh ao s-du dzæn-z tseo-c‛ih nga-min;
35 teh cong-nying kông, “Yi-seh-lih nying, ng-he iao liu-sing wa-sön tsa bæn ge-he.
36 Ing-yü yi-zin c‛ih ih-ke Tiu-da, z-kyi la-t‛in; keng ge-keh mao s-pah nying: ge z-kyi bi sæh-gao; keng ge cü-ts tu sæn-gao, se-ba wön.
37 Keh nying ts-‛eo, zao nying-ting-ts‛ah z-‛eo, yi c‛ih ih-ke Kô-li-li-keh Yiu-da, yiao-‛oh hyü-to pah-sing keng ge: keh nying ah mih-gao, keng ge cü-ts tu sæn-gao.
38 Yin-ze ngô ky‛ün ng-he hyiao kwön ge-he, bing ge: ing-yü ge-he su wa-sön, su tso, ziah-z c‛ih-ü nying, pih-ding se-ba;
39 ziah-z c‛ih-ü Zông-ti, ng-he feh neng peh ge se-ba; sang-teh ng-he tso Zông-ti-keh te-deo.”

33 佢許 聽着 就 戳心 難過，商量 要 殺 佢許。

34 但是 有 一個 法利賽 人，名字 迦瑪列，是 教 律法个 先生，眾 百姓 所 尊重，就 在 公會 中央 徛起，吩咐 差役 噢 使徒 暫時 走出 外面；

35 搭 眾人 講，“以色列 人，爾許 要 留心 畫算 怎 辦 佢許。

36 因爲 以前 出 一個 丟大，自己 賴天；跟 佢个 毛 四百 人：佢 自己 被 殺爻；跟 佢 主子 都 散爻，衰敗 完。

37 箇 人 之後，造 人丁冊 時候，貤 出 一個 加利利个 猶大，謡惑 許多 百姓 跟 佢：箇 人 也 滅爻，跟 佢 主子 都 散爻。

38 現在 我 勸 爾許 𠏕 管 佢許，凭 佢：因爲 佢許 所 畫算，所 做，若是 出於 人，必定 衰敗；

39 若是 出於 上帝，爾許 不 能 畀 佢 衰敗；省得 爾許 做 上帝个 對頭。”

40 Cong-nying i ge: ziu ao s-du tsing-le, tang ge, feng-fu ge feh-k‛o yüong Yia-su-keh ming-deo kao-hyüing, ziu fông ge.
41 S-du li-k‛e kong-we; ziu hwön-hyi, ing-yü Zông-ti sön ge-he k‛o-i yü Yia-su ming-deo ziu tao-me.
42 Me-nyih ze sing-din teh u-li feh hyih-k‛eo kao-hyüing, djün Yia-su z Kyi-toh.

40 眾人 依 佢：就 噢 使徒 進來，打 佢，吩咐 佢 不可 用 耶穌个 名頭 教訓，就 放 佢。

41 使徒 離開 公會；就 歡喜，因爲 上帝 算 佢許 可以 爲 耶穌 名頭 受 倒霉。

42 每日 在 聖殿 搭 塢裏 不 歇口 教訓，傳 耶穌 是 基督。

第六章.

1 S-du iao tsiao-ku gyüong-nying, yi iao tsiao-ku ge-keh ling-weng,
3 ziu sih-lih ts‛ih-ke bæn-z-nying.
5 Ge-he cong-yiang Z-di-fæn z ting siang-sing, bi Sing-Ling c‛ong-mön:
12 ge su pôh-tao-keh nying k‛ô ge,
13 hông-kao ge hyü-pông sing-din teh leh-fæh.

1 使徒 要 照顧 窮人，貤 要 照顧 佢个 靈魂，
3 就 設立 七個 辦事人。
5 佢許 中央 是 頂 相信，被 聖靈 充滿：
12 佢 所 駁倒个 人 揢 佢，
13 謊告 佢 毀謗 聖殿 搭 律法。

KEH z-‛eo meng-du to-ky‛i-le, yiu kông Hyi-læh shih-wa-keh Yiu-t‛a kao-yiu ma-ün Hyi-pah-le kao-yiu, ing-yü feng me-nyih-keh k‛eo-liang, vong feng-djôh peh ge-he kwa-vu.
2 Zih-nyi s-du ziu ao-le cong meng-du, kông, “Ngô-he feh djün Zông-ti-keh dao-li, kwön ky‛üoh-yüong, z feh ing-ke,
3 Su-i, hyüong-di, ng-he z-kyi cong-yiang kæn ts‛ih-ke yiu hao ming-sing-keh nying, bi Sing-Ling c‛ong-mön, yi ting ts‛ong-ming, ngô-he hao sih-lih ge kwön keh z-kön:
4 ngô-he z-kyi hao tsih kwön tao-kao teh djün dao-li.”

箇 時候 門徒 多起來，有 講 希臘 說話个 猶太 教友 埋怨 希伯來 教友，因爲 分 每日个 口糧，朆 分着 畀 佢許 寡婦。

2 十二 使徒 就 噢來 眾 門徒，講，“我許 不 傳 上帝个 道理，管 喫用，是 不 應該，

3 所以，兄弟，爾許 自己 中央 揀 七個 有 好 名聲个 人，被 聖靈 充滿，貤 頂 聰明，我許 好 設立 佢 管 箇 事幹：

4 我許 自己 好 只 管 禱告 搭 傳 道理。”

5 Keh shih-wa cong-nying tu hwön-hyi: ziu kæn Z-di-fæn, z ting siang-sing, bi Sing-Ling c‛ong-mön-keh nying, teh Fi-lih, Pah-lo-ko-lo, Nyi-kô-nô, Di-meng, Pô-mi-nô, wæ-yiu zih Yiu-t‛a kao Ön-di-ah nying Nyi-ko-læh;
6 ziu peh ge-he gyi ze s-du min-zin. S-du tao-kao ku siu en-en ge-he.

5 箇 說話 眾人 都 歡喜：就 揀 士提反，是 頂 相信，被 聖靈 充滿个 人，搭 非立，伯羅哥羅，提門，巴米拿，還有 入 猶太教 安提厄 人 尼哥拉；

6 就 畀 佢許 徛 在 使徒 面前。使徒 禱告 過 手 按按 佢許。

7 Zông-ti-keh dao-li yüih-fæh ‛ang-k‛e; meng-du-keh su-moh ze Yia-lu-sæh-lang kah-nga kô-ts‛eo; tsi-s ah yiu hyü-to i-jing keh dao-li.

7 上帝个 道理 越發 行開；門徒个 數目 在 耶路撒冷 格外 加湊；祭司 也 有 許多 依順 箇 道理。

8 Z-DI-FÆN siang-sing teh neng-kön tu mön-coh, ze pah-sing cong-yiang tso do zing-tsih teh gyi-z.
9 Yiu kyi-ke Li-pah-di-nô jü-we-dông-keh nying, wæ-yiu kyi-ke Ku-li-na, Ô-lih-sæn-da, Kyi-li-kô, Ô-si-ô nying, tu ky‛i-le, teh Z-di-fæn bin-leng.
10 Z-di-fæn kông shih-wa ting ts‛ong-ming bi Sing-Ling kön-dong, ge-he ti-dih ge feh ku.

8 士提反 相信 搭 能幹 都 滿足，在 百姓 中央 做 大 神蹟 搭 奇事。

9 有 幾個 利百地拿 聚會堂个 人，還有 幾個 古利奈，亞歷山大，基利家，亞西亞 人，都 起來，搭 士提反 辯論。

10 士提反 講 說話 頂 聰明 被 聖靈 感動，佢許 抵敵 佢 不 過。

11 Ge-he ziu ma nying nyih-zao, kông, “Ngô-he t‛ing-djôh ge kông hyü-pông Mo-si teh Zông-ti shih-wa.”
12 T‛iao-dong pah-sing teh tsiang-lao doh-shü-nying; ziu k‛ô ge, ta ge tao kong-we,
13 peh vu-kao cü-ts gyi-ky‛i kông, “Keh nying dziang-z hyü-pông keh sing-zin di-fông teh leh-fæh.
14 Ngô-he t‛ing-djôh ge ts‛ing-k‛eo kông, ‘Keh Nô-sæh-leh-keh Yia-su tsiang-le iao ts‛ah-gao keh di-fông, ke-pin Mo-si su djün peh ngô-he-keh leh-li.’ ”
15 Zo ze kong-we-keh nying tu ts‛ing-ting mông ge, mông-djôh ge yüong-mao ziang t‛in-s-keh yüong-mao.

11 佢許 就 買 人 捏造，講，“我許 聽着 佢 講 毀謗 摩西 搭 上帝 說話。”

12 挑動 百姓 搭 長老 讀書人；就 揢 佢，帶 佢 到 公會，

13 畀 誣告 主子 徛起 講，“箇 人 長時 毀謗 箇 聖善 地方 搭 律法。

14 我許 聽着 佢 親口 講，‘箇 拿撒勒个 耶穌 將來 要 拆爻 箇 地方，改變 摩西 所 傳 畀 我許个 律例。’ ”

15 坐 在 公會个 人 都 青盯 望 佢，望着 佢 容貌 像 天使个 容貌。

第七章.

1 Z-di-fæn we-teh kao ge cü-ts,
2 bin-ming Mo-si wæ-vong sang, tsiang-bong vong tso, sing-din vong zao, Ô-pah-læh-hön pa Zông-ti, Zông-ti kæn-shün ge,
37 Mo-si te-tsing Yia-su:
44 ih-ts‛ih nga-min-keh li-tsih z tsiao Zông-ti su feng-fu-keh yiang-sih, dzæn-z sih-lih:
51 tsah-væh ge-he yü ge yü-be Zông-ti, sæh Cü Yia-su, keh tsing-dzih Cü-ts, sin-ts-nying yü-sin su kông we tao si-zông le.
54 Ge-he ziu yüong zih-deo p‛ang ge s, ge ling-weng t‛ôh-fu Yia-su, gyiu Zông-ti sô-min ge.

1 士提反 回答 告 佢 主子，
2 辯明 摩西 還朆 生，帳篷 朆 做，聖殿 朆 造，亞伯拉罕 拜 上帝，上帝 揀選 佢，
37 摩西 對證 耶穌：
44 一切 外面个 禮節 是 照 上帝 所 吩咐个 樣式，暫時 設立：
51 責罰 佢許 爲 佢 違背 上帝，殺 主 耶穌，箇 正直 主子，先知人 預先 所 講 會 到 世上 來。
54 佢許 就 用 石頭 砰 佢 死，佢 靈魂 託付 耶穌，求 上帝 赦免 佢。

Da tsi-s ziu meng ge, “Keh z-kön ko-zin z keh yiang-ts feh?”

大 祭司 就 問 佢，“箇 事幹 果然 是 箇 樣子 不？”

2 Z-di-fæn ziu kông: “Cong-yü shoh-pah hyüong-di, ts‛ing t‛ing. Ngô-he tsu-tsong Ô-pah-læh-hön vong djü ze Ha-læn, wæ ze Mi-su-po-da-mi z-‛eo, keh-yü yüong-wa-keh Zông-ti yin-c‛ih,
3 teh ge kông, ‘Ng yüong tseo-c‛ih peng-koh, li-k‛e ts‛ing-zoh, tao Ngô tsiang-le su ts-ying ng-keh di-fông.’ [Ts. 12. 1.]
4 Ge ziu li-k‛e Kô-leh-ti k‛e djü ze Ha-læn: teng-tao ge pang s-‛eo, Zông-ti jong kæn-min ts‛in ge tao ng-he yin-ze su djü-keh di-fông.
5 Ze keh su-ze ‛ao-vu sæn-nyih s-peh ge, lin gyi-kyiah su-ze tu m-yiu; dæn-z ing-hyü we s keh di-fông peh ge-z teh ge ‛eo-de tso sæn-nyih; keh z-‛eo ge wæ m-yiu n-nô.
6 Zông-ti kông, ‘Ge-keh ‛eo-de we c‛ih-meng ze nga-koh, ze-kæn tso nu-boh mo-næn ge-he, s-pah nyin.’
7 Zông-ti yi kông, ‘Ge-he tso nu-boh-keh koh Ngô pih-ding sing-p‛ön; ‛eo-deo ge-he we tseo-c‛ih, ze-i voh-z Ngô.’ [Ts. 15. 13, 14. C. 3. 12.]
8 Zông-ti yi teh ge lih tsiu-keh-li-keh iah; Ô-pah-læh-hön sang Yi-sæh, tao di-pæh nyih peh ge ‛ang tsiu-keh-li; Yi-sæh sang Ngô-kôh; Ngô-kôh sang ngô-he zih-nyi tsu-tsong.

2 士提反 就 講：“眾位 叔伯 兄弟，請 聽。我許 祖宗 亞伯拉罕 朆 住 在 哈蘭，還 在 米所波大米 時候，箇位 榮華个 上帝 現出，

3 搭 佢 講，‘爾 用 走出 本國，離開 親族，到 我 將來 所 指引 爾个 地方。’ [Ts. 12. 1.]

4 佢 就 離開 加勒底 去 住 在 哈蘭：等到 佢 伯‛ 死後，上帝 從 吤面 遷 佢 到 爾許 現在 所 住个 地方。

5 在 箇 所在 毫無 產業 賜畀 佢，連 徛腳 所在 都 無有；但是 應許 會 賜 箇 地方 畀 佢自 搭 後代 做 產業；箇 時候 佢 還 無有 兒囡。

6 上帝 講，‘佢个 後代 會 出門 在 外國，在吤 做 奴僕 磨難 佢許，四百 年。’

7 上帝 貤 講，‘佢許 做 奴僕个 國 我 必定 審判；後頭 佢許 會 走出，在倚 服事 我。’ [Ts. 15. 13, 14. C. 3. 12.]

8 上帝 貤 搭 佢 立 週割禮个 約；亚伯拉罕 生 以撒，到 第八 日 畀 佢 行 週割禮；以撒 生 雅各；雅各 生 我許 十二 祖宗。

9 “Tsu-tsong tu-gyi Iah-seh, ma ge tao Yi-gyih k‛e: dæn-z Zông-ti teh ge jü-de,
10 kyiu ge c‛ih yiang-yiang tse-næn, s-peh ge ze Yi-gyih wông Fæh-lao-keh min-zin yiu eng-yü teh ts‛ong-ming; Fæh-lao ziu fong ge kwön Yi-gyih koh, teh wông-kyüong-li ih-ts‛ih z-kön.
11 Yi-gyih teh Kô-nön tao-c‛ü yiu hông-nyin teh do tse-næn; ngô-he tsu-tsong m-yiu liang-zih.
12 Ngô-kôh t‛ing-djôh Yi-gyih yiu koh, ziu sin ts‛a ngô-he tsu-tsong k‛e.
13 Di-nyi t‛ao k‛e, Iah-seh peh ge hyüong-di nying-teh, Iah-seh-keh zoh-veng peh Fæh-lao hyiao-teh.
14 Iah-seh ziu ao ge-he k‛e tsih ge pang Ngô-kôh teh ge jün-kô ts‛ih-zih ng nying le.
15 Ngô-kôh ziu tseo-lôh tao Yi-gyih; ge-z teh ngô-he tsu-tsong tu s-gao:
16 bön-gyiu tao Jü-kyin, tsông ze Ô-pah-læh-hön yüong nying-ts jong Jü-kyin-keh Ha-meh ts-seng su ma-keh veng-di.

9 “祖宗 妒忌 約瑟，賣 佢 到 以及 去：但是 上帝 搭 佢 聚隊，

10 救 佢 出 樣樣 災難，賜畀 佢 在 以及 王 法老个 面前 有 恩惠 搭 聰明；法老 就 封 佢 管 以及 國，搭 皇宮裏 一切 事幹。

11 以及 搭 迦南 到處 有 荒年 搭 大 災難；我許 祖宗 無有 糧食。

12 雅各 聽着 以及 有 穀，就 先 差 我許 祖宗 去。

13 第二 套 去，約瑟 畀 佢 兄弟 認得，約瑟个 族份 畀 法老 曉得。

14 約瑟 就 噢 佢許 去 接 佢 伯‛ 雅各 搭 佢 全家 七十 五 人 來。

15 雅各 就 走落 到 以及；佢自 搭 我許 祖宗 都 死爻：

16 槃柩 到 敘劍，葬 在 亞伯拉罕 用 銀子 從 敘劍个 哈抹 子孫 所 買个 墳地。

17 “Ing-hyü-keh nyih-ts kw‛a tao, ziu-z Zông-ti teh Ô-pah-læh-hön væh-tsiu-ku, pah-sing ze Yi-gyih hying-wông to-ky‛i-le,
18 dzih tao feh kyi-nyin Iah-seh-keh sing wông-ti c‛ih-le. [C. 1. 8.]
19 Ge yüong kyü-kyi meo-‛e ngô-he zoh-veng, mo-næn ngô-he tsu-tsong; ao ge-he peh siao-nying tön-gao, feh hyü ge weh.

17 “應許个 日子 快 到，就是 上帝 搭 亞伯拉罕 罰咒過，百姓 在 以及 興旺 多起來，

18 直 到 不 記念 約瑟个 新 皇帝 出來。[C. 1. 8.]

19 佢 用 詭計 謀害 我許 族份，磨難 我許 祖宗；噢 佢許 畀 小人 斷爻，不 許 佢 活。

20 “Keh z-‛eo Mo-si sang-c‛ih, yüong-mao ting hao; ze ah-pang u-li yiang-weh sæn-ke nyüih.
21 ‛Eo-deo tön-gao, Fæh-lao-keh nô ziu siu-liu, yiang ge tông z-keh n-ts.
22 Yi-gyih nying-keh ‛ôh-veng Mo-si tu ‛ôh-ku; kông shih-wa, tso z-kön, yiu neng-kön.

20 “箇 時候 摩西 生出，容貌 頂 好；在 阿伯‛ 塢裏 養活 三個 月。

21 後頭 斷爻，法老个 囡 就 收留，養 佢 當 自个 兒子。

22 以及 人个 學問 摩西 都 學過；講 說話，做 事幹，有 能幹。

23 “Tao s-zih shü, sing-siang iao k‛e mông z-keh hyüong-di Yi-seh-lih nying.
24 Mông-djôh ih-ke nying ziu we-ky‛üoh, ziu pông-zu ge; de ziu næn cü-ts pao-dziu, tang-s Yi-gyih nying.
25 Ge ts‛eng hyüong-di pih-ding we ts‛eng-tao Zông-ti z yüong ge-keh siu le kyiu ge-he: tsih-z ge-he ts‛eng-feh-tao.
26 Di-nyi nyih p‛ong-djôh ge-he siang-tang, Mo-si tseo-le, ky‛ün ge-he ‛o-moh, kông, ‘Ng-he z hyüong-di; tsa-sang jü-de siang-‛e?’
27 We-ky‛üoh bih-ke cü-ts ziu gyü-jih Moh-si, kông, ‘Kæh-nying lih ng tso kwön sing-p‛ön ngô-he?
28 Ng siang sæh ngô, ziang zôh-nying sæh keh Yi-gyih nying feh?’ [C. 2. 14.]
29 Mo-si t‛ing keh shih-wa ziu dao-k‛e, c‛ih-meng ze Mi-din; ze-kæn sang liang-ke n-ts.

23 “到 四十 歲，心想 要 去 望 自个 兄弟 以色列 人。

24 望着 一個 人 受 委屈，就 幫助 佢；代 受 難 主子 報讎，打死 以及 人。

25 佢 忖 兄弟 必定 會 忖到 上帝 是 用 佢个 手 來 救 佢許：只是 佢許 忖不到。

26 第二 日 碰着 佢許 相打，摩西 走來，勸 佢許 和睦，講，‘爾許 是 兄弟；怎生 聚隊 傷害？’

27 委屈 別個 主子 就 拒絕 摩西，講，‘吤人 立 爾 做 官 審判 我許？

28 爾 想 殺 我，像 昨日‛ 殺 箇 以及 人 不？’ [C. 2. 14.]

29 摩西 聽 箇 說話 就 逃去，出門 在 米甸；在吤 生 兩個 兒子。

30 “Yi ku s-zih nyin, ze Si-na sæn hông-yia, yiu Cü-keh T‛in-s ze ts‛-bang jü ho-yin cong-yiang yin-c‛ih peh ge.
31 Mo-si mông-djôh ziu hyi-gyi keh hyin-ling; tseo-tsing ting mông-mông, ziu yiu Cü-keh sing-ing teh ge kông,
32 ‘Ngô z ng tsu-tsong-keh Zông-ti, Yi-sæh-keh Zông-ti, Ngô-kôh-keh Zông-ti.’ [C. 3. 6.] Mo-si fæh-teo, feh kön mông.
33 Cü yi teh ge kông, ‘T‛eh ng kyiah-keh ‛a; ing-yü ng su gyi-keh su-ze z sing-zin-keh di.
34 Ngô pah-sing ze Yi-gyih ziu næn, Ngô mông-djôh-ku; ge-keh t‛æn-ky‛i Ngô t‛ing-djôh-ku; Ngô kông-lôh kyiu ge c‛ih. Yin-ze le, Ngô iao ts‛a ng tao Yi-gyih k‛e.’ [C. 3. 5, 7, 8, 10.]

30 “貤 過 四十 年，在 西奈 山 荒野，有 主个 天使 在 刺棚 樹 火焰 中央 現出 畀 佢。

31 摩西 望着 就 希奇 箇 顯靈；走進 盯 望望，就 有 主个 聲音 搭 佢 講，

32 ‘我 是 爾 祖宗个 上帝，以撒个 上帝，雅各个 上帝。’ [C. 3. 6.] 摩西 發抖，不 敢 望。

33 主 貤 搭 佢 講，‘脫 爾 腳个 鞋；因爲 爾 所 徛个 所在 是 聖善个 地。

34 我 百姓 在 以及 受 難，我 望着過；佢个 嘆氣 我 聽着過；我 降落 救 佢 出。現在 來，我 要 差 爾 到 以及 去。’ [C. 3. 5, 7, 8, 10.]

35 “Keh Mo-si, ge-he su hyiao-ge kông, ‘Kæh-nying lih ng tso kwön sing-p‛ön ngô-he?’ Zông-ti t‛ôh ze ts‛-bang jü su yin-c‛ih-keh T‛in-s ts‛a ge tso kwön, tso c‛ü-joh cü-ts.
36 Ge ta ge-he c‛ih, tso zing-tsih teh gyi-z ze Yi-gyih, ze ‛Ong-he, ze hông-yia, s-zih nyin.
37 Z keh Mo-si teh Yi-seh-lih nying kông, ‘Cü ng-he-keh Zông-ti jong ng-he hyüong-di cong-yiang we kyü-zông ziang ngô ih-ke Sin-ts-nying peh ng-he: ng-he ing-ke t‛ing Ge.’ [Sm. 18. 15.]
38 Ziu-z keh Mo-si jong-zin ze hông-yia kong-we le-k‛e ze T‛in-s teh tsu-tsong cong-yiang, T‛in-s ze Si-na sæn teh ge kông; ge ah teh-djôh keh weh-ming-keh tsiao-shü djün-ziu peh ngô-he.
39 Ngô-he tsu-tsong feh k‛eng i-jing ge, fæn-cün gyü-jih ge, sing-li siang cün-tao Yi-gyih,
40 teh Ô-leng kông, ‘Ng zao zing-ziang peh ngô-he, hao tseo ze ngô-he zin-deo: ing-yü ta ngô-he c‛ih Yi-gyih-keh Mo-si, ge feh-ts ze ‛ah-yi.’ [C. 32. 1.]
41 Keh z-‛eo ge-he tso siao-ngeo, tsi keh ngeo-ziang, yü z-kyi siu su tso-keh meh-z kw‛a-weh.
42 Zông-ti ziu le-cün, ‛eo ge-he voh-z t‛in-zông hyü-to sing-siu; ziang sin-ts-nying shü-li yiu sia-lôh, ‘Yi-seh-lih-keh zoh-veng, ng ze hông-yia s-zih nyin ky‛i feh-z yüong sæh-sang foh-li teh li-veh le tsi Ngô?
43 Ng kông-le Mo-lôh-keh tsiang-bong, teh ng-he zing Lin-fæn keh-leh sing, ziu-z ng-he su tso-keh ziang iao pa ge: yü-ts Ngô we ts‛in ng-he tao Pô-pi-leng nga-min.’[Ô. 5. 25-27.]

35 “箇 摩西，佢許 所 𠏕佢 講，‛吤人 立 爾 做 官 審判 我許？’ 上帝 托 在 刺棚 樹 所 現出个 天使 差 佢 做 官，做 取贖 主子。

36 佢 帶 佢許 出，做 神蹟 搭 奇事 在 以及，在 紅海，在 荒野，四十 年。

37 是 箇 摩西 搭 以色列 人 講，‘主 爾許个 上帝 從 爾許 兄弟 中央 會 舉上 像 我 一個 先知人 畀 爾許：爾許 應該 聽 佢。’ [Sm. 18. 15.]

38 就是 箇 摩西 從前 在 荒野 公會 來去 在 天使 搭 祖宗 中央，天使 在 西奈 山 搭 佢 講；佢 也 得着 箇 活命个 詔書 傳授 畀 我許。

39 我許 祖宗 不 肯 依順 佢，反轉 拒絕 佢，心裏 想 轉到 以及，

40 搭 亞倫 講，‘爾 造 城牆 畀 我許，好 走 在 我許 前頭：因爲 帶 我許 出 以及个 摩西，佢 不知 在 何倚。’ [C. 32. 1.]

41 箇 時候 佢許 做 小牛，祭 箇 偶像，爲 自己 手 所 做个 物事 快活。

42 上帝 就 擂轉，候 佢許 服事 天上 許多 星宿；像 先知人 書裏 有 寫落，‘以色列个 族份，爾 在 荒野 四十 年 豈 不是 用 殺生 福禮 搭 禮物 來 祭 我？

43 爾 扛來 摩西个 帳篷，搭 爾許 神 連番 箇粒 星，就是 爾許 所 做个 像 要 拜 佢：爲之 我 會 遷 爾許 到 巴比倫 外面。’ [Ô. 5. 25-27.]

44 “Ze hông-yia ngô-he tsu-tsong yiu keh te-tsing-keh tsiang-bong, ziang Zông-ti feng-fu Mo-si, kông, hao tsiao mông-djôh-keh yiang-ts tso.
45 Keh tsiang-bong ngô-he tsu-tsong teh Iah-shü-ô tsih-djôh, teh-djôh bih-koh-nying-keh di-fông z-‛eo ta-tsing: keh-sih bih-koh-nying Zông-ti ze ngô-he tsu-tsong min-zin kön-c‛ih, dzih tao Da-bih z-‛eo.
46 Da-bih ze Zông-ti min-zin teh-djôh eng-c‛ong, siang zing ih-ke djü-c‛ü peh Ngô-kôh-keh Zông-ti.
47 Dæn-z Su-lo-meng yü Ge ky‛i-zao sing-din.
48 Keh-yü ting kao-keh Cü feh djü ze nying siu su zao-keh din; ziang sin-ts-nying su kông,
49 ‘Cü kông, T‛in z Ngô zo-yü, di z Ngô kyiah-teng: ng-he ky‛i-zao zah-m din peh Ngô? nô su-ze hao ön-teng Ngô?
50 Væn-veh ky‛i feh-z Ngô siu su zao?’ [Y. 66, 1, 2.]

44 “在 荒野 我許 祖宗 有 箇 對證个 帳篷，像 上帝 吩咐 摩西，講，好 照 望着个 樣子 做。

45 箇 帳篷 我許 祖宗 搭 約書亞 接着，得着 別國人个 地方 時候 帶進：箇些 別國人 上帝 在 我許 祖宗 面前 趕出，直 到 大闢 時候。

46 大闢 在 上帝 面前 得着 恩寵，想 尋 一個 住處 畀 雅各个 上帝。

47 但是 所羅門 爲 佢 起造 聖殿。

48 箇位 頂 高个 主 不 住 在 人 手 所 造个 殿；像 先知人 所 講，

49 ‘主 講，天 是 我 坐位，地 是 我 腳凳：爾許 起造 倽某 殿 畀 我？哪 所在 好 安頓 我？

50 萬物 豈 不是 我 手 所 造？’ [Y. 66, 1, 2.]

51 “Ng-he ngang-deo-kying, sing teh ng-tô m tsiu-keh-li, ng-he dziang-z be-nyih Sing-Ling; ng-he z teh ng-he tsu-tsong ih-yiang-keh.
52 Nô ih-ke sin-ts-nying ng-he tsu-tsong vong pih-næn ge? Yü-sin ts-tin tsing-dzih Cü-ts iao le-keh sin-ts-nying z bi ge-he tsông-s; yin-ze ng-he peh keh tsing-dzih Cü-ts ma-gao, sæh Ge.
53 Ng-he teh-djôh t‛in-s djün-ziu-keh leh-fæh, wæ feh pao-siu ge.”

51 “爾許 硬頭頸，心 搭 耳朵 無 週割禮，爾許 長時 悖逆 聖靈；爾許 是 搭 爾許 祖宗 一樣个。

52 哪 一個 先知人 爾許 祖宗 朆 逼難 佢？預先 指點 正直 主子 要 來个 先知人 是 被 佢許 妝死；現在 爾許 畀 箇 正直 主子 賣爻，殺 佢。

53 爾許 得着 天使 傳授个 律法，還 不 保守 佢。”

54 Ge-he t‛ing-djôh keh shih-wa, sing-li c‛ôh-ky‛i-le, ts‛ih-ts‛ ‛eng ge.
55 Z-di-fæn bi Sing-Ling c‛ong-mön, ngæn ts‛ing-ting hyiang t‛in, mông-djôh Zông-ti-keh yüong-wa, teh Yia-su gyi ze Zông-ti-keh jing-siu-pin,
56 ziu kông, “Ngô mông-djôh t‛in k‛e, Nying-keh N-ts gyi ze Zông-ti-keh jing-siu-pin.”
57 Cong-nying do sing-hyiang ao-ky‛i-le, ng-tô meng-lao, ih-zi üong-zông;
58 kön ge c‛ih zing-nga, yüong zih-deo p‛ang ge: tso kyin-tsing cü-ts i-zông t‛eh-gao fông ze ih-ke ‛eo-sang-keh kyiah-zin, ming-z Sao-lo.
59 Ge-he yüong zih-deo p‛ang ge; Z-di-fæn ze-teh gyiu, kông, “Cü Yia-su, tsih-ziu ngô ling-weng.”
60 Ziu gyü-lôh, ao-hyiang kông, “Cü, hyiao peh keh ze kyü tao ge-he ming-‛ô.” Kông-ku ziu kw‛eng-k‛e.

54 佢許 聽着 箇 說話，心裏 戳起來，切齒 恨 佢。

55 士提反 被 聖靈 充滿，眼 青盯 向 天，望着 上帝个 榮華，搭 耶穌 徛 在 上帝个 順手邊，

56 就 講，“我 望着 天 開，人个 兒子 徛 在 上帝个 順手邊。”

57 眾人 大 聲響 噢起來，耳朵 捫牢，一齊 擁上；

58 趕 佢 出 城外，用 石頭 砰 佢：做 見證 主子 衣裳 脫爻 放 在 一個 後生个 腳前，名字 掃羅。

59 佢許 用 石頭 砰 佢，士提反 在𡍲 求，講，“主 耶穌，接受 我 靈魂。”

60 就 跪落，噢響 講，“主，𠏕 畀 箇 罪 歸 到 佢許 名下。”講過 就 睏去。

²⁾

第八章.

1 Yü ze Yia-lu-sæh-lang yiu pih-næn, dao-li djün tao Sæh-mô-li-ô,
5 Fi-lih kông dao-li, tso gyi-z, ‛ang si-li peh hyü-to nying, ih-ke zia-jih-keh Si-meng z ying-yiu pah-sing ah ze-nen.
14 Pi-teh teh Iah-‛ön le kyin-ku kao-yiu: ge-he tao-kao siu en-en ge, ge ziu teh-djôh Sing-Ling;
18 Si-meng siang ma keh gyün-ping,
20 Pi-teh tsah-væh ge-keh kô-i teh t‛ön-sing, ky‛ün ge hwe-ke, Pi-teh teh Iah-‛ön ziu cün tao Yia-lu-sæh-lang, ih-lu djün-dao.
26 T‛in-s ts‛a Fi-lih tao hông-yia kao-hyüing, ‛ang si-li peh ih-ke t‛a-kæn.

1 爲 在 耶路撒冷 有 逼難，道理 傳 到 撒馬利亞，
5 非力 講 道理，做 奇事，行 洗禮 畀 許多 人，一個 邪術个 西門 是 引誘 百姓 也 在內。
14 彼得 搭 約翰 來 見過 教友：佢許 禱告 手 按按 佢，佢 就 得着 聖靈；
18 西門 想 買 箇 權柄，
20 彼得 責罰 佢个 假意 搭 貪心，勸 佢 悔改，彼得 搭 約翰 就 轉 到 耶路撒冷，一路 傳道。
26 天使 差 非力 到 荒野 教訓，行 洗禮 畀 一個 太監。

Z-di-fæn s-gao, Sao-lo z hwön-hyi. Keh z-‛eo yiu do pih-næn z-kön tsao-djôh Yia-lu-sæh-lang-keh kao-we: djü s-du ts-nga, cong meng-du tu sæn-k‛e Yiu-t‛a teh Sæh-mô-li-ô kôh-c‛ü di-fông.
2 Yiu gyin-sing-keh nying ping-lin Z-di-fæn, væn-tsing k‛oh ge.
3 Sao-lo bao-nyiah kao-we, tseo-tsing veng-veng nying-kô, k‛ô ge nön-nyü kwæn-lôh kæn-lao.

士提反 死爻，掃羅 是 歡喜。箇 時候 有 大 逼難 事幹 遭着 耶路撒冷个 教會：除 使徒 之外，眾 門徒 都 散開 猶太 搭 撒馬利亞 各處 地方。

2 有 虔心个 人 殯殮 士提反，犯真 哭 佢。

3 掃羅 暴虐 教會，走進 份份 人家，揢 佢 男女 關落 監牢。

4 Keh-sih sæn-k‛e cü-ts tseo-le-tseo-k‛e djün foh-ing.
5 Fi-lih tseo-lôh tao Sæh-mô-li-ô zing-li, djün Kyi-toh peh ge-he.
6 Cong-nying t‛ing-djôh Fi-lih kông, mông-djôh ge su tso-keh gyi-z, ziu dong-sing-‛eh-i liu-sing t‛ing ge shih-wa.
7 Yiu hyü-to bi we-u kyü vu-keh nying, kyü ao-ky‛i-le tseo-c‛ih: wæ-yiu hyü-to fong-t‛æn, pa-kyiah i-hao.
8 Keh zing-li nying ting hwön-hyi.

4 箇些 散開 主子 走來走去 傳 福音。

5 非力 走落 到 撒馬利亞 城裏，傳 基督 畀 佢許。

6 眾人 聽着 非力 講，望着 佢 所 做个 奇事，就 同心合意 留心 聽 佢 說話。

7 有 許多 被 穢污 鬼 附个 人，鬼 噢起來 走出：還有 許多 風癱，跛腳 醫好。

8 箇 城裏 人 頂 歡喜。

9 Yiu ih-ke nying ming-z Si-meng, su-zông ze keh zing-li yüong zia-jih, peh Sæh-mô-li-ô pah-sing tu hyi-gyi, z kông z do:
10 cong-nying do-siao tu liu-sing ge, kông, “Keh nying z Zông-ti-keh do neng-kön.”
11 ing-yü ge yüong zia-jih peh pah-sing hyi-gyi yi-kying dziang-kyiu, su-i tu liu-sing ge.
12 Dæn-z yi-kying siang-sing Fi-lih djün Zông-ti koh foh-ing teh Yia-su Kyi-toh-keh ming-deo, nön-nyü tu ziu si-li.
13 Si-meng z-kyi ah siang-sing; ziu si-li ts-‛eo dziang-z teh Fi-lih jü-de; mông-djôh su tso-keh gyi-z teh do zing-tsih, ziu ting hyi-gyi.

9 有 一個 人 名字 西門，素常 在 箇 城裏 用 邪術，畀 撒馬利亞 百姓 都 希奇，自 講 自 大：

10 眾人 大小 都 留心 佢，講，“箇 人 是 上帝个 大 能幹。”

11 因爲 佢 用 邪術 畀 百姓 希奇 已經 長久，所以 都 留心 佢。

12 但是 已經 相信 非力 傳 上帝 國 福音 搭 耶穌 基督个 名頭，男女 都 受 洗禮。

13 西門 自己 也 相信；受 洗禮 之後 長時 搭 非力 聚隊；望着 所 做个 奇事 搭 大 神蹟，就 頂 希奇。

14 Ze Yia-lu-sæh-lang-keh s-du t‛ing-djôh Sæh-mô-li-ô yi-kying tsih-ziu Zông-ti-keh dao-li, ziu ts‛a Pi-teh teh Iah-‛ön tao ge-he su-ze k‛e.
15 Kyi-zin tseo-tao, ziu t‛i ge-he tao-kao, iao ge teh-djôh Sing-Ling:
16 (ing-yü Sing-Ling wæ vong ling-djôh ge-he; ge-he tæn-tsih vong Cü Yia-su-keh ming-deo ziu si-li.)
17 Keh liang-ke s-du ziu yüong siu en-en ge-he, ge-he ziu teh-djôh Sing-Ling.

14 在 耶路撒冷个 使徒 聽着 撒馬利亞 已經 接受 上帝个 道理，就 差 彼得 搭 約翰 到 佢許 所在 去。

15 既然 走到，就 替 佢許 禱告，要 佢 得着 聖靈：

16 （因爲 聖靈 還 朆 臨着 佢許；佢許 單只 奉 主 耶穌个 名頭 受 洗禮。）

17 箇 兩個 使徒 就 用 手 按按 佢許，佢許 就 得着 聖靈。

18 Si-meng mông-djôh s-du siu en-en kæh-nying ziu yiu Sing-Ling s-peh ge, do nying-ts peh ge-he, kông,
19 “Keh gyün-ping peh ngô, peh ngô siu su en cü-ts ah we teh-djôh Sing-Ling.”
20 Pi-teh teh ge kông, “Ng-keh nying-ts teh ng jü-de mih-vông, ing-yü ng siang yüong dong-din ma Zông-ti-keh eng-s.
21 Ng ze keh z-kön, ih-ting m-veng: ing-yü ze Zông-ti min-zin ng-keh sing feh tön-tsing.
22 Su-i yüong hwe-ke ng-keh ze-ôh, gyiu-gyiu Zông-ti, ‛oh-tsia ng sing-li-keh ôh-nyin hao sô-min.
23 Ngô mông ng wæ-z mön-sing ôh-doh, bi ze dzin-ziao.”
24 Si-meng ziu we-teh, kông, “Ng-he t‛i ngô gyiu-gyiu Cü, min-teh ng-he su kông-keh iao ling-djôh ngô.”

18 西門 望着 使徒 手 按按 吤人 就 有 聖靈 賜畀 佢，馱 銀子 畀 佢許，講，

19 “箇 權柄 畀 我，畀 我 手 所 按 主子 也 會 得着 聖靈。”

20 彼得 搭 佢 講，“爾个 銀子 搭 爾 聚隊 滅亡，因爲 爾 想 用 銅錢 買 上帝個 恩賜。

21 爾 在 箇 事幹，一點 無份：因爲 在 上帝 面前 爾个 心 不 端正。

22 所以 用 悔改 爾个 罪惡，求求 上帝，或者 爾 心裏个 惡念 好 赦免。

23 我 望 爾 還是 滿心 惡毒，被 罪 纏繞。”

24 西門 就 回答，講，“爾許 替 我 求求 主，免得 爾許 所 講个 要 臨着 我。”

25 Keh liang s-du kyi-zin tso te-tsing kông Cü-keh dao-li, ziu cün Yia-lu-sæh-lang, ih-lu djün foh-ing ze Sæh-mô-li-ô hyü-to hyiang-ts‛eng.

25 箇 兩 使徒 既然 做 對證 講 主个 道理，就 轉 耶路撒冷，一路 傳 福音 在 撒馬利亞 許多 鄉村。

26 CÜ-KEH t‛in-s teh Fi-lih kông, “Nang-ky‛i, hyiang nön-pin k‛e, tseo-tao jong Yia-lu-sæh-lang tao Kô-sæh k‛e-keh lu: ziu-z hông-yia.”
27 Ge ziu ky‛i-sing: yiu ih-ke Yi-di-ô-pah nying, z Yi-di-ô-pah nyü-wông Kön-da-kyi, yiu gyün-ping-keh t‛a-kæn, kwön-li ge ts‛ông-k‛u; ge zông Yia-lu-sæh-lang li-pa;
28 cün-le zo ze ts‛ô, doh sin-ts Yi-se-ô-keh shü.

26 主个 天使 搭 非力 講，“玍起，向 南邊 去，走到 從 耶路撒冷 到 迦薩 去个 路：就是 荒野。”

27 佢 就 起身：有 一個 以提亞伯 人，是 以提亞伯 女王 干大基，有 權柄个 太監，管理 佢 倉庫；佢 上 耶路撒冷 禮拜；

28 轉來 坐 在 車，讀 先知 以賽亞个 書。

29 Sing-Ling teh Fi-lih kông, “Ng yüong zông-k‛e, tseo-gying ge ts‛ô.”
30 Fi-lih diao-zông, t‛ing ge doh sin-ts Yi-se-ô-keh shü, ziu kông, “Ng su doh-keh, ming-bah feh?”
31 Ge kông, “M-nying ts-ying ngô, tsa neng-keo ming-bah?” Ziu ts‛ing Fi-lih zông ts‛ô, jü-de zo.

29 聖靈 搭 非力 講，“爾 用 上去，走近 佢 車。”

30 非力 趒上，聽 佢 讀 先知 以賽亞个 書，就 講，“爾 所 讀个，明白 不？”

31 佢 講，“無人 指引 我，怎 能彀 明白？” 就 請 非力 上 車，聚隊 坐。

32 Ge su doh-keh shü ziu-z kông, “Ge ziang ih-tsih yiang bi nying ky‛in-k‛e sæh-gao; yi ziang ih-tsih siao-yiang ze tsin ge mao cü-ts-keh min-zin feh hyiang, Ge feh k‛e-k‛eo.
33 Ge ti-vi z-‛eo vong teh-djôh kong-nyi-keh p‛ön-tön: kæh-nying neng-keo kông Ge-keh si-de? ing-yü Ge-keh sing-ming ze si-zông mih-gao.” [Y. 53. 7,8.]
34 T‛a-kæn teh Fi-lih kông, “Ts‛ing-meng ng, sin-ts-nying kông keh shih-wa z ts-tin kæh-nying? wæ-z ge-z, wæ-z bih-nying?”
35 Fi-lih k‛e-k‛eo, jong keh shü ky‛i-deo, djün Yia-su peh ge.

32 佢 所 讀个 書 就是 講，“佢 像 一隻 羊 被 人 牽去 殺爻；貤 像 一隻 小羊 在 剪 佢 毛 主子个 面前 不 響，佢 不 開口。

33 佢 低微 時候 朆 得着 公義个 判斷：吤人 能彀 講 佢个 世代？因爲 佢个 性命 在 世上 滅爻。” [Y. 53. 7,8.]

34 太監 搭 非力 講，“請問 爾，先知人 講 箇 說話 是 指點 吤人？還是 佢自，還是 別人？”

35 非力 開口，從 箇 書 起頭，傳 耶穌 畀 佢。

36 Ge-he ze lu-zông tseo-tao yiu shü-keh su-ze: t‛a-kæn ziu kông, “Ze-i yiu shü; ngô ziu si-li yiu zah-m tsu-kah feh?”
37 Fi-lih kông, “Ng ziah-z ih-sing siang-sing, ziu k‛o-i.” T‛a-kæn we-teh kông, “Ngô siang-sing Yia-su Kyi-toh z Zông-ti-keh N-ts.”
38 Ge ziu feng-fu ts‛ô ding-lao: Fi-lih teh t‛a-kæn jü-de lôh-shü; Fi-lih ‛ang si-li peh ge.
39 Jong shü zông-le, Cü-keh Sing-Ling ziu ta Fi-lih k‛e; t‛a-kæn hwön-hyi tseo z-keh lu, vong tse mông-djôh Fi-lih.

36 佢許 在 路上 走到 有 水个 所在：太監 就 講，“在倚 有 水；我 受 洗禮 有 倽某 阻隔 不？”

37 非力 講，“爾 若是 一心 相信，就 可以。”太監 回答 講，“我 相信 耶穌 基督 是 上帝个 兒子。”

38 佢 就 吩咐 車 停牢：非力 搭 太監 聚隊 落水；非力 行 洗禮 畀 佢。

39 從 水 上來，主个 聖靈 就 帶 非力 去；太監 歡喜 走 自个 路，朆 再 望着 非力。

40 Dæn-z Fi-lih tao Ô-so-tu: ziu kying-ku kôh zing-li djün foh-ing, dzih tao Ke-sæh-li-ô.

40 但是 非力 到 亞鎖都：就 經過 各 城裏 傳 福音，直 到 該撒利亞。

第九章.

1 Sao-lo tao Da-mô-seh k‛e z-‛eo,
4 mông-djôh do liang-kwông tih-tao di,
10 bi kæn-shün tso s-du,
18 Ô-nô-nyi-ô ‛ang si-li peh ge.
20 Ge fông-tæn djün Kyi-toh.
23 Yiu-t‛a nying ma-voh iao sæh ge:
29 kông Hyi-læh shih-wa Yiu-t‛a nying ah wa-sön sæh ge, dæn-z ge tu bi-ku.
31 Kao-we yiu ön-tæn, Pi-teh i-hao Yi-nyi-ngô fong-t‛æn bing,
36 peh Da-pi-da weh-cün-le.

1 掃羅 到 大馬色 去 時候，
4 望着 大 亮光 跌倒 地，
10 被 揀選 做 使徒，
18 亞拿尼亞 行 洗禮 畀 佢。
20 佢 放膽 傳 基督。
23 猶太 人 埋伏 要 殺 佢：
29 講 希臘 說話 猶太 人 也 畫算 殺 佢，但是 佢 都 避過。
31 教會 有 安耽，彼得 醫好 以尼雅 風癱 病，
36 畀 大比大 活轉來。

SAO-LO ky‛i-hong-hong p‛eng Cü-keh meng-du iao sæh ge-he, tseo-tao da tsi-s su-ze,
2 ts‛ing ge sia sing peh ge ta tao Da-mô-seh kôh jü-we-dông, peh Sao-lo p‛ong-djôh jong keh Dao-lu nying, jü-bin nön-nyü, tu hao kw‛eng-lao ka tao Yia-lu-sæh-lang le.

掃羅 氣哄哄 噴 主个 門徒 要 殺 佢許，走到 大 祭司 所在，

2 請 佢 寫 信 畀 佢 帶 到 大馬色 各 聚會堂，畀 掃羅 碰着 從 箇 道路 人，隨便 男女，都 好 綑牢 解 到 耶路撒冷 來。

3 Kw‛a tseo-tao Da-mô-seh, hweh-zin jong t‛in yiu liang-kwông deo-ky‛ün tsiao-djôh ge:
4 ge ziu tih-tao di, t‛ing-djôh yiu sing-ing teh ge kông, “Sao-lo, Sao-lo, ng tsa-sang pih-næn Ngô?”
5 Ge kông, “Cü, Ng z kæh-nying?” Cü kông, “Ngô z Yia-su ziu-z ng su pih-næn-keh: ng kyiah t‛ih-djôh ts‛ z næn.”
6 Ge kying-hôh gæh-gæh-teo kông, “Cü, Ng iao ngô tsa tso fæh?” Cü teh ge kông, “Nang-ky‛i, tsing zing; ng ing-ke tsa tso we t‛ong-ts ng.”

3 快 走到 大馬色，忽然 從 天 有 亮光 頭圈 照着 佢：

4 佢 就 跌倒 地，聽着 有 聲音 搭 佢 講，“掃羅，掃羅，爾 怎生 逼難 我？”

5 佢 講，“主，爾 是 吤人？” 主 講，“我 是 耶穌 就是 爾 所 逼難个：爾 腳 踢着 刺 是 難。”

6 佢 驚𢞕 挾挾抖 講，“主，爾 要 我 怎 做 法？” 主 搭 佢 講，“玍起，進城；爾 應該 怎 做 會 通知 爾。”

7 Jü-de tseo cü-ts t‛ing-djôh keh sing-ing, vong mông-djôh nying; tsih we ô-k‛eo vu-nyin gyi-teh.
8 Sao-lo jong di nang-ky‛i; ngæn ts‛ang-k‛e, feh neng mông; ge-he ziu ky‛in ge siu, ta ge tsing Da-mô-seh.
9 Yiu sæn nyih mông-feh-djôh, yi feh ying-zih.

7 聚隊 走 主子 聽着 箇 聲音，朆 望着 人；只 會 啞口 無言 徛𡍲。

8 掃羅 從 地 玍起；眼 撐開，不 能 望；佢許 就 牽 佢 手，帶 佢 進 大馬色。

9 有 三 日 望不着，貤 不 飲食。

10 Da-mô-seh yiu ih-ke meng-du, ming-z Ô-nô-nyi-ô; Cü ze hyin-ling teh ge kông, “Ô-nô-nyi-ô.” Ge kông, “Cü, ngô ze-i.”
11 Cü teh ge kông, “Nang-ky‛i, tao Dzih-ka k‛e; ze Yiu-da u-li t‛ao-sing ih-ke Da-su nying, ming-z Sao-lo: ing-yü ge yin-ze tao-kao;
12 ge yi-kying mông-djôh ih-ke nying ming-z Ô-nô-nyi-ô tseo-tsing, siu en-en ge, peh ge mông-djôh.”
13 Ô-nô-nyi-ô ziu we-teh kông, “Cü, ngô yi-kying t‛ing-djôh hyü-to nying kông, keh nying yiu to-siao næn-c‛ü de Ng Yia-lu-sæh-lang-keh sing-du:
14 yin-ze ge tao-i le yiu tsi-s-tsiang-keh gyün-ping hao kw‛eng-pông væn-pah tao-kao Ng ming-deo cü-ts.”
15 Cü teh ge kông, “Ng k‛e: ge z Ngô kæn-shün-keh ky‛i-ming, hao yiang-k‛e Ngô-keh ming-deo ze bih-koh-nying, teh kyüing-wông, teh Yi-seh-lih pah-sing-keh min-zin.

16 Ngô we peh ge hyiao-teh ge yü Ngô ming-deo iao ziu to-siao k‛u-næn.”

10 大馬色 有 一個 門徒，名字 亞拿尼亞；主 在 顯靈 搭 佢 講，“亞拿尼亞。” 佢 講，“主，我 在倚。”

11 主 搭 佢 講，“玍起，到 直街 去；在 猶大 塢裏 討信 一個 大數 人，名字 掃羅：因爲 佢 現在 禱告；

12 佢 已經 望着 一個 人 名字 亞拿尼亞 走進，手 按按 佢，畀 佢 望着。”

13 亞拿尼亞 就 回答 講，“主，我 已經 聽着 許多 人 講，箇 人 有 多少 難處 待 爾 耶路撒冷个 聖徒：

14 現在 佢 到倚 來 有 祭司長个 權柄 好 綑綁 凡百 禱告 爾 名頭 主子。”

15 主 搭 佢 講，“爾 去：佢 是 我 揀選个 器皿，好 揚開 我个 名頭 在 別國人，搭 君王，搭 以色列 百姓个 面前。

16 我 會 畀 佢 曉得 佢 爲 我 名頭 要 受 多少 苦難。”

17 Ô-nô-nyi-ô ziu k‛e, tseo-tsing oh-li; siu en-en ge kông, “Hyüong-di Sao-lo, ng le z-‛eo, ze lu-zông su yin-c‛ih peh ng-keh Cü Yia-su, ts‛a ngô le peh ng we mông, yi bi Sing-Ling c‛ong-mön.”
18 Hweh-zin ngæn yiu meh-z ziang ng-ling tih-lôh, lih-k‛eh mông-djôh; ge nang-ky‛i, ziu si-li;
19 væn ky‛üoh-ku, nying ziu gyin-ky‛i-le.

17 亞拿尼亞 就 去，走進 屋裏；手 按按 佢 講，“兄弟 掃羅，爾 來 時候，在 路上 所 現出 畀 爾个 主 耶穌，差 我 來 畀 爾 會 望，貤 被 聖靈 充滿。”

18 忽然 眼 有 物事 像 魚鱗 跌落，立刻 望着；佢 玍起，受 洗禮；

19 飯 喫過，人 就 健起來。

Sao-lo teh Da-mô-seh-keh meng-du djü kyi nyih.
20 Ziu ze keh-sih jü-we-dông djün Yia-su z Zông-ti-keh N-ts.
21 Væn-pah t‛ing-djôh cü-ts tu hyi-gyi, kông, “Ze Yia-lu-sæh-lang ‛e tao-kao keh ming-deo cü-ts, yi tao-i le iao kw‛eng-pông ge-he, ka peh tsi-s-tsiang, ky‛i feh-z keh nying?”
22 Dæn-z Sao-lo neng-kön yüih-fæh kyin-ku, pôh-tao djü ze Da-mô-seh-keh Yiu-t‛a nying, bin-ming Yia-su z Kyi-toh.

掃羅 搭 大馬色个 門徒 住 幾 日。

20 就 在 箇些 聚會堂 傳 耶穌 是 上帝个 兒子。

21 凡百 聽着 主子 都 希奇，講，“在 耶路撒冷 害 禱告 箇 名頭 主子，貤 到倚 來 要 綑綁 佢許，解 畀 祭司長，豈 不是 箇 人？”

22 但是 掃羅 能幹 越發 堅固，駁倒 住 在 大馬色个 猶太 人，辯明 耶穌 是 基督。

23 Ku hyü-to nyih-su, Yiu-t‛a nying jü-de siang-liang iao sæh ge:
24 dæn-z ge-he-keh kyi-meo bi Sao-lo hyiao-teh. Ge-he nyih-yia siu-lao zing-meng wa-sön iao sæh ge:
25 dæn-z meng-du yia-li yüong læn, peh Sao-lo jong zing-zông fông-lôh.

23 過 許多 日數，猶太 人 聚隊 商量 要 殺 佢：

24 但是 佢許个 計謀 被 掃羅 曉得。佢許 日夜 守牢 城門 畫算 要 殺 佢：

25 但是 門徒 夜裏 用 籃，畀 掃羅 從 城上 放落。

26 Sao-lo tao Yia-lu-sæh-lang, siang teh meng-du kyih-kao: dæn-z ge-he tu p‛ô ge, feh siang-sing ge z meng-du.
27 Pô-nô-pô ta ge k‛e, kyin s-du, peh ge lu-zông tsa-sang mông-djôh Cü, Cü teh ge kông-ku, ge ze Da-mô-seh yüong Yia-su-keh ming-deo tsa fông-tæn djün-dao, tu teh ge-he kông.
28 Sao-lo ze Yia-lu-sæh-lang teh meng-du jü-de tsing-c‛ih:
29 yüong Cü Yia-su-keh ming-deo fông-tæn djün-dao: teh kông Hyi-læh shih-wa-keh Yiu-t‛a nying bin-leng: dæn-z ge-he wa-sön iao sæh ge.
30 Hyüong-di hyiao-teh, ziu song ge tao Ke-sæh-li-ô, peh ge tao Da-su k‛e.

26 掃羅 到 耶路撒冷，想 搭 門徒 結交：但是 佢許 都 怕 佢，不 相信 佢 是 門徒。

27 巴拿巴 帶 佢 去，見 使徒，畀 佢 路上 怎生 望着 主，主 搭 佢 講過，佢 在 大馬色 用 耶穌个 名頭 怎 放膽 傳道，都 搭 佢許 講。

28 掃羅 在 耶路撒冷 搭 門徒 聚隊 進出：

29 用 主 耶穌个 名頭 放膽 傳道：搭 講 希臘 說話个 猶太 人 辯論：但是 佢許 畫算 要 殺 佢。

30 兄弟 曉得，就 送 佢 到 該撒利亞，畀 佢 到 大數 去。

31 KEH z-‛eo Yiu-t‛a teh Kô-li-li teh Sæh-mô-li-ô-keh kao-we tu ön-tæn; zing-ziu teh-‛ang; p‛ô-gyü Cü tso-nying, teh-djôh Sing-Ling-keh ön-yü, kô-ts‛eo su-moh.

31 箇 時候 猶太 搭 加利利 搭 撒馬利亞个 教會 都 安耽；成就 德行；怕懼 主 做人，得着 聖靈个 安慰，加湊 數目。

32 Pi-teh tseo-ku s-fông, tseo-tao djü ze Lü-da sing-du-keh su-ze.
33 Ze-kæn p‛ong-djôh ih-ke nying ming-z Yi-nyi-ngô, pæh nyin ze min-zông, ing-yü sang fong-t‛æn bing.
34 Pi-teh teh ge kông, “Yi-nyi-ngô, Yia-su Kyi-toh peh ng jün-yü: nang-ky‛i, côh-zih ng-keh min-zông.” Ge lih-k‛eh nang-ky‛i.
35 Djü ze Lü-da teh Sæh-leng-keh nying tu mông-djôh, ziu kyü-voh Cü.

32 彼得 走過 四方，走到 住 在 呂大 聖徒个 所在。

33 在吤 碰着 一個 人 名字 以尼雅，八年在眠牀，因爲生瘋癱病。

34 彼得搭佢講，“以尼雅，耶穌 基督 畀 爾 痊癒：玍起，捉拾 爾个 眠牀。” 佢 立刻 玍起。

35 住 在 呂大 搭 撒崙个 人 都 望着，就 歸服 主。

36 Ze Iah-p‛ô yiu ih-ke nyü meng-du ming-z Da-pi-da, fæn-c‛ih-le ziu-z To-kô; ge z kwông-‛ang hao-z teh tsiu-tsi nying.
37 Keh z-‛eo ge sang bing s-gao: si kön-zing, ding ze leo-zông.
38 Lü-da teh Iah-p‛ô lin-gying, meng-du t‛ing-djôh Pi-teh ze-kæn, ts‛a liang-ke nying k‛e ts‛ing ge le, hyiao tæn-kôh.

36 在 約帕 有 一個 女 門徒 名字 大比大，翻出來 就是 多加；佢 是 廣行 好事 搭 賙濟 人。

37 箇 時候 佢 生 病 死爻：洗 乾淨，停 在 樓上。

38 呂大 搭 約帕 連近，門徒 聽着 彼得 在吤，差 兩個 人 去 請 佢 來，𠏕 耽擱。

39 Pi-teh ziu ky‛i-sing teh ge-he jü-de k‛e. Tseo-tao, ge-he ta ge zông leo-zông: cong kwa-vu gyi ze Pi-teh wang-pin k‛oh, To-kô ze-sang z-‛eo su tso-keh i-zông, peh ge mông.
40 Pi-teh ao ge-he tu tseo-c‛ih, ziu gyü-lôh tao-kao; le-cün hyiang s-siu kông, “Da-pi-da, nang-ky‛i.” Ge ngæn ts‛ang-k‛e; mông-djôh Pi-teh, ziu zo-ky‛i.
41 Pi-teh di siu, tông ge ky‛i-le: ziu ao cong sing-du teh kwa-vu, peh ge-he mông ge z weh-gao.
42 T‛ong Iah-p‛ô di-fông tu hyiao-teh: ziu yiu hyü-to nying siang-sing Cü.
43 Pi-teh ze Iah-p‛ô djü hao kyi nyih, ze ih-ke siao-bi lao-s Si-meng-keh u-li.

39 彼得 就 起身 搭 佢許 聚隊 去。走到，佢許 帶 佢 上 樓上：眾 寡婦 徛 在 彼得 橫邊 哭，多加 在生 時候 所 做个 衣裳，畀 佢 望。

40 彼得 噢 佢許 都 走出，就 跪落 禱告；擂轉 向 屍首 講，“大比大，玍起。” 佢 眼 撐開；望着 彼得，就 坐起。

41 彼得 遞 手，擋 佢 起來：就 噢 眾 聖徒 搭 寡婦，畀 佢許 望 佢 是 活爻。

42 統 約帕 地方 都 曉得：就 有 許多 人 相信 主。

43 彼得 在 約帕 住 好 幾 日，在 一個 硝皮 老司 西門个 塢裏。

第十章.

1 Gyin-zing-keh Ko-nyi-liu,
5 bi t‛in-s feng-fu, ts‛a nying ts‛ing Pi-teh le.
11 Pi-teh mông hyin-ling,
15,20 Zông-ti kao ge m-c‛ü mông bih-koh-nying feh ky‛i.
34 Ge djün dao-li peh Ko-nyi-liu teh jü-de-keh nying z-‛eo,
44 Sing-ling ling-djôh ih-ts‛ih t‛ing dao-li cü-ts,
48 ge-he tu ziu si-li.

1 虔誠个 哥尼流，
5 被 天使 吩咐，差 人 請 彼得 來。
11 彼得 望 顯靈，
15,20 上帝 教 佢 無處 望 別國人 不 起。
34 佢 傳 道理 畀 哥尼流 搭 聚隊个 人 時候，
44 聖靈 臨着 一切 聽 道理 主子，
48 佢許 都 受 洗禮。

KE-SÆH-LI-Ô yiu ih-ke nying, ming-z Ko-nyi-liu, z Yi-da-li ying-li-keh pah-tsong;
2 ge nying gyin-sing, teh ‛eh-kô p‛ô-gyü Zông-ti, kwông-‛ang hao-z peh pah-sing, dziang-z tao-kao Zông-ti.
3 Mao sing z ts‛u, yiu hyin-ling, ming-ming mông-djôh Zông-ti-keh t‛in-s tsing-le, teh ge kông, “Ko-nyi-liu.”
4 Ko-nyi-liu ts‛ing-ting mông ge, kying-hôh, kông, “Cü, zao z-kön?” T‛in-s teh ge kông, “Ng-keh tao-kao, ng-keh hao-z, yi-kying sing-zông tao Zông-ti min-zin kyi ze-kæn.
5 Yin-ze ng hao ts‛a nying tao Iah-p‛ô, ts‛ing Si-meng le, ziu-z ts‛ing-hwu Pi-teh:
6 ge tæn-kôh ze ih-ke siao-bi lao-s Si-meng u-li, ze he-pin: ng ing-ke tso z-kön ge we teh ng kông.”

該撒利亞 有 一個 人，名字 哥尼流，是 以大利 營裏个 百總；

2 佢 人 虔心，搭 合家 怕懼 上帝，廣行 好事 畀 百姓，長時 禱告 上帝。

3 毛 申 時 初，有 顯靈，明明 望着 上帝个 天使 進來，搭 佢 講，“哥尼流。”

4 哥尼流 青盯 望 佢，驚𢞕，講，“主，倽 事幹？” 天使 搭 佢 講，“爾个 禱告，爾个 好事，已經 升上 到 上帝 面前 記 在吤。

5 現在 爾 好 差 人 到 約帕，請 西門 來，就是 稱呼 彼得：

6 佢 耽擱 在 一個 硝皮 老司 西門 塢裏，在 海邊：爾 應該 做 事幹 佢 會 搭 爾 講。”

7 Teh ge kông-keh t‛in-s k‛e-gao; Ko-nyi-liu ziu ao liang-ke yüong-nying, teh sing-pin voh-z-keh ih-ke gyin-sing ying-ping;
8 keh z-kön tu t‛ong-ts ge, ziu ts‛a ge-he tao Iah-p‛ô.

7 搭 佢 講个 天使 去爻；哥尼流 就 噢 兩個 傭人，搭 身邊 服事个 一個 虔心 營兵；

8 箇 事幹 都 通知 佢，就 差 佢許 到 約帕。

9 Di-nyi nyih, keh sæn-ke nying tseo lu, kw‛a tao zing-li, mao ng z tsing, Pi-teh tseo-zông oh-zông tao-kao:
10 hyiao-teh du-hæh iao ky‛üoh: ge-he ze-teh bi-bæn, ge hweh-zin hweng-k‛e;
11 mông-djôh t‛in k‛e-k‛e, yiu ih-yiang meh-z kông-lôh, ziang ih-kw‛e do pu, kyi s-kôh, dông-lôh tao di:
12 li-min yiu pah-yiang di-zông s-kyiah-keh cong-sang, yia-siu, djong-nyi, teh t‛in-k‛ong-keh tiao.
13 Ziu yiu sing-ing teh ge kông, “Pi-teh, nang-ky‛i; sæh-gao, ky‛üoh.”
14 Pi-teh kông, “Cü, tön feh-k‛o; væn-pah we-u feh kyih-zing-keh meh-z ngô jong-le vong ky‛üoh-ku.”
15 Di-nyi t‛ao yiu sing-ing teh ge kông, “Zông-ti su kyih-zing-keh, ng feh-k‛o sön ge we-u.”
16 Keh-yiang-ts yiu sæn-t‛ao: keh meh-z ziu siu-zông t‛in.

9 第二 日，箇 三個 人 走 路，快 到 城裏，毛 午 時 正，彼得 走上 屋上 禱告：

10 曉得 肚㾎 要 喫：佢許 在𡍲 備辦，佢 忽然 昏去；

11 望着 天 開開，有 一樣 物事 降落，像 一塊 大 布，繫 四角，蕩落 到 地：

12 裏面 有 百樣 地上 四腳个 眾生，野獸，蟲蟻，搭 天空个 鳥。

13 就 有 聲音 搭 佢 講，“彼得，玍起；殺爻，喫。”

14 彼得 講，“主，斷 不可；凡百 穢污 不 潔淨个 物事 我 從來 朆 喫過。”

15 第二 套 有 聲音 搭 佢 講，“上帝 所 潔淨个，爾 不可 算 佢 穢污。”

16 箇樣子 有 三套：箇 物事 就 收上 天。

17 Pi-teh sing-li wæ ze-teh nyi-sing su mông-djôh-keh hyin-ling zao i-s, Ko-nyi-liu ts‛a-le-keh nying t‛ao-sing tao Si-meng u-li, gyi ze meng-k‛eo,
18 ze-teh meng, “Si-meng, ts‛ing-hwu Pi-teh, tæn-kôh ze-i feh?”

17 彼得 心裏 還 在𡍲 疑心 所 望着个 顯靈 倽 意思，哥尼流 差來个 人 討信 到 西門 塢裏，徛 在 門口，

18 在𡍲 問，“西門，稱呼 彼得，耽擱 在倚 不？”

19 Pi-teh ze-teh s-ts‛eng keh hyin-ling, Sing-Ling teh ge kông, “Yiu sæn-ke nying le zing ng.
20 Nang-ky‛i, tseo-lôh, teh ge jü-de k‛e, hyiao nyi-sing: ing-yü Ngô ts‛a ge le.”

19 彼得 在𡍲 思忖 箇 顯靈，聖靈 搭 佢 講，“有 三個 人 來 尋 爾。

20 玍起，走落，搭 佢 聚隊 去，𠏕 疑心：因爲 我 差 佢 來。”

21 Pi-teh ziu tseo-lôh kyin Ko-nyi-liu ts‛a-le-keh nying, kông, “Ng-he su zing-keh ziu-z ngô: ng-he yü zah-m z-kön le?”
22 Ge-he kông, “Pah-tsong Ko-nyi-liu, z tsing-dzih p‛ô-gyü Zông-ti-keh nying, t‛ong Yiu-t‛a pah-sing su ts‛ing-tsæn, mong sing-zin t‛in-s-keh ts-ying, ao ge ts‛ing ng tao ge u-li k‛e, hao t‛ing ng-keh shih-wa.”
23 Pi-teh ziu ts‛ing ge-he tsing-le, liu ge ku yia.

21 彼得 就 走落 見 哥尼流 差來个 人，講，“爾許 所 尋个 就是 我：爾許 爲 倽某 事幹 來？”

22 佢許 講，“百總 哥尼流，是 正直 怕懼 上帝个 人，統 猶太 百姓 所 稱讚，蒙 聖善 天使个 指引，噢 佢 請 爾 到 佢 塢裏 去，好 聽 爾个 說話。”

23 彼得 就 請 佢許 進來，留 佢 過 夜。

Di-nyi nyih Pi-teh teh ge-he jü-de ky‛i-sing; wæ-yiu kyi-ke Iah-p‛ô-keh hyüong-di ah jü-de k‛e.
24 Tse z ih-nyih, ge-he tseo-tsing Ke-sæh-li-ô. Ko-nyi-liu yi-kying jü-zih ts‛ing-kyün bong-yiu, tu ze-kæn teng-‛eo.

第二 日 彼得 搭 佢許 聚隊 起身；還有 幾個 約帕个 兄弟 也 聚隊 去。

24 再 是 一日，佢許 走進 該撒利亞。哥尼流 已經 聚集 親眷 朋友，都 在吤 等候。

25 Pi-teh tseo-tsing oh-li, Ko-nyi-liu ziu tsih-djôh ge, gyü ze ge kyiah-zin pa ge.
26 Pi-teh tông ge ky‛i-le, kông, “Nang-ky‛i; ngô ah z nying.”
27 Ziu teh ge kông-kông tseo-tsing; mông-djôh yiu hyü-to nying jü-zih:
28 ziu teh ge-he kông, “Ng-he hyiao-teh Yiu-t‛a nying ts‛ing-gying bih-koh-nying, tseo-tsing ge oh-li z feh ing-ke; dæn-z Zông-ti yi-kying ts-tin ngô, jü-bin zao-teh nying feh-k‛o sön ge we-u feh kyih-zing.
29 Su-i ts‛a nying le ts‛ing ngô, ngô feh t‛e-z ziu le. Yin-ze meng ng-he yü zao z-kön ts‛ing ngô?”

25 彼得 走進 屋裏，哥尼流 就 接着 佢，跪 在 佢 腳前 拜 佢。

26 彼得 擋 佢 起來，講，“玍起；我 也 是 人。”

27 就 搭 佢 講講 走進；望着 有 許多 人 聚集：

28 就 搭 佢許 講，“爾許 曉得 猶太 人 親近 別國人，走進 佢 屋裏 是 不 應該；但是 上帝 已經 指點 我，隨便 倽𡍲 人 不可 算 佢 穢污 不 潔淨。

29 所以 差 人 來 請 我，我 不 推辭 就 來。現在 問 爾許 爲 倽 事幹 請 我？”

30 Ko-nyi-liu kông, “Ngô s nyih zin kying-zih tao keh z-‛eo, sing z ts‛u ze u-li tao-kao; hweh-zin yiu ih-ke nying tsiah kwông-ming-keh i-zông gyi ze ngô min-zin, kông,
31 ‘Ko-nyi-liu, ng-keh tao-kao yi-kying t‛ing-djôh; ng-keh hao-z yi-kying ze Zông-ti min-zin kyi-nyin.
32 Ng hao ts‛a nying tao Iah-p‛ô, ts‛ing Si-meng le, ziu-z ts‛ing-hwu Pi-teh; ge tæn-kôh ze he-pin, siao-bi lao-s Si-meng u-li: ge le, we teh ng kông.’
33 Ngô lih-k‛eh ts‛a nying ts‛ing ng; ng le z ting hao. Yin-ze ngô-he tu ze-i, ze Zông-ti min-zin, iao t‛ing Zông-ti væn-pah su feng-fu ng.”

30 哥尼流 講，“我 四 日 前 禁食 到 箇 時候，申 時 初 在 塢裏 禱告；忽然 有 一個 人 撯 光明个 衣裳 徛 在 我 面前，講，

31 ‘哥尼流，爾个 禱告 已經 聽着；爾个 好事 已經 在 上帝 面前 記念。

32 爾 好 差 人 到 約帕，請 西門 來，就是 稱呼 彼得；佢 耽擱 在 海邊，硝皮 老司 西門 塢裏：佢 來，會 搭 爾 講。’

33 我 立刻 差 人 請 爾；爾 來 是 頂 好。現在 我許 都 在倚，在 上帝 面前，要 聽 上帝 凡百 所 吩咐 爾。”

34 Pi-teh ky‛i-k‛eo, kông, “Ngô zih-ze hyiao-teh Zông-ti z ‛ao-vu p‛in-ky‛üoh;
35 dæn-z væn-koh pah-sing cong-yiang yiu p‛ô-gyü Ge, tsing-dzih tso nying, Ge tu k‛eng tsih-ziu.
36 Zông-ti su djün peh Yi-seh-lih nying-keh dao-li, z t‛ôh Yia-su Kyi-toh djün ‛o-bing-keh foh-ing (Ge z væn-veh ts Cü) —
37 keh dao-li ng-he tu hyiao-teh, z Iah-‛ön djün si-li ts-‛eo, jong Kô-li-li ky‛i, ze Yiu-t‛a kôh di-fông;
38 Zông-ti tsa-sang yüong Sing-Ling teh neng-kön, fu yiu fong Nô-sæh-læh-keh Yia-su: Ge tseo-le-tseo-k‛e ‛ang-zin, i-hao væn-pah bi mo-kyü su æh-tsi; ing-yü Zông-ti z teh Ge jü-de.
39 Ngô-he z te-tsing Ge ze Yiu-t‛a teh Yia-lu-sæh-lang væn-pah su tso z-kön. Ge-he peh Ge kwa ze jü-zông, tsông Ge s.
40 Tao di-sæn nyih Zông-ti peh Ge tse weh, hyin-ming peh nying mông,
41 feh-z peh cong pah-sing mông, tæn peh Zông-ti yü-sin kæn-shün tso te-tsing-keh mông; ziu-z ngô-he, Ge s-gao tse weh ts-‛eo teh Ge jü-de ky‛üoh hæh cü-ts.
42 Ge feng-fu ngô-he djün dao-li peh pah-sing, te-tsing Zông-ti su ding p‛ön-tön weh-nying teh s-nying-keh ziu-z Ge.
43 Cong sin-ts-nying yü Ge tso te-tsing, kông væn-pah siang-sing Ge k‛ao Ge ming-deo we teh-djôh ze-keh sô-min.”

34 彼得 啓口，講，“我 實在 曉得 上帝 是 毫無 偏曲；

35 但是 萬國 百姓 中央 有 怕懼 佢，正直 做 人，佢 都 肯 接受。

36 上帝 所 傳 畀 以色列 人个 道理，是 託 耶穌 基督 傳 和平个 福音（佢 是 萬物 之 主）——

37 箇 道理 爾許 都 曉得，是 約翰 傳 洗禮 之後，從 加利利 起，在 猶太 各 地方；

38 上帝 怎生 用 聖靈 搭 能幹，敷 油 封 拿撒勒个 耶穌：佢 走來走去 行善，醫好 凡百 被 魔鬼 所 壓制；因爲 上帝 是 搭 佢 聚隊。

39 我許 是 對證 佢 在 猶太 搭 耶路撒冷 凡百 所 做 事幹。佢許 畀 佢 掛 在 樹上，妝 佢 死。

40 到 第三 日 上帝 畀 佢 再 活，顯明 畀 人 望，

41 不是 畀 眾 百姓 望，單 畀 上帝 預先 揀選 做 對證个 望；就是 我許，佢 死爻 再 活 之後 搭 佢 聚隊 喫 呷 主子。

42 佢 吩咐 我許 傳 道理 畀 百姓，對證 上帝 所 定 判斷 活人 搭 死人个 就是 佢。

43 眾 先知人 爲 佢 做 對證，講 凡百 相信 佢 靠 佢 名頭 會 得着 罪个 赦免。”

44 Pi-teh wæ ze-teh kông keh shih-wa, Sing-Ling ling-djôh ih-ts‛ih t‛ing dao-li cü-ts.

45 Teh Pi-teh jü-de le-keh z ziu tsiu-keh-li siang-sing-keh nying, yü Sing-Ling s-peh bih-koh-nying, hyi-gyi.

46 Ing-yü t‛ing ge-he kông bih-c‛ü t‛u-wa, yi ze-teh tsæn-mi Zông-ti.

44 彼得 還 在𡍲 講 箇 說話，聖靈 臨着 一切 聽 道理 主子。

45 搭 彼得 聚隊 來个 是 受 週割禮 相信个 人，爲 聖靈 賜畀 別國人，希奇。

46 因爲 聽 佢許 講 別處 土話，貤 在𡍲 讚美 上帝。

Pi-teh ziu kông,

47 “Keh-sih nying kyi-zin ziu Sing-Ling teh ngô-he ih-yiang, yüong shü peh ge ‛ang si-li, kæh-nying hao tsu-lao?”

48 Ziu feng-fu yüong Cü-keh ming-deo peh ge ‛ang si-li. Ge-he liu Pi-teh ze-kæn djü kyi nyih.

彼得 就 講，

47 “箇些 人 既然 受 聖靈 搭 我許 一樣，用 水 畀 佢 行 洗禮，吤人 好 阻牢？”

48 就 吩咐 用 主个 名頭 畀 佢 行 洗禮。佢許 留 彼得 在吤 住 幾 日。

第十一章.

1 Pi-teh bi kao-zông yü ge teh bih-koh-nying jü-de ky‛üoh,
5 Pi-teh feng-p‛eo,
18 Yiu-t‛a nying teh s-du i ge su kông.
19 Kyi-zin foh-ing ‛ang tao Fi-nyi-kyi, Kyü-pi-lu teh Ön-di-ah, Yia-lu-sæh-lang-keh kao-we ts‛a Pô-nô-pô kyin-ku siang-sing cü-ts.
26 Meng-du ze-kæn ts‛ing-hwu Kyi-toh-du ky‛i-deo.
27 Yiu-t‛a yiu hông-nyin z-‛eo, ge-he tsiu-tsi Yiu-t‛a hyüong-di.

1 彼得 被 告狀 爲 佢 搭 別國人 聚隊 喫，
5 彼得 分剖，
18 猶太 人 搭 使徒 依 佢 所 講。
19 既然 福音 行 到 非尼基，居比路 搭 安提厄，耶路撒冷个 教會 差 巴拿巴 堅固 相信 主子。
26 門徒 在吤 稱呼 基督徒 起頭。
27 猶太 有 荒年 時候，佢許 賙濟 猶太 兄弟。

ZE Yiu-t‛a-keh s-du teh hyüong-di t‛ing-djôh bih-koh-nying ah tsih-ziu Zông-ti-keh dao-li.
2 Pi-teh zông Yia-lu-sæh-lang z-‛eo, ziu tsiu-keh-li-keh meng-du p‛i-bing ge, kông,
3 “Ng tseo-tsing vong ziu tsiu-keh-li-keh nying-kô, yi teh ge-he jü-de ky‛üoh.”

在 猶太个 使徒 搭 兄弟 聽着 別國人 也 接受 上帝个 道理。

2 彼得 上 耶路撒冷 時候，受 週割禮个 門徒 批評 佢，講，

3 “爾 走進 朆 受 週割禮个 人家，貤 搭 佢許 聚隊 喫。”

4 Pi-teh ziu peh keh z-kön a-ts‛-jü t‛ong-ts ge-he, kông,
5 “Ngô ze Iah-p‛ô zing-li tao-kao: nying hweng-k‛e mông-djôh hyin-ling, yiu ih-yiang meh-z ziang ih-kw‛e do pu, kyi s-kôh, jong t‛in dông-lôh, dzih tao ngô su-ze:
6 ngô ts‛ing-ting mông, mông-djôh yiu di-zông s-kyiah-keh cong-sang yia-siu djong-nyi teh t‛in-k‛ong-keh tiao.
7 Ziu t‛ing-djôh sing-ing teh ngô kông, ‘Pi-teh, nang-ky‛i; sæh-gao, ky‛üoh.’
8 Ngô kông, ‘Cü, tön feh-k‛o: væn-pah we-u feh kyih-zing-keh meh-z jong vong tsing ngô k‛eo-li.’
9 Di-nyi t‛ao yiu sing-ing jong t‛in we-teh ngô, kông, ‘Zông-ti su kyih-zing-keh, ng hyiao sön ge we-u.’
10 Keh-yiang-ts yiu sæn-t‛ao: ziu tu siu-zông t‛in.
11 Keh z-‛eo yiu sæn-ke nying tao ngô su djü-keh meng-k‛eo, jong Ke-sæh-li-ô ts‛a-le ts‛ing ngô.
12 Sing-Ling ao ngô teh ge-he jü-de k‛e, feh yüong nyi-sing. Ze-i keh loh-ke hyüong-di ah teh ngô tso-de k‛e; ngô-he ziu tseo-tsing keh nying-keh u-li:
13 ge t‛ong-ts ngô-he tsa mông-djôh ih-ke t‛in-s gyi ze ge u-li teh ge kông, ‘Ng hao ts‛a nying tao Iah-p‛ô, ts‛ing Si-meng le, ts‛ing-hwu Pi-teh;
14 ge we peh ng z-kyi teh ‛eh-kô hao teh-kyiu-keh shih-wa teh ng kông.’
15 Ngô te kông ky‛i-deo, Sing-Ling ling-djôh ge-he, ziang yi-zin ling-djôh ngô-he.
16 Ngô ziu ts‛eng-djôh Cü su kông shih-wa, ‘Iah-‛ön z yüong shü ‛ang si-li, tsih-yiu ng-he we ziu Sing-Ling-keh si-li.’ [Sd. 1. 5.]
17 Zông-ti kyi-zin yiu eng-s s-peh ge-he, teh s-peh ngô-he ih-yiang, siang-sing Cü Yia-su Kyi-toh z-‛eo, ngô sön zao-teh nying hao tsu-djü Zông-ti?”

4 彼得 就 畀 箇 事幹 挨次序 通知 佢許，講，

5 “我 在 約帕 城裏 禱告：人 昏去 望着 顯靈，有 一樣 物事 像 一塊 大 布，繫 四角，從 天 蕩落，直 到 我 所在：

6 我 青盯 望，望着 有 地上 四腳个 眾生 野獸 蟲蟻 搭 天空个 鳥。

7 就 聽着 聲音 搭 我講，‘彼得，玍起；殺爻，喫。’

8 我講，‘主，斷 不可：凡百 穢污 不 潔淨个 物事 從 朆 進 我 口裏。’

9 第二 套 有 聲音 從 天 回答 我，講，‘上帝 所 潔淨个，爾 𠏕 算 佢 穢污。’

10 箇樣子 有 三套：就 都 收上 天。

11 箇 時候 有 三個 人 到 我 所 住个 門口，從 該撒利亞 差來 請 我。

12 聖靈 噢 我 搭 佢許 聚隊 去，不 用 疑心。在倚 箇 六個 兄弟 也 搭 我 佐隊 去；我許 就 走進 箇 人个 塢裏：

13 佢 通知 我許 怎 望着 一個 天使 徛 在 佢 塢裏 搭 佢 講，‘爾 好 差 人 到 約帕，請 西門 來，稱呼 彼得；

14 佢 會 畀 爾 自己 搭 合家 好 得救个 說話 搭 爾 講。’

15 我 搭侇 講 起頭，聖靈 臨着 佢許，像 以前 臨着 我許。

16 我 就 忖着 主 所 講 說話，‘約翰 是 用 水 行 洗禮，只有 爾許 會 受 聖靈个 洗禮。’ [Sd. 1. 5.]

17 上帝 既然 有 恩賜 賜畀 佢許，搭 賜畀 我許 一樣，相信 主 耶穌 基督 時候，我 算 倽𡍲 人 好 阻住 上帝？”

18 Ge-he t‛ing keh shih-wa, fe hyiang, ziu tsæn-mi Zông-ti, kông, “Zông-ti ah s-peh bih-koh-nying hwe-ke teh-djôh weh-ming.”

18 佢許 聽 箇 說話，𣍐 響，就 讚美 上帝，講，“上帝 也 賜畀 別國人 悔改 得着 活命。”

19 YÜ Z-di-fæn-keh pih-næn z-kön sæn-k‛e cü-ts ih-dzih tseo-tao Fi-nyi-kyi, Kyü-pi-lu, Ön-di-ah, tæn djün dao-li peh Yiu-t‛a nying.
20 Nen-cong yiu kyi-ke Kyü-pi-lu teh Ku-li-na nying; ge-he tao Ön-di-ah, djün Cü Yia-su-keh foh-ing peh Hyi-læh-nying.
21 Cü ts‛ing-siu pông-zu ge-he: yiu hyü-to nying siang-sing kyü-voh Cü.

19 爲 士提反个 逼難 事幹 散開 主子 一直 走到 非尼基，居比路，安提厄，單 傳 道理 畀 猶太 人。

20 內中 有 幾個 居比路 搭 古利奈 人；佢許 到 安提厄，傳 主 耶穌个 福音 畀 希臘人。

21 主 親手 幫助 佢許：有 許多 人 相信 歸服 主。

22 Yia-lu-sæh-lang-keh kao-we t‛ing-djôh keh sing-sih, ziu ts‛a Pô-nô-pô tao Ön-di-ah;
23 tseo-tao, mông-djôh Zông-ti-keh eng-yü, ziu kao-hying; ky‛ün ge-he tu yüong kyin-ku-keh sing voh-z Cü:
24 ing-yü ge z hao nying, ting siang-sing, bi Sing-Ling c‛ong-mön: ziu yiu hyü-to nying kyü-voh Cü.

22 耶路撒冷个 教會 聽着 箇 訊息，就 差 巴拿巴 到 安提厄；

23 走到，望着 上帝个 恩惠，就 高興；勸 佢許 都 用 堅固个 心 服事 主：

24 因爲 佢 是 好 人，頂 相信，被 聖靈 充滿：就 有 許多 人 歸服 主。

25 Pô-nô-pô tao Da-su k‛e zing Sao-lo:
26 zing-djôh, ta ge tao Ön-di-ah. Ge-he yiu ih-nyin mön teh kao-yiu jü-de jü-zih, yi kao-hyüing hyü-to nying; meng-du ts‛ing-hwu Kyi-toh-du z Ön-di-ah ky‛i-deo.

25 巴拿巴 到 大數 去 尋 掃羅：

26 尋着，帶 佢 到 安提厄。佢許 有 一年 滿 搭 教友 聚隊 聚集，貤 教訓 許多 人；門徒 稱呼 基督徒 是 安提厄 起頭。

27 KEH z-‛eo yiu kyi-ke sin-ts-nying jong Yia-lu-sæh-lang tseo-lôh tao Ön-di-ah.
28 Nen-cong ih-ke ming-z Ô-kô-pu, bi Sing-Ling kön-dong, gyi-ky‛i kông t‛in-‛ô ‛eo-le yiu do hông-nyin: tao Ke-sæh Kah-lao-tiu z-‛eo ko-zin yiu.
29 Meng-du ziu kôh-nying tsiao z-kyi su yiu, lih-ding cü-i ta-k‛e kyüong-ing ze Yiu-t‛a-keh hyüong-di.
30 Ziu t‛ih tso; ts‛a Pô-nô-pô teh Sao-lo do peh tsiang-lao.

27 箇 時候 有 幾個 先知人 從 耶路撒冷 走落 到 安提厄。

28 內中 一個 名字 亞迦布，被 聖靈 感動，徛起 講 天下 後來 有 大 荒年：到 該撒 革老丟 時候 果然 有。

29 門徒 就 各人 照 自己 所 有，立定 主意 帶去 供應 在 猶太个 兄弟。

30 就 僣 做；差 巴拿巴 搭 掃羅 馱 畀 長老。

第十二章.

1 Hyi-leh wông pih-næn kao-yiu, sæh Ngô-kôh, kwæn Pi-teh ze kæn-lao; yü kao-we-keh tao-kao t‛in-s ta ge c‛ih.
20 Yü Hyi-leh kyiao-ngao, feh kyü yüong-wa peh Zông-ti, t‛in-s tang ge, ting k‛u s-gao.
24 Ge s ts-‛eo Zông-ti-keh dao-li hying-wông.

1 希律 王 逼難 教友，殺 雅各，關 彼得 在 監牢；爲 教會个 禱告 天使 帶 佢 出。
20 爲 希律 驕傲，不 歸 榮華 畀 上帝，天使 打 佢，叮 苦 死爻。((希律王是被蟲咬死的。))
24 佢 死 之後 上帝个 道理 興旺。

KEH z-‛eo Hyi-leh wông dong-siu iao ‛e kao-we-li kyi-ke nying.
2 Ziu sæh-gao Iah-‛ön-keh hyüong-di Ngô-kôh.
3 Mông Yiu-t‛a nying tu hwön-hyi, yi k‛ô Pi-teh. Keh z-‛eo z Vu-kao-tsih.
4 K‛ô-le, ziu kwæn-tsing kæn-lao, kao-de zih-loh-ke ping kwön ge; siang ku Yü-yiah-tsih ta ge c‛ih peh pah-sing.
5 Pi-teh bi kwön-siu ze kæn-lao: dæn-z kao-we de ge ts‛ih-sing gyiu Zông-ti.

箇 時候 希律 王 動手 要 害 教會裏 幾個 人。

2 就 殺爻 約翰个 兄弟 雅各。

3 望 猶太 人 都 歡喜，貤 揢 彼得。箇 時候 是 無酵節。

4 揢來，就 關進 監牢，交代 十六個 兵 管 佢；想 過 逾越節 帶 佢 出 畀 百姓。

5 彼得 被 管守 在 監牢：但是 教會 代 佢 切心 求 上帝。

6 Hyi-leh wa-sön t‛a ge c‛ih, keh yia Pi-teh kw‛eng ze liang-ke ping tông-cong, lin-lao liang-kwang t‛ih-lin; kwön cü-ts ze meng-k‛eo siu-kæn.
7 Yiu Cü-keh t‛in-s hweh-zin gyi ze ge pin, yiu liang-kwông t‛eo-c‛ih keh kæn: ge tæh-tæh Pi-teh iao-hyih, ao ge sing, kông, “Kw‛a-ting nang-ky‛i.” Ge siu-zông-keh t‛ih-lin jü-tsih t‛eh-lôh.
8 T‛in-s yi teh ge kông, “Kyi-iao-ta kyi-hao, ‛a-ta vôh-lao.” Pi-teh i ge tso. Yi teh ge kông, “Ng p‛i nga-min i-zông, keng ngô le.”
9 Ziu tseo-c‛ih keng ge; wæ ts‛eng-feh-tao t‛in-s su tso z tsing, tsih ts‛eng mông-djôh hyin-ling.
10 Ku di-ih teh di-nyi siu-lao su-ze, tao t‛ong zing-keh t‛ih-meng; meng z-kyi k‛e peh ge-he: tseo-c‛ih, ku ih-diao ka; t‛in-s mah-ding li-k‛e ge.
11 Pi-teh ziu sing-sin, kông, “Yin-ze ngô hyiao-teh Cü lao-zih ts‛a Ge-keh t‛in-s, kyiu ngô c‛ih Hyi-leh siu-li, teh Yiu-t‛a pah-sing ih-ts‛ih sô-mông.”

6 希律 畫算 拖 佢 出，箇 夜 彼得 睏 在 兩個 兵 當中，鏈牢 兩桄 鐵鏈；管 主子 在 門口 守監。

7 有 主个 天使 忽然 徛 在 佢 邊，有 亮光 透出 箇 監：佢 㩉㩉 彼得 腰脅，噢 佢 醒，講，“快點 玍起。” 佢 手上个 鐵鏈 隨即 脫落。

8 天使 貤 搭 佢 講，“繫腰帶 繫好，鞋帶 縛牢。” 彼得 依 佢 做。貤 搭 佢 講，“爾 披 外面 衣裳，跟 我 來。”

9 就 走出 跟 佢；還 忖不到 天使 所 做 是 真，只 忖 望着 顯靈。

10 過 第一 搭 第二 守牢 所在，到 通 城个 鐵門；門 自己 開 畀 佢許：走出，過 一條 街；天使 驀停 離開 佢。

11 彼得 就 惺鮮，講，“現在 我 曉得 主 老實 差 佢个 天使，救 我 出 希律 手裏，搭 猶太 百姓 一切 奢望。”

12 Ge s-ts‛eng, ziu tao Mô-li-ô u-li, ziu-z Iah-‛ön yi ts‛ing-hwu Mô-k‛o-keh nyiang: ze-kæn yiu hyü-to nying jü-zih tso tao-kao.
13 Pi-teh k‛ao nga-de-meng, yiu ih-ke ô-deo, ming-z Lo-da, tseo-le t‛ing-t‛ing.
14 T‛ing-c‛ih z Pi-teh-keh sing-ing, ting kao-hying, lin meng tu vong k‛e, diao-tsing t‛ong-ts ge-he Pi-teh gyi ze meng-k‛eo.
15 Cong-nying teh ge kông, “Ng fæh-tin.” Ge ih-ding kông z yiu. Ge-he kông, “Keh z ge-keh t‛in-s.”
16 Pi-teh k‛ao feh hyih: ge-he k‛e meng, mông-djôh ge, ziu gyi-kwa.
17 Pi-teh siu yiao-yiao, ao ge-he hyiao hyiang, ziu t‛ong-ts ge-he Cü tsa-sang ta ge c‛ih kæn-lao. Yi kông, “Keh z-kön hao k‛e t‛ong-ts Ngô-kôh teh cong hyüong-di.” Ge tseo-c‛ih, tao bih-c‛ü k‛e.

12 佢 思忖，就 到 馬利亞 塢裏，就是 約翰 貤 稱呼 馬可个 孃：在吤 有 許多 人 聚集 做 禱告。

13 彼得 敲 外臺門，有 一個 丫頭，名字 羅大，走來 聽聽。

14 聽出 是 彼得个 聲音，頂 高興，連 門 都 朆 開，趒進 通知 佢許 彼得 徛 在 門口。

15 眾人 搭 佢 講，“爾 發癲。” 佢 一定 講 是 有。佢許 講，“箇 是 佢个 天使。”

16 彼得 敲 不 歇：佢許 開 門，望着 佢，就 奇怪。

17 彼得 手 搖搖，噢 佢許 𠏕 響，就 通知 佢許 主 怎生 帶 佢 出 監牢。貤 講，“箇 事幹 好 去 通知 雅各 搭 眾 兄弟。” 佢 走出，到 別處 去。

18 Tao t‛in-liang, ping-ting ting kying-hông, feh-ts Pi-teh tao ‛ah-yi k‛e.
19 Hyi-leh zing ge zing-feh-djôh, jü-tsih sing-veng kwön-siu cü-ts, feng-fu peh ge-he sæh-gao. Ts-‛eo jong Yiu-t‛a tseo-lôh tao Ke-sæh-li-ô tæn-kôh.

18 到 天亮，兵丁 頂 驚慌，不知 彼得 到 何倚 去。

19 希律 尋 佢 尋不着，隨即 審問 管守 主子，吩咐 畀 佢許 殺爻。之後 從 猶太 走落 到 該撒利亞 耽擱。

20 Hyi-leh ting ky‛i-‛eng T‛e-lo Si-teng nying: ge-he ts‛oh-zi tao ge su-ze le, coh-t‛ôh wông-keh gying-sing-kwön Pah-læh-z-tu gyiu-‛o, yü ge-he di-fông-keh liang-zih jün k‛ao wông-keh di-ka le.
21 Tao ding-kyü-keh nyih-ts Hyi-leh tsiah dziao-i, zo ze wông-yü, ze pah-sing min-zin teh ge-he kông.
22 Cong-nying ao-hyiang kông, “Keh z zông-ti-keh sing-ing, feh-z nying-keh sing-ing.”
23 Cü-keh t‛in-s lih-k‛eh tang ge, ing-yü ge feh kyü yüong-wa peh Zông-ti: ge nying c‛ih djong, ky‛i ziu dön-gao.

20 希律 頂 氣恨 推羅 西頓 人：佢許 簇齊 到 佢 所在 來，囑託 王个 近身官 伯拉士都 求和，爲 佢許 地方个 糧食 全 靠 王个 地界 來。

21 到 定規个 日子 希律 撯 朝衣，坐 在 王位，在 百姓 面前 搭 佢許 講。

22 眾人 噢響 講，“箇 是 上帝个 聲音，不是 人个 聲音。”

23 主个 天使 立刻 打 佢，因爲 佢 不 歸 榮華 畀 上帝：佢 人 出 蟲，氣 就 斷爻。

24 Dæn-z Zông-ti-keh dao-li yüih-fæh hying-wông ‛ang-k‛e.
25 Pô-nô-pô teh Sao-lo kyüong-ing z-kön tso-ku, jong Yia-lu-sæh-lang cün-le: ta Iah-‛ön yi ts‛ing-hwu Mô-k‛o, jü-de le.

24 但是 上帝个 道理 越發 興旺 行開。

25 巴拿巴 搭 掃羅 供應 事幹 做過，從 耶路撒冷 轉來：帶 約翰 貤 稱呼 馬可，聚隊 來。

第十三章.

1 Pao-lo teh Pô-nô-pô kæn-shün djün dao-li peh bih-koh nying.
7 Z-gyiu Pao-lo teh tso zia-fæh-keh Pô-yia-su,
13 Pao-lo ze Ön-di-ah djün Yia-su z Kyi-toh.
42 Bih-koh nying siang-sing:
45 dæn-z Yiu-t‛a nying hyü-pông;
46 su-i le-cün hyiang-djôh bih-koh nying.
48 Væn-pah yü-sin ding-kyü teh-djôh weh-ming tu siang-sing.

1 保羅 搭 巴拿巴 揀選 傳 道理 畀 別國 人。
7 士求 保羅 搭 做 邪法个 巴耶穌，
13 保羅 在 安提厄 傳 耶穌 是 基督。
42 別國 人 相信：
45 但是 猶太 人 毀謗；
46 所以 擂轉 向着 別國 人。
48 凡百 預先 定規 得着 活命 都 相信。

ZE Ön-di-ah kao-we-li yiu kyi-ke sin-ts-nying teh kao-s; ziu-z Pô-nô-pô, Si-min yi ts‛ing-hwu Nyi-kyih, Ku-li-na nying Lu-gyiu, teh Hyi-leh feng-fong wông jü-de yiang-do-keh Mô-nyin, wæ-yiu Sao-lo.
2 Ge-he ze-teh voh-z Cü, kying-zih, Sing-Ling kông, “Ng-he peh Ngô feng-p‛a Pô-nô-pô teh Sao-lo, hao tso Ngô yi-kying dziao ge-he k‛e tso z-kön.”
3 Ge-he ziu kying-zih tao-kao, siu en-en ge-he, peh ge k‛e.

在 安提厄 教會裏 有 幾個 先知人 搭 教師；就是 巴拿巴，西面 貤 稱呼 尼結，古利奈 人 路求，搭 希律 分封 王 聚隊 養大个 馬念，還有 掃羅。

2 佢許 在𡍲 服事 主，禁食，聖靈 講，“爾許 畀 我 分派 巴拿巴 搭 掃羅，好 做 我 已經 召 佢許 去 做 事幹。”

3 佢許 就 禁食 禱告，手 按按 佢許，畀 佢 去。

4 Ge-he bi Sing-Ling ts‛a-k‛e, ziu tao Si-liu-kyi; jong kæn k‛e-jün sa tao Kyü-pi-lu.
5 Tao Sæh-læh-mi, ze Yiu-t‛a nying-keh jü-we-dông djün Zông-ti-keh dao-li: ge-he yiu Iah-‛ön tso pông-siu.
6 Kying-ku keh he-tao ih-dzih tao P‛ô-feh, p‛ong-djôh ih-ke yüong zia-fæh-keh kô sin-ts-nying, z Yiu-t‛a nying, ming-z Pô-yia-su;
7 ge teh tsong-toh Z-gyiu Pao-lo ih-ke ts‛ong-ming nying jü-de. Tsong-toh ao Pô-nô-pô teh Sao-lo le, siang t‛ing Zông-ti-keh dao-li.
8 Dæn-z Yi-lü-mô (fæn-c‛ih ziu-z ‘yüong zia-fæh-keh i-s’) teh ge-he tsôh-te, iao hong-yiu tsong-toh peh ge ts‛o-ku tsing dao-li.
9 Sao-lo, yi ts‛ing-hwu Pao-lo, bi Sing-Ling c‛ong-mön, ngæn ts‛ing-ting mông ge, kông,
10 “Ng c‛ong-mön kyü-tsô kæn-ôh, mo-kyü-keh n-ts, ih-ts‛ih kong-nyi-keh dziu-dih, tsa-sang feh hyih kao-ziao Cü-keh dzih-lu?
11 Yin-ze Cü-keh siu ze ng sing-zông, ng iao hæh-ngæn, yiu dzæn-z fe mông-djôh nyih-deo.” Ge ngæn lih-k‛eh ziang vu-lu tsao-lao heh-gao; môh-le-môh-k‛e iao bih-ke ky‛in ge.
12 Tsong-toh, mông keh z-kön, hyi-gyi Cü-keh kao-hyüing, ziu siang-sing.

4 佢許 被 聖靈 差去，就 到 西流基；從 吤 開船 駛 到 居比路。

5 到 撒拉米，在 猶太 人个 聚會堂 傳 上帝个 道理：佢許 有 約翰 做 幫手。

6 經過 箇 海島 一直 到 帕弗，碰着 一個 用 邪法个 假 先知人，是 猶太 人，名字 巴耶穌；

7 佢 搭 總督 士求·保羅 一個 聰明 人 聚隊。總督 噢 巴拿巴 搭 掃羅 來，想 聽 上帝个 道理。

8 但是 以呂馬（翻出 就是 ‘用 邪法个 意思’）搭 佢許 作對，要 哄誘 總督 畀 佢 錯過 真 道理。

9 掃羅，貤 稱呼 保羅，被 聖靈 充滿，眼 青盯 望 佢，講，

10 “爾 充滿 詭詐 奸惡，魔鬼个 兒子，一切 公義个 讎敵，怎生 不 歇 攪擾 主个 直路？

11 現在 主个 手 在 爾 身上，爾 要 瞎眼，有 暫時 𣍐 望着 日頭。” 佢 眼 立刻 像 霧露 罩牢 黑爻；摸來摸去 要 別個 牽 佢。

12 總督，望 箇 事幹，希奇 主个 教訓，就 相信。

13 Pao-lo teh jü-de nying jong P‛ô-feh k‛e-jün, sa tao Bông-fi-li-ô-keh Bih-kô: Iah-‛ön li-k‛e ge-he cün Yia-lu-sæh-lang k‛e.

13 保羅 搭 聚隊 人 從 帕弗 開船，駛 到 旁非利亞个 別加：約翰 離開 佢許 轉 耶路撒冷 去。

14 GE-HE jong Bih-kô tseo-ku, tao Pi-si-ti-keh Ön-di-ah; ön-sih-nyih tseo-tsing jü-we-dông zo-lôh.
15 Leh-fæh teh sin-ts-keh shü doh-ku, kwön jü-we-dông cü-ts ts‛a nying teh ge-he kông, “Hyüong-di, ng-he ziah yiu ky‛ün-hwa pah-sing shih-wa, ts‛ing kông.”

14 佢許 從 別加 走過，到 彼西底个 安提厄；安息日 走進 聚會堂 坐落。

15 律法 搭 先知个 書 讀過，管 聚會堂 主子 差 人 搭 佢許 講，“兄弟，爾許 若 有 勸化 百姓 說話，請 講。”

16 Pao-lo gyi-ky‛i, yiao siu, kông, “Yi-seh-lih nying, teh væn-pah p‛ô-gyü Zông-ti cü-ts, ts‛ing t‛ing.
17 Yi-seh-lih pah-sing-keh Zông-ti kæn-shün ngô-he tsu-tsong, pah-sing c‛ih-meng ze Yi-gyih z-‛eo peh ge-he hying-wông, yi yüong jün-neng siu ta ge-he c‛ih.
18 Ze hông-yia mao s-zih nyin kong-fu yiang-yüoh ge-he.
19 Djü-mih Kô-nön di-fông ts‛ih-zoh pah-sing, feng-k‛e ge-he di-fông s-peh ge tso sæn-nyih mao s-pah ng-zih nyin:
20 ts-‛eo sih-lih p‛ön-tön-kwön peh ge-he, dzih tao sin-ts Sæh-meo-z.
21 ‛Eo-le ge-he iao ih-ke wông-ti: Zông-ti ziu sih-lih Bin-ngô-ming ts-p‛a-keh nying, Kyi-z-keh n-ts Sao-lo, s-zih nyin tso ge-he wông-ti.
22 Kyi-zin peh ge fi-gao, kyü-zông Da-bih tso ge-he wông-ti; teh ge tso te-tsing, kông, ‘Ngô p‛ong-djôh Yia-si-keh n-ts Da-bih, z ‛eh-djôh Ngô sing-siang-keh nying, ge we i Ngô ih-ts‛ih ts-i tso.’ [1 S. 13. 14.]
23 Jong keh nying-keh ‛eo-de Zông-ti tsiao Ge su ing-hyü yü Yi-seh-lih nying sih-lih ih-yü Kyiu-cü, Yia-su:
24 Ge vong le ts-zin Iah-‛ön yü-sin djün hwe-ke-keh si-li peh cong Yi-seh-lih pah-sing.
25 Iah-‛ön tso-zing z-keh tsih-veng z-‛eo kông, ‘Ng-he ts‛eng ngô z kæh-nying? Ngô feh-z Kyi-toh. Dæn-z ‛eo-jü ngô le Cü-ts, lin ka Ge kyiah-keh ‛a-ta, ngô feh kön-tông.’

16 保羅 徛起，搖 手，講，“以色列 人，搭 凡百 怕懼 上帝 主子，請 聽。

17 以色列 百姓个 上帝 揀選 我許 祖宗，百姓 出門 在 以及 時候 畀 佢許 興旺，貤 用 全能 手 帶 佢許 出。

18 在 荒野 毛 四十 年 工夫 養育 佢許。

19 除滅 迦南 地方 七族 百姓，分開 佢許 地方 賜畀 佢 做 產業 毛 四百 五十 年：

20 之後 設立 判斷官 畀 佢許，直 到 先知 撒母耳。

21 後來 佢許 要 一個 皇帝：上帝 就 設立 便雅憫 支派个 人，基士个 兒子 掃羅，四十 年 做 佢許 皇帝。

22 既然 畀 佢 廢爻，舉上 大闢 做 佢許 皇帝；搭 佢 做 對證，講，‘我 碰着 耶西个 兒子 大闢，是 合着 我 心想个 人，佢 會 依 我 一切 旨意 做。’ [1 S. 13. 14.]

23 從 箇 人个 後代 上帝 照 佢 所 應許 爲 以色列 人 設立 一位 救主，耶穌：

24 佢 朆 來 之前 約翰 預先 傳 悔改个 洗禮 畀 眾 以色列 百姓。

25 約翰 做成 自个 職份 時候 講，‘爾許 忖 我 是 吤人？我 不是 基督。但是 後如 我 來 主子，連 解 佢 腳个 鞋帶，我 不 敢當。’

26 Cong-yü hyüong-di, Ô-pah-læh-hön-keh ‛eo-de, teh ng-he væn-pah p‛ô-gyü Zông-ti cü-ts, keh kyiu-dao z djün peh ngô-he.
27 Djü ze Yia-lu-sæh-lang-keh nying, teh ge-he kwön-fu, ing-yü feh sih-teh Ge, ah feh ming-bah me ön-sih-nyih su doh sin-ts-nying shih-wa, su-i ding Ge ze ing-nyin sin-ts shih-wa.
28 Shü-tsih zing feh c‛ih Ge yiu s-ze, wæ we gyiu Pi-læh-to tsông Ge s.
29 Ge-he yi-kying tso-zing væn-pah su sia-lôh ts-tin Ge-keh shih-wa, ziu jong jü-zông do Ge lôh, tsông ze veng-mo.
30 Dæn-z Zông-ti peh Ge jong s-nying cong-yiang weh-cün-le:
31 yiu hyü-to nyih-ts peh keh-sih jong Kô-li-li teh Ge jü-de zông Yia-lu-sæh-lang keh nying mông-djôh, ziu-z yin-ze tso Ge-keh te-tsing peh pah-sing cü-ts.

26 眾位 兄弟，亞伯拉罕个 後代，搭 爾許 凡百 怕懼 上帝 主子，箇 救道 是 傳 畀 我許。

27 住 在 耶路撒冷个 人，搭 佢許 官府，因爲 不 識得 佢，也 不 明白 每 安息日 所 讀 先知人 說話，所以 定 佢 罪 應驗 先知 說話。

28 雖即 尋 不 出 佢 有 死罪，還 會 求 彼拉多 妝 佢 死。

29 佢許 已經 做成 凡百 所 寫落 指點 佢个 說話，就 從 樹上 馱 佢 落，葬 在 墳墓。

30 但是 上帝 畀 佢 從 死人 中央 活轉來：

31 有 許多 日子 畀 箇些 從 加利利 搭 佢 聚隊 上 耶路撒冷个 人 望着，就是 現在 做 佢个 對證 畀 百姓 主子。

32 “Ngô-he djün hao sing-sih peh ng-he; Zông-ti ing-hyü tsu-tsong shih-wa,
33 yi-kying kyü-zông Yia-su tso-zing keh ing-hyü peh ge-keh ts-seng, ziu-z peh Yia-su jong s-nying cong-yiang weh-cün-le; ziang di-nyi p‛in s sia-lôh, ‘Ng z Ngô-keh N-ts, Ngô kying-nying sang Ng.’ [S. 2. 7.]
34 Kông-tao Zông-ti peh Ge jong s-nying cong-yiang weh-cün-le, Ge fe tse s, fe læn-wu, yiu t‛ih kông, ‘Ngô su ing-hyü Da-bih sing-zin-keh eng-yü we s-peh ng-he.’ [Y. 55. 3.]
35 Su-i wæ-yiu ih-p‛in s kông, ‘Ng fe peh Ng sing-zin Cü-ts læn-wu.’ [S. 16. 10.]
36 Ziah kông Da-bih, ge ze si tsiao Zông-ti ts-i tso-zing, kw‛eng-k‛e, ön-tsông ze tsu-tsong su-ze, ziu læn-wu:
37 tsih-z Zông-ti su weh-cün-le-keh vong læn-wu.

32 “我許 傳 好 訊息 畀 爾許；上帝 應許 祖宗 說話，

33 已經 舉上 耶穌 做成 箇 應許 畀 佢个 子孫，就是 畀 耶穌 從 死人 中央 活轉來；像 第二 篇 詩 寫落，‘爾 是 我个 兒子，我 今日 生 爾。’ [S. 2. 7.]

34 講到 上帝 畀 佢 從 死人 中央 活轉來，佢 𣍐 再 死，𣍐 爛腐，有 僣 講，‘我 所 應許 大闢 聖善个 恩惠 會 賜畀 爾許。’ [Y. 55. 3.]

35 所以 還有 一篇 詩 講，‘爾 𣍐 畀 爾 聖善 主子 爛腐。’ [S. 16. 10.]

36 若 講 大闢，佢 在 世 照 上帝 旨意 做成，睏去，安葬 在 祖宗 所在，就 爛腐：

37 只是 上帝 所 活轉來个 朆 爛腐。

38 “Cong-yü hyüong-di, ng-he hao hyiao-teh, k‛ao-djôh keh Nying yiu sô-ze dao-li djün peh ng-he:
39 k‛ao Mo-si-keh leh-fæh ng-he feh neng sön tsing-dzih, væn-pah siang-sing k‛ao-djôh Yia-su tu hao sön tsing-dzih.
40 Su-i yüong liu-sing, sang-teh sin-ts-nying su kông ling-djôh ng-he, ziu-z,
41 ‘Ky‛ing-mæn cü-ts, iao mông kying-nga, mih-vông: ing-yü ng-he ze-si z-‛eo Ngô we tso ih-yiang z-kön, shü-tsih yiu nying t‛ong-ts ng, ng-he ah feh siang-sing.’ [Hp. 1. 5.]”

38 “眾位 兄弟，爾許 好 曉得，靠着 箇 人 有 赦罪 道理 傳 畀 爾許：

39 靠 摩西个 律法 爾許 不 能 算 正直，凡百 相信 靠着 耶穌 都 好 算 正直。

40 所以 用 留心，省得 先知人 所 講 臨着 爾許，就是，

41 ‘輕慢 主子，要 望 驚訝，滅亡：因爲 爾許 在世 時候 我 會 做 一樣 事幹，雖即 有 人 通知 爾，爾許 也 不 相信。’ [Hp. 1. 5.]”

42 Yiu-t‛a nying tseo-c‛ih jü-we-dông z-‛eo, bih-koh-nying ts‛ing ge cün-ke ön-sih-nyih tse teh ge-he kông keh dao-li.
43 Jü-we-dông-li-keh nying yi-kying sæn-k‛e, yiu hyü-to Yiu-t‛a nying teh gyin-sing zih Yiu-t‛a kao-keh, keng Pao-lo teh Pô-nô-pô: keh liang-ke teh ge-he kông, ky‛ün ge zông-zông i-k‛ao Zông-ti-keh eng-yü.

42 猶太 人 走出 聚會堂 時候，別國人 請 佢 轉個 安息日 再 搭 佢許 講 箇 道理。

43 聚會堂裏个 人 已經 散去，有 許多 猶太 人 搭 虔心 入 猶太 教个，跟 保羅 搭 巴拿巴：箇 兩個 搭 佢許 講，勸 佢 常常 依靠 上帝个 恩惠。

44 Di-nyi ön-sih-nyih ts‛ô-feh-to t‛ong zing-li jü-zih le t‛ing Zông-ti-keh dao-li.
45 Yiu-t‛a nying mông-djôh keh hyü-to nying, ziu mön-sing tu-gyi, bin-pôh Pao-lo su kông-keh dao-li, yi hyü-pông.
46 Pao-lo teh Pô-nô-pô fông-tæn-do kông, “Zông-ti-keh dao-li nyün-z ing-ke sin djün peh ng-he. Ng-he kyi-zin tön ge gao, z-kyi sön feh ing-ke teh-djôh üong-yün weh-ming, su-i ngô-he le-cün hyiang-djôh bih-koh-nying.
47 Ing-yü Cü z-t‛ih feng-fu ngô-he, kông, ‘Ngô sih-lih Ng tso bih-koh-nying-keh liang-kwông, peh Ng tso kyiu-sing dzih tao di-keh zing-deo.’ [Y. 49. 6.]”

44 第二 安息日 差不多 統 城裏 聚集 來 聽 上帝个 道理。

45 猶太 人 望着 箇 許多 人，就 滿心 妒忌，辯駁 保羅 所 講个 道理，貤 毀謗。

46 保羅 搭 巴拿巴 放膽大 講，“上帝个 道理 原是 應該 先 傳 畀 爾許。爾許 既然 斷 佢 爻，自己 算 不 應該 得着 永遠 活命，所以 我許 擂轉 向着 別國人。

47 因爲 主 是僣 吩咐 我許，講，‘我 設立 爾 做 別國人个 亮光，畀 爾 做 救星 直 到 地个 盡頭。’ [Y. 49. 6.]”

48 Bih-koh-nying t‛ing keh shih-wa, ziu kao-hying, yüong-wa Cü-keh dao-li: væn-pah yü-sin ding-kyü teh-djôh üong-yün weh-ming tu siang-sing.
49 Cü-keh dao-li djün-pin keh di-fông.

48 別國人 聽 箇 說話，就 高興，榮華 主个 道理：凡百 預先 定規 得着 永遠 活命 都 相信。

49 主个 道理 傳遍 箇 地方。

50 Dæn-z Yiu-t‛a nying t‛iao-so gyin-sing kyü-djong-keh nyü-nying, teh zing-li yiu ming-sing cü-ts, pih-næn Pao-lo teh Pô-nô-pô, kön ge-he c‛ih keh di-ka.
51 Keh liang-ke ze ge-he min-zin tæn-gao kyiah-zông-keh hwe-dzing, tao Yi-ko-nyin k‛e.
52 Meng-du ting kao-hying, bi Sing-Ling c‛ong-mön.

50 但是 猶太 人 挑唆 虔心 貴重个 女人，搭 城裏 有 名聲 主子，逼難 保羅 搭 巴拿巴，趕 佢許 出 箇 地界。

51 箇 兩個 在 佢許 面前 担爻 腳上个 灰塵，到 以哥念 去。

52 門徒 頂 高興，被 聖靈 充滿。

第十四章.

1 Pao-lo teh Pô-nô-pô ze Yi-ko-nyin ziu pih-næn dao tao bih-c‛ü,
8 ze Lu-z-teh Pao-lo i-hao ih-ke nyün-kyiah-kweh-keh nying, pah-sing kông ge z zing.
19 Pao-lo bi zih-deo p‛ang.
21 Pao-lo teh Pô-nô-pô tao kôh-c‛ü kao-we kyin-ku ge-keh siang-sing teh zing-ne.
26 Cün-tao Ön-di-ah t‛ong-ts kao-we Zông-ti su tso z-kön.

1 保羅 搭 巴拿巴 在 以哥念 受 逼難 逃 到 別處，
8 在 路士得 保羅 醫好 一個 軟腳骨个 人，百姓 講 佢 是 神。
19 保羅 被 石頭 砰。
21 保羅 搭 巴拿巴 到 各處 教會 堅固 佢个 相信 搭 忍耐。
26 轉到 安提厄 通知 教會 上帝 所 做 事幹。

ZE Yi-ko-nyin ge-he jü-de tseo-tsing Yiu-t‛a nying jü-we-dông, kông dao-li peh Yiu-t‛a nying teh Hyi-læh nying yiu hyü-to siang-sing.
2 Dæn-z feh siang-sing-keh Yiu-t‛a nying t‛iao-so bih-koh-nying, peh ge sing ky‛i-‛eng keh-sih hyüong-di.
3 Ge-he ze-kæn tæn-kôh dziang-kyiu k‛ao-djôh Cü fông-tæn djün-dao; Cü te-tsing Ge-z eng-yü-keh dao-li, peh ge-he siu tso-c‛ih zing-tsih teh gyi-z.
4 Keh zing-li cong-nying feng-k‛e; yiu-sih keng Yiu-t‛a nying, yiu-sih keng s-du.
5 Bih-koh-nying, Yiu-t‛a nying teh ge-he kwön-fu ih-zi iao tsao-t‛æh ge, do zih-deo p‛ang ge;
6 ge-he hyiao-teh, ziu dao tao Lü-kao-nyi-keh Lu-z-teh Deh-pi liang zing-li, teh deo-ky‛ün di-fông:
7 ze-kæn djün foh-ing.

在 以哥念 佢許 聚隊 走進 猶太 人 聚會堂，講 道理 畀 猶太 人 搭 希臘 人 有 許多 相信。

2 但是 不 相信个 猶太 人 挑唆 別國人，畀 佢 心 氣恨 箇些 兄弟。

3 佢許 在吤 耽擱 長久 靠着 主 放膽 傳道；主 對證 佢自 恩惠个 道理，畀 佢許 手 做出 神蹟 搭 奇事。

4 箇 城裏 眾人 分開；有些 跟 猶太 人，有些 跟 使徒。

5 別國人，猶太 人 搭 佢許 官府 一齊 要 遭塌 佢，馱 石頭 砰 佢；

6 佢許 曉得，就 逃 到 呂高尼个 路士得 特庇 兩 城裏，搭 頭圈 地方：

7 在吤 傳 福音。

8 Lu-z-teh yiu ih-ke nyün-kyiah-kweh-keh nying zo-kæn, jong sang-c‛ih ziu pa-kyiah, ih-hyiang vong tseo-ku.
9 Keh nying ze-teh t‛ing Pao-lo kông: Pao-lo ts‛ing-ting mông ge, hyiao-teh ge yiu siang-sing-keh sing hao jün-yü,
10 ziu ao-hyiang kông, “Ng nang-ky‛i, kyiah pih-dzih gyi-teh.” Ge ziu t‛iao-ky‛i-le, tseo-tseo.

8 路士得 有 一個 軟腳骨个 人 坐吤，從 生出 就 跛腳，一向 朆 走過。

9 箇 人 在𡍲 聽 保羅 講：保羅 青盯 望 佢，曉得 佢 有 相信个 心 好 痊癒，

10 就 噢響 講，“爾 玍起，腳 筆直 徛𡍲。” 佢 就 跳起來，走走。

11 Cong-nying mông-djôh Pao-lo su tso z-kön yüong Lü-kao-nyi t‛u-ing ao-hyiang kông, “Zing yin-hwa nying-keh væn-ts kông-lôh tao ngô-he su-ze le.”
12 Ge-he ts‛ing-hwu Pô-nô-pô Tiu-z; ts‛ing Pao-lo Hyi-z-mi, yü ge ta-deo kông shih-wa.
13 Zing-nga Tiu-z miao-keh tsi-s ky‛in ngeo, ta hwa tso-keh mao, tseo-tao zing-meng-k‛eo, i-s teh cong-nying jü-de tsi ge-he.
14 S-du Pô-nô-pô teh Pao-lo t‛ing-djôh, ziu ts‛e-k‛e z-keh i-zông, t‛iao-tsing cong-nying cong-yiang, ao-ky‛i-le, kông,
15 “Cong-yü, ng-he tsa-sang tso keh z-kön? Ngô-he ah z nying teh ng-he sing-zing tso-yiang, le djün foh-ing peh ng-he, iao ng-he tön-gao keh-sih hyü-hwa, kyü-voh keh-yü weh-keh Zông-ti, ziu-z zao t‛in di he teh ge li-min-keh væn-veh:
16 yi-zin z-si, Ge ‛eo væn-koh pah-sing tseo ge-z-keh lu.
17 Ge ah feh-z vong te-tsing Ge-z, hao sing de nying, jong t‛in s-lôh yü teh da-joh nyin-zing peh ngô-he, peh ngô-he k‛eo-liang to, mön-sing kao-hying.”
18 Kông keh shih-wa, ah ts‛ô-ting tsu ge-he feh lao iao tsi ge.

11 眾人 望着 保羅 所 做 事幹 用 呂高尼 土音 噢響 講，“神 現化 人个 範子 降落 到 我許 所在 來。”

12 佢許 稱呼 巴拿巴 丟士；稱 保羅 希耳米，爲 佢 帶頭 講 說話。

13 城外 丟士 廟个 祭司 牽 牛，帶 花 做个 帽，走到 城門口，意思 搭 眾人 聚隊 祭 佢許。

14 使徒 巴拿巴 搭 保羅 聽着，就 扯開 自个 衣裳，跳進 眾人 中央，噢起來，講，

15 “眾位，爾許 怎生 做 箇 事幹？我許 也 是 人 搭 爾許 性情 佐樣，來 傳 福音 畀 爾許，要 爾許 斷爻 箇些 虛花，歸服 箇位 活个 上帝，就是 造 天 地 海 搭 佢 裏面个 萬物：

16 以前 時世，佢 候 萬國 百姓 走 佢自个 路。

17 佢 也 不是 朆 對證 佢自，好 心 待 人，從 天 賜落 雨 搭 大熟 年成 畀 我許，畀 我許 口糧 多，滿心 高興。”

18 講 箇 說話，也 差點 阻 佢許 不 牢 要 祭 佢。

19 Yiu kyi-ke Yiu-t‛a nying jong Ön-di-ah tao Yi-ko-nyin le, t‛iao-so cong-nying, do zih-deo p‛ang Pao-lo, t‛a ge c‛ih zing-nga, ts‛eng ge s-gao.
20 Dæn-z meng-du yü-lao z-‛eo, ge nang-ky‛i, tseo-tsing zing-li: di-nyi nyih teh Pô-nô-pô jü-de tao Deh-pi k‛e.

19 有 幾個 猶太 人 從 安提厄 到 以哥念 來，挑唆 眾人，馱 石頭 砰 保羅，拖 佢 出 城外，忖 佢 死爻。

20 但是 門徒 圍牢 時候，佢 玍起，走進 城裏：第二 日 搭 巴拿巴 聚隊 到 特庇 去。

21 Ge-he ze keh zing-li djün foh-ing, tsih-ziu hyü-to nying tso meng-du: ziu cün tao Lu-z-teh Yi-ko-nyin Ön-di-ah le,
22 kyin-ku meng-du-keh sing, ky‛ün ge-he zông-zông siu-lao su siang-sing-keh dao-li, yi kông, “Ngô-he tsing Zông-ti-keh koh, pih iao p‛ong-djôh hyü-to næn-deo.”
23 Ze kôh kao-we sih-lih tsiang-lao, ziu kying-zih tao-kao, peh ge-he t‛ôh-fu ge su siang-sing-keh Cü.

21 佢許 在 箇 城裏 傳 福音，接受 許多 人 做 門徒：就 轉 到 路士得 以哥念 安提厄 來，

22 堅固 門徒个 心，勸 佢許 常常 守牢 所 相信个 道理，貤 講，“我許 進 上帝个 國，必 要 碰着 許多 難頭。”

23 在 各 教會 設立 長老，就 禁食 禱告，畀 佢許 託付 佢 所 相信个 主。

24 Keh-ts‛iah kying-ku Pi-si-ti tao Bông-fi-li-ô.
25 Ze Bih-kô djün dao-li, ziu tseo-lôh tao Ô-da-li;
26 jong kæn k‛e-jün sa tao Ön-di-ah, ziu-z keh su-ze ky‛i-deo bi hyüong-di t‛ôh Zông-ti eng-yü hao k‛e tso ge-he yin-ze su tso-zing-keh ming-veng.

24 箇且 經過 彼西底 到 旁非利亞。

25 在 別加 傳 道理，就 走落 到 亞大利；

26 從 吤 開船 駛 到 安提厄，就是 箇 所在 起頭 被 兄弟 託 上帝 恩惠 好 去 做 佢許 現在 所 做成个 明份。

27 Kyi-zin tao-gao, ziu jü-zih kao-we, peh Zông-ti yüong ge-he ih-ts‛ih su tso z-kön, yi k‛e siang-sing-keh meng peh bih-koh-nying, tu teh ge-he kông.
28 Ge-he ze-kæn teh meng-du jü-de djü dziang-kyiu.

27 既然 到爻，就 聚集 教會，畀 上帝 用 佢許 一切 所 做 事幹，貤 開 相信个 門 畀 別國人，都 搭 佢許 講。

28 佢許 在吤 搭 門徒 聚隊 住 長久。

第十五章.

1 Yiu kyi-ke Yiu-t‛a nying iao kao-yiu tu ziu tsiu-keh-li.
6 S-du siang-liang keh z-kön,
22 ge-he su ding-kyü z-kön sia peh cong kao-we,
36 Pao-lo teh Pô-nô-pô siang jü-de k‛e mông kao-we, yü Pô-nô-pô iao ta Mô-k‛o ziu feng-k‛e.

1 有 幾個 猶太 人 要 教友 都 受 週割禮。
6 使徒 商量 箇 事幹，
22 佢許 所 定規 事幹 寫 畀 眾 教會，
36 保羅 搭 巴拿巴 想 聚隊 去 望 教會，爲 巴拿巴 要 帶 馬可 就 分開。

YIU kyi-ke nying jong Yiu-t‛a lôh-le, kao-hyüing hyüong-di, kông, “Ng-he ziah feh i Mo-si-keh kwe-kyü ziu tsiu-keh-li, feh neng teh kyiu.”
2 Pao-lo Pô-nô-pô teh ge-he væn-tsing bin-leng ku, cong-nying ding-kyü peh Pao-lo Pô-nô-pô, teh ge-he cong-yiang kyi-ke nying, zông Yia-lu-sæh-lang k‛e kyin s-du tsiang-lao, siang-liang keh z-kön.
3 Kao-we ziu song ge k‛e, ge-he tseo-ku Fi-nyi-kyi, Sæh-mô-li-ô, i-lu³⁾ kông bih-koh-nying kyü-voh Cü z-kön: cong hyüong-di ting kao-hying.
4 Tao Yia-lu-sæh-lang, kao-we teh s-du teh tsiang-lao tu nying-tsih ge-he, ge-he ziu peh Zông-ti yüong ge ih-ts‛ih su tso teh cong-nying kông.

有 幾個 人 從 猶太 落來，教訓 兄弟，講，“爾許 若 不 依 摩西个 規矩 受 週割禮，不 能 得 救。”

2 保羅 巴拿巴 搭 佢許 犯真 辯論 過，眾人 定規 畀 保羅 巴拿巴，搭 佢許 中央 幾個 人，上 耶路撒冷 去 見 使徒 長老，商量 箇 事幹。

3 教會 就 送 佢 去，佢許 走過 非尼基，撒馬利亞，依路 講 別國人 歸服 主 事幹：眾 兄弟 頂 高興。

4 到 耶路撒冷，教會 搭 使徒 搭 長老 都 迎接 佢許，佢許 就 畀 上帝 用 佢 一切 所 做 搭 眾人 講。

5 Yiu kyi-ke Fæh-li-se kao siang-sing-keh nying, gyi-ky‛i, kông, “Ge-he pih iao ziu tsiu-keh-li, feng-fu ge-he siu Mo-si-keh leh-fæh.”

5 有 幾個 法利賽 教 相信个 人，徛起，講，“佢許 必 要 受 週割禮，吩咐 佢許 守 摩西个 律法。”

6 S-du teh tsiang-lao jü-zih siang-liang keh z-kön.
7 Jü-de bin-leng hyü-to shih-wa, Pi-teh gyi-ky‛i, teh ge-he kông, “Cong-yü hyüong-di, ng-he hyiao-teh Zông-ti yi-zin ze ngô-he cong-yiang kæn-shün ngô, peh bih-koh-nying jong ngô k‛eo-li hao t‛ing-djôh foh-ing dao-li, siang-sing.
8 Ping-ts‛ia hyiao-teh nying sing keh-yü Zông-ti teh ge-he tso te-tsing, s Sing-Ling peh ge-he, teh ngô-he ih-yiang;
9 ge-he teh ngô-he Ge ih-ting m-kao feng-pih, yüong siang-sing kyih-zing ge-he-keh sing.
10 Yin-ze ng-he tsa-sang s-s Zông-ti, iao peh tsu-tsong teh ngô-he tu gwæn-feh-dong-keh ah, pa ze meng-du-keh deo-kying?
11 Ngô-he siang-sing tsih k‛ao Cü Yia-su Kyi-toh-keh eng-yü hao teh kyiu, ge-he ah z-t‛ih.”

6 使徒 搭 長老 聚集 商量 箇 事幹。

7 聚隊 辯論 許多 說話，彼得 徛起，搭 佢許 講，“眾位 兄弟，爾許 曉得 上帝 以前 在 我許 中央 揀選 我，畀 別國人 從 我 口裏 好 聽着 福音 道理，相信。

8 并且 曉得 人 心 箇位 上帝 搭 佢許 做 對證，賜 聖靈 畀 佢許，搭 我許 一樣；

9 佢許 搭 我許 佢 一點 無較 分別，用 相信 潔淨 佢許个 心。

10 現在 爾許 怎生 試試 上帝，要 畀 祖宗 搭 我許 都 擐不動个 軛，擺 在 門徒个 頭頸？

11 我許 相信 只 靠 主 耶穌 基督个 恩惠 好 得救，佢許 也 是僣。”

12 Cong-nying tu feh hyiang; t‛ing Pô-nô-pô teh Pao-lo dziang-si kông Zông-ti yüong ge-he ze bih-koh-nying cong-yiang ih-ts‛ih su tso-keh zing-tsih teh gyi-z.

12 眾人 都 不 響；聽 巴拿巴 搭 保羅 詳細 講 上帝 用 佢許 在 別國人 中央 一切 所 做个 神蹟 搭 奇事。

13 Ge-he hyih-k‛eo, Ngô-kôh kông, “Cong-yü hyüong-di, ts‛ing t‛ing ngô shih-wa:
14 Si-meng yi-kying kông-ku Zông-ti ky‛i-deo k‛ön-ku bih-koh-nying, jong ge-he cong-yiang t‛iao-shün pah-sing hao vong Ge-keh ming-deo.
15 Sin-ts-nying-keh shih-wa ah siang-te; ziang sia-lôh kông,
16 ‘Keh-sih z-kön ts-‛eo Ngô we cün-le, tse ky‛i-zao Da-bih tao-gao-keh tsiang-bong; su ts‛ah-gao-keh Ngô we tse jü-ky‛i, peh ge gyi dzih:
17 peh nying-keh cong-yiang dzing-gao cü-ts, teh væn-pah vong Ngô ming-deo-keh bih-koh-nying, tu we le zing Cü. Keh z tso-zing keh z-kön-keh Cü su kông,’ [Ô. 9. 11,12.]
18 Zông-ti yiang-yiang su tso z-kön, jong-ku-yi-le sin hyiao-teh.
19 Su-i ngô i-s ziu-z, hyiao ts‛ao-ziao kyü-voh Zông-ti-keh bih-koh-nying;
20 tæn sia sing peh ge-he, ao ge hyiao bang-djôh nyi-su-moh-tiao-keh we-u, teh kæn-ying, wæ-yiu ts‛ih-s-keh cong-sang, teh hyüih.
21 Ing-yü jong-ku-yi-le Mo-si-keh shü kôh zing-li tu yiu djün-k‛e, me ön-sih-nyih ze jü-we-dông doh ge.”

13 佢許 歇口，雅各 講，“眾位 兄弟，請 聽 我 說話：

14 西門 已經 講過 上帝 起頭 看顧 別國人，從 佢許 中央 挑選 百姓 好 奉 佢个 名頭。

15 先知人个 說話 也 相對；像 寫落 講，

16 ‘箇些 事幹 之後 我 會 轉來，再 起造 大闢 倒爻个 帳篷；所 拆爻个 我 會 再 豎起，畀 佢 徛 直：

17 畀 人个 中央 剩爻 主子，搭 凡百 奉 我 名頭个 別國人，都 會 來 尋 主。箇 是 做成 箇事幹个 主 所 講，’ [Ô. 9. 11,12.]

18 上帝 樣樣 所 做 事幹，從古以來 先 曉得。

19 所以 我 意思 就是，𠏕 譟擾 歸服 上帝个 別國人；

20 單 寫 信 畀 佢許，噢 佢 𠏕 碰着 泥塑木雕个 穢污，搭 姦淫，還有 敕死个 眾生，搭 血。

21 因爲 從古以來 摩西个 書 各 城裏 都 有 傳開，每 安息日 在 聚會堂 讀 佢。”

22 Keh z-‛eo s-du tsiang-lao, teh t‛ong kao-we, tu kyüih-i jong ge-he cong-yiang kæn-shün kyi-ke nying, ts‛a ge-he teh Pao-lo Pô-nô-pô jü-de tao Ön-di-ah; ziu-z ts‛ing-hwu Pô-sæh-pô-keh Yiu-da, teh Si-læh, z hyüong-di su tseng-djong cü-ts:
23 yi sia sing t‛ôh ge ta-k‛e, kông, “S-du tsiang-lao, teh gyi-yü hyüong-di sia sing peh Ön-di-ah Jü-li-ô Kyi-li-kô bih-koh-keh cong hyüong-di, ts‛ing-ön:
24 ing-yü t‛ing-djôh jong ngô-he cong-yiang yiu kyi-ke nying c‛ih-le kông ts‛ao-ziao ng-he shih-wa, yiao-‛oh ng-he-keh sing; kông pih iao ziu tsiu-keh-li, siu leh-fæh; dæn-z ngô-he vong feng-fu ge ku;
25 su-i ngô-he dong-sing-‛eh-i jü-zih, kyüih-i kæn-shün kyi-ke nying ts‛a ge-he teh ngô-he ts‛ing-e-keh Pô-nô-pô Pao-lo,
26 ziu-z yü ngô-he Cü Yia-su Kyi-toh ming-deo feh ku-djôh sing-ming-keh nying, jü-de tao ng su-ze.
27 Su-i ts‛a Yiu-da Si-læh le, ge ah we k‛eo-djün keh-sih z-kön.
28 Sing-Ling teh ngô-he tu kyüih-i feh kô bih-yiang tæn-deo peh ng-he, tsih-yiu keh kyi-yiang iao-kying-keh;
29 ziu-z feh bang-djôh nyi-su-moh-tiao-keh tsi-veh, teh hyüih, lin ts‛ih-s-keh cong-sang, wæ-yiu kæn-ying; ng-he neng-keo z-kyi kying-ka keh z-kön, ziu hao. Dæn-nyün ng-he bing-ön.”

22 箇 時候 使徒 長老，搭 統 教會，都 決意 從 佢許 中央 揀選 幾個 人，差 佢許 搭 保羅 巴拿巴 聚隊 到 安提厄；就是 稱呼 巴撒巴个 猶大，搭 西拉，是 兄弟 所 尊重 主子：

23 貤 寫 信 託 佢 帶去，講，“使徒 長老，搭 其餘 兄弟 寫 信 畀 安提厄 敘利亞 基利家 別國个 眾 兄弟，請安：

24 因爲 聽着 從 我許 中央 有 幾個 人 出來 講 譟擾 爾許 說話，謠惑 爾許个 心；講 必 要 受 週割禮，守 律法；但是 我許 朆 吩咐 佢 過；

25 所以 我許 同心合意 聚集，決意 揀選 幾個 人 差 佢許 搭 我許 親愛个 巴拿巴 保羅，

26 就是 爲 我許 主 耶穌 基督 名頭 不 顧着 性命个 人，聚隊 到 爾 所在。

27 所以 差 猶大 西拉 來，佢 也 會 口傳 箇些 事幹。

28 聖靈 搭 我許 都 決意 不 加 別樣 擔頭 畀 爾許，只有 箇 幾樣 要緊个；

29 就是 不 碰着 泥塑木雕个 祭物，搭 血，連 敕死个 眾生，還有 姦淫；爾許 能彀 自己 禁戒 箇 事幹，就 好。但願 爾許 平安。”

30 Ge-he bi ts‛a-k‛e, ziu tao Ön-di-ah, jü-zih cong-nying, kao-fu shü-sing.
31 Ge-he doh-ku, yü keh ön-yü shih-wa kao-hying.
32 Yiu-da teh Si-læh, ah z sin-ts-nying, kông hyü-to shih-wa ky‛ün hyüong-di, kyin-ku ge-he sing.
33 Tæn-kôh to nyih. hyüong-di peh ge-he ön-tæn cün tao s-du su-ze k‛e.
34 Dæn-z Si-læh ih-ding wæ djü ze-kæn.
35 Pao-lo teh Pô-nô-pô tæn-kôh ze Ön-di-ah, teh hyü-to hyüong-di jü-de kao-hyüing, djün Cü-keh foh-ing dao-li.

30 佢許 被 差去，就 到 安提厄，聚集 眾人，交付 書信。

31 佢許 讀過，爲 箇 安慰 說話 高興。

32 猶大 搭 西拉，也 是 先知人，講 許多 說話 勸 兄弟，堅固 佢許 心。

33 耽擱 多 日。兄弟 畀 佢許 安耽 轉 到 使徒 所在 去。

34 但是 西拉 一定 還 住 在吤。

35 保羅 搭 巴拿巴 耽擱 在 安提厄，搭 許多 兄弟 聚隊 教訓，傳 主个 福音 道理。

36 KU kyi-nyih Pao-lo teh Pô-nô-pô kông, “Ngô-he zin-deo djün Cü dao-li-keh kôh zing-li, ngô-he ing-ke cün-k‛e mông hyüong-di z tsa-sang.”
37 Pô-nô-pô i-s iao ta Iah-‛ön, yi ts‛ing-hwu Mô-k‛o jü-de.
38 Dæn-z Pao-lo i-s ge jong-zin ze Bông-fi-li-ô li-k‛e ge-he, feh jü-de tso z-kön, keh nying feh ing-ke ta ge k‛e.
39 Ge-he siang-tsang, zing-ts liang-‛ô feng-k‛e, Pô-nô-pô ta Mô-k‛o k‛e-jün tao Kyü-pi-lu;
40 Pao-lo kæn Si-læh, hyüong-di de ge-he gyiu Zông-ti-keh eng-yü ziu dong-sing.
41 Ge kying-ku Jü-li-ô teh Kyi-li-kô, kyin-ku kao-we.

36 過 幾日 保羅 搭 巴拿巴 講，“我許 前頭 傳 主 道理个 各 城裏，我許 應該 轉去 望 兄弟 是 怎生。”

37 巴拿巴 意思 要 帶 約翰，貤 稱呼 馬可 聚隊。

38 但是 保羅 意思 佢 從前 在 旁非利亞 離開 佢許，不 聚隊 做 事幹，箇 人 不 應該 帶 佢 去。

39 佢許 相爭，甚至 兩下 分開，巴拿巴 帶 馬可 開船 到 居比路；

40 保羅 揀 西拉，兄弟 代 佢許 求 上帝个 恩惠 就 動身。

41 佢 經過 敘利亞 搭 基利家，堅固 教會。

第十六章.

1 Pao-lo ‛ang tsiu-keh-li peh Di-mo-t‛a,
7 Sing-Ling ao ge tao Mô-gyi-teng k‛e,
14 Lü-ti-ô siang-sing,
16 Pao-lo kön-c‛ih zia-kyü.
19 Yü ge kön-c‛ih kyü Pao-lo teh Si-læh bi tang, kwæn ze kæn-lao.
26 Di yiao-dong k‛e kæn-lao-keh meng.
31 Kwön-kæn-keh siang-sing,
37 ziu fông ge-he.

1 保羅 行 週割禮 畀 提摩太，
7 聖靈 噢 佢 到 馬其頓 去，
14 呂底亞 相信，
16 保羅 趕出 邪鬼。
19 爲 佢 趕出 鬼 保羅 搭 西拉 被 打，關 在 監牢。
26 地 搖動 開 監牢个 門。
31 管監个 相信，
37 就 放 佢許。

Ge tao Deh-pi teh Lu-z-teh: ze-kæn yiu ih-ke meng-du, ming-z Di-mo-t‛a, ge nyiang z Yiu-t‛a siang-sing-keh nyü-nying, ge pang z Hyi-læh nying.
2 Lu-z-teh teh Yi-ko-nyin-keh hyüong-di tu ts‛ing-tsæn ge.
3 Pao-lo siang keh nying jü-de k‛e; yü ze-kæn-keh Yiu-t‛a nying ‛ang tsiu-keh-li peh ge; ing-yü tu hyiao-teh ge pang z Hyi-læh nying.

佢 到 特庇 搭 路士得：在吤 有 一個 門徒，名字 提摩太，佢 孃 是 猶太 相信个 女人，佢 伯‛ 是 希臘 人。

2 路士得 搭 以哥念个 兄弟 都 稱讚 佢。

3 保羅 想 箇 人 聚隊 去；爲 在吤个 猶太 人 行 週割禮 畀 佢；因爲 都 曉得 佢 伯‛ 是 希臘 人。

4 Ge-he tseo-ku kôh zing-li, peh Yia-lu-sæh-lang-keh s-du teh tsiang-lao su ding-keh kwe-kyü, kao-fu meng-du pao-siu.
5 Su-i cong kao-we siang-sing-keh sing kah-nga kyin-ku, nying-keh su-moh nyih-nyih kô-ts‛eo.

4 佢許 走過 各 城裏，畀 耶路撒冷个 使徒 搭 長老 所 定个 規矩，交付 門徒 保守。

5 所以 眾 教會 相信个 心 格外 堅固，人个 數目 日日 加湊。

6 YI-KYING kying-ku Feh-lü-kô teh Kô-læh-t‛a, bi Sing-Ling kying-lao feh hyü ge-he ze Ô-si-ô kông dao-li;
7 tao Me-si-ô, ziu wa-sön tao Pi-t‛e-nyi k‛e; tsih-z Sing-Ling feh hyü ge;
8 tseo-ku Me-si-ô, lôh Deh-lo-ô k‛e.
9 Yia-li Pao-lo mông-djôh hyin-ling; Yiu ih-ke Mô-gyi-teng nying gyi ze-teh, gyiu ge kông, “Ts‛ing ng ku tao Mô-gyi-teng, pông-zu ngô-he.”

6 已經 經過 弗呂家 搭 加拉太，被 聖靈 禁牢 不 許 佢許 在 亞西亞 講 道理；

7 到 每西亞，就 畫算 到 庇推尼 去；只是 聖靈 不 許 佢；

8 走過 每西亞，落 特羅亞 去。

9 夜裏 保羅 望着 顯靈；有 一個 馬其頓 人 徛 在𡍲，求 佢 講，“請 爾 過 到 馬其頓，幫助 我許。”

10 Pao-lo mông-djôh keh hyin-ling, ngô-he jü-tsih wa-sön tao Mô-gyi-teng k‛e, ding-kyü z Cü ao ngô-he djün foh-ing peh ge-he.

10 保羅 望着 箇 顯靈，我許 隨即 畫算 到 馬其頓 去，定規 是 主 噢 我許 傳 福音 畀 佢許。

11 Ziu jong Deh-lo-ô k‛e-jün, ih-dzih sa-tao Sæh-mô-deh-læh, di-nyi nyih tao Nyi-ô-po-li;
12 jong kæn tao Fi-lih-pi, ziu-z Mô-gyi-teng tong-pin deo-ih tu zing, yi z Lo-mô nying-keh zing: keh zing-li ngô-he tæn-kôh kyi nyih.
13 Ön-sih-nyih tseo-c‛ih zing-nga ‛o-pin, tao ih-ke su-zông tao-kao su-ze; zo-lôh, teh jü-zih ze-kæn-keh nyü-nying kông dao-li.
14 Yiu ih-ke nyü-nying, ming-z Lü-ti-ô, z T‛e-ngô-t‛e-læh zing-li ma ts-hwa-pu-keh nying, z kying-pa Zông-ti, ze-teh t‛ing: Cü k‛e-dao ge-keh sing, peh ge liu-sing Pao-lo shih-wa.
15 Ge-z teh ‛eh-kô ziu si-li, ziu gyiu ngô-he kông, “Ng-he ziah sön ngô z siang-sing Cü-keh, ts‛ing tao ngô u-li k‛e djü.” Ziu liu ngô-he tsing-k‛e.

11 就 從 特羅亞 開船，一直 駛到 撒馬特喇，第二 日 到 尼亞波利；

12 從 吤 到 非立比，就是 馬其頓 東邊 頭一 堵 城，貤 是 羅馬 人个 城：箇 城裏 我許 耽擱 幾 日。

13 安息日 走出 城外 河邊，到 一個 素常 禱告 所在；坐落，搭 聚集 在吤个 女人 講 道理。

14 有 一個 女人，名字 呂底亞，是 推雅推喇 城裏 賣 紫花布个 人，是 敬拜 上帝，在𡍲 聽：主 開導 佢个 心，畀 佢 留心 保羅 說話。

15 佢自 搭 合家 受 洗禮，就 求 我許 講，“爾許 若 算 我 是 相信 主个，請 到 我 塢裏 去 住。” 就 留 我許 進去。

16 Ts-‛eo ngô-he tseo-tao tao-kao su-ze, p‛ong-djôh ih-ke ô-deo, z bi zia-kyü vu-keh; ge ky‛i-k‛o, dzæn hyü-to dong-din peh cü-nying-kô.
17 Ge keng Pao-lo teh ngô-he, ao-ky‛i-le kông, “Keh-sih nying z ting kao Zông-ti-keh nu-boh, djün teh-kyiu-keh dao-lu peh ngô-he.”
18 Ge hao-liang nyih z-t‛ih tso-fæh. Pao-lo feh cong-i, le-cün teh kyü kông, “Ngô yüong Yia-su Kyi-toh-keh ming-deo feng-fu ng jong ge c‛ih-le.” Kyü ziu c‛ih-le.

16 之後 我許 走到 禱告 所在，碰着 一個 丫頭，是 被 邪鬼 附个；佢 起課，賺 許多 銅錢 畀 主人家。

17 佢 跟 保羅 搭 我許，噢起來 講，“箇些 人 是 頂 高 上帝个 奴僕，傳 得救个 道路 畀 我許。”

18 佢 好兩 日 是僣 做法。保羅 不 中意，擂轉 搭 鬼 講，“我 用 耶穌 基督个 名頭 吩咐 爾 從 佢 出來。” 鬼 就 出來。

19 Ge cü-nying-kô mông ge-he sô-mông-keh dzæn-deo yi-kying sih-gao, ziu k‛ô Pao-lo teh Si-læh, t‛a ge tao z-dziang-zông k‛e kyin kwön,
20 ka tao kwön su-ze, kông, “Keh-sih nying ze-teh ts‛ao-ziao ngô-he zing-li, ge z Yiu-t‛a nying,
21 yi ze-teh djün ngô-he Lo-mô nying feh ing-ke ziu, feh ing-ke tso-keh kwe-kyü.”
22 Cong-nying jü-de üong-zông-le ti-dih ge: kwön feng-fu t‛eh-gao ge-he i-zông, yüong kweng tang ge.
23 Tang hyü-to kyi-su, kwæn-lôh kæn-lao, feng-fu kwön-kæn-keh lao-k‛ao kwön-siu ge:
24 ge teh-djôh keh feng-fu, ziu peh ge-he kwæn ze do-kæn, peh ge kyiah yüong kyiah-zæh zæh-lao.

19 佢 主人家 望 佢許 奢望个 賺頭 已經 失爻，就 揢 保羅 搭 西拉，拖 佢 到 市場上 去 見 官，

20 解 到 官 所在，講，“箇些 人 在𡍲 譟擾 我許 城裏，佢 是 猶太 人，

21 貤 在𡍲 傳 我許 羅馬 人 不 應該 受，不 應該 做个 規矩。”

22 眾人 聚隊 擁上來 抵敵 佢：官 吩咐 脫爻 佢許 衣裳，用 棍 打 佢。

23 打 許多 朞數，關落 監牢，吩咐 管監个 牢靠 管守 佢：

24 佢 得着 箇 吩咐，就 畀 佢許 關 在 大監，畀 佢 腳 用 腳牐 牐牢。

25 Mao pön-yia Pao-lo teh Si-læh tao-kao, ts‛ông-s tsæn-mi Zông-ti, væn-nying tu t‛ing-djôh;
26 mah-ding di dong-teh-mang, kæn-lao-keh di-kyi yiao-dong; meng lih-k‛eh tu k‛e-k‛e, kôh-nying liao-k‛ao tu t‛eh-lôh.
27 Kwön kæn-keh kw‛eng-sing, mông-djôh kæn-lao meng tu k‛e-k‛e, ts‛eng væn-nying yi-kying dao-k‛e, ziu bæh-c‛ih tao, z-kyi iao zing s.
28 Pao-lo ao-hyiang, kông, “Hyiao z ‛e z: ngô-he tu ze-i.”
29 Kwön kæn-keh ao nying teng-liang do-le, t‛iao-tsing, gæh-gæh-teo p‛oh ze Pao-lo Si-læh min-zin,
30 ta ge-he c‛ih, kông, “Sin-sang, ngô ing-ke tsa tso hao teh kyiu?”
31 Ge-he kông, “Yüong siang-sing Cü Yia-su Kyi-toh, ng teh ‛eh-kô tu hao teh kyiu.”
32 Ziu kông Cü-keh dao-li peh ge t‛ing, teh ge u-li-keh nying.
33 Tông yia ge si ge liang-ke siang-‛eng; ge z-kyi teh ‛eh-kô lih-k‛eh ziu si-li.
34 Be ge-he tseo-tao z-kyi u-li, pa ts‛e-su ts‛ing ge: ge z-kyi teh ‛eh-kô yü siang-sing Zông-ti, ting kao-hying.

25 毛 半夜 保羅 搭 西拉 禱告，唱詩 讚美 上帝，犯人 都 聽着；

26 驀停 地 動得猛，監牢个 地基 搖動；門 立刻 都 開開，各人 鐐銬 都 脫落。

27 管 監个 睏醒，望着 監牢 門 都 開開，忖 犯人 已經 逃去，就 拔出 刀，自己 要 尋 死。

28 保羅 噢響，講，“𠏕 自 害 自：我許 都 在倚。”

29 管 監个 噢 人 燈亮 馱來，跳進，挾挾抖 覆 在 保羅 西拉 面前，

30 帶 佢許 出，講，“先生，我 應該 怎 做 好 得 救？”

31 佢許 講，“用 相信 主 耶穌 基督，爾 搭 合家 都 好 得 救。”

32 就 講 主个 道理 畀 佢 聽，搭 佢 塢裏个 人。

33 當 夜 佢 洗 佢 兩個 傷痕；佢 自己 搭 合家 立刻 受 洗禮。

34 陪 佢許 走到 自己 塢裏，擺 菜蔬 請 佢：佢 自己 搭 合家 爲 相信 上帝，頂 高興。

35 Tao t‛in-liang, kwön ao ts‛a-yüoh le, kông, “Hao fông keh liang-ke nying.”
36 Kwön kæn-keh jü-tsih peh keh shih-wa t‛ong-ts Pao-lo, “Kwön ts‛a nying le kông hao fông ng-he; yin-ze ng-he hao c‛ih-k‛e, bing-ön k‛e.”
37 Pao-lo teh ge-he kông, “Ngô-he z Lo-mô nying, vong ding ze ku, wæ we ze cong-nying min-zin tang ngô-he, yi kwæn-lôh kæn-lao; yin-ze iao s-‛ô fông ngô-he c‛ih feh? Keh-z tön feh-k‛o; iao ge z-kyi le be ngô-he c‛ih.”
38 Ts‛a-yüoh peh keh shih-wa we-pao kwön. Kwön t‛ing-djôh ge-he z Lo-mô nying, p‛ô-gyü;
39 ziu le ky‛ün ge-he, be ge c‛ih, ts‛ing ge li-k‛e keh zing-li.
40 Ge-he tseo-c‛ih kæn-lao, tao Lü-ti-ô u-li; kyin hyüong-di, ön-yü ge-he ziu k‛e-gao.

35 到 天亮，官 噢 差役 來，講，“好 放 箇 兩個 人。”

36 管 監个 隨即 畀 箇 說話 通知 保羅，“官 差 人 來 講 好 放 爾許；現在 爾許 好 出去，平安 去。”

37 保羅 搭 佢許 講，“我許 是 羅馬 人，朆 定 罪 過，還 會 在 眾人 面前 打 我許，貤 關落 監牢；現在 要 私下 放 我許 出 不？箇是 斷 不可；要 佢 自己 來 陪 我許 出。”

38 差役 畀 箇 說話 回報 官。官 聽着 佢許 是 羅馬 人，怕懼；

39 就 來 勸 佢許，陪 佢 出，請 佢 離開 箇 城裏。

40 佢許 走出 監牢，到 呂底亞 塢裏；見 兄弟，安慰 佢許 就 去爻。

第十七章.

1 Pao-lo ze T‛ih-sæh-lo-nyi-kô djün-dao,
4 ze-kæn yiu-sih siang-sing, yiu-sih pih-næn ge.
10 Kao-yiu song ge tao Pi-li-ô, ze-kæn ge djün-dao.
13 Ze T‛ih-sæh-lo-nyi-kô ziu pih-næn,
15 ziu tao Ngô-tin, ze-kæn bin-ming, djün ge-he feh sih-teh üong-weh-keh Zông-ti,
34 hyü-to siang-sing Kyi-toh.

1 保羅 在 帖撒羅尼迦 傳道，
4 在吤 有些 相信，有些 逼難 佢。
10 教友 送 佢 到 庇哩亞，在吤 佢 傳道。
13 在 帖撒羅尼迦 受 逼難，
15 就 到 雅典，在吤 辯明，傳 佢許 不 識得 永活个 上帝，
34 許多 相信 基督。

GE-HE kying-ku Ön-fi-po-li teh Ô-po-lo-nyi-ô, ziu tao T‛ih-sæh-lo-nyi-kô, ze-kæn yiu Yiu-t‛a nying jü-we-dông:
2 Pao-lo tsiao lao-li tseo-tsing, sæn-ke ön-sih-nyih teh ge-he bin-leng Sing-shü,
3 ka-shih ge, te-tsing Kyi-toh ing-ke ziu næn, s-gao tse-weh; yi kông, “Ngô su djün peh ng-he-keh Yia-su, ziu-z Kyi-toh.”
4 Nen-cong yiu kyi-ke siang-sing, ziu ts‛ing-gying Pao-lo teh Si-læh; wæ-yiu hyü-to gyin-sing-keh Hyi-læh nying, kyü-djong nyü-nying ah feh siao.

佢許 經過 暗非波里 搭 亞波羅泥亞，就 到 帖撒羅尼迦，在吤 有 猶太 人 聚會堂：

2 保羅 照 老例 走進，三個 安息日 搭 佢許 辯論 聖書，

3 解說 佢，對證 基督 應該 受 難，死爻 再活；貤 講，“我 所 傳 畀 爾許个 耶穌，就是 基督。”

4 內中 有 幾個 相信，就 親近 保羅 搭 西拉；還有 許多 虔心个 希臘 人，貴重 女人 也 不 少。

5 Dæn-z feh siang-sing-keh Yiu-t‛a nying sang k‛eh-tu sing, jü-zih kyi-ke kwông-kweng, ts‛ao-lön zing-li; c‛ông-tsing Yia-seng u-li, iao t‛a ge-he c‛ih-le peh pah-sing.
6 Zing-feh-djôh, ziu t‛a Yia-seng teh kyi-ke hyüong-di k‛e kyin kwön, ao-ky‛i-le kông, “Keh-sih fæn-lön t‛in-‛ô cü-ts ah tao-i le;
7 Yia-seng siu-liu ge: keh-sih nying tu z yü-be Ke-sæh-keh ‛ao-ling, kông yiu bih-ke wông-ti, Yia-su.
8 Cong-nying teh kwön-fu t‛ing-djôh keh-sih z-kön, ziu kying-nga.
9 Kwön c‛ü Yia-seng teh gyi-yü nying-keh pao-zông ziu fông ge.

5 但是 不 相信个 猶太 人 生 克妒 心，聚集 幾個 光棍，譟亂 城裏；闖進 耶孫 塢裏，要 拖 佢許 出來 畀 百姓。

6 尋不着，就 拖 耶孫 搭 幾個 兄弟 去 見 官，噢起來 講，“箇些 反亂 天下 主子 也 到倚 來；

7 耶孫 收留 佢：箇些 人 都 是 違背 該撒个 號令，講 有 別個 皇帝，耶穌。

8 眾人 搭 官府 聽着 箇些 事幹，就 驚訝。

9 官 取 耶孫 搭 其餘 人个 保狀 就 放 佢。

10 Hyüong-di lih-k‛eh song Pao-lo Si-læh tông-yia tao Pi-li-ô: ih tao ziu tseo-tsing Yiu-t‛a nying jü-we-dông.
11 Keh-sih nying hao-jü ze T‛ih-sæh-lo-nyi-kô cü-ts, ing-yü ge-he ih-sing zing-nyün tsih-ziu dao-li, nyih-nyih k‛ao-kyiu Sing-shü, iao hyiao-teh keh dao-li z feh-z.
12 Su-i nen-cong yiu hyü-to siang-sing; wæ-yiu Hyi-læh kyü-djong-keh nyü-nying teh nön-nying ah feh siao.

10 兄弟 立刻 送 保羅 西拉 當夜 到 庇哩亞：一 到 就 走進 猶太 人 聚會堂。

11 箇些 人 好如 在 帖撒羅尼迦 主子，因爲 佢許 一心 情願 接受 道理，日日 考究 聖書，要 曉得 箇 道理 是 不是。

12 所以 內中 有 許多 相信；還有 希臘 貴重个 女人 搭 男人 也 不 少。

13 T‛ih-sæh-lo-nyi-kô-keh Yiu-t‛a nying hyiao-teh Pao-lo ze Pi-li-ô djün Zông-ti-keh dao-li, yi tseo-le, ts‛ao-lön pah-sing.
14 Hyüong-di ziu peh Pao-lo tao he-pin k‛e: Si-læh teh Di-mo-t‛a ning-gyiu djü ze-kæn.
15 Be Pao-lo cü-ts ta ge tao Ngô-tin: Pao-lo feng-fu ge-he ao Si-læh Di-mo-t‛a kw‛a-ting le, ge-he tsih-ziu ge feng-fu cün-k‛e.

13 帖撒羅尼迦个 猶太 人 曉得 保羅 在 庇哩亞 傳 上帝个 道理，貤 走來，譟亂 百姓。

14 兄弟 就 畀 保羅 到 海邊 去：西拉 搭 提摩太 仍舊 住 在吤。

15 陪 保羅 主子 帶 佢 到 雅典：保羅 吩咐 佢許 噢 西拉 提摩太 快點 來，佢許 接受 佢 吩咐 轉去。

16 PAO-LO ze Ngô-tin teng ge, mông-djôh zing-li tu yiu nyi-su-moh-tiao, sing-li dziah-kyih.
17 Su-i ze jü-we-dông teh Yiu-t‛a nying teh gyin-sing cü-ts jü-de bin-leng, nyih-nyih ze z-dziang-zông teh su p‛ong-djôh cü-ts ah z-t‛ih.
18 Yiu kyi-ke Yi-pi-ku-lo teh Z-to-ô-keh doh-shü-nying pæn-pôh ge. Yiu-sih kông, “Keh kông to wa cü-ts siang kông, zah-m?” Yiu-sih kông, “Ge z ziang djün bih-koh kyü-zing:” ing-yü Pao-lo djün Yia-su teh tse-weh-keh dao-li.

16 保羅 在 雅典 等 佢，望着 城裏 都 有 泥塑木雕，心裏 着急。

17 所以 在 聚會堂 搭 猶太 人 搭 虔心 主子 聚隊 辯論，日日 在 市場上 搭 所 碰着 主子 也 是僣。

18 有 幾個 以彼古羅 搭 士多亞个 讀書人 扳駁 佢。有些 講，“箇 講 多 話 主子 想 講，倽某？” 有些 講，“佢 是 像 傳 別國 鬼神：” 因爲 保羅 傳 耶穌 搭 再活个 道理。

19 Ge-he ky‛in ge ta tao Ô-liah-pô-ku, kông, “Ng su kông-keh sing dao-li ngô-he hao hyiao-teh feh?
20 Yü ng yiu kyi-yiang hyi-gyi z-kön djün-tao ngô-he ng-tô: ngô-he iao hyiao-teh yü zao i-s.”
21 (Ngô-tin nying teh tæn-kôh kæn-keh c‛ih-meng nying feh kwön bih-yiang, tæn cong-i kông-kông t‛ing-t‛ing sing-veng.)

19 佢許 牽 佢 帶 到 亞略巴古，講，“爾 所 講个 新 道理 我許 好 曉得 不？

20 爲 爾 有 幾樣 希奇 事幹 傳到 我許 耳朵：我許 要 曉得 爲 倽 意思。”

21 （雅典 人 搭 耽擱 吤个 出門 人 不 管 別樣，單 中意 講講 聽聽 新聞。）

22 Pao-lo gyi ze Ô-liah-pô-ku cong-yiang, kông, “Cong-yü Ngô-tin nying, ngô mông ng-he pah-yiang z-kön z ting kying-djong kyü-zing.
23 Ing-yü ngô te tseo-ku, mông ng-he su pa-keh, p‛ong-djôh ih-ke dæn yiu sia-teh, kông, ‘VI-SIH-TS ZÔNG-TI.’ Ng-he feh sih-teh wæ we pa Ge, keh-yü Zông-ti ngô ziu djün peh ng-he.
24 Keh-yü zao yü-dziu teh ge li-min væn-veh-keh Zông-ti, Ge kyi-zin z t‛in-di-keh Cü-tse, feh djü ze nying siu su zao-keh miao-yü;
25 ah feh-z nying siu hao voh-z Ge, ziang yiu zah-m ky‛üih-siao, Ge fæn-cün s weh-ming, k‛eo-ky‛i, teh væn-pah meh-z, peh cong-nying.
26 Ge jong ih-ke keng-mah zao-c‛ih væn-koh nying hao djü ze kôh-tao-c‛ü di-zông; ping-ts‛ia ‛æn-ding ge z-‛eo, teh ge-he su djü-keh ts-ka;
27 iao ge-he zing keh-yü Cü, ‛oh-tsia môh-le-môh-k‛e we zing-djôh Ge; gyi-zih Ge z li ngô-he kôh-nying feh yün:
28 ing-yü ngô-he yiu weh-ming, we ‛ang-dong, ze-teh tso nying, tu z k‛ao-djôh Ge; ziang ng-he z-kyi tso s cü-ts yiu-sih kông, ‘Ngô-he tu z Ge sang.’
29 Kyi-zin z Zông-ti sang, ngô-he ziu feh ing-ke ts‛eng Zông-ti-keh t‛i-tsih z ziang kying-ts, nying-ts, zih-deo, bi nying-keh siu-dön teh ling-ky‛iao su tiao-k‛eh.
30 Yi-zin feh ming-bah-keh z-si Zông-ti feh cü-kyiu; dæn-z yin-ze feng-fu kôh-tao-c‛ü væn-pah nying tu iao hwe-ke:
31 ing-yü Ge yi-kying ‛æn-ding nyih-ts, iao t‛ôh Ge su sih-lih-keh Nying, tsiao tsing-dzih sing-p‛ön si-zông; su-i peh Ge s-gao tse-weh-keh bing-kyü, peh cong-nying hao siang-sing.”

22 保羅 徛 在 亞略巴古 中央，講，“眾位 雅典 人，我 望 爾許 百樣 事幹 是 頂 敬重 鬼神。

23 因爲 我 搭侇 走過，望 爾許 所 拜个，碰着 一個 壇 有 寫𡍲，講，‘未識之 上帝。’ 爾許 不 識得 還 會 拜 佢，箇位 上帝 我 就 傳 畀 爾許。

24 箇位 造 宇宙 搭 佢 裏面 萬物个 上帝，佢 既然 是 天地个 主宰，不 住 在 人 手 所 造个 廟宇；

25 也 不是 人 手 好 服事 佢，像 有 倽某 缺少，佢 反轉 賜 活命，口氣，搭 凡百 物事，畀 眾人。

26 佢 從 一個 根脈 造出 萬國 人 好 住 在 各到處 地上；并且 限定 佢 時候，搭 佢許 所 住个 址界；

27 要 佢許 尋 箇位 主，或者 摸來摸去 會 尋着 佢；其實 佢 是 離 我許 各人 不 遠：

28 因爲 我許 有 活命，會 行動，在𡍲 做 人，都 是 靠着 佢；像 爾許 自己 做 詩 主子 有些 講，‘我許 都 是 佢 生。’

29 既然 是 上帝 生，我許 就 不 應該 忖 上帝个 體質 是 像 金子，銀子，石頭，被 人个 手段 搭 靈巧 所 雕刻。

30 以前 不 明白个 時世 上帝 不 追究；但是 現在 吩咐 各到處 凡百 人 都 要 悔改：

31 因爲 佢 已經 限定 日子，要 託 佢 所 設立个 人，照 正直 審判 世上；所以 畀 佢 死爻 再活个 凭據，畀 眾人 好 相信。”

32 Ge-he t‛ing s-gao tse-weh shih-wa. yiu-sih siao ge; yiu-sih kông, “Ngô-he tse t‛ing ng kông keh z-kön.”
33 Pao-lo z-t‛ih li-k‛e cong-nying.
34 Yiu kyi-ke keng ge, siang-sing: nen-cong yiu Ô-liah-pô-ku nying Tiu-nyi-siu, teh ih-ke nyü-nying ming-z Da-mo-li, wæ-yiu kyi-ke teh ge jü-de.

32 佢許 聽 死爻 再活 說話。有些 笑 佢；有些 講，“我許 再 聽 爾 講 箇 事幹。”

33 保羅 是僣 離開 眾人。

34 有 幾個 跟 佢，相信：內中 有 亞略巴古 人 丟尼修，搭 一個 女人 名字 大馬哩，還有 幾個 搭 佢 聚隊。

第十八章.

1 Pao-lo ze Ko-ling-to tso siu-nyi, yi djün-dao peh bih-koh nying:
9 Cü ze hyin-ling ao ge feh iao p‛ô, fông-tæn djün-dao.
12 Pao-lo ze Kô-liu min-zin bi kao-zông, dæn-z Kô-liu feh kwön-tsiang.
18 ‛Eo-deo ge tao kôh zing-li kyin-ku meng-du.
24 Ô-kyü-læh teh Pah-kyi-læh ts-si ka-shih Zông-ti-keh dao-li peh Ô-po-lo,
28 ‛eo-deo ge djün dao-li yiu neng-kön.

1 保羅 在 哥林多 做手藝，貤 傳道 畀 別國 人：
9 主 在 顯靈 噢 佢 不 要 怕，放膽 傳道。
12 保羅 在 迦流 面前 被 告狀，但是 迦流 不 管賬。
18 後頭 佢 到 各 城裏 堅固 門徒。
24 亞居拉 搭 百基拉 仔細 解說 上帝个 道理 畀 亞波羅，
28 後頭 佢 傳 道理 有 能幹。

KEH z-kön ts-‛eo Pao-lo li-k‛e Ngô-tin, tao Ko-ling-to.
2 P‛ong-djôh ih-ke Yiu-t‛a nying ming-z Ô-kyü-læh, sang ze Peng-tu, ge teh ts‛i-ts Pah-kyi-læh te jong Yi-da-li le, ing-yü Kah-lao-tiu c‛ih ‛ao-ling ao Yiu-t‛a nying tu li-k‛e Lo-mô kying-zing: Pao-lo tao ge-he su-ze le;
3 ing-yü z tso-yiang siu-nyi, ziu djü ze ge-he u-li tso sang-weh; ge-he z tso tsiang-bong-keh.
4 Pao-lo me ön-sih-nyih ze jü-we-dông bin-leng, ky‛ün Yiu-t‛a teh Hyi-læh nying.

箇 事幹 之後 保羅 離開 雅典，到 哥林多。

2 碰着 一個 猶太 人 名字 亞居拉，生 在 本都，佢 搭 妻子 百基拉 對 從 以大利 來，因爲 革老丟 出 號令 噢 猶太 人 都 離開 羅馬 京城：保羅 到 佢許 所在 來；

3 因爲 是 佐樣 手藝，就 住 在 佢許 塢裏 做 生活；佢許 是 做 帳篷个。

4 保羅 每 安息日 在 聚會堂 辯論，勸 猶太 搭 希臘 人。

5 Teng Si-læh Di-mo-t‛a jong Mô-gyi-teng le, Pao-lo sing-li dziah-kyih, teh Yiu-t‛a nying tso te-tsing Yia-su z Kyi-toh.
6 Yiu-t‛a nying pæn-pôh yi kông hyü-pông shih-wa, Pao-lo i-zông teo-teo, teh ge-he kông, “Ng-he hyüih kyü tao ng-z deo-zông; ngô z kön-zing: jong-kying-yi-‛eo ngô tao bih-koh nying su-ze k‛e.”
7 Ziu li-k‛e ge-he, tseo-tsing ih-veng nying-kô, ming-z Yiu-z-tu, z kying-pa Zông-ti cü-ts, ge-keh oh teh jü-we-dông lin-gying.
8 Kwön jü-we-dông Kah-li-z-pu teh ‛eh-kô tu siang-sing Cü; Ko-ling-to nying t‛ing keh dao-li siang-sing ziu si-li cü-ts, ah yiu hyü-to.

5 等 西拉 提摩太 從 馬其頓 來，保羅 心裏 着急，搭 猶太 人 做 對證 耶穌 是 基督。

6 猶太 人 扳駁 貤 講 毀謗 說話，保羅 衣裳 抖抖，搭 佢許 講，“爾許 血 歸 到 爾自 頭上；我 是 乾淨：從今以後 我 到 別國 人 所在 去。”

7 就 離開 佢許，走進 一份 人家，名字 猶士都，是 敬拜 上帝 主子，佢个 屋 搭 聚會堂 連近。

8 管 聚會堂 革利士布 搭 合家 都 相信 主；哥林多 人 聽 箇 道理 相信 受 洗禮 主子，也 有 許多。

9 Yia-li Pao-lo mông-djôh hyin-ling, Cü teh ge kông, “Hyiao p‛ô; ng yüong djün-dao, hyiao feh kông:
10 Ngô teh ng jü-de, m-nying we dong-siu ‛e ng; ing-yü ze keh zing-li Ngô yiu hyü-to pah-sing.”

9 夜裏 保羅 望着 顯靈，主 搭 佢 講，“𠏕 怕；爾 用 傳道，𠏕 不 講：

10 我 搭 爾 聚隊，無人 會 動手 害 爾；因爲 在 箇 城裏 我 有 許多 百姓。”

11 Ge djü ze-kæn nyin-pön, kao-hyüing ge-he Zông-ti-keh dao-li.

11 佢 住 在吤 年半，教訓 佢許 上帝个 道理。

12 Kô-liu tso Ô-ke-ô tsong-toh z-‛eo, Yiu-t‛a nying ih-zi kong-kyih Pao-lo, t‛a ge tao fæh-dông, kông,
13 “Keh nying ky‛ün cong-nying feh tsiao leh-fæh pa Zông-ti.”
14 Pao-lo iao k‛e k‛eo, Kô-liu teh Yiu-t‛a nying kông, “Ziah yiu feh kong-dao, teh kæn-ôh-keh ön-gyin, ngô ing-ke ne-sing t‛ing ng-he Yiu-t‛a nying:
15 ziah kông-tao bin-leng dao-li ming-z teh ng-he-keh leh-fæh, ng-he z-kyi li-dzih; ngô fe sing-p‛ön keh z-kön.”
16 Ziu kön ge-he c‛ih fæh-dông.
17 Cong Hyi-læh nying bæh-lao kwön jü-we-dông-keh Su-di-nyi. ze fæh-dông-zin tang ge. Keh-sih z-kön Kô-liu tu feh kwön.

12 迦流 做 亞該亞 總督 時候，猶太 人 一齊 攻擊 保羅，拖 佢 到 法堂，講，

13 “箇 人 勸 眾人 不 照 律法 拜 上帝。”

14 保羅 要 開口，迦流 搭 猶太 人 講，“若 有 不 公道，搭 奸惡个 案件，我 應該 耐心 聽 爾許 猶太 人：

15 若 講到 辯論 道理 名字 搭 爾許个 律法，爾許 自己 理直；我 𣍐 審判 箇 事幹。”

16 就 趕 佢許 出 法堂。

17 眾 希臘 人 拔牢 管 聚會堂个 所提尼。在 法堂前 打 佢。箇些 事幹 迦流 都 不 管。

18 Pao-lo djü hao-kyi nyih, ziu bih-k‛e cong hyüong-di, k‛e-jün sa tao Jü-li-ô, Pah-kyi-læh teh Ô-kyü-læh jü-de k‛e; ze Kyin-kah-li tsin deo-fæh; ing-yü yiu nyün-sing hyü-ku.
19 Tao Yi-feh-su, ziu li-k‛e ge liang-ke: ge-z tseo-tsing jü-we-dông, teh Yiu-t‛a nying bin-leng.
20 Ge-he ts‛ing ge jü-de to djü kyi-nyih, ge feh k‛eng;
21 ziu bih-k‛e ge-he, kông, “Keh tsih-ts‛ kw‛a tao, ngô tsong iao tao Yia-lu-sæh-lang k‛e siu ge: Zông-ti ziah k‛eng, ngô tse cün-le mông ng-he.” Ziu k‛e-jün li-k‛e Yi-feh-su.
22 Tao Ke-sæh-li-ô, ziu zông Yia-lu-sæh-lang mông-mông kao-we, ‛eo-le tao Ön-di-ah.

18 保羅 住 好幾 日，就 別開 眾 兄弟，開船 駛 到 敘利亞，百基拉 搭 亞居拉 聚隊 去；在 堅革哩 剪 頭髮；因爲 有 願心 許過。

19 到 以弗所，就 離開 佢 兩個：佢自 走進 聚會堂，搭 猶太 人 辯論。

20 佢許 請 佢 聚隊 多 住 幾日，佢 不 肯；

21 就 別開 佢許，講，“箇 節次 快 到，我 總 要 到 耶路撒冷 去 守 佢：上帝 若 肯，我 再 轉來 望 爾許。” 就 開船 離開 以弗所。

22 到 該撒利亞，就 上 耶路撒冷 望望 教會，後來 到 安提厄。

23 Tæn-kôh to nyih, yi dong-sing, a-ts‛ kying-ku Kô-læh-t‛a teh Feh-lü-kô, kyin-ku cong meng-du-keh sing.

23 耽擱 多 日，貤 動身，挨次 經過 加拉太 搭 弗呂家，堅固 眾 門徒个 心。

24 Yiu ih-ke Yiu-t‛a nying ming-z Ô-po-lo, sang ze Ô-lih-sæn-t‛a, ge ting yiu k‛eo-ze, we ka-shih Sing-shü, tao Yi-feh-su le.
25 Keh nying yi-kying ‛ôh-ku Cü-keh dao-li; yiu nyih-sing, su-i ts-si kao-hyüing pah-sing Cü-keh z-kön, dæn-z tsih hyiao-teh Iah-‛ön-keh si-li:
26 ge ze jü-we-dông fông-tæn ze-teh kông. Ô-kyü-læh teh Pah-kyi-læh t‛ing-djôh, ziu liu ge, ge-he ka-shih Zông-ti dao-li peh ge kah-nga ts-si.
27 Ô-po-lo siang tao Ô-ke-ô k‛e, cong hyüong-di sia-sing, ts‛ing meng-du tsih-ziu ge: kyi-zin tseo-tao, ge ting pông-zu teh-djôh eng-yü siang-sing-keh nying:
28 ing-yü ge ze cong-nying min-zin gyih-lih pôh-tao Yiu-t‛a nying, yüong Sing-shü piao-ming Yia-su z Kyi-toh.

24 有 一個 猶太 人 名字 亞波羅，生 在 亞歷山太，佢 頂 有 口才，會 解說 聖書，到 以弗所 來。

25 箇 人 已經 學過 主个 道理；有 熱心，所以 仔細 教訓 百姓 主个 事幹，但是 只 曉得 約翰个 洗禮：

26 佢 在 聚會堂 放膽 在𡍲 講。亞居拉 搭 百基拉 聽着，就 留 佢，佢許 解說 上帝 道理 畀 佢 格外 仔細。

27 亞波羅 想 到 亞該亞 去，眾 兄弟 寫信，請 門徒 接受 佢：既然 走到，佢 頂 幫助 得着 恩惠 相信个 人：

28 因爲 佢 在 眾人 面前 極力 駁倒 猶太 人，用 聖書 表明 耶穌 是 基督。

第十九章.

6 Kyi-ke meng-du ziu Sing-Ling.
9 Yiu-t‛a nying hyü-pông, Zông-ti yüong Pao-lo-keh siu tso hyü-to gyi-z. 
13 Tseo-kông-wu kön kyü-keh Yiu-t‛a nying,
16 bi kyü tang-ku.
19 Zia-fæh-keh shü siao-gao.
24 Ti-mi-tiu yü t‛ön-sing ts‛ao-lön pah-sing, iao k‛ô Pao-lo,
35 ih-ke veng-kwön ky‛ün ge-he hyiao nao-z.

6 幾個 門徒 受 聖靈。
9 猶太 人 毀謗，上帝 用 保羅个 手 做 許多 奇事。
13 走江湖 趕 鬼个 猶太 人，
16 被 鬼 打過。
19 邪法个 書 燒爻。
24 底米丟 爲 貪心 譟亂 百姓，要 揢 保羅，
35 一個 文官 勸 佢許 𠏕 鬧事。

Ô-po-lo ze Ko-ling-to z-‛eo, Pao-lo yi-kying jong zông-lu kying-ku, tao Yi-feh-su, p‛ong-djôh kyi-ke meng-du:
2 ziu meng ge-he kông, “Ng-he siang-sing z-‛eo tsih-ziu Sing-Ling feh?” Ge-he teh ge kông, “Sing-Ling yiu m-yiu, ngô-he vong t‛ing-djôh.”
3 Pao-lo teh ge-he kông, “Keh-yiang-ts, ng-he ziu zah-m si-li?” Ge-he kông, “Iah-‛ön-keh si-li.”
4 Pao-lo kông, “Iah-‛ön z ‛ang hwe-ke-keh si-li, t‛ong-ts pah-sing iao siang-sing ‛eo-jü ge le Cü-ts, ziu-z Kyi-toh Yia-su.”
5 Ge-he t‛ing-djôh ziu vong Cü Yia-su-keh ming-deo ziu si-li.
6 Pao-lo siu en-en ge-he, Sing-Ling ling-djôh ge-he; ziu kông kôh-c‛ü t‛u-wa, teh vi-le z-kön.
7 Ih-gyüong mao zih-nyi-ke nying.

亞波羅 在 哥林多 時候，保羅 已經 從 上路 經過，到 以弗所，碰着 幾個 門徒：

2 就 問 佢許 講，“爾許 相信 時候 接受 聖靈 不？”佢許 搭 佢 講，“聖靈 有 無有，我許 朆 聽着。”

3 保羅 搭 佢許 講，“箇樣子，爾許 受 倽某 洗禮？” 佢許 講，“約翰个 洗禮。”

4 保羅 講，“約翰 是 行 悔改个 洗禮，通知 百姓 要 相信 後如 佢 來 主子，就是 基督 耶穌。”

5 佢許 聽着 就 奉 主 耶穌个 名頭 受 洗禮。

6 保羅 手 按按 佢許，聖靈 臨着 佢許；就 講 各處 土話，搭 未來 事幹。

7 一共 毛 十二個 人。

8 Pao-lo tseo-tsing jü-we-dông, fông-tæn kông, yiu sæn-ke nyüih bin-leng ky‛ün ge-he Zông-ti koh z-kön.
9 Yiu kyi-ke nying sing ngang feh siang-sing, ze cong-nying min-zin hyü-pông keh dao-li; Pao-lo ziu li-k‛e ge-he, yi ao meng-du li-k‛e ge-he, nyih-nyih ze T‛e-læh-nu shü-yün bin-leng dao-li.
10 Keh-t‛ih yiu liang nyin; djü ze Ô-si-ô cü-ts, feh-leng Yiu-t‛a Hyi-læh nying, tu t‛ing-djôh Cü Yia-su-keh dao-li.

8 保羅 走進 聚會堂，放膽 講，有 三個 月 辯論 勸 佢許 上帝 國 事幹。

9 有 幾個 人 心 硬 不 相信，在 眾人 面前 毀謗 箇 道理；保羅 就 離開 佢許，貤 噢 門徒 離開 佢許，日日 在 推喇奴 書院 辯論 道理。

10 箇僣 有 兩 年；住 在 亞西亞 主子，不論 猶太 希臘 人，都 聽着 主 耶穌个 道理。

11 Zông-ti yüong Pao-lo-keh siu tso kah-nga gyi-z:
12 zing-ts peh siu-kying, ‛oh-tsia yü-gyüing, jong Pao-lo sing-zông do tao bing-nying sing-zông, ge-keh bing ziu t‛e-gao, ôh-kyü ziu c‛ih-le.

11 上帝 用 保羅个 手 做 格外 奇事：

12 甚至 畀 手巾，或者 圍裙，從 保羅 身上 馱 到 病人 身上，佢个 病 就 退爻，惡鬼 就 出來。

13 Yiu kyi-ke tseo-kông-wu kön kyü-keh Yiu-t‛a nying, ze ôh-kyü vu-keh cü-ts sing-zông yüong Cü Yia-su-keh ming-deo, kông, “Ngô-he k‛ao Pao-lo su djün-keh Yia-su, feng-fu ng c‛ih-k‛e.”
14 Yiu ih-ke Yiu-t‛a tsi-s-tsiang Z-kyi-ngô yiu ts‛ih-ke n-ts z-t‛ih tso-fæh.
15 Ôh-kyü we-teh, kông, “Yia-su ngô hyiao-teh, Pao-lo ngô nying-teh; dæn-z ng-he z zao-teh nying?”
16 Ôh-kyü vu-keh nying ziu t‛iao-ku, tang-shü ge, æh-voh ge; peh ge-he c‛ih-diao-diao ziu siang dao-c‛ih oh-nga.

13 有 幾個 走江湖 趕 鬼个 猶太 人，在 惡鬼 附个 主子 身上 用 主 耶穌个 名頭，講，“我許 靠 保羅 所 傳个 耶穌，吩咐 爾 出去。”

14 有 一個 猶太 祭司長 士基瓦 有 七個 兒子 是僣 做法。

15 惡鬼 回答，講，“耶穌 我 曉得，保羅 我 認得；但是 爾許 是 倽𡍲 人？”

16 惡鬼 附个 人 就 跳過，打輸 佢，壓服 佢；畀 佢許 出條條 受 傷 逃出 屋外。

17 Djü ze Yi-feh-su-keh Yiu-t‛a teh Hyi-læh nying tu hyiao-teh keh z-kön; ge-he tu p‛ô-gyü; Cü Yia-su-keh ming-deo ziu teh-djôh ts‛ing-tsæn.
18 Siang-sing-keh nying yiu hyü-to tseo-le tsiao-nying ze, kong-c‛ih⁴⁾ z-kyi su tso z-kön.
19 Ping-ts‛ia ‛ang zia-fæh cü-ts yiu hyü-to do-zi ge-keh shü, ze cong-nying min-zin siao-gao: ge-he ku-ku ge kô-din, dzih ng-væn nying-ts.
20 Z-t‛ih Cü-keh dao-li yüih-fæh hying-wông, yi teh-sing.

17 住 在 以弗所个 猶太 搭 希臘 人 都 曉得 箇 事幹；佢許 都 怕懼；主 耶穌个 名頭 就 得着 稱讚。

18 相信个 人 有 許多 走來 招認 罪，講出 自己 所 做 事幹。

19 并且 行 邪法 主子 有 許多 馱齊 佢个 書，在 眾人 面前 燒爻：佢許 估估 佢 價錢，值 五萬 銀子。

20 是僣 主个 道理 越發 興旺，貤 得勝。

21 Keh-sih z-kön tso-wön, Pao-lo kyüih-i kying-ku Mô-gyi-teng Ô-ke-ô, tao Yia-lu-sæh-lang, kông, “Tao kæn ts-‛eo, ngô pih iao k‛e mông Lo-mô.”
22 Ziu ts‛a ge liang-ke pông-siu Di-mo-t‛a teh Yi-læh-tu tao Mô-gyi-teng; ge-z dzæn-djü ze Ô-si-ô.

21 箇些 事幹 做完，保羅 決意 經過 馬其頓 亞該亞，到 耶路撒冷，講，“到 吤 之後，我 必要 去 望 羅馬。”

22 就 差 佢 兩個 幫手 提摩太 搭 以拉都 到 馬其頓；佢自 暫住 在 亞西亞。

23 KEH z-‛eo yü keh dao-li ting ts‛ao-lön.
24 Yiu ih-ke nying-ziang ming-z Ti-mi-tiu, z tso Ô-ti-mi nying-ts veh-hön-keh, peh ge ho-kyi dzæn dong-din feh siao:
25 ge ao-zi keh-sih nying teh tso keh ‛ông-tông-keh lao-s, kông, “Bong-yiu, ng-he hyiao-teh ngô-he k‛ao keh ‛ông-tông dzæn din.
26 Yin-ze keh Pao-lo, ng-he mông-djôh yi t‛ing-djôh fi-tæn ze Yi-feh-su, ts‛ô-feh-to t‛ong Ô-si-ô ky‛ün-sing ta-gao hyü-to nying, kông nying-keh siu su tso-keh sön-feh-teh zing:
27 fi-tæn ngô-he sang-i peh nying mông-feh-ky‛i; ziu-z keh-yü ting do nyü zing Ô-ti-mi-keh miao-yü ah iao bi k‛ön-ky‛ing, ping-ts‛ia t‛ong Ô-si-ô teh pin-t‛in-‛ô su kyüong-vong Ô-ti-mi-keh yü-nyin ah iao mih-gao.”

23 箇 時候 爲 箇 道理 頂 譟亂。

24 有 一個 銀匠 名字 底米丟，是 做 亞底米 銀子 佛龕个，畀 佢 伙計 賺 銅錢 不 少：

25 佢 噢齊 箇些 人 搭 做 箇 行當个 老司，講，“朋友，爾許 曉得 我許 靠 箇 行當 賺 錢。

26 現在 箇 保羅，爾許 望着 貤 聽着 非單 在 以弗所，差不多 統 亞西亞 勸信 帶爻 許多 人，講 人个 手 所 做个 算不得 神：

27 非單 我許 生意 畀 人 望不起；就是 箇位 頂 大 女 神 亞底米个 廟宇 也 要 被 看輕，并且 統 亞西亞 搭 遍天下 所 供奉 亞底米个 威嚴 也 要 滅爻。”

28 Ge-he t‛ing keh shih-wa ky‛i-teh-mang, ziu ao-ky‛i-le kông, “Yi-feh-su nying-keh Ô-ti-mi do-teh-mang!”
29 ‛Eh zing-li tu ts‛ao-lön; k‛ô Mô-gyi-teng nying Kô-yiu teh Ô-li-dæh-ku, z teh Pao-lo jü-de c‛ih-meng cü-ts, ziu ih-zi c‛ông-tsing hyi-kwön.
30 Pao-lo siang tseo-tsing pah-sing cong-yiang; meng-du tsu-lao ge.
31 Ô-si-ô kwön ah yiu kyi-ke, z teh Pao-lo siang-hao, ts‛a nying le ky‛ün ge tön feh-k‛o tseo-tsing hyi-kwön.
32 Ge-he ‛eo-long hyiang-liang feng-feh-c‛ih: jü-zih lön-feng-feng, yiu ih-do-pön wæ feh hyiao-teh yü zao z-kön jü-zih.
33 Yiu-t‛a nying peh Ô-lih-sæn-t‛a fæn-c‛ih, gyi ze cong-nying min-zin. Ô-lih-sæn-t‛a siu yüih-yüih, iao feng-p‛eo peh pah-sing.
34 Cong-nying hyiao-teh ge z Yiu-t‛a nying, ziu ‛eh-k‛eo-zi-dong ao-ky‛i-le, kông, “Yi-feh-su nying-keh Ô-ti-mi do-teh-mang!” keh væn-ts mao ih-ke z-zing.

28 佢許 聽 箇 說話 氣得猛，就 噢起來 講，“以弗所 人个 亞底米 大得猛！”

29 合 城裏 都 譟亂；揢 馬其頓 人 迦猶 搭 亞里達古，是 搭 保羅 聚隊 出門 主子，就 一齊 闖進 戲館。

30 保羅 想 走進 百姓 中央；門徒 阻牢 佢。

31 亞西亞 官 也 有 幾個，是 搭 保羅 相好，差 人 來 勸 佢 斷 不可 走進 戲館。

32 佢許 喉嚨 響亮 分不出：聚集 亂紛紛，有 一大半 還 不 曉得 爲 倽 事幹 聚集。

33 猶太 人 畀 亞歷山太 反出，徛 在 眾人 面前。亞歷山太 手 㧒㧒，要 分剖 畀 百姓。

34 眾人 曉得 佢 是 猶太 人，就 合口齊同 噢起來，講，“以弗所 人个 亞底米 大得猛！” 箇 範子 毛 一個 時辰。

35 Yiu ih-ke veng-kwön ky‛ün-sih cong-nying, kông, “Yi-feh-su nying, kæh-nying feh hyiao-teh Yi-feh-su zing-li z kwön-siu keh-yü ting do nyü zing Ô-ti-mi, teh jong Tiu-z kông-lôh-keh ziang?
36 Keh z-kön kyi-zin m-kao pæn-pôh, ng-he ing-ke ön-zing, feh-k‛o lön-tso.
37 Keh-sih nying vong t‛eo miao-yü-keh meh-z, yi feh sih-doh ng-he zing, ng-he t‛a ge tao-i le.
38 Ziah-z Ti-mi-tiu teh ge lao-s iao teh bih-ke tang kwön-s, yiu sing-z-keh nyih-ts, ah yiu kwön; liang-‛ô tu hao sing ming-bah.
39 Ng-he ziah meng bih-yiang z-kön, hao ze ‛eh-li-keh kong-we kyüih-tön ge.
40 Kông-tao kying-nying z-kön, sang-teh iao kao ngô-he ts‛ao-lön; ing-yü m-kao shih-wa hao feng-p‛eo keh nao-z.”
41 Kông wön, ge ziu sæn-k‛e cong-nying.

35 有 一個 文官 勸息 眾人，講，“以弗所 人，吤人 不 曉得 以弗所 城裏 是 管守 箇位 頂 大 女 神 亞底米，搭 從 丟士 降落个 像？

36 箇 事幹 既然 無較 扳駁，爾許 應該 安靜，不可 亂做。

37 箇些 人 朆 偷 廟宇个 物事，貤 不 褻瀆 爾許 神，爾許 拖 佢 到倚 來。

38 若是 底米丟 搭 佢 老司 要 搭 別個 打 官司，有 審視个 日子，也 有 官；兩下 都 好 審 明白。

39 爾許 若 問 別樣 事幹，好 在 合理个 公會 決斷 佢。

40 講到 今日 事幹，省得 要 告 我許 譟亂；因爲 無較 說話 好 分剖 箇 鬧事。”

41 講 完，佢 就 散開 眾人。

第廿章.

1 Pao-lo tao Mô-gyi-teng k‛e.
7 Ge ze-kæn fu væn-ts‛æn kông dao-li.
9 Yiu-t‛e-ku tih s, Pao-lo peh ge weh-cün-le.
17 Ze Mi-li-tu ao-le Yi-feh-su-keh tsiang-lao, t‛ong-ts ge-he tsiang-le iao p‛ong-djôh z-kön,
28 Zông-ti-keh yiang t‛ôh-fu ge-he,
29 yi t‛ong-ts ge ze ge-he cong-yiang kô sin-sang we c‛ih-le,
32 teh ge-he tao-kao.

1 保羅 到 馬其頓 去。
7 佢 在吤 赴 晚餐 講 道理。
9 猶推古 跌 死，保羅 畀 佢 活轉來。
17 在 米利都 噢來 以弗所个 長老，通知 佢許 將來 要 碰着 事幹，
28 上帝个 羊 託付 佢許，
29 貤 通知 佢 在 佢許 中央 假 先生 會 出來，
32 搭 佢許 禱告。

KEH ts‛ao-lön ön-zing, Pao-lo ao-le meng-du ky‛ün ge, feng-bih ih-fæn, ziu tao Mô-gyi-teng.

箇 譟亂 安靜，保羅 噢來 門徒 勸 佢，分別 一番，就 到 馬其頓。

2 Kying-ku keh-sih di-fông, yüong hyü-to shih-wa ky‛ün ge-he, ziu tao Hyi-læh.
3 Djü ze-kæn sæn-ke nyüih, ge iao k‛e-jün tao Jü-li-ô, Yiu-t‛a nying yüong kyi-meo iao ‛e ge; ziu kyüih-i ku Mô-gyi-teng cün-k‛e.
4 Keng ge tao Ô-si-ô cü-ts, yiu Pi-li-ô nying Su-pô-teh, T‛ih-sæh-lo-nyi-kô-keh Ô-li-dæh-ku teh Si-kong-tu, Deh-pi-keh Kô-yiu, wæ-yiu Di-mo-t‛a; Ô-si-ô-keh T‛e-kyi-ku teh Deh-lo-fi-mo.
5 Ge-he ku-sin, ze Deh-lo-ô teng ngô-he.
6 Vu-kao-tsih ts-‛eo, ngô-he jong Fi-lih-pi k‛e-jün, ng-nyih tao Deh-lo-ô, teh ge-he we-djôh; ze-kæn tæn-kôh ts‛ih-nyih.

2 經過 箇些 地方，用 許多 說話 勸 佢許，就 到 希臘。

3 住 在吤 三個 月，佢 要 開船 到 敘利亞，猶太 人 用 計謀 要 害 佢；就 決意 過 馬其頓 轉去。

4 跟 佢 到 亞西亞 主子，有 庇哩亞 人 所巴得，帖撒羅尼迦个 亞里達古 搭 西公都，特庇个 迦猶，還有 提摩太；亞西亞个 推基古 搭 特羅非摩。

5 佢許 過先，在 特羅亞 等 我許。

6 無酵節 之後，我許 從 非立比 開船，五日 到 特羅亞，搭 佢許 會着；在吤 耽擱 七日。

7 Ts‛ih-nyih-keh deo-nyih, meng-du jü-zih p‛ah ping, Pao-lo di-nyi nyih iao ky‛i-sing, su-i teh ge-he kông dao-li; ih-dzih kông tao pön-yia.
8 Ze ge-he jü-zih-keh leo-zông yiu hyü-to teng-liang.
9 Yiu ih-ke ‛eo-sang, ming-z Yiu-t‛e-ku, zo ze c‛ông-zông, tang k‛eh-c‛ong; Pao-lo kông dziang-kyiu, ge kw‛eng-k‛e, ziu jong sæn-zeng-leo tih-lôh; tông-ky‛i yi-kying s-gao.
10 Pao-lo tseo-lôh, p‛oh ze ge sing-zông, peh ge k‛u-lao, kông, “Ng-he feh iao kying-hông; ge sing-ming wæ ze-teh.”
11 Ziu tse zông leo, p‛ah ping, yi ky‛üoh-ku, teh ge-he jü-de kông dziang-kyiu, dzih-tao t‛in-liang, ziu ky‛i-sing.
12 Keh ‛eo-sang weh-gao, ge-he ky‛in ge, kôh-nying ting ön-yü.

7 七日个 頭日，門徒 聚集 𤖼餅，保羅 第二 日 要 起身，所以 搭 佢許 講 道理；一直 講 到 半夜。

8 在 佢許 聚集个 樓上 有 許多 燈亮。

9 有 一個 後生，名字 猶推古，坐 在 窗上，打 瞌𥅻；保羅 講 長久，佢 睏去，就 從 三層樓 跌落；擋起 已經 死爻。

10 保羅 走落，覆 在 佢 身上，畀 佢 䉐牢，講，“爾許 不 要 驚慌；佢 性命 還 在𡍲。”

11 就 再 上 樓，𤖼 餅，貤 喫過，搭 佢許 聚隊 講 長久，直到 天亮，就 起身。

12 箇 後生 活爻，佢許 牽 佢，各人 頂 安慰。

13 Ngô-he lôh-jün, sa tao Ô-shôh, iao ze-kæn tsih Pao-lo: ing-yü ge z-t‛ih iah-ding, ge-z tseo ‛ön-lu.
14 Ze Ô-shôh we-djôh Pao-lo, tsih ge lôh-jün, sa tao Mi-t‛e-li-nyi.
15 Jong kæn k‛e-jün, di-nyi nyih sa tao Kyi-ah te-‛ön; di-sæn nyih sa-tsing Sæh-mo; p‛ao ze To-kyi-lin, di-s nyih tao Mi-li-tu.
16 Pao-lo kyüih-i sa-ku Yi-feh-su, min-teh Ô-si-ô to tæn-kôh kong-fu; siang kw‛a-ting, ‛oh-tsia ng-shing-tsih-keh nyih-ts hao tao Yia-lu-sæh-lang.

13 我許 落船，駛 到 亞朔，要 在吤 接 保羅：因爲 佢 是僣 約定，佢自 走 岸路。

14 在 亞朔 會着 保羅，接 佢 落船，駛 到 米推利尼。

15 從 吤 開船，第二 日 駛 到 基厄 對岸；第三 日 駛進 撒摩；拋 在 多基連，第四日到米利都。

16 保羅 決意 駛過 以弗所，免得 亞西亞 多 耽擱 工夫；想 快點，或者 五旬節个 日子 好 到 耶路撒冷。

17 PAO-LO jong Mi-li-tu ts‛a nying tao Yi-feh-su ts‛ing kao-we-keh tsiang-lao.
18 Le-gao, Pao-lo teh ge-he kông.

17 保羅 從 米利都 差 人 到 以弗所 請 教會个 長老。

18 來爻，保羅 搭 佢許 講。

“Ng-he tu hyiao-teh jong ngô ky‛i-ts‛u tao Ô-si-ô yi-le, zông-zông teh ng-he jü-de tsa-sang tso-nying,

19 voh-z Cü yiu ih-ts‛ih-keh ky‛in-hyü, c‛ih ngæn-li, yi bi Yiu-t‛a nying meo-‛e ngô-keh næn-deo:
20 væn-pah kwæn-djôh ng-he-keh ih-c‛ü ngô vong ing-mön, ze cong-nying min-zin teh kôh-nying oh-li t‛ong-ts ng-he, kao-hyüing ng-he;
21 ky‛ün Yiu-t‛a nying teh Hyi-læh nying, tu iao hwe-ke kyü-voh Zông-ti, siang-sing ngô-he Cü Yia-su Kyi-toh.

“爾許 都 曉得 從 我 起初 到 亞西亞 以來，常常 搭 爾許 聚隊 怎生 做人，

19 服事 主 有 一切个 謙虛，出 眼淚，貤 被 猶太 人 謀害 我个 難頭：

20 凡百 關着 爾許个 益處 我 朆 隱瞞，在 眾人 面前 搭 各人 屋裏 通知 爾許，教訓 爾許；

21 勸 猶太 人 搭 希臘 人，都 要 悔改 歸服 上帝，相信 我許 主 耶穌 基督。

22 “Yin-ze ngô sing vôh-lao tao Yia-lu-sæh-lang k‛e, feh-ts ze-kæn we p‛ong-djôh zah-m z-kön:
23 tsih-z Sing-Ling ze kôh zing-li ts-tin ngô, kông yiu kw‛eng-pông teh wæn-næn ze-teh teng ngô.
24 Dæn-z keh z-kön ngô feh tông ka-i, ah fe feh-sô-teh z-keh sing-ming, iao kao-hying tseo-wön ngô lu, tso-zing Cü Yia-su su kao-de ngô-keh tsih-veng, te-tsing Zông-ti eng-yü-keh foh-ing.

22 “現在 我 心 縛牢 到 耶路撒冷 去，不知 在吤 會 碰着 倽某 事幹：

23 只是 聖靈 在 各 城裏 指點 我，講 有 綑綁 搭 患難 在𡍲 等 我。

24 但是 箇 事幹 我 不 當 介意，也 𣍐 不捨得 自个 性命，要 高興 走完 我 路，做成 主 耶穌 所 交代 我个 職份，對證 上帝 恩惠个 福音。

25 “Ngô su-zông ze ng cong-yiang le-k‛e djün Zông-ti koh-keh dao-li, ngô hyiao-teh ng-he yi-‛eo feh neng tse teh ngô kyin-min.
26 Su-i ngô kying-nyih tso te-tsing peh ng-he, cong-nying-keh hyüih feh sön ngô tsiang.
27 Ing-yü Zông-ti-keh ts-i ngô vong ing-mön, tu djün peh ng-he.
28 Su-i ng-he z yüong ku-djôh z, ah iao ku-djôh keh ih-do-pæn yiang, Sing-Ling su sih-lih ng-he tso kæn-toh-keh, tsiao-kwön Zông-ti-keh kao-we, ziu-z Ge yüong Z-keh hyüih su ma-le.
29 Ngô hyiao-teh ngô k‛e ts-‛eo pih-ding yiu li-‛e-keh za-lông tseo-tsing ng-he cong-yiang, feh e-sih keh-pæn yiang;
30 ze ng-he z-kyi cong-yiang ah pih-ding yiu nying c‛ih-le, kông zia dao-li, siang yiu-‛oh meng-du keng ge.
31 Su-i ng-he yüong kying-sing, iao kyi-teh ngô sæn-nyin kong-fu nyih yia feh hyih yiu ngæn-li ky‛ün ng kôh-nying.

25 “我 素常 在 爾 中央 來去 傳 上帝 國个 道理，我 曉得 爾許 以後 不 能 再 搭 我 見面。

26 所以 我 今日 做 對證 畀 爾許，眾人个 血 不 算 我 賬。

27 因爲 上帝个 旨意 我 朆 隱瞞，都 傳 畀 爾許。

28 所以 爾許 是 用 顧着 自，也 要 顧着 箇 一大班 羊，聖靈 所 設立 爾許 做 監督个，照管 上帝个 教會，就是 佢 用 自个 血 所 買來。

29 我 曉得 我 去 之後 必定 有 厲害个 豺狼 走進 爾許 中央，不 愛惜 箇班 羊；

30 在 爾許 自己 中央 也 必定 有 人 出來，講 邪 道理，想 誘惑 門徒 跟 佢。

31 所以 爾許 用 警醒，要 記得 我 三年 工夫 日 夜 不 歇 有 眼淚 勸 爾 各人。

32 “Hyüong-di, ngô yin-ze peh ng-he t‛ôh-fu Zông-ti, teh Ge eng-yü-keh dao-li, keh dao-li neng-keo zing-ziu ng-he-keh teh-‛ang, yi s-peh ng-he sæn-nyih ze cong sing-du ts-cong.
33 Ngô vong t‛ön kæh-nying-keh kying-ts, nying-ts, teh i-zông.
34 Ng-he tu hyiao-teh ngô keh-shông siu z kyüong-ing ngô-keh yüong-dziang, ah kyüong-ing ngô dong-de cü-ts.
35 Ngô væn-pah z-kön tso pông-yiang peh ng-he, iao ng-he z-t‛ih lao-loh, pông-zu nyün-ziah cü-ts, yi iao ng-he kyi-teh Cü Yia-su shih-wa, ziu-z, ‘S eng, pi ziu eng, kah-nga yiu foh-ky‛i.’ ”

32 “兄弟，我 現在 畀 爾許 託付 上帝，搭 佢 恩惠个 道理，箇 道理 能彀 成就 爾許个 德行，貤 賜畀 爾許 產業 在 眾 聖徒 之中。

33 我 朆 貪 吤人个 金子，銀子，搭 衣裳。

34 爾許 都 曉得 我 箇雙 手 是 供應 我个 用場，也 供應 我 同隊 主子。

35 我 凡百 事幹 做 榜樣 畀 爾許，要 爾許 是僣 勞碌，幫助 軟弱 主子，貤 要 爾許 記得 主 耶穌 說話，就是，‘賜 恩，比 受 恩，格外 有 福氣。’ ”

36 Kông-ku, gyü-lôh, teh cong-nying jü-de tao-kao.
37 Ge-he tu t‛ong-k‛oh, k‛u-lao Pao-lo deo-kying, teh ge ‛o-cü,
38 ge-he ting iu-zeo, yü ge kông “yi-‛eo fe tse kyin ge min.” Ziu song ge lôh-jün.

36 講過，跪落，搭 眾人 聚隊 禱告。

37 佢許 都 痛哭，䉐牢 保羅 頭頸，搭 佢 唩嘴，

38 佢許 頂 憂愁，爲 佢 講 “以後 𣍐 再 見 佢 面。” 就 送 佢 落船。

第廿一章.

1 Pao-lo feh t‛ing ky‛ün ih-ding tao Yia-lu-sæh-lang k‛e.
9 Fi-lih yiu s-ke nô we kông sin-ts shih-wa.
17 Pao-lo tao Yia-lu-sæh-lang k‛e,
27 bi k‛ô-lao, tsang-ting tang s,
31 Ts‛in-tsong kyiu ge, ing-hyü ze pah-sing min-zin feng-p‛eo.

1 保羅 不 聽 勸 一定 到 耶路撒冷 去。
9 非力 有 四個 囡 會 講 先知 說話。
17 保羅 到 耶路撒冷 去，
27 被 揢牢，爭點 打 死，
31 千總 救 佢，應許 在 百姓 面前 分剖。

NGÔ-HE li-k‛e ge-he, k‛e-jün, ih-dzih sa tao Ko-z, di-nyi nyih tao Lo-ti; jong kæn tao P‛ô-da-læh,
2 p‛ong-djôh ih-tsih jün iao tao Fi-nyi-kyi, lôh-jün ziu k‛e-c‛ih.
3 Mông-djôh Kyü-pi-lu, sa-ku ge jing-siu-pin, hyiang Jü-li-ô k‛e, tao T‛e-lo zông-‛ön: ing-yü jün ze-kæn iao ky‛i-ho.
4 Ngô-he zing-djôh meng-du, teh ge jü-de tæn-kôh ts‛ih-nyih: ge-he bi Sing-Ling kön-dong, ao Pao-lo feh iao zông Yia-lu-sæh-lang.
5 Nyih-ts mön-gao, ngô-he ky‛i-sing; ge-he lin nyü-nying n-nô song ngô-he tao zing-nga: tu gyü ze ‛ön-zông tao-kao,
6 jü-de feng-bih, ngô-he lôh-jün, ge-he cün u-li.

我許 離開 佢許，開船，一直 駛 到 哥士，第二 日 到 羅底；從 吤 到 帕大喇，

2 碰着 一隻 船 要 到 非尼基，落船 就 開出。

3 望着 居比路，駛過 佢 順手邊，向 敘利亞 去，到 推羅 上岸：因爲 船 在吤 要 起貨。

4 我許 尋着 門徒，搭 佢 聚隊 耽擱 七日：佢許 被 聖靈 感動，噢 保羅 不 要 上 耶路撒冷。

5 日子 滿爻，我許 起身；佢許 連 女人 兒囡 送 我許 到 城外：都 跪 在 岸上 禱告，

6 聚隊 分別，我許 落船，佢許 轉 塢裏。

7 Jong T‛e-lo sa tao To-li-ma, shü-lu wön-gao; ziu t‛ao-sing hyüong-di, jü-de djü ih-nyih.
8 Di-nyi nyih ngô-he tu ky‛i-sing tao Ke-sæh-li-ô: tseo-tsing djün foh-ing Fi-lih-keh u-li, djü ze-kæn. Fi-lih ziu-z keh ts‛ih-ke nying ze-nen.
9 Ge yiu s-ke nô, z do-nyiang, we kông sin-ts shih-wa.

7 從 推羅 駛 到 多利買，水路 完爻；就 討信 兄弟，聚隊 住 一日。

8 第二 日 我許 都 起身 到 該撒利亞：走進 傳 福音 非力个 塢裏，住 在吤。非力 就是 箇 七個 人 在內。

9 佢 有 四個 囡，是 大娘，會 講 先知 說話。

10 Ngô-he djü to nyih, yiu ih-ke sin-ts-nying, ming-z Ô-kô-pu, jong Yiu-t‛a le.
11 Tao ngô-he su-ze, do Pao-lo-keh kyi-iao-ta, vôh ge z-kyi siu kyiah, kông, “Sing-Ling kông, ‘Keh ta-keh cü-nying-kô, Yiu-t‛a nying ze Yia-lu-sæh-lang ah we z-t‛ih zôh ge, song peh bih-koh nying-keh siu-li.’ ”

10 我許 住 多 日，有 一個 先知人，名字 亞迦布，從 猶太 來。

11 到 我許 所在，馱 保羅个 繫腰帶，縛 佢 自己 手 腳，講，“聖靈 講，‘箇 帶个 主人家，猶太 人 在 耶路撒冷 也 會 是僣 𧮙 佢，送 畀 別國 人个 手裏。’ ”

12 Ngô-he t‛ing keh shih-wa, teh keh di-fông nying tu jü-de ky‛ün ge feh iao zông Yia-lu-sæh-lang.
13 Pao-lo we-teh kông, “Ng-he tsa-sang k‛oh, siang-djôh ngô-keh sing? ngô yü Cü Yia-su-keh ming-deo, fi-tæn bi nying kw‛eng-pông, ziu-z s ze Yia-lu-sæh-lang ah zing-nyün.”
14 Ge kyi-zin feh k‛eng t‛ing ky‛ün, ngô-he ziu hyih-gao, kông, “Cü-keh ts-i hao tso-zing.”

12 我許 聽 箇 說話，搭 箇 地方 人 都 聚隊 勸 佢 不 要 上 耶路撒冷。

13 保羅 回答 講，“爾許 怎生 哭，傷着 我个 心？我 爲 主 耶穌个 名頭，非單 被 人 綑綁，就是 死 在 耶路撒冷 也 情願。”

14 佢 既然 不 肯 聽 勸，我許 就 歇爻，講，“主个 旨意 好 做成。”

15 Keh kyi-nyih ts-‛eo, ngô-he siu-zih ‛ang-li, zông Yia-lu-sæh-lang.
16 Yiu kyi-ke Ke-sæh-li-ô-keh meng-du jü-de k‛e, ta ngô-he tao ih-ke lao meng-du, Kyü-pi-lu nying, Nô-seng u-li tæn-kôh.

15 箇 幾日 之後，我許 收拾 行李，上 耶路撒冷。

16 有 幾個 該撒利亞个 門徒 聚隊 去，帶 我許 到 一個 老 門徒，居比路 人，拿孫 塢裏 耽擱。

17 NGÔ-HE tao Yia-lu-sæh-lang, hyüong-di tu kao-hying nying-tsih ngô-he.
18 Di-nyi nyih Pao-lo teh ngô-he jü-de tsing-k‛e kyin Ngô-kôh; cong tsiang-lao ze-kæn.
19 Pao-lo t‛ao-sing ge-he ku, ziu peh Zông-ti ze bih-koh cong-yiang yüong ge su tso ih-ts‛ih z-kön t‛ong-ts ge-he.

17 我許 到 耶路撒冷，兄弟 都 高興 迎接 我許。

18 第二 日 保羅 搭 我許 聚隊 進去 見 雅各；眾 長老 在吤。

19 保羅 討信 佢許 過，就 畀 上帝 在 別國 中央 用 佢 所 做 一切 事幹 通知 佢許。

20 Ge-he t‛ing-ku ziu kyü yüong-wa peh Cü; teh Pao-lo kông, “Hyüong-di, ng mông siang-sing-keh Yiu-t‛a nying yiu to-siao væn-su, kông-tao leh-fæh ge-he tu z nyih-sing:
21 yiu nying teh ge-he kông, ng kao-hyüing ze bih-koh-keh Yiu-t'a nying tu hao tön-gao Mo-si shih-wa, ao ge-he feh iao peh n-ts 'ang tsiu-keh-li, ah feh yüong i lao kwe-kyü.
22 Yin-ze tsa tsông-fæh? Ing-yü cong-nying t‛ing-djôh ng le-gao, pih-ding iao jü-zih.
23 Ng yüong i ngô-he shih-wa tso: Ngô-he ze-i yiu s-ke nying, yiu nyün-sing hyü-ku;
24 ng hao ta ge-he, teh ge-he jü-de kyih-zing, de ge do-c‛ih fi-yüong, peh ge-he hao t‛i-deo: cong-nying ziu hao hyiao-teh su t‛ing-djôh ng-keh z-kön tu z kô; yi hyiao-teh ng z-kyi ah z siu leh-fæh tso-nying.
25 Kông-tao siang-sing-keh bih-koh-nying, ngô-he yi-kying sia sing, ding-kyü ge-he feh yüong siu keh z-kön, tsih iao feh bang-djôh nyi-su-moh-tiao-keh tsi-veh, teh hyüih, lin ts‛ih-s-keh cong-sang, teh kæn-ying.”

20 佢許 聽過 就 歸 榮華 畀 主；搭 保羅 講，“兄弟，爾 望 相信个 猶太 人 有 多少 萬數，講到 律法 佢許 都 是 熱心：

21 有 人 搭 佢許 講，爾 教訓 在 別國个 猶太 人 都 好 斷爻 摩西 說話，噢 佢許 不 要 畀 兒子 行 周割禮，也 不 用 依 老 規矩。

22 現在 怎 妝法？因爲 眾人 聽着 爾 來爻，必定 要 聚集。

23 爾 用 依 我許 說話 做：我許 在倚 有 四個 人，有 願心 許過；

24 爾 好 帶 佢許，搭 佢許 聚隊 潔淨，代 佢 馱出 費用，畀 佢許 好 剃頭：眾人 就 好 曉得 所 聽着 爾个 事幹 都 是 假；貤 曉得 爾 自己 也 是 守 律法 做人。

25 講到 相信个 別國人，我許 已經 寫 信，定規 佢許 不 用 守 箇 事幹，只 要 不 碰着 泥塑木雕个 祭物，搭 血，連 敕死个 眾生，搭 姦淫。”

26 Pao-lo ta ge-he, di-nyi nyih teh ge-he jü-de kyih-zing-ku tseo-tsing sing-din, t‛ong-ts kyih-zing-keh nyih-ts mön-gao, teng-tao de kôh-nying hyin tsi-veh.

26 保羅 帶 佢許，第二 日 搭 佢許 聚隊 潔淨過 走進 聖殿，通知 潔淨个 日子 滿爻，等到 代 各人 獻 祭物。

27 Ts‛ih-nyih kw‛a mön, jong Ô-si-ô le-keh Yiu-t‛a nying, mông-djôh Pao-lo ze sing-din, ziu t‛iao-so cong pah-sing, dong-siu k‛ô ge,
28 ao-ky‛i-le kông, “Yi-seh-lih nying, le pông-zu: keh nying ziu-z kôh-tao-c‛ü djün-kao ti-dih ngô-he pah-sing, teh leh-fæh, teh ze-i di-fông: yi ta Hyi-læh nying tseo-tsing sing-din, we-u keh sing-zin su-ze.”
29 Ing-yü ge-he zin-deo mông-djôh Yi-feh-su nying Deh-lo-fi-mo teh Pao-lo jü-de ze zing-li, su-i ts‛eng Pao-lo ta ge tsing sing-din.
30 Mön zing-li ziu yiao-dong, pah-sing tu diao-le: k‛ô Pao-lo, t‛a-c‛ih sing-din: meng ziu kwæn-gao.

27 七日 快 滿，從 亞西亞 來个 猶太 人，望着 保羅 在 聖殿，就 挑唆 眾 百姓，動手 揢 佢，

28 噢起來 講，“以色列 人，來 幫助：箇 人 就是 各到處 傳教 抵敵 我許 百姓，搭 律法，搭 在倚 地方：貤 帶 希臘 人 走進 聖殿，穢污 箇 聖善 所在。”

29 因爲 佢許 前頭 望着 以弗所 人 特羅非摩 搭 保羅 聚隊 在 城裏，所以 忖 保羅 帶 佢 進 聖殿。

30 滿 城裏 就 搖動，百姓 都 趒來：揢 保羅，拖出 聖殿：門 就 關爻。

31 Tsing iao wa-sön tsông ge s, yiu sing-sih djün tao ying-li teh ts‛in-tsong, kông, “Yia-lu-sæh-lang tu lön-ky‛i-le.”
32 Ge lih-k‛eh teh pah-tsong ky‛i ping, diao tao ge-he su-ze; cong-nying mông-djôh ts‛in-tsong teh ying-ping, ziu feh tse tang Pao-lo.
33 Ts‛in-tsong tseo-le k‛ô ge, feng-fu do liang-kwang t‛ih-lin so-lao; meng ge z zao-teh nying, ge tso-ku zah-m z-kön.
34 Cong-nying ao-ky‛i-le; yü lön feng-feng, ts‛in-tsong dzô-feh-c‛ih yün-ku, feng-fu ta ge tao ying-li.
35 Tao in-ka-zông, yü cong-nying tsi-mang, ying-ping tsih hao tông ge;
36 cong pah-sing keng ze ‛eo-min, ao-ky‛i-le kông, “Tön ge gao.”

31 正 要 畫算 妝 佢 死，有 訊息 傳 到 營裏 搭 千總，講，“耶路撒冷 都 亂起來。”

32 佢 立刻 搭 百總 起 兵，趒 到 佢許 所在；眾人 望着 千總 搭 營兵，就 不 再 打 保羅。

33 千總 走來 揢 佢，吩咐 馱 兩梗 鐵鏈 鎖牢；問 佢 是 倽𡍲 人，佢 做過 倽某 事幹。

34 眾人 噢起來；爲 亂 紛紛，千總 查不出 緣故，吩咐 帶 佢 到 營裏。

35 到 檐階上，爲 眾人 擠猛，營兵 只 好 擋 佢；

36 眾 百姓 跟 在 後面，噢起來 講，“斷 佢 爻。”

37 Pao-lo kw‛a tsing ying-li, teh ts‛in-tsong kông, “Ngô hao teh ng kông ih-kyü feh?” Ts‛in-tsong kông, “Hyi-læh shih-wa ng hyiao-teh feh?
38 Ng ky‛i feh-z keh Yi-gyih nying, zin-deo tsôh-lön, ta-ling s-ts‛in hyüong-siu tseo-c‛ih tao hông-yia?”
39 Pao-lo kông, “Ngô z Yiu-t‛a nying, sang ze Kyi-li-kô-keh Da-su, z yiu ming-sing zing-li-keh pah-sing: gyiu ng ing-hyü ngô teh pah-sing kông.”

37 保羅 快 進 營裏，搭 千總 講，“我 好 搭 爾 講 一句 不？” 千總 講，“希臘 說話 爾 曉得 不？

38 爾 豈 不是 箇 以及 人，前頭 作亂，帶領 四千 兇手 走出 到 荒野？”

39 保羅 講，“我 是 猶太 人，生 在 基利家个 大數，是 有 名聲 城裏个 百姓：求 爾 應許 我 搭 百姓 講。”

40 Ts‛in-tsong ing-hyü, Pao-lo ziu gyi ze in-ka-zông, dziao pah-sing siu yüih-yüih. Ge-he ih-ting feh hyiang, Pao-lo yüong Hyi-pah-le t‛u-ing teh ge-he kông,

40 千總 應許，保羅 就 徛 在 檐階上，朝 百姓 手 㧒㧒。佢許 一點 不 響，保羅 用 希伯來 土音 搭 佢許 講，

第廿二章.

1 Pao-lo kông ge tsa-sang siang-sing,
17 tsa-sang bi kæn-shün tso meng-du.
22 Pao-lo kông iao djün dao-li peh bih-koh nying, cong-nying ao-ky‛i-le.
24 Bi-bæn iao tang Pao-lo,
25 yü ge kông ge z Lo-mô nying, ts‛in-tsong m-tæn tang ge.

1 保羅 講 佢 怎生 相信，
17 怎生 被 揀選 做 門徒。
22 保羅 講 要 傳 道理 畀 別國 人，眾人 噢起來。
24 備辦 要 打 保羅，
25 爲 佢 講 佢 是 羅馬 人，千總 無膽 打 佢。

“Cong-yü pah-shoh hyüong-di, ts‛ing ng-he t‛ing ngô yin-ze feng-p‛eo shih-wa.
2 (Cong-nying t‛ing ge yüong Hyi-pah-le-keh t‛u-ing teh ge-he kông, kah-nga pih-zing⁵⁾: Pao-lo kông,)
3 Ngô z Yiu-t‛a nying, sang ze Kyi-li-kô-keh Da-su, ze-i zing-li yiang-do ze Kô-mô-lih meng-‛ô dziang-si ‛ôh-zih tsu-tsong-keh leh-fæh, yü Zông-ti nyih-sing, teh kying-nyih ng kôh-yü ih-yiang:
4 ngô zin-deo pih-næn jong keh Dao-lu nying tao s-keh di-bu, feh-leng nön-nyü tu pông-ky‛i kwæn ze kæn-lao.
5 Da tsi-s teh cong tsiang-lao hao teh ngô tso te-tsing; ngô jong ge-he siu-li tsih-ziu sia peh hyüong-di-keh sing, tao Da-mô-seh k‛e, iao peh ze-kæn-keh nying pông-ky‛i ta tao Yia-lu-sæh-lang, ziu ying-væh.

“眾位 伯叔 兄弟，請 爾許 聽 我 現在 分剖 說話。

2 （眾人 聽 佢 用 希伯來个 土音 搭 佢許 講，格外 僻靜：保羅 講，）

3 我 是 猶太 人，生 在 基利家个 大數，在倚 城裏 養大 在 迦瑪列 門下 詳細 學習 祖宗个 律法，爲 上帝 熱心，搭 今日 爾 各位 一樣：

4 我 前頭 逼難 從 箇 道路 人 到 死个 地步，不論 男女 都 綁起 關 在 監牢。

5 大 祭司 搭 眾 長老 好 搭 我 做 對證；我 從 佢許 手裏 接受 寫 畀 兄弟个 信，到 大馬色 去，要 畀 在吤个 人 綁起 帶 到 耶路撒冷，受 刑罰。

6 “Ngô kw‛a tao Da-mô-seh, mao nyih-tsiu, mah-ding t‛in yiu ting do liang-kwông deo-ky‛ün tsiao-djôh ngô.
7 Ngô ziu tih-tao di, t‛ing-djôh yiu sing-ing teh ngô kông, ‘Sao-lo, Sao-lo, ng tsa-sang pih-næn Ngô?’
8 Ngô we-teh kông, ‘Cü, Ng z kæh-nying?’ Ge teh ngô kông, ‘Ngô ziu-z ng su pih-næn-keh Nô-sæh-læh Yia-su.’
9 Teh ngô jü-de-keh nying mông-djôh liang-kwông, ziu p‛ô-gyü; tsih t‛ing-feh-c‛ih teh ngô kông Cü-ts-keh sing-ing.
10 Ngô kông, ‘Cü, ngô ing-ke tsa tso?’ Cü teh ngô kông, ‘Nang-ky‛i, tao Da-mô-seh k‛e; væn-pah ding-kyü peh ng tso z-kön, ze-kæn we teh ng kông.’
11 Ngô yü keh liang-kwông yüong-yiao feh neng mông, jü-de cü-ts ky‛in ngô siu, tao Da-mô-seh k‛e.
12 Yiu ih-ke nying Ô-nô-nyi-ô, tsiao leh-fæh z gyin-sing-keh nying, djü ze-kæn-keh Yiu-t‛a nying tu ts‛ing-tsæn,
13 tseo-tao ngô su-ze, gyi ze ngô pin, teh ngô kông, ‘Hyüong-di Sao-lo, ng hao mông-djôh.’ Ngô tông-z mông-djôh ge.
14 Ge yi kông, ‘Ngô-he tsu-tsong-keh Zông-ti yü-sin sih-lih ng hao hyiao-teh Ge-keh ts-i, mông-djôh keh-yü tsing-dzih Cü-ts, t‛ing-djôh Ge k‛eo-li shih-wa.
15 Ing-yü ng su mông-djôh su t‛ing-djôh z-kön, iao ze cong-nying min-zin yü Ge tso te-tsing.
16 Yin-ze ng zao yün-ku tæn-kôh? Nang-ky‛i, tao-kao Cü ming-deo ziu si-li, si-gao ng-keh ze.’

6 “我 快 到 大馬色，毛 日晝，驀停 天 有 頂 大 亮光 頭圈 照着 我。

7 我 就 跌倒 地，聽着 有 聲音 搭 我 講，‘掃羅，掃羅，爾 怎生 逼難 我？’

8 我 回答 講，‘主，爾 是 吤人？’ 佢 搭 我 講，‘我 就是 爾 所 逼難个 拿撒勒 耶穌。’

9 搭 我 聚隊个 人 望着 亮光，就 怕懼；只 聽不出 搭 我 講 主子个 聲音。

10 我 講，‘主，我 應該 怎 做？’ 主 搭 我 講，‘玍起，到 大馬色 去；凡百 定規 畀 爾 做 事幹，在吤 會 搭 爾 講。’

11 我 爲 箇 亮光 榮耀 不 能 望，聚隊 主子 牽 我 手，到 大馬色 去。

12 有 一個 人 亞拿尼亞，照 律法 是 虔心个 人，住 在吤个 猶太 人 都 稱讚，

13 走到 我 所在，徛 在 我 邊，搭 我 講，‘兄弟 掃羅，爾 好 望着。’ 我 當時 望着 佢。

14 佢 貤 講，‘我許 祖宗个 上帝 預先 設立 爾 好 曉得 佢个 旨意，望着 箇位 正直 主子，聽着 佢 口裏 說話。

15 因爲 爾 所 望着 所 聽着 事幹，要 在 眾人 面前 爲 佢 做 對證。

16 現在 爾 倽 緣故 耽擱？玍起，禱告 主 名頭 受 洗禮，洗爻 爾个 罪。’

17 “Ngô tse tao Yia-lu-sæh-lang, ze sing-din tao-kao z-‛eo, nying hweng-k‛e,
18 mông-djôh Ge teh ngô kông, ‘Yüong kw‛a-ting tseo-c‛ih Yia-lu-sæh-lang; ing-yü ng yü Ngô su tso-keh te-tsing ge-he feh k‛eng tsih-ziu.’
19 Ngô kông, ‘Cü, ge-he hyiao-teh ngô su-le k‛ô siang-sing Ng cü-ts lôh kæn-lao, ze kôh jü-we-dông tang ge:
20 wæ-yiu yü Ng tso kyin-tsing-keh Z-di-fæn ge-keh hyüih liu-c‛ih z-‛eo, ngô gyi ze pin, cong-i ge s, yi siu-lao tsông-s ge cü-ts-keh i-zông.’
21 Cü yi teh ngô kông, ‘K‛e; Ngô iao ts‛a ng yün-yün tao bih-koh nying su-ze.’ ”

17 “我 再 到 耶路撒冷，在 聖殿 禱告 時候，人 昏去，

18 望着 佢 搭 我 講，‘用 快點 走出 耶路撒冷；因爲 爾 爲 我 所 做个 對證 佢許 不 肯 接受。’

19 我 講，‘主，佢許 曉得 我 素來 揢 相信 爾 主子 落 監牢，在 各 聚會堂 打 佢：

20 還有 爲 爾 做 見證个 士提反 佢个 血 流出 時候，我 徛 在 邊，中意 佢 死，貤 守牢 妝死 佢 主子个 衣裳。’

21 主 貤 搭 我 講，‘去；我 要 差 爾 遠遠 到 別國 人 所在。’ ”

22 Cong-nying t‛ing ge tao keh-kyü shih-wa, ziu ao-ky‛i-le, kông, “Keh-yiang-ts nying, jong si-zông djü-mih ge: feh ing-ke peh ge weh.”
23 Ge-he ao-ky‛i-le, t‛eh-gao i-zông, do hwe-dzing tsæh ze k‛ong-cong,
24 ts‛in-tsong ao nying peh Pao-lo ta-tsing ying-li, feng-fu yüong pin k‛ao-tang meng ge, iao hyiao-teh ge-he keh-t‛ih ao-ky‛i-le z zao yün-ku.
25 Ge-he do bi-ta pông-ky‛i Pao-lo, Pao-lo teh gyi ze pin-keh pah-tsong kông, “Lo-mô nying, vong ding ze, ng-he hao tang ge feh?”
26 Pah-tsong t‛ing-djôh, ziu t‛ong-ts ts‛in-tsong, kông, “Ng su tso iao liu-sing, keh z Lo-mô nying.”
27 Ts‛in-tsong tseo-le teh ge kông, “Ng t‛ong-ts ngô, ng z Lo-mô nying feh?” Ge kông, “Z-keh.”
28 Ts‛in-tsong kông, “Ngô tso Lo-mô nying z yüong hyü-to nying-ts ma le.” Pao-lo kông, “Ngô sang-c‛ih ziu-z.”
29 Iao k‛ao-tang meng ge cü-ts ziu li-k‛e ge: ts‛in-tsong hyiao-teh ge z Lo-mô nying, ing-yü yi-kying pông-ky‛i ge, ziu kying-hôh.

22 眾人 聽 佢 到 箇句 說話，就 噢起來，講，“箇樣子 人，從 世上 除滅 佢：不 應該 畀 佢 活。”

23 佢許 噢起來，脫爻 衣裳，馱 灰塵 撒 在 空中，

24 千總 噢 人 畀 保羅 帶進 營裏，吩咐 用 鞭 拷打 問 佢，要 曉得 佢許 箇僣 噢起來 是 倽 緣故。

25 佢許 馱 皮帶 綁起 保羅，保羅 搭 徛 在 邊个 百總 講，“羅馬 人，朆 定 罪，爾許 好 打 佢 不？”

26 百總 聽着，就 通知 千總，講，“爾 所 做 要 留心，箇 是 羅馬 人。”

27 千總 走來 搭 佢 講，“爾 通知 我，爾 是 羅馬 人 不？” 佢 講，“是个。”

28 千總 講，“我 做 羅馬 人 是 用 許多 銀子 買 來。” 保羅 講，“我 生出 就是。”

29 要 拷打 問 佢 主子 就 離開 佢：千總 曉得 佢 是 羅馬 人，因爲 已經 綁起 佢，就 驚𢞕。

30 DI-NYI nyih, iao k‛ôh-zih hyiao-teh ge bi Yiu-t‛a nying su kao-keh yün-ku, peh ge pông ka-gao, ao cong tsi-s-tsiang teh jün kong-we tu-le; ta Pao-lo c‛ih, peh ge gyi ze ge-he min-zin.

30 第二 日，要 確實 曉得 佢 被 猶太 人 所 告个 緣故，畀 佢 綁 解爻，噢 眾 祭司長 搭 全 公會 都來；帶 保羅 出，畀 佢 徛 在 佢許 面前。

第廿三章.

1 Pao-lo feng-p‛eo z-‛eo,
2 Ô-nô-nyi-ô feng-fu tang ge cü-kwah,
7 Kao ge cü-ts feng-k‛e.
11 Cü tsông ge tæn.
14 Yiu-t‛a nying ma-voh iao sæh ge,
20 yiu nying t‛ong-ts ts‛in-tsong.
27 Ts‛in-tsong ts‛a ge tao Fi-li-z.

1 保羅 分剖 時候，
2 亞拿尼亞 吩咐 打 佢 嘴摑，
7 告 佢 主子 分開。
11 主 壯 佢 膽。
14 猶太 人 埋伏 要 殺 佢，
20 有 人 通知 千總。
27 千總 差 佢 到 非力士。

1 Pao-lo ts‛ing-ting mông kong-we, kông, “Cong-yü hyüong-di, ngô ze Zông-ti min-zin yiang-yiang i liang-sing tso-nying, dzih tao kying-nying.”

保羅 青盯 望 公會，講，“眾位 兄弟，我 在 上帝 面前 樣樣 依 良心 做人，直 到 今日。”

2 Da tsi-s Ô-nô-nyi-ô feng-fu gyi ze pin-keh nying tang ge cü-kwah.
3 Pao-lo ziu teh ge kông, “Ng feng-bah-keh ziang: Zông-ti we tang ng. Ng zo-lôh iao tsiao leh-fæh sing ngô, wæ we yü-be leh-fæh ao nying tang ngô?”
4 Gyi ze pin-keh nying kông, “Zông-ti-keh da tsi-s ng we zôh ge feh?”
5 Pao-lo kông, “Hyüong-di, ngô feh hyiao-teh ge z da tsi-s: ing-yü yiu sia-lôh kông, ‘Ng pah-sing-keh kwön feh-k‛o hyü-pông ge.’ [C. 22. 28.]”

2 大 祭司 亞拿尼亞 吩咐 徛 在 邊个 人 打 佢 嘴摑。

3 保羅 就 搭 佢 講，“爾 粉白个 牆：上帝 會 打 爾。爾 坐落 要 照 律法 審 我，還 會 違背 律法 噢 人 打 我？”

4 徛 在 邊个 人 講，“上帝个 大 祭司 爾 會 𧮙 佢 不？”

5 保羅 講，“兄弟，我 不 曉得 佢 是 大 祭司：因爲 有 寫落 講，‘爾 百姓个 官 不可 毀謗 佢。’ [C. 22. 28.]”

6 Pao-lo hyiao-teh gyi-cong yiu-sih z Sæh-t‛u-ke nying, yiu-sih z Fæh-li-se nying, ze kong-we-li ao-hyiang kông, “Cong-yü hyüong-di, Ngô z Fæh-li-se nying, ah z Fæh-li-se nying-keh n-ts; yü sô-mông s-gao tse-weh, ngô yin-ze bi sing-p‛ön.”

6 保羅 曉得 其中 有些 是 撒土該 人，有些 是 法利賽 人，在 公會裏 噢響 講，“眾位 兄弟，我 是 法利賽 人，也 是 法利賽 人个 兒子；爲 奢望 死爻 再活，我 現在 被 審判。”

7 Pao-lo kông keh shih-wa, Fæh-li-se nying teh Sæh-t‛u-ke nying ts‛ao-ky‛i-le: cong-nying liang-‛ô feng-k‛e.
8 Ing-yü Sæh-t‛u-ke nying kông m-yiu tse-weh, ah m-yiu t‛in-s teh ling: Fæh-li-se nying kông keh liang-yiang tu yiu.
9 Ziu do sing-hyiang ao-ky‛i-le: Fæh-li-se-keh doh-shü-nying nang-ky‛i tsang-leng, kông, “Keh nying ngô-he zing-feh-c‛ih zah-m hyüong-ôh: ‛oh-tsia yiu ling, ‛oh-tsia yiu t‛in-s teh ge kông, ngô-he feh-k‛o ti-dih Zông-ti.”
10 Yü do tsang-leng, ts‛in-tsong sang-teh Pao-lo bi ge-he p‛ah-gao, feng-fu ping lôh-le, jong ge-he cong-yiang deh ge c‛ih, ta-tsing ying-li.

7 保羅 講 箇 說話，法利賽 人 搭 撒土該 人 吵起來：眾人 兩下 分開。

8 因爲 撒土該 人 講 無有 再活，也 無有 天使 搭 靈：法利賽 人 講 箇 兩樣 都 有。

9 就 大 聲響 噢起來：法利賽个 讀書人 玍起 爭論，講，“箇 人 我許 尋不出 倽某 兇惡：或者 有 靈，或者 有 天使 搭 佢 講，我許 不可 抵敵 上帝。”

10 爲 大 爭論，千總 省得 保羅 被 佢許 𤖼爻，吩咐 兵 落來，從 佢許 中央 奪 佢 出，帶進 營裏。

11 Tông-yia Cü gyi ze ge pin, kông, “Pao-lo, fông-sing; ng ze Yia-lu-sæh-lang kyi-zin yü Ngô tso te-tsing, ze Lo-mô ah iao z-t‛ih tso te-tsing.”

11 當夜 主 徛 在 佢 邊，講，“保羅，放心；爾 在 耶路撒冷 既然 爲 我 做 對證，在 羅馬 也 要 是僣 做 對證。”

12 TAO t‛in-liang, yiu kyi-ke Yiu-t‛a nying jü-de kyih-tông væh-tsiu, kông feh sæh Pao-lo, feh ky‛üoh feh hæh.
13 Væh keh tsiu cü-ts yiu s-zih to nying.
14 Ge-he tao tsi-s-tsiang tsiang-lao su-ze, kông, “Ngô-he yi-kying væh-ku tsiu, feh sæh Pao-lo, ih-ting feh ky‛üoh.
15 Yin-ze væn ng-he teh cong kong-we t‛ong-ts ts‛in-tsong, ts‛ing ge t‛in-nyiang ta Pao-lo lôh-le kyin ng-he, ziang iao hyiao-teh ge z-kön kah-nga dziang-si; ngô-he, teng ge vong tao ng-he su-ze, yü-bi sæh ge.”

12 到 天亮，有 幾个 猶太 人 聚隊 結黨 罰咒，講 不 殺 保羅，不 喫 不 呷。

13 罰 箇 咒 主子 有 四十 多 人。

14 佢許 到 祭司長 長老 所在，講，“我許 已經 罰過 咒，不 殺 保羅，一點 不 喫。

15 現在 煩 爾許 搭 眾 公會 通知 千總，請 佢 天亮 帶 保羅 落來 見 爾許，像 要 曉得 佢 事幹 格外 詳細；我許，等 佢 朆 到 爾許 所在，預備 殺 佢。”

16 Pao-lo ts-me-keh n-ts t‛ing-djôh ge-keh kyi-meo, ziu tao ying-li, t‛ong-ts Pao-lo.
17 Pao-lo ziu ts‛ing ih-ke pah-tsong le, kông, “Ta keh ‛eo-sang k‛e kyin ts‛in-tsong; ing-yü yiu ih-yiang z-kön iao t‛ong-ts ge.”
18 Ge ta ge k‛e kyin ts‛in-tsong, kông, “Væn-nying Pao-lo ts‛ing ngô le, iao ngô ta keh ‛eo-sang le kyin ng, yiu ih-ky‛i z-kön iao teh ng kông.”
19 Ts‛in-tsong te ge siu, tseo-tao ön-cong su-ze, meng ge kông, “Ng yiu zao z-kön iao t‛ong-ts ngô?”
20 Ge kông, “Yiu-t‛a nying yi-kying iah hao gyiu ng t‛in-nyiang ta Pao-lo tao kong-we, ziang iao tse k‛ao-kyiu ge dziang-si.
21 Ng feh iao t‛ing ge: ing-yü nen-cong yiu s-zih-kyi nying ma-voh-kæn; ge-he væh-tsiu, feh sæh ge, feh ky‛üoh feh hæh; yin-ze yi-kying yü-bi, tæn-teng ng ing-hyü.”
22 Ts‛in-tsong ao ‛eo-sang k‛e, feng-fu ge, “Ng t‛ong-ts ngô z-kön, feh iao teh nying kông.”

16 保羅 姊妹个 兒子 聽着 佢个 計謀，就 到 營裏，通知 保羅。

17 保羅 就 請 一個 百總 來，講，“帶 箇 後生 去 見 千總；因爲 有 一樣 事幹 要 通知 佢。”

18 佢 帶 佢 去 見 千總，講，“犯人 保羅 請 我 來，要 我 帶 箇 後生 來 見 爾，有 一起 事幹 要 搭 爾 講。”

19 千總 𠡒 佢 手，走到 暗中 所在，問 佢 講，“爾 有 倽 事幹 要 通知 我？”

20 佢 講，“猶太 人 已經 約 好 求 爾 天亮 帶 保羅 到 公會，像 要 再 考究 佢 詳細。

21 爾 不 要 聽 佢：因爲 內中 有 四十幾 人 埋伏吤；佢許 罰咒，不 殺 佢，不 喫 不 呷；現在 已經 預備，單等 爾 應許。”

22 千總 噢 後生 去，吩咐 佢，“爾 通知 我 事幹，不 要 搭 人 講。”

23 Ziu ao liang-ke pah-tsong le, kông, “Bi-bæn nyi-pah bu-ping, mô-ping ts‛ih-zih, dziang-ts‛iang-siu nyi-pah, kying-yia nyi-kang ky‛i-sing tao Ke-sæh-li-ô k‛e:
24 Bi-bæn cong-sang, peh Pao-lo gyi, wu-song ge tao tsong-toh Fi-lih-z su-ze.”
25 Yi sia ih-fong sing kông:

23 就 噢 兩個 百總 來，講，“備辦 二百 步兵，馬兵 七十，長槍手 二百，今夜 二更 起身 到 該撒利亞 去：

24 備辦 眾生，畀 保羅 騎，護送 佢 到 總督 非力士 所在。”

25 貤 寫 一封 信 講：

26 “Kah-lao-tiu Lü-si-ô sia sing peh tsong-toh Fi-lih-z da-nying, ts‛ing ön.
27 Keh nying bi Yiu-t‛a nying k‛ô-lao, kw‛a iao tsông-s, ngô hyiao-teh ge z Lo-mô nying, ta ping kyiu ge.
28 Ngô iao hyiao-teh ge-he kao ge-keh yün-ku, ziu ta ge tao ge-he kong-we-li:
29 mông su kao-keh yün-ku, z yü ge-he-keh leh-fæh, m-yiu ing-ke s ing-ke pông-keh ze-ming.
30 Ts-‛eo yiu nying peh Yiu-t‛a nying wa-sön meo-‛e ge-keh kyi-meo t‛ong-ts ngô, ngô jü-tsih song-zông-le kyin ng, ah feng-fu nyün-kao ze ng min-zin kao ge. Dæn-nyün ng bing-ön.”

26 “革老丟 呂西亞 寫 信 畀 總督 非力士 大人，請 安。

27 箇 人 被 猶太 人 揢牢，快 要 妝死，我 曉得 佢 是 羅馬 人，帶 兵 救 佢。

28 我 要 曉得 佢許 告 佢个 緣故，就 帶 佢 到 佢許 公會裏：

29 望 所 告个 緣故，是 爲 佢許个 律法，無有 應該 死 應該 綁个 罪名。

30 之後 有 人 畀 猶太 人 畫算 謀害 佢个 計謀 通知 我，我 隨即 送上來 見 爾，也 吩咐 原告 在 爾 面前 告 佢。但願 爾 平安。”

31 Ping i ge ‛ao-ling, peh Pao-lo lin-yia song tao Ön-di-p‛ô-ti.
32 Di-nyi nyih peh mô-ping song ge k‛e, gyi-yü cün tao ying-li:
33 ge-he tao Ke-sæh-li-ô, peh keh-fu sing song-zông peh tsong-toh, peh Pao-lo gyi ze ge min-zin.
34 Tsong-toh mông-ku, meng ge z nô ih-sang nying, hyiao-teh ge z Kyi-li-kô nying,
35 kông, “Teng ng-keh nyün-kao le, ngô we t‛ing ng dziang-si:” ziu feng-fu peh ge æh ze Hyi-leh-keh wông-kyüong.

31 兵 依 佢 號令，畀 保羅 連夜 送 到 安提帕底。

32 第二 日 畀 馬兵 送 佢 去，其餘 轉 到 營裏：

33 佢許 到 該撒利亞，畀 箇副 信 送上 畀 總督，畀 保羅 徛 在 佢 面前。

34 總督 望過，問 佢 是 哪 一省 人，曉得 佢 是 基利家 人，

35 講，“等 爾个 原告 來，我 會 聽 爾 詳細：” 就 吩咐 畀 佢 押 在 希律个 王宮。

第廿四章.

1 Pao-lo bi T‛ih-t‛u-lo kao-zông,
10 feng-p‛eo z-kyi tsa-sang tso-nying, yi ka-shih ge-keh dao-li.
24 Kông Kyi-toh z-kön peh tsong-toh teh ge ts‛i-ts.
26 Tsong-toh siang teh-hwe, dæn-z teh-feh-djôh.
27 Tsong-toh sia-dzing liu Pao-lo ze kæn-lao.

1 保羅 被 帖土羅 告狀，
10 分剖 自己 怎生 做人，貤 解說 佢个 道理。
24 講 基督 事幹 畀 總督 搭 佢 妻子。
26 總督 想 得賄，但是 得不着。
27 總督 卸任 留 保羅 在 監牢。

KU ng nyih, da tsi-s Ô-nô-nyi-ô, teh kyi-ke tsiang-lao, wæ-yiu ih-ke jong-s T‛ih-t‛u-lo, tu lôh-le; ze tsong-toh min-zin kao Pao-lo.

過 五 日，大 祭司 亞拿尼亞，搭 幾个 長老，還有 一個 訟師 帖土羅，都 落來；在 總督 面前 告 保羅。

2 Pao-lo ao-le, T‛ih-t‛u-lo kao ge zông, kông, “Ngô-he k‛ao ng neng-keo t‛a-bing, ping-ts‛ia keh ih-koh k‛ao ng sin-kyin-ts-ming tso hyü-to yiu-ih z-kön,
3 su-i ngô-he kôh-c‛ü z-zông kön-eng feh zing, Fi-lih-z da-nying.
4 Yin-ze sang-teh ngô to væn ng, gyiu ng kw‛ön-shü t‛ing ngô kông liang-kyü.
5 Ngô-he mông keh nying ziang weng-yüoh, ts‛ao-lön t‛in-‛ô cong Yiu-t‛a nying, tso Nô-sæh-leh kao-keh deo-nao:
6 ge wæ iao væn-djôh sing-din: ngô-he ziu k‛ô ge, iao tsiao ngô-he leh-fæh p‛ön-tön ge,
7 dæn-z ts‛in-tsong Lü-si-ô tseo-le, jong ngô-he siu-li ngang-gyiang deh-k‛e;
8 feng-fu ge-keh nyün-kao tao ng su-ze le: Yin-ze ng meng ge, ng ziu hao hyiao-teh ngô-he kao ge-keh ih-ts‛ih z-kön.”

2 保羅 噢來，帖土羅 告 佢 狀，講，“我許 靠 爾 能彀 太平，并且 箇 一國 靠 爾 先見之明 做 許多 有益 事幹，

3 所以 我許 各處 時常 感恩 不 盡，非力士 大人。

4 現在 省得 我 多 煩 爾，求 爾 寬恕 聽 我 講 兩句。

5 我許 望 箇 人 像 瘟疫，譟亂 天下 眾 猶太 人，做 拿撒勒 教个 頭腦：

6 佢 還 要 犯着 聖殿：我許 就 揢 佢，要 照 我許 律法 判斷 佢，

7 但是 千總 呂西亞 走來，從 我許 手裏 硬強 奪去；

8 吩咐 佢个 原告 到 爾 所在 來：現在 爾 問 佢，爾 就 好 曉得 我許 告 佢个 一切 事幹。”

9 Yiu-t‛a nying tu jü ge, kông, “Z-kön tsing-z.”

9 猶太 人 都 隨 佢，講，“事幹 真是。”

10 Tsong-toh deo tin-tin, ao Pao-lo kông: ge ziu kông, “Ngô hyiao-teh ng ze keh koh tso kwön to-nyin, su-i ngô kah-nga fông-sing feng-p‛eo ngô-z z-kön:
11 ng hao hyiao-teh ngô zông Yia-lu-sæh-lang tso li-pa tao yin-ze, tsih-yiu zih-nyi nyih:
12 ge-he vong mông-djôh ngô ze sing-din teh bih-nying bin-leng, ‛oh-tsia ts‛ao-lön pah-sing, ziu-z jü-we-dông teh zing-li, ah vong mông ngô t‛ih tso.
13 Yin-ze ge-he su kao ngô z-kön yi m bing-kyü.
14 Tsih keh ih-yiang ngô ze ng su-ze tsiao-nying, ziu-z ge-he kông zia-kao-keh Dao-lu, ngô i ge voh-z tsu-tsong-keh Zông-ti, siang-sing ih-ts‛ih leh-fæh teh sin-ts-nying su sia-lôh shih-wa:
15 yi sô-mông Zông-ti we peh s-keh cü-ts feh-leng tsing-dzih feh tsing-dzih, tsiang-le tu weh-cün-le; keh ah z ge-he su sô-mông.
16 Yü-ts, ngô z-kyi kying-sing, zông-zông ze Zông-ti teh nying min-zin zeng te-teh-djü-keh liang-sing.
17 Ngô vong tao Yiu-t‛a to nyin, yin-ze cün-le, ta kyün-ông tsiu-tsi ngô peng-koh nying, yi hyin tsi-veh:
18 ngô t‛ih ze-teh tso, yiu kyi-ke jong Ô-si-ô le-keh Yiu-t‛a nying mông ngô ze sing-din, yi-kying kyih-zing, nying feh to, yi feh nao-nyih:
19 ge-he ziah yiu zah-m hao kao ngô, ing-ke tao ng min-zin le kao ngô.
20 Ziu-z ze-i-keh nying, ngô gyi ze kong-we min-zin, ziah mông ngô yiu zah-m dzæn-c‛ü, hao kông;
21 tsih-yiu ngô gyi ze ge-he cong-yiang ao-hyiang kông, ‘yü s-gao tse-weh-keh dao-li, ngô kying-nyih bi ng sing-p‛ön,’ djü keh ih-kyü ts-nga m-kao hao kông ngô.”

10 總督 頭 點點，噢 保羅 講：佢 就 講，“我 曉得 爾 在 箇 國 做 官 多年，所以 我 格外 放心 分剖 我自 事幹：

11 爾 好 曉得 我 上 耶路撒冷 做 禮拜 到 現在，只有 十二 日：

12 佢許 朆 望着 我 在 聖殿 搭 別人 辯論，或者 譟亂 百姓，就是 聚會堂 搭 城裏，也 朆 望 我 僣 做。

13 現在 佢許 所 告 我 事幹 貤 無 凭據。

14 只 箇 一樣 我 在 爾 所在 招認，就是 佢許 講 邪教个 道路，我 依 佢 服事 祖宗个 上帝，相信 一切 律法 搭 先知人 所 寫落 說話：

15 貤 奢望 上帝 會 畀 死个 主子 不論 正直 不 正直，將來 都 活轉來；箇 也 是 佢許 所 奢望。

16 爲之，我 自己 警醒，常常 在 上帝 搭 人 面前 存 對得住个 良心。

17 我 朆 到 猶太 多 年，現在 轉來，帶 捐項 賙濟 我 本國 人，貤 獻 祭物：

18 我 僣 在𡍲 做，有 幾个 從 亞西亞 來个 猶太 人 望 我 在 聖殿，已經 潔淨，人 不 多，貤 不 鬧熱：

19 佢許 若 有 倽某 好 告 我，應該 到 爾 面前 來 告 我。

20 就是 在倚个 人，我 徛 在 公會 面前，若 望 我 有 倽某 賺處，好 講；

21 只有 我 徛 在 佢許 中央 噢響 講，‘爲 死爻 再活个 道理，我 今日 被 爾 審判，’ 除 箇 一句 之外 無較 好 講 我。”

22 Fi-lih-z yi-kying dziang-si hyiao-teh keh Dao-lu, t‛ing keh shih-wa ziu yiu-yi ge-he, kông, “Teng ts‛in-tsong Lü-si-ô lôh-le, ngô we sing-kyih ng-keh z-kön.”
23 Ziu feng-fu pah-tsong kwön-æh Pao-lo, iao kw‛ön-de ge; wæ-yiu ge-z-keh nying ziah iao kyüong-ing ge ‛oh-tsia le t‛ao-sing ge, feh yüong tsu ge.

22 非力士 已經 詳細 曉得 箇 道路，聽 箇 說話 就 遊移 佢許，講，“等 千總 呂西亞 落來，我 會 審結 爾个 事幹。”

23 就 吩咐 百總 管押 保羅，要 寬待 佢；還有 佢自个 人 若 要 供應 佢 或者 來 討信 佢，不 用 阻 佢。

24 Ku kyi nyih, Fi-lih-z teh ge ts‛i-ts T‛u-si-læh, z Yiu-t‛a nyü-nying, jü-de le; ziu ao Pao-lo, t‛ing ge kông siang-sing Kyi-toh-keh dao-li.
25 Pao-lo kông-tao kong-nyi tön-fông, teh tsiang-le-keh sing-p‛ön, Fi-lih-z ziu p‛ô-gyü, kông, “Yin-ze ng k‛e-ky‛i; yiu bin z-‛eo we tse ao ng.”
26 Ge sô-mông Pao-lo we peh ge nying-ts, sih-fông ge: su-i lü-ts‛ ao ge le, jü-de kông-kông.

24 過 幾 日，非力士 搭 佢 妻子 土西拉，是 猶太 女人，聚隊 來；就 噢 保羅，聽 佢 講 相信 基督个 道理。

25 保羅 講到 公義 端方，搭 將來个 審判，非力士 就 怕懼，講，“現在 爾 去起；有 便 時候 會 再 噢 爾。”

26 佢 奢望 保羅 會 畀 佢 銀子，釋放 佢：所以 屢次 噢 佢 來，聚隊 講講。

27 Ku liang nyin, Po-gyiu Fi-z-tu le tsih Fi-lih-z-keh ing: Fi-lih-z iao t‛ao Yiu-t‛a nying-keh hwön-hyi, ning-gyiu peh Pao-lo kwæn-kæn.

27 過 兩 年，波求 非士都 來 接 非力士个 印：非力士 要 討 猶太 人个 歡喜，仍舊 畀 保羅 關監。

第廿五章.

1 Yiu-t‛a nying ze Fi-z-tu min-zin kao Pao-lo.
8 Ge feng-p‛eo,
11 gyiu Ke-sæh sing-ün.
14 Fi-z-tu peh Pao-lo z-kön t‛ong-ts Ô-kyi-p‛ô wông,
23 Pao-lo ta-c‛ih kyin wông-ti.
25 Fi-z-tu kông ge vong væn s-ze.

1 猶太 人 在 非士都 面前 告 保羅。
8 佢 分剖，
11 求 該撒 伸冤。
14 非士都 畀 保羅 事幹 通知 亞基帕 王，
23 保羅 帶出 見 皇帝。
25 非士都 講 佢 朆 犯 死罪。

FI-Z-TU zông-dzing, ku sæn nyih jong Ke-sæh-li-ô zông Yia-lu-sæh-lang.
2 Tsi-s-tsiang teh Yiu-t‛a-keh sing-kying ze ge su-ze kao Pao-lo zông; yi gyiu ge,
3 iao ge s eng ts‛a nying k‛e ta Pao-lo tao Yia-lu-sæh-lang le: i-s siang ze lu-zông sæh ge.
4 Fi-z-tu we-teh kông, Pao-lo æh ze Ke-sæh-li-ô, ngô ziu iao cün-k‛e.
5 Ge yi kông, “Ng-he cong-yiang yiu gyün-ping-keh hao jü-de lôh-k‛e; keh nying yiu zah-m feh hao, hao kao ge.”

非士都 上任，過 三 日 從 該撒利亞 上 耶路撒冷。

2 祭司長 搭 猶太个 紳衿 在 佢 所在 告 保羅 狀；貤 求 佢，

3 要 佢 賜 恩 差 人 去 帶 保羅 到 耶路撒冷 來：意思 想 在 路上 殺 佢。

4 非士都 回答 講，保羅 押 在 該撒利亞，我 就 要 轉去。

5 佢 貤 講，“爾許 中央 有 權柄个 好 聚隊 落去；箇 人 有 倽某 不 好，好 告 佢。”

6 Ze ge-he su-ze yi ku mao zih nyih, ziu lôh Ke-sæh-li-ô k‛e; di-nyi nyih zo-dông, feng-fu ta Pao-lo c‛ih-le.
7 Le-gao, jong Yia-lu-sæh-lang le-keh Yiu-t‛a nying deo-ky‛ün gyi-teh, yüong hyü-to m bing-kyü-keh djong ze kao Pao-lo.
8 Pao-lo feng-p‛eo, kông, “Yiu-t‛a nying-keh leh-fæh, teh sing-din, teh Ke-sæh, ngô tu vong væn-djôh.”

6 在 佢許 所在 貤 過 毛 十 日，就 落 該撒利亞 去；第二 日 坐堂，吩咐 帶 保羅 出來。

7 來爻，從 耶路撒冷 來个 猶太 人 頭圈 徛𡍲，用 許多 無 凭據个 重 罪 告 保羅。

8 保羅 分剖，講，“猶太 人个 律法，搭 聖殿，搭 該撒，我 都 朆 犯着。”

9 Dæn-z Fi-z-tu iao t‛ao Yiu-t‛a nying-keh hwön-hyi, teh Pao-lo kông, “Ng k‛eng zông Yia-lu-sæh-lang, ze-kæn ze ngô min-zin t‛ing sing-p‛ön feh?”
10 Pao-lo kông, “Ngô yin-ze gyi ze Ke-sæh-keh fæh-dông-zông, ngô ing-ke t‛ing sing-p‛ön-keh di-fông: ngô vong feh hao de Yiu-t‛a nying, ng ming-ming hyiao-teh.
11 Ngô ziah yiu zah-m feh hao, ‛oh-tsia væn-djôh zah-m s-ze, ziu-z s ngô ah feh t‛e-z: ziah ge-he kao ngô z-kön tu z kô, m-nying hao peh ngô kao-fu ge-he. Ngô gyiu Ke-sæh sing-ün.”

9 但是 非士都 要 討 猶太 人个 歡喜，搭 保羅 講，“爾 肯 上 耶路撒冷，在吤 在 我 面前 聽 審判 不？”

10 保羅 講，“我 現在 徛 在 該撒个 法堂上，我 應該 聽 審判个 地方：我 朆 不 好 待 猶太 人，爾 明明 曉得。

11 我 若 有 倽某 不 好，或者 犯着 倽某 死罪，就是 死 我 也 不 推辭：若 佢許 告 我 事幹 都 是 假，無人 好 畀 我 交付 佢許。我 求 該撒 伸冤。”

12 Fi-z-tu teh kong-we siang-liang, ziu we-teh kông, “Ng kyi-zin gyiu Ke-sæh sing-ün: peh ng k‛e kyin Ke-sæh.”

12 非士都 搭 公會 商量，就 回答 講，“爾 既然 求 該撒 伸冤：畀 爾 去 見 該撒。”

13 KU kyi nyih, Ô-kyi-p‛ô wông teh Pah-nyi-kyi tao Ke-sæh-li-ô t‛ao-sing Fi-z-tu.
14 Djü hao kyi nyih, Fi-z-tu peh Pao-lo z-kön t‛ong-ts wông, kông, “Ze-i yiu ih-ke nying, Fi-lih-z liu ze kæn-lao:
15 ngô tao Yia-lu-sæh-lang, cong tsi-s-tsiang teh Yiu-t‛a nying-keh tsiang-lao kao ge, iao ngô ding ge ze.
16 Ngô we-teh ge-he kông, ‘Pi-kao vong teh nyün-kao te-min, vong peh ge feng-p‛eo su kao ge z-kön, ziu bæn ge s-ze, feh-z Lo-mô nying-keh kwe-kyü.’
17 Su-i ge-he ih tao-i le, ngô feh tæn-kôh, di-nyi nyih zo-dông, feng-fu ta ge c‛ih-le.
18 Keh-sih nyün-kao gyi-c‛ih-le, bing-fi ngô su liang-liao z-kön kao ge;
19 tæn nyi-leng ge-he kao-meng z-kön, wæ-yiu ih-ke s-ku-keh Yia-su, Pao-lo kông Ge weh-gao, z-t‛ih kao ge.
20 Ngô feh hyiao-teh tsa tön keh z-kön, su-i meng ge iao tao Yia-lu-sæh-lang k‛e t‛ing sing-p‛ön feh.
21 Dæn-z Pao-lo, iao ngô liu ge teng-tao Si-pô-z-toh sing-p‛ön, ngô ziu feng-fu liu ge, teng-tao ka-k‛e peh Ke-sæh.”

13 過 幾 日，亞基帕 王 搭 百尼基 到 該撒利亞 討信 非士都。

14 住 好 幾 日，非士都 畀 保羅 事幹 通知 王，講，“在倚 有 一個 人，非力士 留 在 監牢：

15 我 到 耶路撒冷，眾 祭司長 搭 猶太 人个 長老 告 佢，要 我 定 佢 罪。

16 我 回答 佢許 講，‘被告 朆 搭 原告 對面，朆 畀 佢 分剖 所 告 佢 事幹，就 辦 佢 死罪，不是 羅馬 人个 規矩。’

17 所以 佢許 一 到倚 來，我 不 耽擱，第二 日 坐堂，吩咐 帶 佢 出來。

18 箇些 原告 徛出來，並非 我 所 量料 事幹 告 佢；

19 單 議論 佢許 教門 事幹，還有 一個 死過个 耶穌，保羅 講 佢 活爻，是僣 告 佢。

20 我 不 曉得 怎 斷 箇 事幹，所以 問 佢 要 到 耶路撒冷 去 聽 審判 不。

21 但是 保羅，要 我 留 佢 等到 西巴士督 審判，我 就 吩咐 留 佢，等到 解去 畀 該撒。”

22 Ô-kyi-p‛ô teh Fi-z-tu kông, “Ngô ah iao t‛ing keh nying kông-kông.” Fi-z-tu kông, “T‛in-nyiang ng hao t‛ing ge.”

22 亞基帕 搭 非士都 講，“我 也 要 聽 箇 人 講講。” 非士都 講，“天亮 爾 好 聽 佢。”

23 DI-NYI nyih Ô-kyi-p‛ô teh Pah-nyi-kyi yüong jün-fu tsih-z le, wæ-yiu cong ts‛in-tsong, teh zing-li-keh sing-kying, jü-de tseo-tsing kong-dông; Fi-z-tu feng-fu, ge-he ziu ta-c‛ih Pao-lo.

23 第二 日 亞基帕 搭 百尼基 用 全副 執事 來，還有 眾 千總，搭 城裏个 紳衿，聚隊 走進 公堂；非士都 吩咐，佢許 就 帶出 保羅。

24 Fi-z-tu kông, “Ô-kyi-p‛ô wông, teh ze-i-keh cong-yü, ts‛ing mông keh nying, ziu-z cong Yiu-t‛a nying ze Yia-lu-sæh-lang teh ze-i gyiu ngô, ao-hyiang kông feh ing-ke peh ge weh.
25 Dæn-z ngô hyiao-teh ge vong væn-ku s-ze; ge-z gyiu Si-pô-z-toh sing-ün, su-i ngô kyüih-i ka ge zông.
26 Ngô m-yiu zah-m zing-zih hao tseo-ming ngô cü. Su-i ta ge c‛ih ze ng cong-yü min-zin, dih-di ze ng Ô-kyi-p‛ô wông-keh min-zin, sing-ku ts-‛eo ngô yiu zah-m hao sia.
27 Ing-yü ngô ts‛eng, væn-nying ka-zông, feh song ge-keh ön-kyün, z feh ‛eh-li.”

24 非士都 講，“亞基帕 王，搭 在倚个 眾位，請 望 箇 人，就是 眾 猶太 人 在 耶路撒冷 搭 在倚 求 我，噢響 講 不 應該 畀 佢 活。

25 但是 我 曉得 佢 朆 犯過 死罪；佢自 求 西巴士督 伸冤，所以 我 決意 解 佢 上。

26 我 無有 倽某 情實 好 奏明 我 主。所以 帶 佢 出 在 爾 眾位 面前，迭地 在 爾 亞基帕 王个 面前，審過 之後 我 有 倽某 好 寫。

27 因爲 我 忖，犯人 解上，不 送 佢个 案卷，是 不 合理。”

第廿六章.

1 Pao-lo ze Ô-kyi-p‛ô wông min-zin kông ge jong siao z-kön,
12 kông ge tsa-sang siang-sing, yi bi kæn-shün tso s-du.
24 Fi-z-tu kông ge z tin-gao, Pao-lo ti-vi we-teh ge.
28 Ô-kyi-p‛ô meng ge, hao t‛ih sang-lih ky‛ün ge tso Kyi-toh-du.
31 Ge-he tu kông, Pao-lo m-yiu ze.

1 保羅 在 亞基帕 王 面前 講 佢 從 小 事幹，
12 講 佢 怎生 相信，貤 被 揀選 做 使徒。
24 非士都 講 佢 是 癲爻，保羅 低微 回答 佢。
28 亞基帕 問 佢，好 僣 省力 勸 佢 做 基督徒。
31 佢許 都 講，保羅 無有 罪。

Ô-kyi-p‛ô teh Pao-lo kông, “Cing ng-z feng-p‛eo.” Pao-lo siu di-ky‛i, feng-p‛eo, kông:

亞基帕 搭 保羅 講，“准 爾自 分剖。” 保羅 手 提起，分剖，講：

2 “Ô-kyi-p‛ô wông, Yiu-t‛a nying su kao ngô z-kön, kying-nyih hao ze ng min-zin feng-p‛eo, ngô sön z ting zao-hwa:
3 ing-yü ng ting ming-bah Yiu-t‛a nying-keh kwe-kyü teh nyi-leng: su-i gyiu ng ne-sing t‛ing ngô.

2 “亞基帕 王，猶太 人 所 告 我 事幹，今日 好 在 爾 面前 分剖，我 算 是 頂 造化：

3 因爲 爾 頂 明白 猶太 人个 規矩 搭 議論：所以 求 爾 耐心 聽 我。

4 “Ngô jong ky‛i-deo ze Yia-lu-sæh-lang ngô peng-koh-nying cong-yiang, jong siao tsa-sang tso-nying, Yiu-t‛a nying tu hyiao-teh;
5 ge-he ziah k‛eng tso kyin-tsing, su-le hyiao-teh ngô z i-jing ting nyin-kying-keh kao-meng tso Fæh-li-se nying.
6 Yin-ze yü sô-mông Zông-ti su ing-hyü tsu-tsong-keh, ngô gyi ze-i ziu sing-p‛ön;
7 ngô-he zih-nyi ts-p‛a, nyih yia gying-lih voh-z Zông-ti, ah sô-mông teh-djôh keh ing-hyü. Ô-kyi-p‛ô wông, yü keh sô-mông Yiu-t‛a nying kao ngô!

4 “我 從 起頭 在 耶路撒冷 我 本國人 中央，從 小 怎生 做人，猶太 人 都 曉得；

5 佢許 若 肯 做 見證，素來 曉得 我 是 依順 頂 嚴緊个 教門 做 法利賽 人。

6 現在 爲 奢望 上帝 所 應許 祖宗个，我 徛 在倚 受 審判；

7 我許 十二 支派，日 夜 勤力 服事 上帝，也 奢望 得着 箇 應許。亞基帕 王，爲 箇 奢望 猶太 人 告 我！

8 “Zông-ti peh s-nying tse-weh, ng-he tsa-sang sön feh hao siang-sing?
9 Ngô-z zin-deo ts‛eng ing-ke yüong hyü-to fông-fæh kong-kyih Nô-sæh-leh Yia-su-keh ming-deo.
10 Ngô ze Yia-lu-sæh-lang z-t‛ih tso: jong cong tsi-s-tsiang siu-li tsih-ziu gyün-ping k‛ô hyü-to sing-du, kwæn ze kæn-lao, ge-he bi sæh-gao z-‛eo, ngô ah teh-ing.
11 Ze kôh jü-we-dông lü-ts‛ ying-væh ge-he, iao ngang-æh ge sih-doh Yia-su; yü ts‛ih-ts‛-t‛ong-‛eng ge, pih-næn ge tao nga-koh zing-li.

8 “上帝 畀 死人 再活，爾許 怎生 算 不 好 相信？

9 我自 前頭 忖 應該 用 許多 方法 攻擊 拿撒勒 耶穌个 名頭。

10 我 在 耶路撒冷 是僣 做：從 眾 祭司長 手裏 接受 權柄 揢 許多 聖徒，關 在 監牢，佢許 被 殺爻 時候，我 也 答應。

11 在 各 聚會堂 屢次 刑罰 佢許，要 硬押 佢 褻瀆 耶穌；爲 切齒痛恨 佢，逼難 佢 到 外國 城裏。

12 “Ngô keh z-‛eo, k‛ao tsi-s-tsiang-keh gyün-ping teh ‛ao-ling tao Da-mô-seh k‛e,
13 wông, tông nyih-tsiu, ngô lu-zông mông-djôh jong t‛in yiu liang-kwông, pi nyih-deo wæ liang, deo-ky‛ün tsiao-djôh ngô teh jü-de cü-ts.
14 Ngô-he tu tih-tao di, ngô t‛ing-djôh sing-hyiang yüong Hyi-pah-le t‛u-ing teh ngô kông, ‘Sao-lo, Sao-lo, ng tsa-sang pih-næn Ngô? ng kyiah t‛ih-djôh ts‛ z næn.’
15 Ngô kông, ‘Cü, Ng z kæh-nying?’ Ge kông, ‘Ngô ziu-z ng su pih-næn-keh Yia-su.
16 Nang-ky‛i, gyi-teh: ing-yü Ngô dih-di yin-c‛ih peh ng, iao sih-lih ng tso ts‛a-s, hao te-tsing ng yi-kying su mông-djôh, teh Ngô tsiang-le we yin-c‛ih peh ng mông z-kön:
17 Ngô ze Yi-seh-lih pah-sing teh bih-koh nying cong-yiang ah we kyiu ng c‛ih: Ngô yin-ze ts‛a ng tao ge-he su-ze k‛e,
18 hao k‛e ge-he-keh ngæn, peh ge li-k‛e heh-ön cün-tao liang-kwông, li-k‛e Sæh-dæn-keh si-deo kyü-voh Zông-ti, peh ge yü siang-sing Ngô, hao teh-djôh ze-keh sô-min, yi ze sing-du cong-yiang teh-djôh sæn-nyih.’

12 “我 箇 時候，靠 祭司長个 權柄 搭 號令 到 大馬色 去，

13 王，當 日晝，我 路上 望着 從 天 有 亮光，比 日頭 還 亮，頭圈 照着 我 搭 聚隊 主子。

14 我許 都 跌倒 地，我 聽着 聲響 用 希伯來 土音 搭 我 講，‘掃羅，掃羅，爾 怎生 逼難 我？爾 腳 踢着 刺 是 難。’

15 我 講，‘主，爾 是 吤人？’ 佢 講，‘我 就是 爾 所 逼難个 耶穌。

16 玍起，徛𡍲：因爲 我 迭地 現出 畀 爾，要 設立 爾 做 差使，好 對證 爾 已經 所 望着，搭 我 將來 會 現出 畀 爾 望 事幹：

17 我 在 以色列 百姓 搭 別國 人 中央 也 會 救 爾 出：我 現在 差 爾 到 佢許 所在 去，

18 好 開 佢許个 眼，畀 佢 離開 黑暗 轉到 亮光，離開 撒但个 勢頭 歸服 上帝，畀 佢 爲 相信 我，好 得着 罪个 赦免，貤 在 聖徒 中央 得着 產業。’

19 “Ô-kyi-p‛ô wông, ngô su-i m-yiu feh i t‛in-keh hyin-ling:
20 sin ze Da-mô-seh, ‛eo ze Yia-lu-sæh-lang, teh t‛ong Yiu-t‛a, dzih tao bih-koh, ao ge hwe-ke kyü-voh Zông-ti, ping-ts‛ia tso zin-z hyin-ming hwe-ke-keh sing.
21 Yü-ts, Yiu-t‛a nying ze sing-din k‛ô ngô, dong-siu iao sæh ngô.
22 Mong Zông-ti pao-wu, ngô tao kying-nyih wæ gyi-lao, teh pi-zin tseng-kyü tso te-tsing, feh kông bih-yiang, tæn kông sin-ts-nying teh Mo-si su kông ‛eo-le iao tso-zing z-kön:
23 ziu-z Kyi-toh pih iao ziu næn, tso deo-ih-ke s-gao tse-weh Cü-ts, sin djün liang-kwông peh Yi-seh-lih pah-sing teh bih-koh nying.”

19 “亞基帕 王，我 所以 無有 不 依 天个 顯靈：

20 先 在 大馬色，後 在 耶路撒冷，搭 統 猶太，直 到 別國，噢 佢 悔改 歸服 上帝，并且 做 善事 顯明 悔改个 心。

21 爲之，猶太 人 在 聖殿 揢 我，動手 要 殺 我。

22 蒙 上帝 保護，我 到 今日 還 徛牢，搭 卑賤 尊貴 做 對證，不 講 別樣，單 講 先知人 搭 摩西 所 講 後來 要 做成 事幹：

23 就是 基督 必 要 受 難，做 頭一個 死爻 再活 主子，先 傳 亮光 畀 以色列 百姓 搭 別國 人。”

24 Ze-teh feng-p‛eo, Fi-z-tu ao-hyiang kông, “Pao-lo, ng fæh-tin; yü doh-shü to tin-gao.”

24 在𡍲 分剖，非士都 噢響 講，“保羅，爾 發癲；爲 讀書 多 癲爻。”

25 Pao-lo kông, “Fi-z-tu da-nying, ngô feh-z fæh-tin, z kông zing-zih ‛eh-li shih-wa.
26 Wông yi hyiao-teh keh z-kön, ngô ze ge min-zin fông do-tæn kông: ngô ts‛eng keh z-kön ge m-yiu ih-yiang feh hyiao-teh; ing-yü keh feh-z ze ön-cong tso.
27 Ô-kyi-p‛ô wông, ng siang-sing sin-ts-nying feh? Ngô hyiao-teh ng siang-sing.”

25 保羅 講，“非士都 大人，我 不是 發癲，是 講 誠實 合理 說話。

26 王 貤 曉得 箇 事幹，我 在 佢 面前 放 大膽 講：我 忖 箇 事幹 佢 無有 一樣 不 曉得；因爲 箇 不是 在 暗中 做。

27 亞基帕 王，爾 相信 先知人 不？我 曉得 爾 相信。”

28 Ô-kyi-p‛ô teh Pao-lo kông, “Ng t‛ih sang-lih ky‛ün-sing ngô tso Kyi-toh-du.”
29 Pao-lo kông, “Dæn-nyün Zông-ti fi-tæn peh ng, ah peh væn-pah kying-nyih t‛ing ngô-keh nying, feh-leng sang-lih feh sang-lih, tu we teh ngô m-kao kôh-yiang, tsih iao djü keh t‛ih-lin.”

28 亞基帕 搭 保羅 講，“爾 僣 省力 勸信 我 做 基督徒。”

29 保羅 講，“但願 上帝 非單 畀 爾，也 畀 凡百 今日 聽 我个 人，不論 省力 不 省力，都 會 搭 我 無較 各樣，只 要 除 箇 鐵鏈。”

30 Keh shih-wa kông-ku, wông teh tsong-toh, teh Pah-nyi-kyi, lin jü-de zo-kæn-keh nying, tu nang-ky‛i.
31 Tseo-tsing, jü-de siang-nyi kông, “Keh nying vong tso ing-ke s ing-ke æh z-kön.”
32 Ô-kyi-p‛ô teh Fi-z-tu kông, “Keh nying ziah vong gyiu Ke-sæh sing-ün, ziu hao fông ge.”

30 箇 說話 講過，王 搭 總督，搭 百尼基，連 聚隊 坐吤个 人，都 玍起。

31 走進，聚隊 商議 講，“箇 人 朆 做 應該 死 應該 押 事幹。”

32 亞基帕 搭 非士都 講，“箇 人 若 朆 求 該撒 伸冤，就 好 放 佢。”

第廿七章.

1 Pao-lo lôh-jün tao Lo-mô,
10 kông ge ze lu-zông iao p‛ong-djôh zah-m nyü-hyin,
11 pah-tsong feh siang-sing ge.
14 Jün bi do fong p‛iao-dong,
41 jün tang-p‛o,
22, 34, 44 tu kyiu zông-‛ön.

1 保羅 落船 到 羅馬，
10 講 佢 在 路上 要 碰着 倽某 危險，
11 百總 不 相信 佢。
14 船 被 大 風 飄動，
41 船 打破，
22，34，44 都 救 上岸。

KYI-ZIN ding-kyü peh ngô-he ku he tao Yi-da-li, ziu peh Pao-lo teh kyi-ke væn-nying kao-fu Si-pô-z-toh ying-li-keh pah-tsong ming-z Yiu-liu.
2 Yiu ih-tsih Ô-da-mi-din-keh jün, iao sa-ku Ô-si-ô he-pin di-fông, ngô-he lôh keh-tsih jün ziu k‛e-c‛ih: Mô-gyi-teng-keh T‛ih-sæh-lo-nyi-kô nying Ô-li-dæh-ku ah teh ngô-he jü-de.
3 Di-nyi nyih tao Si-teng: Yiu-liu de Pao-lo ting hao, peh ge k‛e t‛ao-sing bong-yiu, hao teh-djôh ge-he tsiao-ing.
4 Jong kæn k‛e-jün, yü fong feh jing, sa ku Kyü-pi-lu ‛ô-fong-‛ön.
5 Sa-ku Kyi-li-kô Bông-fi-li-ô-keh he, tao Lü-kô-keh Me-læh.

既然 定規 畀 我許 過 海 到 以大利，就 畀 保羅 搭 幾个 犯人 交付 西巴士督 營裏个 百總 名字 猶流。

2 有 一隻 亞大米田个 船，要 駛過 亞西亞 海邊 地方，我許 落 箇隻 船 就 開出：馬其頓个 帖撒羅尼迦 人 亞里達古 也 搭 我許 聚隊。

3 第二 日 到 西頓：猶流 待 保羅 頂 好，畀 佢 去 討信 朋友，好 得着 佢許 照應。

4 從 吤 開船，爲 風 不 順，駛 過 居比路 下風岸。

5 駛過 基利家 旁非利亞个 海，到 呂家个 每拉。

6 Ze-kæn pah-tsong p‛ong-djôh ih-tsih Ô-lih-sæn-t‛a-keh jün, iao tao Yi-da-li k‛e; ao ngô-he lôh keh-tsih jün.
7 Jün mæn-mæn sa hao kyi-nyih tsih tao Kah-nyi-t‛u-keh te-‛ön, bi fong tsu-lao, dziao Sæh-mô-nyi sa tao Kah-li-ti-keh ‛ô-fong-‛ön;
8 ts‛ing ‛ön-pin sa tao ih-ke di-fông di-ming Kô-ao, teh Læh-si-ô zing lin-gying.

6 在吤 百總 碰着 一隻 亞歷山太个 船，要 到 以大利 去；噢 我許 落 箇隻 船。

7 船 慢慢 駛 好 幾日 只 到 革尼土个 對岸，被 風 阻牢，朝 撒馬尼 駛 到 革哩底个 下風岸；

8 趁 岸邊 駛 到 一個 地方 地名 佳澳，搭 拉西亞 城 連近。

9 Nyih-ts dziang-kyiu, kying-zih-keh tsih-ts‛ yi-kying ku-gao, sa-jün z ting nyü-hyin, Pao-lo ky‛ün ge-he, kông,
10 “Cong yü, ngô mông yin-ze k‛e-jün pih-ding yiu hyü-to k‛u-næn teh seng-siang, fi-tæn ho-veh teh jün, lin ngô-he-keh sing-ming næn pao.”
11 Dæn-z pah-tsong siang-sing lao-da teh kwön ho cü-ts, ku-yü Pao-lo shih-wa.
12 Keh ao ku tong feh bin, yiu ih-do-pön sing-siang k‛e-c‛ih, ‛oh-tsia hao tao Fi-nyi-kyi ku tong. Fi-nyi-kyi ziu-z Kah-li-ti ao, ih-pin dziao tong-nön, ih-pin dziao tong-poh.
13 Nön-fong mæn-mæn c‛ü-le, ge-he ts‛eng z teh-i, ziu ky‛i mao, ts‛ing Kah-li-ti ‛ön-pin sa k‛e.
14 M kyi-z, gyüông-fong jong he-tao fæh-ky‛i, fong-ming Yiu-lo-kah-deng:
15 jün bi fong c‛ü-k‛e, ky‛üoh-feh-djü; ngô-he tsih hao ‛eo ge p‛iao-dông.
16 P‛iao tao ih-ke he-tao-keh ‛ô-fong-‛ön, he-tao di-ming Kah-lao-ti, tsih neng siu-zông sæn-pæn:
17 siu-zông-le, ziu yüong zing-sôh kw‛eng-lao jün-ti; hôh iao gôh-sô, fông-lôh do-bong, p‛iao-k‛e.
18 Bi gyüông-fong tön-le-tön-k‛e, di-nyi nyih ho-veh tön ze he-li;
19 di-sæn nyih ngô-he ts‛ing-siu tön-gao ky‛i-gyü.
20 To nyih vong mông-djôh nyih-deo teh sing-siu, gyüông-fong kah-nga do, ngô-he teh-kyiu-keh sô-mông m-gao.

9 日子 長久，禁食个 節次 已經 過爻，駛船 是 頂 危險，保羅 勸 佢許，講，

10 “眾 位，我 望 現在 開船 必定 有 許多 苦難 搭 損傷，非單 貨物 搭 船，連 我許个 性命 難 保。”

11 但是 百總 相信 老大 搭 管 貨 主子，過于 保羅 說話。

12 箇 澳 過 冬 不 便，有 一大半 心想 開出，或者 好 到 非尼基 過 冬。非尼基 就是 革哩底 澳，一邊 朝 東南，一邊 朝 東北。

13 南風 慢慢 吹來，佢許 忖 是 得意，就 起 錨，趁 革哩底 岸邊 駛 去。

14 無 幾時，狂風 從 海島 發起，風名 友羅革屯：

15 船 被 風 吹去，喫不住；我許 只 好 候 佢 飄蕩。

16 飄 到 一個 海島个 下風岸，海島 地名 革老底，只 能 收上 舢板：

17 收上來，就 用 繩索 綑牢 船底；𢞕 要 擱沙，放落 大篷，飄去。

18 被 狂風 斷來斷去，第二 日 貨物 斷 在 海裏；

19 第三 日 我許 親手 斷爻 器具。

20 多 日 朆 望着 日頭 搭 星宿，狂風 格外 大，我許 得救个 奢望 無爻。

21 Cong-nying dziang-kyiu vong ky‛üoh, Pao-lo gyi ze ge-he tông-cong, kông, “Cong-yü, ng-he yi-zin ing-ke t‛ing ngô shih-wa, feh li-k‛e Kah-li-ti, ziu fe p‛ong-djôh keh k‛u-næn teh seng-siang.
22 Dæn-z ngô yin-ze ky‛ün ng-he fông-sing: djü jün ts-nga, ng-he fe sông ih-ke nying sing-ming.
23 Ing-yü ngô su kyü-voh su kyüong-vong keh-yü Zông-ti, Ge-keh t‛in-s zôh-yia gyi ze ngô pin, kông,
24 ‘Pao-lo, feh yüong p‛ô; ng pih iao gyi ze Ke-sæh min-zin: ping-ts‛ia Zông-ti we s-peh ng ih-ts‛ih dong-jün-keh nying.’
25 Su-i, cong-yü, hao fông-sing: ngô siang-sing Zông-ti, pih-ding we tso-zing ziang t‛in-s teh ngô su kông.
26 Dæn-z ngô-he pih iao gôh ze ih-ke he-tao.”

21 眾人 長久 朆 喫，保羅 徛 在 佢許 當中，講，“眾位，爾許 以前 應該 聽 我 說話，不 離開 革哩底，就 𣍐 碰着 箇 苦難 搭 損傷。

22 但是 我 現在 勸 爾許 放心：除 船 之外，爾許 𣍐 喪 一個 人 性命。

23 因爲 我 所 歸服 所 供奉 箇位 上帝，佢个 天使 昨夜 徛 在 我 邊，講，

24 ‘保羅，不 用 怕；爾 必 要 徛 在 該撒 面前：并且 上帝 會 賜畀 爾 一切 同船个 人。’

25 所以，眾位，好 放心：我 相信 上帝，必定 會 做成 像 天使 搭 我 所 講。

26 但是 我許 必 要 擱 在 一個 海島。”

27 Tao zih-s nyih, jün p‛iao-k‛e ze Ô-ti-ô he, pön-yia shü-siu ts‛eng teh ‛ön gying-gao;
28 ziu tang-lôh, yiu zih-nyi dziang sing; ku-ting yi tang-lôh, yiu kyiu dziang sing.
29 Sang-teh ts‛eo-tsiao, ziu ze jün-‛eo p‛ao s-meng mao, sô-mông t‛in-liang.
30 Shü-siu wa-sön li jün dao-tseo, peh sæn-pæn fông-lôh he, kô-i tao jün-deo k‛e p‛ao mao,
31 Pao-lo teh pah-tsong kông, “Keh-sih nying feh ze jün-li, ng-he feh neng teh kyiu.”
32 Ying-ping ziu tsôh-dön sæn-pæn-keh zing-sôh, ‛eo ge t‛eng-k‛e.

27 到 十四 日，船 飄去 在 亞底亞 海，半夜 水手 忖 搭 岸 近爻；

28 就 打落，有 十二 丈 深；過點 貤 打落，有 九 丈 深。

29 省得 湊礁，就 在 船後 拋 四門 錨，奢望 天亮。

30 水手 畫算 離 船 逃走，畀 舢板 放落 海，假意 到 船頭 去 拋 錨，

31 保羅 搭 百總 講，“箇些 人 不 在 船裏，爾許 不 能 得 救。”

32 營兵 就 斫斷 舢板个 繩索，候 佢 氽去。

33 T‛in kw‛a liang, Pao-lo ky‛ün cong-nying ky‛üoh-væn, kông, “Yin-ze ng-he ze-teh mông, du-hæh vong ky‛üoh yi-kying zih-s nyih.
34 Su-i ngô ky‛ün ng-he ky‛üoh ting; hao teh kyiu: ing-yü ng-he deo-fæh lin ih-keng tu fe tih-lôh.”
35 Kông-ku, ge do mæn-deo, ze cong-nying min-zin kön-zia Zông-ti, p‛ah-k‛e ky‛üoh.
36 Cong-nying ziu fông-sing, yi ky‛üoh.
37 Ngô-he ze jün-li ih-gyüong yiu nyi-pah ts‛ih-zih loh nying.
38 Yi-kying ky‛üoh-pao, ziu peh mah tön-lôh he-li, peh jün hao ky‛ing-ting.

33 天 快 亮，保羅 勸 眾人 喫飯，講，“現在 爾許 在𡍲 望，肚㾎 朆 喫 已經 十四 日。

34 所以 我 勸 爾許 喫 點；好 得 救：因爲 爾許 頭髮 連 一根 都 𣍐 跌落。”

35 講過，佢 馱 饅頭，在 眾人 面前 感謝 上帝，𤖼開 喫。

36 眾人 就 放心，貤 喫。

37 我許 在 船裏 一共 有 二百 七十 六 人。

38 已經 喫飽，就 畀 麥 斷落 海裏，畀 船 好 輕點。

39 Tao t‛in-liang, feh sih-teh keh di-fông; mông-djôh ih-ke ao yiu ‛ön-deo, wa-sön ziah hao tso, peh jün gôh ze-kæn.
40 Ziu peh mao fông-gao, ‛eo ge dzing ze he-ti, fông-kw‛ön jün-do-keh zing-sôh; bæh-ky‛i deo-bong sa fong, dziao ‛ön tsing-k‛e.
41 P‛ong-djôh liang-ts dziao-shü kæh-liu-keh su-ze, jün ts‛eo sô; jün-deo gôh-lao fe dong, jün-‛eo bi lông c‛ong-p‛o.
42 Ying-ping i-s iao sæh væn-nying, sang-teh yiu nying wa-ku-k‛e dao-tseo.
43 Dæn-z pah-tsong iao kyiu Pao-lo, feh hyü ge-he t‛ih tso: ziu feng-fu sih-shü cü-ts sin t‛iao-lôh shü, wa tao ‛ön-zông;
44 gyi-yü, yiu-sih k‛ao ih-lin pæn, yiu-sih k‛ao jün-li bih-yiang meh-z zông-‛ön. Z-t‛ih, tu teh kyiu zông-‛ön.

39 到 天亮，不 識得 箇 地方；望着 一個 澳 有 岸頭，畫算 若 好 做，畀 船 擱 在吤。

40 就 畀 錨 放爻，候 佢 沉 在 海底，放寬 船舵个 繩索；拔起 頭篷 駛 風，朝 岸 進去。

41 碰着 兩支 潮水 夾流个 所在，船 湊 沙；船頭 擱牢 𣍐 動，船後 被 浪 衝破。

42 營兵 意思 要 殺 犯人，省得 有 人 划過去 逃走。

43 但是 百總 要 救 保羅，不 許 佢許 僣 做：就 吩咐 識水 主子 先 跳落 水，划 到 岸上；

44 其餘，有些 靠 一脟 板，有些 靠 船裏 別樣 物事 上岸。是僣，都 得 救 上岸。

第廿八章.

1 P‛ong-djôh nyü-hyin ts-‛eo mæn-nying de Pao-lo hao.
5 Doh-zô shü-tsih ngao ge, z feh ‛e ge.
8 Ze he-tao Pao-lo i-hao hyü-to bing-nying.
11 Ge-he ky‛i-sing tao Lo-mô k‛e.
17 Pao-lo t‛ong-ts Yiu-t‛a nying ge zao yün-ku le.
24 Kông dao-li ts-‛eo, yiu-sih feh siang-sing.
30 Liang nyin ze-kæn djün dao-li.

1 碰着 危險 之後 蠻人 待 保羅 好。
5 毒蛇 雖即 咬 佢，是 不 害 佢。
8 在 海島 保羅 醫好 許多 病人。
11 佢許 起身 到 羅馬 去。
17 保羅 通知 猶太 人 佢 倽 緣故 來。
24 講 道理 之後，有些 不 相信。
30 兩 年 在吤 傳 道理。

Kyi-zin kyiu-zông, ziu hyiao-teh keh he-tao di-ming z Mi-li-da.
2 He-tao ts‛u-mæn nying de ngô-he ting hao: yü lôh-yü, t‛in-kô yi lang, ziu sa⁶⁾ ho siu-liu ngô-he cong-nying.

既然 救上，就 曉得 箇 海島 地名 是 米利大。

2 海島 粗蠻 人 待 我許 頂 好：爲 落雨，天架 貤 冷，就 生 火 收留 我許 眾人。

3 Pao-lo côh ih-pô za, kô ze ho-zông, yiu ih-kwang doh-zô yü nyih-mang ts‛ön-c‛ih, ngao-lao ge-keh siu.
4 He-tao ts‛u-mæn nying mông doh-zô dông ze Pao-lo siu, jü-de kông, “Keh nying tsong z hyüong-siu; shü-tsih jong he-li kyiu-zông, t‛in wæ feh hyü ge weh.”
5 Pao-lo hwæh-gao doh-zô ze ho-li, ih-ting vong ziu siang.
6 Ge-he tæn-teng⁷⁾ ge cong-ky‛i, ‛oh-tsia mah-ding s, tih-tao di: teng dziang-kyiu, mông ge ih-ting m-kao siang-‛e, ziu cün-sing, kông ge z zing.

3 保羅 捉 一把 柴，架 在 火上，有 一桄 毒蛇 爲 熱猛 竄出，咬牢 佢个 手。

4 海島 粗蠻 人 望 毒蛇 蕩 在 保羅 手，聚隊 講，“箇 人 總 是 兇手；雖即 從 海裏 救上，天 還 不 許 佢 活。”

5 保羅 搳爻 毒蛇 在 火裏，一點 朆 受 傷。

6 佢許 單等⁸⁾ 佢 腫起，或者 驀停 死，跌倒 地：等 長久，望 佢 一點 無較 傷害，就 轉身，講 佢 是 神。

7 Keh he-tao-keh deo-nao, ming-z Bu-pah-liu, yiu din-di teh keh su-ze lin-gying; ge siu-liu ngô-he, de ngô-he ting hao sæn-nyih.
8 Bu-pah-liu-keh pang sang nyih-bing teh li-zih kw‛eng-kæn: Pao-lo tseo-tsing ge su-ze, tao-kao-ku siu en-en ge, i ge hao.
9 Yü-ts, keh he-tao yiu bing-keh nying tu tseo-le, teh-djôh i-hao:
10 ziu ting kyüong-kying de ngô-he; ky‛i-sing z-‛eo iao yüong-keh meh-z song peh ngô-he.

7 箇 海島个 頭腦，名字 部百流，有 田地 搭 箇 所在 連近；佢 收留 我許，待 我許 頂 好 三日。

8 部百流个 伯‛ 生 熱病 搭 痢疾 睏吤：保羅 走進 佢 所在，禱告過 手 按按 佢，醫 佢 好。

9 爲之，箇 海島 有 病个 人 都 走來，得着 醫好：

10 就 頂 恭敬 待 我許；起身 時候 要 用个 物事 送 畀 我許。

11 KU sæn-ke nyüih, ngô-he ts‛ing ih-tsih Ô-lih-sæn-t‛a jün, jün-‛ao ‘Tiu-z-shông-sang,’ keh jün z ze keh he-tao ku tong; ziu k‛e-jün.
12 Tao Jü-læh-ku, tæn-kôh sæn-nyih.
13 Jong kæn diao-ts‛iang sa tao Li-kyi-ong: ku ih nyih yiu nön-fong c‛ü-le, ziu di-nyi nyih tao Bu-tiu-li;
14 ze-kæn p‛ong-djôh hyüong-di, ts‛ing ngô-he jü-de tæn-kôh ts‛ih nyih; ziu tao Lo-mô k‛e.
15 Lo-mô hyüong-di t‛ing-djôh ngô-he-keh sing-sih, tseo-tao Ô-pi-u-z teh Sæn-kwön di-fông le nying-tsih ngô-he; Pao-lo mông-djôh ge-he, ziu kön-zia Zông-ti, sing-li ön-yü.

11 過 三個 月，我許 趁 一隻 亞歷山太 船，船號 ‘丟士雙生，’ 箇 船 是 在 箇 海島 過 冬；就 開船。

12 到 敘拉古，耽擱 三日。

13 從 吤 調搶 駛 到 利基翁：過 一 日 有 南風 吹來，就 第二 日 到 部丟利；

14 在吤 碰着 兄弟，請 我許 聚隊 耽擱 七 日；就 到 羅馬 去。

15 羅馬 兄弟 聽着 我許个 訊息，走到 亞比烏市 搭 三館 地方 來 迎接 我許；保羅 望着 佢許，就 感謝 上帝，心裏 安慰。

16 Ngô-he tao Lo-mô, pah-tsong peh væn-nying kao-de tsiang-kyüing: tsih hyü Pao-lo teh ih-ke kwön-siu ge-keh ping ling-nga djü.

16 我許 到 羅馬，百總 畀 犯人 交代 將軍：只 許 保羅 搭 一個 管守 佢个 兵 另外 住。

17 KU sæn-nyih, Pao-lo ts‛ing yiu ming-sing-keh Yiu-t‛a nying le: le-gao, ziu teh ge-he kông, “Cong-yü hyüong-di, ngô m-yiu væn-djôh ngô-he pah-sing teh tsu-tsong-keh kwe-kyü, dæn-z jong Yia-lu-sæh-lang ka peh Lo-mô nying-keh siu-li tso væn-nying.
18 Ge-he sing-meng-ku wa-sön iao fông ngô, ing-yü vong væn-djôh zah-m s-ze.
19 Dæn-z Yiu-t‛a nying feh k‛eng hyih; su-i ngô feh-teh-feh gyiu Ke-sæh sing-ün; feh-z yiu zah-m iao kao ngô-keh pah-sing.
20 Yü-ts ngô ts‛ing ng-he le, iao tông-min teh ng-he kông: ngô yin-ze bi keh t‛ih-lin vôh-lao, z yü Yi-seh-lih su sô-mông.”

17 過 三日，保羅 請 有 名聲个 猶太 人 來：來爻，就 搭 佢許 講，“眾位 兄弟，我 無有 犯着 我許 百姓 搭 祖宗个 規矩，但是 從 耶路撒冷 解 畀 羅馬 人个 手裏 做 犯人。

18 佢許 審問過 畫算 要 放 我，因爲 朆 犯着 倽某 死罪。

19 但是 猶太 人 不 肯 歇；所以 我 不得不 求 該撒 伸冤；不是 有 倽某 要 告 我个 百姓。

20 爲之 我 請 爾許 來，要 當面 搭 爾許 講：我 現在 被 箇 鐵鏈 縛牢，是 爲 以色列 所 奢望。”

21 Ge-he teh ge kông, “Ngô-he vong tsih-djôh Yiu-t‛a le kông ng z-kön-keh sing, keh-sih le-keh hyüong-di, ah vong kông ng yiu zah-m feh hao.
22 Yin-ze ngô-he iao t‛ing ng-z-keh i-s tsa-sang: ing-yü kông-tao keh kao-meng, tao-c‛ü bi nying p‛i-bing z ngô-he hyiao-teh.”

21 佢許 搭 佢 講，“我許 朆 接着 猶太 來 講 爾 事幹个 信，箇些 來个 兄弟，也 朆 講 爾 有 倽某 不 好。

22 現在 我許 要 聽 爾自个 意思 怎生：因爲 講到 箇 教門，到處 被 人 批評 是 我許 曉得。”

23 Teh Pao-lo iah-ding nyih-ts, ge-he yiu hyü-to tao ge nyü-su le; Pao-lo jong tsao tao æn peh Mo-si-keh leh-fæh teh sin-ts-nying-keh shih-wa dziang-si ka-shih keh dao-li peh ge-he t‛ing, te-tsing Zông-ti-keh koh, yi ky‛ün ge-he siang-sing Yia-su.
24 Ge shih-wa yiu-sih siang-sing, yiu-sih feh siang-sing.

23 搭 保羅 約定 日子，佢許 有 許多 到 佢 寓所 來；保羅 從 早 到 晏 畀 摩西个 律法 搭 先知人个 說話 詳細 解說 箇 道理 畀 佢許 聽，對證 上帝个 國，貤 勸 佢許 相信 耶穌。

24 佢 說話 有些 相信，有些 不 相信。

25 Liang-‛ô feh te iao sæn-gao, Pao-lo kông keh ih-kyü wa, “Sing-Ling t‛ôh sin-ts Yi-se-ô teh ngô-he tsu-tsong kông-keh zih-ze feh dzæn;
26 Ge kông, ‘Hao tao keh pah-sing su-ze k‛e kông, Ng-he t‛ing we t‛ing-djôh, tsih fe hyiao-teh; mông we mông-djôh, tsih fe ming-bah;
27 ing-yü keh pah-sing sing ngang, ng-tô læn-teh t‛ing, ngæn pi-lao; sang-teh ngæn mông-djôh, ng-tô t‛ing-djôh, sing-li ming-bah, ziu we-sing-cün-i, peh Ngô i ge hao.’ [Y. 6. 9,10.]
28 Su-i, ng-he hao hyiao-teh, Zông-ti-keh kyiu-sing z djün peh bih-koh nying, ge-he we t‛ing.”
29 Pao-lo keh shih-wa kông-ku, Yiu-t‛a nying ziu k‛e; ge-he z-kyi nyi-leng feng-feng.

25 兩下 不 對 要 散爻，保羅 講 箇 一句 話，“聖靈 託 先知 以賽亞 搭 我許 祖宗 講个 實在 不 賺；

26 佢 講，‘好 到 箇 百姓 所在 去 講，爾許 聽 會 聽着，只 𣍐 曉得；望 會 望着，只 𣍐 明白；

27 因爲 箇 百姓 心 硬，耳朵 懶得 聽，眼 閉牢；省得 眼 望着，耳朵 聽着，心裏 明白，就 回心轉意，畀 我 醫 佢 好。’ [Y. 6. 9,10.]

28 所以，爾許 好 曉得，上帝个 救星 是 傳 畀 別國 人，佢許 會 聽。”

29 保羅 箇 說話 講過，猶太 人 就 去；佢許 自己 議論 紛紛。

30 PAO-LO liang-nyin mön djü ze ge-z shü-le-keh oh, tsih-ziu væn-pah le kyin ge cü-ts:
31 fông do-tæn djün Zông-ti koh dao-li, kông Cü Yia-su Kyi-toh z-kön; m-nying tsu ge.

30 保羅 兩年 滿 住 在 佢自 稅來个 屋，接受 凡百 來 見 佢 主子：

31 放 大膽 傳 上帝 國 道理，講 主 耶穌 基督 事幹；無人 阻 佢。