====== MÔ-T‛A DJÜN FOH-ING SHÜ ======
馬太傳福音書
===== Mt. 1. =====
第一章.
1 Kyi-toh-keh kô-pu jong Ô-pah-læh-hön tao Iah-seh.
8 Mô-li-ô bi Sing-Ling kön-dong wa-ying.
19 T‛in-s ao Iah-seh feh yüong p‛ô; ka-shih Kyi-toh-keh ‛æn-deo.
1 基督个 家譜 從 亞伯拉罕 到 約瑟。
8 瑪利亞 被 聖靈 感動 懷孕。
19 天使 噢 約瑟 不 用 怕；解說 基督个 銜頭。
> Ô-PAH-LÆH-HÖN ‛eo-de, Da-bih-keh ‛eo-de, Yia-su Kyi-toh-keh kô-pu.
亞伯拉罕 後代，大別个 後代，耶穌 基督个 家譜。
> 2 Ô-pah-læh-hön sang Yi-sæh; Yi-sæh sang Ngô-kôh; Ngô-kôh sang Yiu-da teh ge hyüong-di;
> 3 Yiu-da jong Da-mô sang Fæh-læh-z teh Sæh-læh; Fæh-læh-z sang Yi-z-leng; Yi-z-leng sang O-læn;
> 4 O-læn sang Ô-mi-nô-dæh; Ô-mi-nô-dæh sang Nô-jing; Nô-jing sang Sæh-meng;
> 5 Sæh-meng jong Læh-‛eh sang Po-z; Po-z jong Lu-teh sang Ô-pah; Ô-pah sang Yia-si;
> 6 Yia-si sang Da-bih wông.
2 亞伯拉罕 生 以撒；以撒 生 雅各；雅各 生 猶大 搭 佢 兄弟；
3 猶大 從 大瑪 生 法拉士 搭 撒拉；法拉士 生 以茲崙；以茲崙 生 阿蘭；
4 阿蘭 生 亞米拿達；亞米拿達 生 拿順；拿順 生 撒門；
5 撒門 從 喇合 生 波士；波士 從 路得 生 亞伯；亞伯 生 耶西；
6 耶西 生 大別 王。
> Da-bih wông jong U-li-ô-keh ts‛i-ts sang Su-lo-meng;
> 7 Su-lo-meng sang Lo-po-ön; Lo-po-ön sang Ô-pi-ô; Ô-pi-ô sang Ô-sæh;
> 8 Ô-sæh sang Iah-sô-fæh; Iah-sô-fæh sang Iah-læn; Iah-læn sang U-si-ô;
> 9 U-si-ô sang Iah-tæn; Iah-tæn sang Ô-hah-z; Ô-hah-z sang Hyi-si-kô;
> 10 Hyi-si-kô sang Mô-nô-si; Mô-nô-si sang O-meng; O-meng sang Iah-si-ô;
> 11 Pah-sing lo-liah tao Pô-pi-leng z-‛eo, Iah-si-ô sang Yia-ko-nyi-ô teh ge hyüong-di.
大別王從烏利亞个妻子生所羅門；
7 所羅門生羅波安；羅波安生亞比亞；亞比亞生亞撒；
8 亞撒生約沙法；約沙法生約蘭；約蘭生烏西亞；
9 烏西亞生約旦；約旦生亞嚇士；亞嚇士生希西家；
10 希西家生瑪拿西；瑪拿西生阿們；阿們生約西亞；
11 百姓攞掠到巴比倫時候，約西亞生耶哥尼亞搭佢兄弟。
> 12 Pah-sing lo-liah tao Pô-pi-leng ts-‛eo, Yia-ko-nyi-ô sang Sæh-læh-t‛ih; Sæh-læh-t‛ih sang Su-lo-pô-pah;
> 13 Su-lo-pô-pah sang Ô-pi-üoh; Ô-pi-üoh sang Yi-li-ô-kying; Yi-li-ô-kying sang Ô-su;
> 14 Ô-su sang Sæh-dôh; Sæh-dôh sang Ô-kying; Ô-kying sang Yi-leh;
> 15 Yi-leh sang Yi-li-ô-sæh; Yi-li-ô-sæh sang Mô-tæn; Mô-tæn sang Ngô-kôh;
> 16 Ngô-kôh sang Iah-seh, ziu-z Mô-li-ô-keh dziang-fu; Mô-li-ô sang Yia-su ts‛ing-hwu Kyi-toh.
> 17 Jong Ô-pah-læh-hön tao Da-bih ih-gyüong yiu zih-s de; jong Da-bih tao pah-sing lo-liah tao Pô-pi-leng z-‛eo, yi yiu zih-s de; jong pah-sing lo-liah tao Pô-pi-leng ts-‛eo tao Kyi-toh yi yiu zih-s de.
12 百姓攞掠到巴比倫之後，耶哥尼亞生撒拉鐵；撒拉鐵生所羅巴伯；
13 所羅巴伯生亞比郁；亞比郁生以利亞敬；以利亞敬生亞所；
14 亞所生撒鐸；撒鐸生亞金；亞金生以律；
15 以律生以利亞撒；以利亞撒生馬旦；馬旦生雅各；
16 雅各生約瑟，就是瑪利亞个丈夫；瑪利亞生耶穌稱呼基督。
17 從亞伯拉罕到大別一共有十四代；從大別到百姓攞掠到巴比倫時候，貤有十四代；從百姓攞掠到巴比倫之後到基督貤有十四代。
> 18 YIA-SU Kyi-toh sang-keh z-kön z tsiao ‛ô-veng: Ge nyiang Mô-li-ô yi-kying hyü peh Iah-seh, wæ-vong tso ts‛ing, bi Sing-Ling kön-dong wa-ying.
> 19 Ge dziang-fu Iah-seh z tsing-dzih nying, feh k‛eng ming-ming peh ge tao me, siang s-ô t‛e-hweng.
> 20 Ge k‛eo-k‛eo s-ts‛eng keh z-kön, Cü keh t‛in-s mong-cong yin-c‛ih-le, teh ge kông, “Da-bih-keh ‛eo-de Iah-seh, ng k‛e c‛ü ng-keh ts‛i-ts Mô-li-ô ku-le, feh yüong p‛ô; ing-yü ge wa-ying z bi Sing-Ling kön-dong.
> 21 Ge we sang ih-ke N-ts; ng iao c‛ü Ge ming-z YIA-SU; ing-yü z Ge iao kyiu Ge pah-sing t‛eh-c‛ih ge-keh ze-ôh.”
18 耶穌基督生个事幹是照下文：佢娘瑪利亞已經許畀約瑟，還朆佐寢，被聖靈感動懷孕。
19 佢丈夫約瑟是正直人，不肯明明畀佢倒楣，想私下退婚。
20 佢扣扣思忖箇事幹，主个天使夢中現出來，搭佢講：“大別个後代約瑟，爾去娶爾个妻子瑪利亞過來，不用怕；因為佢懷孕是被聖靈感動。
21 佢會生一個兒子；爾要取佢名字耶穌；因為是佢要救佢百姓脫出佢个罪惡。”
> 22 Keh z-kön tu tso-zing, hao peh Cü t‛ôh sin-ts-nying su kông shih-wa yiu ing-nyin, ziu-z,
> 23 “Yiu ih-ke do-nyiang we wa-ying sang N-ts, nying iau ts‛ing-hwu Ge ming-z YI-MÔ-NE-LI;” [Y. 7. 14.] fæn-c‛ih-le ziu-z, ZÔNG-TI TEH NGÔ-HE JÜ-DE.
22 箇事幹都做成，好畀主託先知人所講說話有應驗，就是，
23 “有一個大娘會懷孕生兒子，人要稱呼佢名字**以馬內利**；” [Y. 7. 14.] 翻出來就是，**上帝搭我許聚隊**。
> 24 Iah-seh kw‛eng-sing nang-ky‛i, ziu i Cü t‛in-s su feng-fu, c‛ü ge ts‛i-ts ku-le;
> 25 dæn-z vong teh ge dong-vông teng-tao ge sang deo ih-ke N-ts: c‛ü Ge ming-z YIA-SU.
24 約瑟睏醒玍起，就依主天使所吩咐，娶佢妻子過來；
25 但是朆搭佢同房等到佢生頭一個兒子：取佢名字耶穌。
===== Mt. 5. =====
章5.
1 Kyi-toh ze sæn-zông djün dao:
3 kông zao væn-ts nying yiu foh,
13 meng-du z si-zông-keh yin,
14 si-zông-keh liang-kwông, ih-tu zing ze sæn-zông,
15 teng-liang,
17 Kyi-toh le iao t-so-zing leh-fæh.
21 Sæh nying-keh i-s,
27 kæn-ying-keh i-s,
33 væh-tsiu-keh i-sy;
38 ky‛ün nying kw‛ön-shü bih-ke,
43 e-sih ling-sô,
48 ke tso nying jün-bi.
1 基督在山上传道：
3 講倽範子人有福，
13 門徒是世上个鹽，
14 世上个亮光，一堵城在山上，
15 燈亮，
17 基督來要做成律法。
21 殺人个意思，
27 姦淫个意思，
33 罰咒个意思；
38 勸人寬恕別個，
43 愛惜鄰舍，
48 該做人全備。
> YIA-SU mong-djôh keh hyü-to nying, ziu tseo-zông sæn: ih zo-lôh, meng-du tao Ge sing-pin. 2 Yia-su k‛e-k‛eo kao-hyüing ge-he, kông:—
耶穌望着箇許多人，就走上山，一坐落，門徒到佢身邊。2 耶穌開口教訓佢許，講：——
> 3 “Sing-li gyüong-keh yiu foh: ing-yü t‛in-koh z ge-ke.
3 “心裏窮个有福：因爲天國是佢个。
> 4 “Sing-t‛ong-keh yiu foh: ing-yü ge-he we teh-djôh ön-yü.
4 “心痛个有福：因爲佢許會得着安慰。
> 5 “Weng-ziu-keh yiu foh: ing-yü ge-he we teh-djôh di-t‛u tso sæn-nyih.
5 “溫柔个有福：因爲佢許會得着地土做產業。
> 6 “Ziang du-hæh k‛eo-k‛eh s-siang kong-nyi yiu foh: ing-yü ge-he we teh-djôh sing-mön-i-coh.
6 “像肚㾎口渴思想公義有福：因爲佢許會得着心滿意足。
> 7 “E-lin-nying-keh yiu foh: ing-yü ge-he we teh-djôh e-lin.
7 “愛憐人个有福：因爲佢許會得着愛憐。
> 8 “Sing-li ts‛ing-kyih yiu foh: ing-yü ge-he we mông-djôh Zông-ti.
8 “心裏清潔有福：因爲佢許會望着上帝。
> 9 “Ky‛ün nying ‛o-moh-keh yiu foh; ing-yü ge-he we ts‛ing-hwu z Zông-ti-keh n-ts.
9 “勸人和睦个有福；因爲佢許會稱呼是上帝个兒子。
> 10 “Yü kong-nyi ziu pih-næn-keh, yiu foh: ing-yü t‛in-koh z ge-ke.
10 “爲公義受逼難个有福：因爲天國是佢个。
> 11 “Ziah yiu nying yü Ngô zôh ng-he, pih-næn ng-he, yüong yiang-yiang ôh shih-wa hyü-pông ng-he, ng yiu foh.
11 “若有人爲我𧮙爾許，逼難爾許，用樣樣惡說話毀謗爾許，爾有福。
> 12 “Ing-ke hwön-hyi kw‛a-lôh: ing-yü ze t‛in-zông ng-he-keh pao-ing z ting do: ing-yü ge-he yi z-t‛ih pih-næn ng-he zin-deo-keh sin-ts-nying.
12 “應該歡喜快樂：因爲在天上爾許个報應是頂大：因爲佢許貤似剔逼難爾許前頭个先知人。
> 13 “NG-HE z si-zông-keh yin: yin ziah-z sih-gao ge ‛æn-keh mi-dao, yiu zah-m hao tsông ge ‛æn? ‛eo-deo z vu-yüong, tsih hao tao ze nga-min peh nying dæh-gao.
13 “爾許是世上个鹽：鹽若是失爻佢鹹个味道，有啥某好妝佢鹹？後頭是無用，只好倒在外面畀人蹋爻。
> 14 “Ng-he z si-zông-keh liang-kwông. Ih-tu zing zao ze sæn-zông feh neng ing-zông. 15 Nying tin teng, fe fông ze teo-‛ô, fông ze teng-de zông; ziu tsiao-djôh ‛eh-kô-keh nying. 16 Ng-he-keh liang-kwông ah ing-ke tsiao ze nying min-zin peh ge mông-djôh ng-keh hao ‛ang-yü, ziu we kyü yüong-wa peh ng-he t‛in-zông Vu-ts‛ing.
14 “爾許是世上个亮光。一堵城造在山上不能隐藏。15 人點燈，𣍐放在斗下，放在燈臺上；就照着閤家个人。16 爾許个亮光也應該照在人面前畀佢望着爾許好行爲，就會歸榮華畀爾許天上父親。
> 17 “Feh-k‛o ts‛eng Ngô le iao fi-gao leh-fæh teh sin-ts-nying: Ngô le feh-z iao fi-gao, z iao tso-zing.
> 18 Ngô lao-zih teh ng kông, Teng-tao t‛in-di ku-k‛e, leh-fæh ih-tin ih-wah feh neng-keo ku-k‛e, dzih tao yiang yiang tso-zing.
> 19 Ka-ming lin ih-diao ting siao, ziah yiu nying fi-gao, yi kao bih-nying fi-gao, keh nying ze t‛in-koh sön ting siao: ziah yiu nying i-jing ge yi kao bih-nying i-jing, keh nying ze t‛in-koh sön do.
> 20 Ngô teh ng kông, Ng-keh kong-nyi ziah feh ku-yü doh-shü-nying teh Fæh-li-se nying-keh kong-nyi, töe feh neng-keo tseo-tsing t‛in-koh.
17 “不可忖我徠要廢爻律法搭先知人：我來不是要廢爻，是要做成。
18 我老實搭爾講，等到天地過去，律法一點一劃不能夠過去，直到樣樣做成。
19 誡命連一條頂小，若有人廢爻，貤教別人廢爻，箇人在天國算頂小：若有人依循佢貤教別人依循，箇人在天國算大。
20 我搭爾講，爾个公義若不過於讀書人搭法利賽人个公義，斷不能夠走進天國。
> 21 “NG-HE t‛ing-djôh yiu feng-fu ku-z-tsih nying kông, ‘Feh-k‛o sæh nying; væn-pah hyüong-sæh pih-iao sing-p‛ön:’
> 22 dæn-z Ngô teh ng kông, Væn-pah vu-ku ky‛i-‛eng ge hyüong-di pih iao sing-p‛ön; væn-pah zôh-mô ge hyüong-di, Leh-kô, iao song tao kong-dông; væn-pah zôh-mô ge hyüong-di, Mo-li, iao tön ze di-nyüoh-keh ho-li. [Leh-kô teh Mo-li ziu-z Yiu-t‛a nying zôh-mô shih-wa.]
> 23 Su-i ng ziah ta li-veh tao tsi-dæn zin, kyi-teh ng yiu teh-ze hyüong-di,
> 24 ng-keh li-veh fông ze tsi-dæn zin, sin k‛e teh hyüong-di ‛o-hao, ‛eo-deo le hyin li-veh.
21 “爾許聽着有吩咐古時節人講，‘不可殺人；凡百兇殺必要審判：’
22 但是我搭爾講，凡百無故氣恨佢兄弟必要審判；凡百𧮙罵佢兄弟，拉加，要送到公堂；凡百𧮙罵佢兄弟，魔利，要斷在地獄个火裏。[拉加搭魔利就是猶太人𧮙罵說話。]
23 所以爾若帶禮物到祭壇前，記得爾有得罪兄弟，
24 爾个禮物放在祭壇前，先去搭兄弟和好，後頭來獻禮物。
> 25 Ng teh ün-kô wæ ze lu-zông, iao kw‛a-ting teh ge kông ‛o; sang-teh ün-kô song ng peh kwön, kwön kao peh ts‛a-yüoh, ziu kwæn ng ze kæn-lao.
> 26 Ngô lao-zih teh ng kông, Ziah yiu ih-ke dong-din vong wæn wön, ng tsong feh neng tseo-c‛ih.
25 爾搭冤家還在路上，要快點搭佢講話；省得冤家送爾畀官，官交畀差役，就關爾在監牢。
26 我老實搭爾講，若有一個銅錢朆還完，爾總不能走出。
> 27 “Ng-he t‛ing-djôh yiu feng-fu ku-z-tsih nying kông, ‘Feh-k‛o kæn-ying:’
> 23 dæn-z Ngô teh ng kông, Væn-pah mông djôh vu-nyü ky‛i ying-sing sing-li z yi-kying væn-djôh kæn-ying.
> 29 Ng jing-tsih ngæn ziah-z ta-li ng væn-ze, hao leo-c‛ih, tön-gao: neng-ts pah-t‛i ky‛üih ih-yiang, feh iao jün-sing tön-lôh di-nyüoh.
> 30 Ng jing-tsih siu ziah-z ta-li ng væn-ze, hao tsôh-lôh, tön-gao: neng-ts pah-t‛i ky‛üih ih-yiang, feh iao jün-sing tön-lôh di-nyüoh.
27 “爾許聽着有吩咐古時節人講，‘不可姦淫：’
23 但是我搭爾講，凡百望着婦女起淫心心裏是已經犯着姦淫。
29 爾順隻眼若是帶累((同寧波話聖經))爾犯罪，好摟出，斷爻：甯之百體缺一樣，不要全身斷落地獄。
30 爾順隻手若是帶累((同寧波話聖經))爾犯罪，好斫落，斷爻：甯之百體缺一樣，不要全身斷落地獄。
> 31 “Yi yiu kông, ‘Ziah yiu nying iao li-k‛e ts‛i-ts, ing-ke sia li-shü peh ge:’
> 32 dæn-z Ngô teh ng kông, Ziah feh-z yü kæn-ying li-k‛e ts‛i-ts, z ‛e ge væn kæn-ying: ziah yiu nying c‛ü li-gao-keh ts‛i-ts yi z væn kæn-ying.
31 “貤有講，‘若有人要離開妻子，應該寫離書畀佢：’
32 但是我搭爾講，若不是爲姦淫離開妻子，是害佢犯姦淫：若有人娶離爻个妻子貤是犯姦淫。
> 33 “Ng-he yi t‛ing-djôh yiu feng-fu ku-z-tsih nying kông, ‛Feh-k‛o væh kô-tsiu, hyü-nyün peh Cü tsong iao wæn:‛
> 34 dæn-z Ngô teh ng kông, tön feh-k‛o væh-tsiu; feh-k‛o ts-tin t‛in væh-tsiu, ing-yü t‛in z Zông-ti-keh zo yü:
> 35 yi feh-k‛o ts-tin di væh-tsiu, ing-yü di z Ge-keh dæh-kyiah-teng: yi feh-k‛o ts-tin Yia-lu-sæh-lang væh-tsiu, ing-yü Yia-lu-sæh-lang z keh-yü do Wông-ti-keh kying-zing.
> 36 Yi feh-k‛o ts-tin z-keh deo væh-tsiu, ing-yü ng feh neng peh ih-keng deo-fæh pin-bah pin heh.
> 37 Dæn-z ng-he-keh shih-wa ing-ke Z, kông z; feh-z, kông feh-z; ziah-z kô-ts‛eo z jong ôh-i le.
33 “爾許貤聽着有吩咐古時節人講，‘不可罰假咒，許願畀主總要還：’
34 但是我搭爾講，斷不可罰咒，不可指點天罰咒，因爲天是上帝个坐位：
35 貤不可指點地罰咒，因爲地是佢个蹋腳凳：貤不可指點耶路撒冷罰咒，因爲耶路撒冷是箇位大皇帝个京城。
36 貤不可指點頭髮變白變黑。
37 但是爾許个說話應該，是，講是，不是，講不是；若是加湊是從惡倚來。
> 38 “Ng-he t‛ing-djôh kông, ‘Ngæn ti-wæn ngæn, ngô-ts‛ ti-wæn ngô-ts‛:’
> 39 dæn-z Ngô teh ng kông, Feh-k‛o ti-dih ôh-nying: ziah yiu nying tang ng jing-pin cü-kwah, tsi-pin ah hao le cün peh ge tang.
> 40 Ziah yiu nying kao ng siang ng-keh li-min i-zông, lin nga-min i-zông ah hao peh ge do-k‛e.
> 41 Ziah yiu nying ngang-æh ng tseo ih-li lu, ziu hao teh ge tseo liang-li.
> 42 Gyiu ng-keh, hao peh ge; iao tsia ng-keh, feh iao t‛e-z.
38 “爾許聽着講，‘眼抵還眼，牙齒抵還牙齒：’
39 但是我搭爾講，不可抵敵惡人：若有人打爾順邊嘴摑，濟邊也好擂轉畀佢打。
40 若有人告爾想爾个裏面衣裳，連外面衣裳也好畀佢馱去。
41 若有人硬押爾走一里路，就好搭佢走兩里。
42 求爾个，好畀佢；要借爾个，不要推辭。
> 43 “Ng-he t‛ing-djôh kông, ‘Iao e-sih ng-keh ling-sô, ky‛i ng-keh ün-kô:’
> 44 dæn-z Ngô teh ng kông, Iao e-sih ng-keh ün-kô; coh-foh tsiu ng cü-ts; ky‛i ng-keh, iao de ge hao; hyü-pông ng pih-næn ng-keh, iao de ge tao-kao.
> 45 Ng ziu hao tso ng T‛in-Vu-keh n-ts: ing-yü Ge peh Ge-keh nyih-deo tsiao-djôh ôh-nying teh zin-nying; yi kông-lôh yü peh tsing-dzih teh feh tsing-dzih nying.
> 46 Ng-he ziah-z e-sih e-sih ng-he cü-ts, yiu zah-m pao-ing? Ziu-z siu-din-liang-keh, ky‛i feh-z t‛ih tso?
> 47 Ziah-z tæn tsiao-tsih z-keh hyüong-di, yiu zah-m kah-nga hao? Siu-din-liang-keh, ky‛i feh-z t‛ih tso?
> 48 Su-i ng-he tso nying ke jün-bi, ziang ng-he T‛in-Vu z jün-bi.
43 “爾許聽着講，‘要愛惜爾个邻舍，氣爾个冤家：’
44 但是我搭爾講，要愛惜爾个冤家，祝福咒爾主子；氣爾个，要待佢好；毀謗爾逼難爾个，要代佢禱告。
45 爾就好做爾天父个兒子：因爲佢畀佢个日頭照着惡人搭善人；貤降落雨畀正直搭不正直人。
46 爾許若是愛惜愛惜爾許主子，有啥某報應？就是收錢糧个，豈不是剔做？
47 若是單招接自个兄弟，有啥某格外好？收錢糧个，豈不是剔做？
48 所以爾許做人該全備，像爾許天父似全備。
===== Mt. 6. =====
第六章.
1 Kyi-toh wæ ze sæn-zông djün dao, ka-shih tso hao-z,
5 tao-kao,
14 nyiao-sô bih-ke,
16 kying-zih.
19 ze nô su-ze hao k‛ông ze-veh,
24 voh-z Zông-ti teh ze-veh:
25 ky‛ün ge feh iao yü si-zông meh-z iu-zeo:
33 sin gyiu Zông-ti-keh koh.
1 基督還在山上傳道，解說做好事，
5 禱告，
14 饒赦別個，
16 禁食。
19 在哪所在好囥財物，
24 服侍上帝搭財物：
25 勸佢不要爲世上物事憂愁：
33 先求上帝个國。
> “NG-HE tso hao-z iao liu-sing, feh-k‛o dih-di ze nying min-zin peh ge mông: ziah-z t‛ih ng-he feh neng teh-djôh T‛in-Vu-keh pao-ing.
“爾許做好事要留心，不可特地在人面前畀佢望：若是剔爾許不能得着天父个報應。
> 2 “Su-i tso hao-z z-‛eo, feh-k‛o ze ng min-zin c‛ü ‛ao-deo, ziang kô-hao-nying ze jü-we-dông teh do-ka-zông su tso, siang teh-djôh nying-keh ts‛ing-tsæn. Ngô lao-zih teh ng kông, Ge-keh pao-ing yi-kying teh-djôh.
> 3 Dæn-z ng tso hao-z, jing siu su tso feh k‛o peh tsi siu hyiao-teh:
> 4 s-teh ng-keh hao-z we ön-cong: ng-keh Vu-ts‛ing lin ön-cong su-ze tu mông-djôh Z-kyi we ming-ming pao-ing ng.
2 “所以做好事時候，不可在爾面前吹號頭，像假好人在聚會堂搭大街上所做，想得着人个稱讚。我老實搭爾講，佢个報應已經得着。
3 但是爾做好事，順手所做不可畀濟手曉得：
4 使得爾个好事會暗中：爾个父親連暗中所在都望着自己會明明報應爾。
> 5 “Ng tao-kao z-‛eo, feh-k‛o ziang kô-hao-nying: ge-he hwön-hyi ze jü-we-dông teh s-ts‛ô-lu-k‛eo gyi-kæn tao-kao, dih-di peh nying mông. Ngô lao-zih teh ng kông, Ge-keh pao-ing yi-kying teh-djôh.
> 6 Dæn-z ng tao-kao z-‛eo, tseo-tsing z-keh iu-zing vông-kæn, meng kwæn-gao, gyiu-gyiu ng-keh Vu-ts‛ing lin ön-cong su-ze tu ze-teh: ng Vu-ts‛ing ze ön-cong su-ze tu mông-djôh, we ming-ming pao-ing ng.
5 “爾禱告時候，不可像假好人：佢許歡喜在聚會堂搭四岔路口徛吤禱告，特地畀人望。我老實搭爾講，佢个報應已經得着。
6 但是爾禱告時候，走進自个幽靜房間，門关爻，求求爾許父親連暗中所在都在㙮：爾父親在暗中所在都望着，會明明報應爾。
> 7 “Ng-he tao-kao feh-k‛o kông ku yi kông, ziang bih-koh-nying: ing-yü ge ts‛eng yü shih-wa to pih-ding we t‛ing.
> 8 Ng-he feh-k‛o tsiao ge yiang: ing-yü vong gyiu Ge ts-zin ng-he su iao yüong, ng-keh Vu-ts‛ing yi-kying hyiao-teh.
> 9 Ng tao-kao ing-ke t‛ih kông:—
> “Ngô-he Vu-ts‛ing ze t‛in-zông, dæn-nyün cong-nying tseng-kying Ng sing-zin-keh ming-deo.
> 10 Dæn-nyün Ng-keh koh we le. Dæn-nyün Ng-keh ts-i we tso-zing, ze di ziang ze t‛in.
> 11 Ngô-he nyih-nyih-keh liang-zih kying-nying s-peh ngô-he.
> 12 Sô-min ngô-he tsa, ziang ngô-he sô-min bih-nying-keh tsa.
> 13 Feh iao peh ngô-he p‛ong-djôh mi-‛oh, kyiu ngô-he t‛eh-c‛ih hyüong-ôh. Ing-yü koh-veng neng-kön yüong-wa, si-si-de-de tu z Ng-he. Ô-meng.
> 14 “Ing-yü ng-he ziah sô-min bih-nying-keh dzæn-c‛ü, ng-he T‛in-Vu yi we sô-min ng-he-keh dzæn-c‛ü.
> 15 Ng-he ziah feh k‛eng sô-min bih-nying dzæn-c‛ü, ng-he T‛in-Vu ah feh k‛eng sô-min ng-keh dzæn-c‛ü.
7 “爾許禱告不可講過貤講，像別國人：因爲佢忖爲說話多必定會聽。
8 爾許不可照佢樣：因爲朆求佢之前爾許所要用，爾个父親已經曉得。
9 爾禱告應該剔講：——
“我許父親在天上，但願衆人尊敬爾聖善个名頭。
10 但願爾个國會來。但願爾个旨意會做成，在地像在天。
11 我許日日个糧食今日賜畀我許
12 赦免我許債，像我許赦免別人个債。
13 不要畀我許碰着迷惑，救我許脫出兇惡。因爲箇份能幹榮華，世世代代都是爾許。亞門。
14 “因爲爾許若赦免別人个賺處，爾許天父也會赦免爾許个賺處。
15 爾許若不肯赦免別人賺處，爾許天父也不肯赦免爾个賺處。
> 16 “Ng-he kying-zih z-‛eo, feh-k‛o ziang kô-hao-nying, ta iu-zeo væn-ts: ing-yü ge-he pin-wön min-seh, dih-di peh nying mông-djôh ge ze-teh kying-zih. Ngô lao-zih teh ng kông, Ge-he pao-ing yi-kying teh-djôh.
> 17 Dæn-z ng kying-zih, yüong s-deo, si-min;
> 18 feh iao peh nying mông, tsih iao peh ng ön-cong-keh Vu-ts‛ing mông-djôh: ng-keh Vu-ts‛ing, lin ön-cong su-ze tu mông-djôh, we ming-ming pao-ing ng.
16 “爾許禁食時候，不可像假好人，帶憂愁範子：因爲佢許變換面色，特地畀人望着佢在㙮禁食。我老實搭爾講，佢許報應已經得着。
17 但是爾禁食，用梳頭，洗面；
18 不要畀人望，只要畀爾暗中个父親望着：爾个父親，連暗中所在都望着，會明明報應爾。
> 19 “NG-HE feh-k‛o tsih-djü ze-veh ze di-zông, cü-djong iao cü-gao, iao fæh-siu me-læn, dao-zeh we ts‛ah dong t‛eo k‛e:
> 20 iao tsih-djü ze-veh ze t‛in-zông, cü-djong cü feh-gao, fe fæh-siu me-læn, dao-zeh fe ts‛ah dong t‛eo-k‛e.
> 21 Ing-yü ng-keh ze-veh ze ‛ah-yi, ng-keh sing ah ze ‛ah-yi.
> 22 “Ngæn z sing-zông-keh teng: ng-keh ngæn ziah-z liang, mön-sing yiu kwông.
> 23 Ng-keh ngæn ziah feh liang, mön-sing z heh-ön, keh heh-ön z ting do!
19 “爾許不可積儲財物在地上，蛀蟲要蛀爻，要發鏽黴爛，盜賊會拆洞偷去：
20 要積儲財物在天上，蛀蟲蛀不爻，𣍐發鏽黴爛，盜賊𣍐拆洞偷去。
21 因爲爾許財物在何倚，爾个心也在何倚。
22 “眼是身上个燈：爾个眼若是亮，滿身有光。
23 爾个眼若不亮，满身是黑暗，箇黑暗是頂大！
> 24 “Ih-ke nying feh neng voh-z liang-ke cü-nying-kô: ‛oh-tsia we k‛o-u ih-ke, e-kying bih-ke; ‛oh-tsia we ts‛ing-gying i-pin, k‛ön-ky‛ing kæn-pin. Zông-ti teh ze-veh ng feh neng tu voh-z.
> 25 Su-i Ngô teh ng kông, Feh-k‛o yü sing-ming iu-zeo, zah-m ky‛üoh, zah-m hæh; yi feh-k‛o yü sing-t‛i iu-zeo, zah-m tsiah. Sing-ming ky‛i feh-z pi ky‛üoh-zih kyü-djong, sing-t‛i ky‛i feh-z pi i-zông iao-kying?
> 26 Hao mông k‛ong-cong-keh tiao, ge feh cong-lôh, feh siu-keh, yi feh siu-tsing koh-ts‛ông-li; ng-keh T‛in-Vu we yiang ge. Ng-he ziah-z iu-zeo, nô ih-ke neng-keo to tso ih-k‛eh nying?
> 28 Ng tsa-sang zeo i-zông tsiah? Hao s-ts‛eng hông-di-keh pah-‛eh hwa, tsa-sang do-ky‛i-le; ge feh lao-loh, yi feh fông-min:
> 29 Ngô-teh ng kông, Ziu-z Su-lo-meng ting yüng-wa z-‛eo ge tsiah-sih feh gyih-jü ih-tô pah-‛eh-hwa.
> 30 Yia-ts‛ao kying-nying wæ ze-teh, t‛in-nyiang tön ze ho-lu, Zông-ti we z-t‛ih tang-pæ ge, ‛o-hyüông ng-he, siao siang-sing-keh nying?
> 31 Su-i feh yüong iu-zeo, kông, Ngô-he yiu zah-m ky‛üoh? zah-m hæh, zah-m tsiah?
> 32 (Keh-sih tu z bih-koh-nying su gyiu:) ng ih-ts‛ih su iao, ng-keh T‛in-Vu yi-kying hyiao-teh.
> 33 Ng ing-ke sin gyiu Zông-ti-keh koh, teh Ge kong-nyi; keh ih-ts‛ih-keh tu we kô-ts‛eo peh ng.
> 34 Su-i feh-k‛o yü t‛in-nyiang iu-zeo: t‛in-nyiang we zeo t‛in-nyiang z-kön. Ih-nyih kwön ih-nyih lao-loh keo-gao.
24 “一個人不能服侍兩個主人家：或者會可惡一個，愛敬別個；或者會親近倚邊，看輕吤邊。上帝搭財物爾不能都服侍。
25 所以我搭爾講，不可爲性命憂愁，啥某喫，啥某呷；貤不可爲身體憂愁，啥某撯。性命豈不是比喫食貴重，身體豈不是比衣裳要緊？
26 好望空中个鳥，佢不種落，不收割，貤不收進穀倉裏；爾个天父會養佢。爾許若是憂愁，哪一個能夠多做一刻人？
28 爾怎生愁衣裳撯？好思忖荒地个百合花，怎生大起來；佢不勞碌，貤不紡棉：
29 我搭爾講，就是所羅門頂榮華時候佢撯飾不及如一朵百合花。
30 野草今日還在㙮，天亮斷在火爐，上帝會似剔打扮佢，何況爾許，小相信个人？
31 所以不用憂愁，講，我許有啥某喫？啥某呷？啥某撯？
32 （箇些都是別國人所求：）爾一切所要，爾个天父已經曉得。
33 爾應該先求上帝个國，搭佢公義；箇一切个都會加湊畀爾。
34 所以不可爲天亮憂愁：天亮會愁天亮事幹。一日管一日勞碌夠爻。
===== Mt. 7. =====
第七章.
1 Kyi-toh wæ ze sæn-zông djün dao, tsah-væh p‛i-bing bih-ke cü-ts.
6 sing-zin-keh meh-z m-c‛ü tön peh ts,
7 ky‛ün nying tao-kao,
13 tseo-tsing ‛æh-tsæh-keh meng,
15 vông-bi kô sin-ts-nying.
21 feh tæn-tsih iao t‛ing, yi iao i-jing:
24 oh ky‛i ze zih-deo zông,
28 oh ky‛i ze sô-t‛æn-zông.
1 基督還在山上傳道，責罰批評別個主子。
6 聖善个物事無處斷畀豬，
7 勸人禱告，
13 走進狹窄个門，
15 防備假先知人。
21 不單只要聽，貤要依循：
24 屋起在石頭上，
28 屋起在沙灘上。
> “NG-HE feh-k‛o p‛i-bing nying, sang-teh nying p‛i-bing ng.
> 2 Ing-yü ng-he p‛i-bing nying tsa-sang, p‛i-bing ng ah we tsa-sang: ng-he liang peh bih-nying tsa-sang, liang peh ng ah we tsa-sang.
> 3 Ng yü zah-m mông-djôh hyüong-di ngæn-li yiu ts‛, feh ts‛eng-tao z-keh ngæn-li yiu tong-liang?
> 4 Ng tsa-sang hao teh hyüong-di kông, ‘Ng ngæn-li-keh ts‛ peh ngô bæh-c‛ih;’ ng-z ngæn-li yiu tong-liang?
> 5 Kô-hao-nying, sin bæh-c‛ih ng-z ngæn-li-keh tong-liang; ‛eo-deo ng neng-keo mông-ming, hao bæh-c‛ih hyüong-di ngæn-li-keh ts‛.
“爾許不可批評人，省得人批評爾。
2 因爲爾許批評人怎生，批評爾也會怎生：爾許量畀別人怎生，量畀爾也會怎生。
3 爾爲啥某望着兄弟眼裏有刺，不忖到自个眼裏有棟梁？
4 爾怎生好搭兄弟講，‘爾眼裏个刺畀我拔出；’ 爾自眼裏有棟梁？
5 假好人，先拔出爾自眼裏个棟梁；後頭爾能夠望明，好拔出兄弟眼裏个刺。
> 6 “Sing-zin-keh meh-z feh-k‛o peh keo, ng-keh tsing-cü yi feh-k‛o tön peh ts, sang-teh ge kyiah dæh-gao, wæ iao le-cün ngao ng.
6 “聖善个物事不可畀狗，爾个珍珠貤不可斷畀豬，省得佢腳蹋爻，還要擂轉咬爾。
> 7 “Ng-he gyiu, tsong we peh ng; zing, tsong we zing-djôh; k‛ao meng, tsong we k‛e peh ng:
> 8 ing-yü væn-pah gyiu-keh we teh-djôh; zing-keh, we zing-djôh; k‛ao-meng-keh we k‛e peh ge.
> 9 Ng-he cong-yiang nô ih-ke yiu n-ts gyiu ih-ke ping, we côh ih-kw‛e zih-deo peh ge;
> 10 gyiu ih-kwang ng, we côh ih-kwang zô peh ge?
> 11 Ng-he shü-tsih z ôh-nying, ziah hyiao-teh yüong hao meh-z peh a-nô, ‛o-hyüong ng-he t‛in-zông Vu-ts‛ing ky‛i feh kah-nga yüong hao meh-z s-peh gyiu Ge cü-ts?
7 “爾許求，總會畀爾；尋，總會尋着；敲門，總會開畀爾：
8 因爲凡百求个會得着；尋个，會尋着；敲門个會開畀佢。
9 爾許中央哪一個有兒子求一個餅，會捉一塊石頭畀佢；
10 求一桄魚，會捉一桄蛇畀佢？
11 爾許雖即是惡人，若曉得用好物事畀阿囝，何況爾許天上父親豈不格外用好物事賜畀求佢主子？
> 12 “Su-i ng he iao bih-nying tsa-sang de ng, ng ah iao tsa-sang de ge: keh ziu-z leh-fæh teh sin-ts-nying-keh i-s.
12 “所以爾許要別人怎生待爾，爾也要怎生待佢：箇就是律法搭先知人个意思。
> 13 “NG-HE iao tseo-tsing ‛æh-tsæh-keh meng: ing-yü tao djü-mih su-ze, meng z kw‛eh, lu z do, tseo-tsing-keh nying to.
> 14 Dæn-z tao weh-ming di-fông, meng z ‛æh-tsæh, lu z siao, zing-djôh cü-ts feh to.
13 “爾許要走進狹窄个門：因爲到除滅所在，門是闊，路是大，走進个人多。
14 但是到活命地方，門是狹窄，路是小，尋着主子不多。
> 15 “Ng-he kying-vông kô sin-ts-nying, ge tao ng su-ze le, nga-min ziang yiang, li-min z za-lông.
> 16 Ng-he mông ge ko-ts hao hyiao-teh ge. Ts‛-bang cong-yiang ‛ah-yi yiu bu-dao tsah, zih-li cong-yiang ‛ah-yi yiu vu-hwa-ko tsah?
> 17 Su-i, hao jü we kyih hao ko-ts; feh hao jü we kyih feh hao ko-ts.
> 18 Hao jü feh neng kyih feh hao ko-ts, feh hao jü feh neng kyih hao ko-ts.
> 19 Væn-pah feh kyih hao ko-ts-keh jü, tu tsôh-gao tön ze ho-li.
> 20 Su-i mông ge ko-ts hao hyiao-teh ge.
15 “爾許謹防假先知人，佢到爾所在來，外面像羊，裏面是豺狼
16 爾許望佢果子好曉得佢。刺棚中央何倚有葡萄摘，蒺藜中央何倚有無花果摘？
17 所以，好樹會結好果子；不好樹會結不好果子。
18 好樹不能結不好果子，不好樹不能結好果子。
19 凡百不結好果子个樹，都斫爻斷在火裏。
20 所以望佢果子好曉得佢。
> 21 “Bing fi væ-pah ts‛ing-hwu Ngô, ‘Cü, Cü,’ hao tseo-tsing t‛ing-koh; tsih-yiu i Ngô t‛in-zông Vu-ts‛ing-keh ts-i hao tseo-tsing.
> 22 Tao keh nyih yiu hyü-to nying we teh Ngô kông, ‘Cü, Cü, ngô-he ky‛i feh-z vong Ng-keh ming-deo djün-dao, vong Ng-keh ming-deo kön-c‛ih kyü, vong Ng-keh ming-deo tso hyü-to gyi-z?’
> 23 Ngô ziu we ming-ming teh ge kông, Ngô jong-le feh nying-teh ng: ng-he tso fi-li z-kön hao li-k‛e Ngô.
21 “並非凡百稱呼我，‘主，主，’ 好走進天國；只有依我天上父親个旨意好走進。
22 到箇日有許多人會搭我講，‘主，主，我許豈不是奉爾个名頭傳道，奉爾个名頭趕出鬼，奉爾个名頭做許多奇事？’
23 我就會明明搭佢講，我從來不認得爾：爾許做非禮事幹好離開我。
> 24 “Su-i væn-pah t‛ing Ngô keh-sih shih-wa, ziu i ge tso, k‛o-pi ts‛ong-ming-keh nying ky‛i oh ze zih-deo-zông:
> 25 yü lôh-le, shü mön-zông, fong c‛ü-ku, tu djông-djôh keh oh; ge tao-feh-gao: ing-yü ziang-kyiah fông ze ngæn-zih zông.
> 26 Væn-pah t‛ing-djôh Ngô keh-sih shih-wa, feh i ge tso, k‛o-pi ih-ke nge-beng nying, ky‛i oh ze sô-t‛æn-zông:
> 27 yü lôh-le, shü mön-zông, fong c‛ü-ku, tu djông-djôh keh oh; ge ziu tao-gao: ge-keh tao-gao z li-‛e.”
24 “所以凡百聽我箇些說話，就依佢做，可比聰明个人起屋在石頭上：
25 雨落來，水滿上，風吹過，都撞着箇屋；佢倒不爻：因爲牆腳放在岩石上。
26 凡百聽着我箇些說話，不依佢做，可比一個呆笨人，豈屋在沙灘上：
27 雨落來，水滿上，風吹過，都撞着箇屋；佢就倒爻：佢个倒爻是厲害。”
> 28 Yia-su shih-wa kông wön, cong-nying tu hyi-gyi Ge-keh kao-hyüing:
> 29 ing-yü kao-hyüing ge-he ziang yiu gyün-ping, feh ziang doh-shü-nying.
28 耶穌說話講完，衆人都稀奇佢个教訓：
29 因爲教訓佢許像有權柄，不像讀書人。
===== Mt. 9. =====
第九章.
2 Kyi-toh i fong-t‛æn,
9 ao zo ze shü-kwæn-keh Mô-t‛a keng Ge,
10 teh siu-din-liang ze-nying jü-de zo-zih,
14 kông zao yün-ku Ge-keh meng-du feh kying-zih,
20 i kyüih-leo-keh bing,
23 peh Nga-lu-keh nô weh-cün-le,
27 i liang-ke hæh-ngæn,
32 i hao bi kyü vu-keh ô-lao,
36 e-lin si-zông nying.
2 基督醫風癱，
9 噢坐在稅關个馬太跟佢，
10 搭收錢糧罪人聚隊座席，
14 講倽緣故佢个門徒不禁食，
20 醫缺漏个病，
23 畀外路个囡活轉來，
27 醫兩個瞎眼，
32 醫好被鬼附个啞佬，
36 愛憐世上人。
> Yia-su lôh jün, ku-du tao Z-keh peng-zing.
耶穌落船，過渡到自个本城。
> 2 Yiu nying kông ih-ke fong-t‛æn, kw‛eng ze p‛u-pæn, tao Ge su-ze: Yia-su mông ge-he yiu siang-sing-keh sing, teh fong-t‛æn cü-ts kông, “N-ts, fông-sing; ng-keh ze sô-gao.”
> 3 Yiu kyi-ke doh-shü-nying sing-li kông, “Keh Nying kông sih-doh shih-wa.”
2 有人講一個風癱，睏在鋪板，到佢所在：耶穌望着佢許有相信个心，搭風癱主子講，“兒子，放心；爾个罪赦爻。”
3 有幾個讀書人心裏講，“箇人講褻瀆說話。”
> 4 Yia-su hyiao-teh ge-keh sing-i ziu kông, “Ng-he sing-li tsa-sang zeng ôh-i?
> 5 Wæ-z kông, Nang-ky‛i tseo,— nô ih-yiang yüong-yi?
> 6 Yin-ze peh ng-he hyiao-teh Nying-keh N-ts ze si-zông yiu sô-ze-keh gyün-ping, (ziu teh fong-t‛æn cü-ts kông,) Nang-ky‛i, do p‛u-pæn cün u-li k‛e.”
> 7 Ge ziu nang-ky‛i, cün u-li k‛e.
> 8 Cong-nying mông-djôh tu hyi-gyi, ziu kyü yüong-wa peh Zông-ti, ing-yü Ge yiu t‛ih do gyün-ping s-peh nying.
4 耶穌曉得佢个心意就講，“爾許心裏怎生存惡意？
5 還是講，玍起湊，——哪一樣容易？
6 現在畀爾許曉得人个兒子在世上有赦罪个權柄，(就搭風癱主子講，) 玍起，馱鋪板轉屋裏去。”
7 佢就玍起，轉屋裏去。
8 衆人望着都稀奇，就歸榮華畀上帝，因爲佢有剔大權柄賜畀人。
> 9 YIA-SU jong keh su-ze tseo-ku, mông-djôh ih-ke nying, ming-z Mô-t‛a, zo ze shü-kwæn: teh ge kông, “Keng Ngô le.” Ge ziu nang-ky‛i, keng Yia-su.
9 耶穌從箇所在走過，望着一個人，名字馬太，坐在稅關：搭佢講，“跟我來。” 佢就玍起，跟耶穌。
> 10 Yia-su ze ge oh-li zo-zih, yiu hyü-to siu-din-liang teh ze-nying tseo-le, teh Yia-su lin meng-du jü-de zo-zih.
> 11 Fæh-li-se nying mông-djôh, teh Ge meng-du kông, “Ng-keh Sin-sang tsa-sang teh siu-din-liang lin ze-nying jü-de ky‛üoh-væn?”
> 12 Yia-su t‛ing-djôh, teh ge kông, “Gyin-keh nying feh iao t‛a-i sin-sang, yiu bing nying iao.
> 13 ‛Ngô iao e-lin, feh iao tsi-veh,‛ [‛O. 6. 6.] keh-tsih shü tsa-sang i-s, ng-he hao k‛e ts‛eng ming-bah: ing-yü Ngô le, feh-z ao tsing-dzih nying hwe-ke, z ao ze-nying hwe-ke.”
10 耶穌在佢屋裏坐席，有許多收錢糧搭罪人走來，搭耶穌連門徒聚隊坐席。
11 法利賽人望着，搭佢門徒講，“爾个先生怎生搭收錢糧連罪人聚隊喫飯？”
12 耶穌聽着，搭佢講，“健个人不要太醫先生，有病人要。
13 ‛我要愛憐，不要祭物，‛ [‛O. 6. 6.] 箇節書怎生意思，爾許好去忖明白：因爲我來，不是噢正直人悔改，是噢罪人悔改。”
> 14 Keh z-‛eo Iah-‛ön-keh meng-du tao Yia-su su-ze le, kông, “Ngô-he teh Fæh-li-se nying zông-zông kying-zih, Ng-keh meng-du tsa-sang feh kying-zih?”
> 15 Yia-su teh ge kông, “Sing-lông teh ‛o-hyi nying jü-de, tsa-sang iao sing-t‛ong? dæn-z tsiang-le sing-lông iao li-k‛e ge-he, keh z-‛eo iao kying-zih.
> 16 M-yiu nying yüong sing pu pu gyiu i-zông; sang-teh su pu-keh sing pu pang-se gyiu i-zông, ge-keh se-k‛ong ziu kah-nga do.
> 17 Ah feh yüong gyiu bi-de din sing tsiu: sang-teh bi-de lih-k‛e, tsiu leo-gao, bi-de yi wa-gao: tsong z yüong sing bi-de din sing tsiu, liang-yiang tu pao lao.”
14 箇時候約翰个門徒到耶穌所在來，講，“我許搭法利賽人常常禁食，爾个門徒怎生不禁食？”
15 耶穌搭佢講，“新郎搭賀喜人聚隊，怎生要心痛？但是將來新郎要離開佢許，箇時候要禁食。
16 無有人用新布補舊衣裳；省得所補个新布pang-se舊衣裳，佢个碎孔就格外大。
17 也不用舊皮袋填新酒：省得皮袋裂開，酒漏爻，皮袋貤壞爻：總是用新皮袋填新酒，兩樣都保牢。”
> 18 YIA-SU teh ge-he kông keh shih-wa z-‛eo, yiu ih-ke kwön le pa Ge, kông, “Ngô-keh nô te s-gao: dæ-z Ng le yüong siu en ge, ge we weh.”
> 19 Yia-su ziu ky‛i-le, keng ge, meng-du ah jü-de k‛e.
18 耶穌搭佢許講箇說話時候，有一個管來拜佢，講，“我个囡對死爻：但是爾來用手摁佢，佢會活。”
19 耶穌就起來，跟佢，門徒也聚隊去。
> 20 Yiu ih-ke nyü-nying sang hyüih-leo bing zih-nyi nyin, ze Yia-su ‛eo-min tseo-le. Môh-djôh Ge i-zông-kying:
> 21 ing-yü ge sing-li kông, “Ngô tæn-tsih môh-djôh Ge i-zông, ziu jün-yü.”
> 22 Yia-su le-cün mông-djoh ge, kông, “Nô, ng hao fông-sing; z ng siang-sing-keh sing peh ng jün-yü.” Keh nyü-nying tông-z jün-yü.
20 有一個女人生血漏病十二年，在耶穌後面走來。摸着佢衣裳襟：
21 因爲佢心裏講，“我單只摸着佢衣裳，就痊癒。”
22 耶穌擂轉望着佢，講，“囡，爾好放心；是爾相信个心畀爾痊癒。” 箇女人當時痊癒。
> 23 Yia-su ih tao kwön-keh u-li, mông-djôh yiu c‛ü-ku-tang, wæ-yiu hyü-to nying yia-yia-sing,
> 24 ziu teh ge kông, “Tseo-k‛e ting: keh nô vong s, z kw‛eng-k‛e.” Ge-he ziu lang-siao Ge.
> 25 Cong-nying bi kön-c‛ih, Yia-su ziu tseo-tsing, ky‛in ge siu; keh nô ziu nang-ky‛i.
> 26 Keh z-kön yiang-pin keh di-fông.
23 耶穌一到管个屋裏，望着有吹鼓打，還有許多人吔吔聲，
24 就搭佢講，“走去點：箇囡朆死，是睏去。” 佢許就冷笑佢。
25 衆人被趕出，耶穌就走進，牽佢手；箇囡就玍起。
26 箇事幹揚遍箇地方。
> 27 Yia-su jong keh di-fông tseo-ku, yiu liang-ke hæh-ngæn keng Ge, ao-hyiang, kông, “Da-bih-keh ‛Eo-de, k‛o-lin ngô-he.”
> 28 Yia-su tseo-tsing oh-li, hæh-ngæn tseo tao Ge min-zin: Yia-su teh ge kông, “Keh z-kön ng-he siang-sing Ngô neng-keo tso feh?” Ge kông, “Cü, ngô-he siang-sing.”
> 29 Yia-su ziu môh-môh ge ngæn, kông, “Tsiao ng siang-sing-keh sing peh ng tso-zing.”
> 30 Ge-keh ngæn ziu mông-djôh. Yia-su coh-fu ge, kông, “Yüong liu-sing feh-k‛o peh bih-nying hyiao-teh.”
> 31 Dæn-z ge-he tseo-c‛ih peh Yia-su ming-sing djün-pin keh di-fông.
27 耶穌從箇地方走過，有兩個瞎眼跟佢，噢響，講，“大別个後代，可憐我許。”
28 耶穌走進屋裏，瞎眼走到佢面前：耶穌搭佢講，“箇事幹爾許相信我能夠做不？” 佢講，“主，我許相信。”
29 耶穌就摸摸佢眼，講，“照爾相信个心畀爾做成。”
30 佢个眼就望着。耶穌囑咐佢，講，“用留心不可畀別人曉得。”
31 但是佢許走出畀耶穌名聲傳遍箇地方。
> 32 Ge-he tseo-c‛ih z-‛eo, yiu nying ta ih-ke bi kyü vu-keh ô-lao tao Ge min-zin.
> 33 Kyü ih kön-c‛ih, ô-lao ziu kông shih-wa: cong-nying tu hyi-gyi, kông, “Ze Yi-seh-lih di-fông jong-le vong mông-djôh keh-yiang z-kön.”
> 34 Dæn-z Fæh-li-se nying kông, “Ge z k‛ao-djôh kyü-wông kön-c‛ih kyü.”
32 佢許走出時候，有人帶一個被鬼附个啞佬到佢面前。
33 鬼一趕出，啞佬就講說話：衆人都稀奇，講，“在以色列地方從來朆望着箇樣事幹。”
34 但是法利賽人講，“佢在靠着鬼王趕出鬼。”
> 35 YIA-SU tseo-pin kôh zing-li kôh hyiang-ts‛eng, ze ge-he jü-we-dông kao-hyüing, djün t‛in-koh-keh foh-ing, wæ-yiu i pah-sing-keh yiang-yiang bing-t‛ong.
> 36 Mông-djôh keh hyü-to nying, ziu fæh z-pe sing e-lin ge-he, ing-yü ge-he z kw‛eng-k‛u li-sæn, ziang m-nying kwön-keh yiang.
> 37 Ge ziu teh meng-du kông, “Nyin-zing da-joh, tso kong-nying ky‛üih.
> 38 Su-i ng-he ke gyiu siu-keh Cü-nying-kô ts‛a kong-nying siu-keh.”
35 耶穌走遍各城裏各鄉村，在佢許聚會堂教訓，傳天國个福音，還有醫百姓个樣樣病痛。
36 望着箇許多人，就發慈悲心愛憐佢許，因爲佢許是困苦離散，像無人管个羊。
37 佢就搭門徒講，“年成大熟，做工人缺。
38 所以爾許該求收割主人家差工人收割。”
===== Mt. 10. =====
第十章.
1 Kyi-toh ts‛a zih-nyi s-du c‛ih-meng djün-dao i bing,
5 feng-fu ge-he tao ‛ah-yi k‛e, tsa tso-fæh,
16 t‛ong-ts ge iao p‛ong-djôh pih-næn z-kön:
40 Kông tsih-ziu ge-he cü-ts we teh-djôh pao-ing.
1 基督差十二使徒出門傳道醫病，
5 吩咐佢許到何倚去，怎做法，
16 通知佢要碰着逼難事幹：
40 講接受佢許主子會得着報應。
> Ziu ao Ge zih-nyi meng-du le, s-peh ge gyün-ping hao kön-c‛ih we-u-keh kyü, i hao yiang-yiang bing-t‛ong.
就噢佢十二門徒來，賜畀佢權柄好趕出穢污个鬼，醫好樣樣病痛。
> 2 Keh zih-nyi s-du ming-z di-ih, Si-meng yi ts‛ing-hwu Pi-teh teh ge hyüong-di ön-teh-lih; Si-pi-t‛a-keh n-ts Ngô-kôh, teh ge hyüong-di Iah-‛ön;
> 3 Fi-lih, teh Pô-to-lo-ma; To-mô, teh siu-din-liang-keh Mô-t‛a; Ô-læh-fi-keh n-ts Ngô-kôh, teh Læh-pa, yi ts‛ing-hwu Dæh-t‛a;
> 4 Kô-nô-keh Si-meng, teh ma Yia-su Kô-liah-keh Yiu-da.
箇十二使徒名字，第一，西門貤稱呼彼得搭佢兄弟安得烈；西庇太个兒子雅各，搭佢兄弟約翰；
3 非立，搭巴多羅買；多馬，搭收錢糧个馬太；亞拉非个兒子雅各，搭拉拜，貤稱呼達太；
4 加拿个西門，搭賣耶穌加略个猶大。
> 5 Yia-su ts‛a keh zih-nyi-ke nying, feng-fu ge-he kông. “Feh-k‛o tao bih-koh-nying di-fông k‛e, feh-k‛o tseo-tsing Sæh-mô-li-ô nying-keh zing-li:”(???)
> 6 neng-ts tao Yi-seh-lih zoh-veng mi-lu-keh yiang su-ze k‛e.
> 7 Ng-he ih(原文i)-lu iao djün dao, kông, ‘T‛in-koh z gying-gao.’
> 8 Yiu bing-keh, i ge, da-mô-fong, peh ge kyih-zing; s-nying, peh ge weh-cün-le, kyü, peh ge kön-c‛ih: ng-he bah-bah teh-le, hao bah-bah peh nying.
> 9 “Ng-keh iao-yü-li feh k‛o ta kying-ts, nying-ts, dong-din;
> 10 lu-zông yüong-keh pao-voh, shông t‛ao i-zông, ‛a, en-siu-bông, tu feh iao ta; ing-yü kong-nying teh-djôh ge ky‛üoh-zih z ing-ke.
5 耶穌差箇十二个人，吩咐佢許講。“不可到別國人地方去，不可走進撒馬利亞人个城裏：”
6 甯之到以色列族份迷路个羊所在去。
7 爾許一路要傳道，講，‘天國是近爻。’
8 有病个，醫佢，大麻風，畀佢潔淨；死人，畀佢活轉來，鬼，畀佢趕出：爾許白白得來，好白白畀人。
9 “爾个腰圍裏不可帶金子，銀子，銅錢；
10 路上用个包袱，雙套衣裳，鞋，摁手棒，都不要帶；因爲工人得着佢喫食是應該。
> 11 Ng-he jü-bin tseo-tsing nô zing-li, nô hyiang-ts‛eng, iao tang-t‛ing keh su-ze nô ih-ke z hao nying; ziu djü ze ge u-li, ih-dzih tao k‛e z-‛eo.
> 12 Tseo-tsing keh-veng nying-kô, iao gyiu ge bing-ön.
> 13 Keh-veng nying-kô ziah ing-ke teh-djôh, ng-he su gyiu-keh bing-ön ziu we ling-djôh ge: ziah feh ing-ke teh-djôh, keh bing-ön ziu kyü peh ng z.
> 14 Nying ziah feh tsiao-tsih ng-he, feh t‛ing ng-keh shih-wa, tseo-c‛ih keh-veng nying-kô ‛oh-tsia keh zing-li z-‛eo, hao tæn-gao ng kyiah-zông-keh hwe-dzing.
> 15 Ngô lao-zih teh ng kông, Tao sing-p‛ön nyih-ts, Su-to-mô teh Ngô-mo-læh-keh ying-væh pi keh zing-li wæ ky‛ing.
11 爾許隨便走進哪城裏，哪鄉村，要打聽箇所在哪一個是好人；就住在佢屋裏，一直到去時候。
12 走進箇份人家，要求佢平安。
13 箇份人家若應該得着，爾許所求个平安就會臨着佢：若不應該得着，箇平安就歸畀爾自。
14 人若不招接爾許，不聽爾个說話，走出箇份人家或者箇城裏時候，好担爻爾腳上个灰塵。
15 我老實搭爾講，到審判日子，所多瑪搭雅摩拉个刑罰比箇城裏還輕。
> 16 “Ngô ts‛a ng-he k‛e, ziang yiang tseo-tsing za-lông cong-yiang: su-i ng iao ziang zô ts‛ong-ming, ziang bôh-kön lao-zih.
> 17 Ng-he iao kying-vông nying: ing-yü ge iao song ng-he tao kong-we, ze ge jü-we-dông yüong pin tang ng-he;
> 18 wæ-yiu yü Ngô-keh yün-ku ka ng-he tao tsong-toh teh wông-ti min-zin, peh ge teh bih-koh nying tso te-tsing.
> 19 Ge ka ng-he z-‛eo, feh yüong zeo zah-m shih-wa tsa kông-fæh: tao keh z-‛eo ing-ke kông shih-wa we s-peh ng.
> 20 Ing-yü ze-teh kông, feh-z ng z-kyi, z ng-he Vu-ts‛ing-keh Sing-Ling ze ng-he li-min kông.
> 21 Keh z-‛eo hyüong-di we peh hyüong-di, ah-pang we peh n-ts song kwön bæn ge s-ze: n-nô ah we dong-siu, tsông-s do-lao-nying.
> 22 Ng-he yü Ngô-keh ming-deo pih iao bi cong-nying ün-‛eng: dæn-z zing-ne tao-ti cü-ts, hao teh-djôh kyiu.
> 23 Ziah yiu nying ze keh zing-li pih-næn ng-he, hao dao tao bih zing-li: Ngô lao-zih teh ng kông, Yi-seh-lih kôh zing-li ng-he wæ-vong tseo-pin, Nying-keh N-ts ziu tao-gao.
16 “我差爾許去，像羊走進豺狼中央：所以爾要像蛇聰明，像舶鴿老實。
17 爾許要謹防人：因爲佢要送爾許到公會，在佢聚會堂用鞭打爾許；
18 還有爲我个緣故解爾許到總督搭皇帝面前，畀佢搭別國人做對證。
19 佢解爾許時候，不用愁啥某說話怎講法：到箇時候應該講說話會賜畀爾。
20 因爲在㙮講，不是爾自己，是爾許父親个聖靈在爾許裏面講。
21 箇時候兄弟會畀兄弟，阿伯會畀兒子送官辦佢死罪：兒囡也會動手，妝死大佬人。
22 爾許爲我个名頭必要被衆人怨恨：但是忍耐到底主子，好得着救。
23 若有人在箇城裏逼難爾許，好逃到別城裏：我老實搭爾講，以色列各城裏爾許還朆走遍，人个兒子就到爻。
> 24 “‛ôh-sang feh neng do-jü sin-sang, nu-boh feh neng do-jü cü-nying-kô.
> 25 ‛ôh-sang ziang sin-sang, nu-boh ziang cü-nying-kô, ziu keo-gao. Nying zông-ts‛ia kông Cü-nying-kô z Bih-si-poh, ‛o-hyüông Ge kô-li nying!
> 26 Su-i feh yüong p‛ô ge-he: ing-yü m-yiu ön-zông z-kön feh lu-c‛ih-le; m-yiu s-‛ô z-kön feh peh bih-nying hyiao-teh.
> 27 Ngô ze ön-cong su-ze teh ng kông, ng-he ze ming-liang di-fông hao kông-c‛ih: ng-he ng-tô-li su t‛ing-djôh, ze oh-zông hao djün-yiang.
> 28 Sæh sing-t‛i feh neng sæh ling-weng cü-ts feh yüong p‛ô ge; neng-keo mih-gao ling-weng lin sing-t‛i ze di-nyüoh Cü-ts, neng-ts p‛ô Ge.
> 29 Liang-tsih tsiang ky‛i feh-z ih-feng nying-ts hao ma? Ziah feh-z ng Vu-ts‛ing-keh ing-hyü, lin ih-tsih tu fe tih-lôh di:
> 30 ziu-z ng-he-keh deo-fæh tu su-ku.
> 31 Su-i feh yüong p‛ô; ng-he z pi hyü-to tsiang wæ kyü-djong.
> 32 Væn-pah ze nying min-zin tsiao-nying Ngô cü-ts, ze Ngô t‛in-zông Vu-ts‛ing min-zin Ngô ah we tsiao-nying ge.
> 33 Ze nying min-zin feh tsiao-nying Ngô cü-ts, ze Ngô t‛in-zông Vu-ts‛ing min-zin Ngô ah feh tsiao-nying ge.
24 “學生不能大如先生，奴僕不能大如主人家。
25 學生像先生，奴僕像主人家，就夠爻。人尚且講主人家是別西卜，何況佢家裏人！
26 所以不用怕佢許：因爲無有暗藏事幹不露出來；無有私下事幹不畀別人曉得。
27 我在暗中所在搭爾講，爾許在明亮地方好講出：爾許耳朵裏所聽着，在屋上好傳揚。
28 殺身體不能殺靈魂主子不用怕佢；能夠滅爻靈魂連身體在地獄主子，甯之怕佢。
29 兩隻雀豈不是一分銀子好賣？若不是爾父親个應許，連一隻都𣍐跌落地：
30 就是爾許个頭髮都數過。
31 所以不用怕；爾許是比許多雀還貴重。
32 凡百在人面前招認我主子，在我天上父親面前我也會招認佢。
33 在人面前不招認我主子，在我天上父親面前我也不招認佢。
> 34 “Ng-he feh iao ts‛eng Ngô le peh t‛in-‛ô t‛a-bing; Ngô le, feh-z peh ge t‛a-bing, z peh ge dong tao-ping.
> 35 Ing-yü Ngô le z peh n-ts teh ah-pang, nô teh nyiang, sing-vu teh kô-nyiang, tu we z wa z:
> 36 nying-keh dziu-dih, ziu-z z-kyi kô-li nying.
> 37 E-kying vu-meo ku-yü e-kying Ngô, feh siang-p‛e tso Ngô meng-du; e-sih n-nô ku-yü e-kying Ngô, feh siang-p‛e tso Ngô meng-du.
> 38 Feh gwæn zih-z-kô keng ngô cü-ts, yi feh siang-p‛e tso Ngô meng-du.
> 39 Teh-djôh sing-ming cü-ts, we sông ge; yü Ngô sông sing-ming cü-ts, we te-djôh ge.
34 “爾許不要忖我來畀天下太平；我來，不是畀佢太平，在畀佢動刀兵。
35 因爲我來是畀兒子搭阿伯，囡搭孃，新婦搭家孃，都會自壞自：
36 人个讎敵，就是自己家裏人。
37 愛敬父母過於愛敬我，不相配做我門徒；愛惜兒囡過於愛敬我，不相配做我門徒。
38 不擐十字架跟我主子，貤不相配做我門徒。
39 得着性命主子，會喪佢；爲我喪性命主子，會得着佢。
> 40 “Væn-pah tsiao-tsih ng-he ziu-z tsiao-tsih Ngô, tsiao-tsih Ngô ziu-z tsiao-tsih ts‛a Ngô le Cü-ts.
> 41 Ziah yiu nying tsiao-tsih sin-ts-nying, yü ge z sin-ts-nying, we teh-djôh sin-ts-nying-keh pao-ing; ziah yiu nying tsiao-tsih tsing-dzih nying, yü ge z tsing-dzih nying ge we teh-djôh tsing-dzih nying-keh pao-ing.
> 42 Ziah yiu nying do ih-tsæn lang-shü peh ih-ke siao-nying ky‛üoh, yü ge z meng-du, Ngô lao-zih teh ng kông, Ge tsong fe sih-gao pao-ing.”
40 “凡百招接爾許就是招接我，招接我就是招接差我來主子。
41 若有人招接先知人，爲佢是先知人，會得着先知人个報應；若有人招接正直人，爲佢是正直人佢會得着正直个報應。
42 若有人馱一盞冷水畀一個小人喫，爲佢是門徒，我老實搭爾講，佢總𣍐失爻報應。”
===== Mt. 13. =====
第十三章.
3 Tsæh cong-keh pi-fông:
18 ka-shih keh pi-fông.
24 Ba-ts‛ao-keh pi-fông,
31 ka-ts‛e-ts,
33 kao-shü pi-fông,
44 k‛ông-kæn-keh pao-pe,
45 zing tsing-cü,
47 he-li hwæh mông;
53 Kyi-toh Z-kô-nying feh siang-sing Ge.
3 撒種个比方
18 解說个比方。
24 稗草个比方，
31 芥菜籽，33 酵水比方，
44 囥吤个比方，
45 尋珍珠，
47 海裏豁網；
53 基督自家人不相信佢。
> KEH nyih Yia-su jong u-li tseo-c‛ih, zo ze he-pin.
2 Yiu hyü-to nying jü-zih ze Ge min-zin, Ge ziu lôh jün zo-kæn: cong-nying tu gyi ze ‛ön-zông.
箇日耶穌從屋裏走出，坐在海邊。
2 有許多人聚集在佢面前，佢就落船坐吤：衆人都徛在岸上。
> 3 Yia-su ziu yüong pi-fông shih-wa teh ge-he kông hyü-to z-kön, ziu kông, “Yiu ih-ke tsæh cong-keh tseo-c‛ih tsæh cong;
> 4 ge tsæh-k‛e z-‛eo, yiu-sih tih-lôh lu-pin, tiao ziu fi-le ky‛üoh-gao:
> 5 yiu-sih tih-lôh yiu zih-deo su-ze, t‛u feh to: yü t‛u feh sing, jü-tsih ts‛iu-c‛ih;
> 6 nyih-deo c‛ih-le, sô-pih, ing-yü m-yiu keng-deo ziu k‛u-gao.
> 7 Yiu-sih tih-lôh ts‛-bang cong-yiang; ts‛ dziang-ky‛i peh ge tsô-lao:
> 8 yiu-sih tih-lôh hao t‛u-li, ziu kyih-zih, yiu-sih kyih ih-pah be, yiu-sih loh-zih be, yiu-sih sæn-zih be.
> 9 Yiu ng-tô we t‛ing cü-ts ing-ke t‛ing.”
耶穌就用比方說話搭佢許講許多事幹，就講，“有一個撒種个走出撒種；
4 佢撒去時候，有些跌落路邊，鳥就飛來喫爻：
5 有些跌落有石頭所在，土不多：爲土不深，隨即抽出；
6 日頭出來，曬癟，因爲無有根頭就枯爻。
7 有些跌落刺棚中央；刺長起畀佢遮牢：
8 有些跌落好土裏，就結實，有些結一百倍，有些六十倍，有些三十倍。
9 有耳朵會聽主子應該聽。”
> 10 Meng-du tseo-le, teh Ge kông, “Ng tsa-sang yüong pi-fông shih-wa teh ge-he kông?”
> 11 Yia-su we-teh ge kông, “Ing-yü t‛in-koh ao-miao z-kön z peh ng-he hyiao-teh, feh peh ge-he hyiao-teh.
> 12 Væn-pah yiu-keh, wæ iao kô-ts‛eo peh ge, peh ge yiu-yü: væn-pah m-yiu-keh, lin ge su yiu ah iao deh-k‛e.
> 13 Su-i Ngô yüong pi-fông shih-wa teh ge-he kông; ing-yü ge mông yi mông-feh-djôh, t‛ing yi t‛ing-feh-tsing, yi feh ming-bah.
> 14 Yi-se-ô zin-deo su kông shih-wa ing-djôh ge-he, ziu-z, ‛Ng-he t‛ing we t‛ing-djôh, tsih-z feh hyiao-teh; mông we mông-djôh, tsih-z feh ming-bah.
> 15 Ing-yü keh pah-sing sing-dziang z ngang, ge ng-tô læn-teh t‛ing, ge ngæn pi-lao; sang-teh ngæn mông-djôh, ng-tô t‛ing-djôh, sing-li ming-bah, ziu hwe-ke, Ngô i ge hao.‛ [Y. 6. 9, 10.]
> 16 Dæn-z ng-he-keh ngæn yiu foh, ing-yü z mông-djôh; ng-he-keh ng-tô yiu foh, ing-yü z t‛ing-djôh.
> 17 Ngô lao-zih teh ng kông, Yiu hyü-to sin-ts-nying teh tsing-dzih nying siang mông ng-he su mông-djôh, vong mông-djôh-ku; siang t‛ing ng-he su t‛ing-djôh, vong t‛ing-djôh-ku.
10 門徒走來，搭佢講，“爾怎生用比方說話搭佢許講？”
11 耶穌回答佢講，“因爲天國奧妙事幹是畀爾許曉得，不畀佢許曉得。
12 凡百有个，還要加湊畀佢，畀佢有餘：凡百無有个，連佢所有也要奪去。
13 所以我用比方說話搭佢許講；因爲佢望也望不着，聽也聽不進，也不明白。
14 以賽亞前頭所講說話應着佢許，就是，‛爾許聽會聽着，只是不曉得；望會望着，只是不明白。
15 因爲箇百姓心腸是硬，佢耳朵懶得聽，佢眼閉牢；省得眼望着，耳朵聽着，心裏明白，就悔改，我醫佢好。‛ [Y. 6. 9, 10.]
16 但是爾許个眼有福，因爲是望着，爾許个耳朵有福，因爲是聽着。
17 我老實搭爾講，有許多先知人搭正直人想望爾許所望着，朆望着過；想聽爾許所聽着，朆聽着過。
> 18 “Su-i tsæh cong-keh pi-fông ng-he ing-ke t‛ing.
> 19 Væn-pah t‛ing-djôh t‛in-koh-keh dao-li feh ming-bah, keh hyüong-ôh cü-ts ziu le, bæh-gao ge sing-li su tsæh-keh cong. Keh ziu-z tsæh ze lu-pin-keh.
> 20 Tsæh ze yiu zih-deo su-ze, ziu-z t‛ing-djôh keh dao-li, jü-tsih hwön-hyi tsih-ziu;
> 21 dæn-z sing-li m keng, tsih-z dzæn-z; yü keh dao-li p‛ong-djôh we-ky‛üoh pih-næn z-kön, jü-tsih pæn-tih.
> 22 Tsæh ze ts‛-bang cong-yiang, ziu-z t‛ing-djôh keh dao-li cü-ts; ge kying-si-keh iu-zeo, teh ze-veh-keh hong-p‛in, tsô-lao keh dao-li, ziu m dao-dzing.
> 23 Tsæh ze hao t‛u-keh, ziu-z t‛ing-djôh keh dao-li yi ming-bah cü-ts; ge kyih-zih, yiu-sih kyih ih-pah be, yiu-sih loh-zih be, yiu-sih sæn-zih be.”
18 “所以撒種个比方爾許應該聽。
19 凡百聽着天國个道理不明白，箇兇惡主子就來，拔爻佢心裏所撒个種。箇就是撒在路邊个。
20 撒在有石頭所在，就是聽着个道理，隨即歡喜接受；
21 但是心裏無根，只是暫時；爲箇道理碰着委屈逼難事幹，隨即扳跌。
22 撒在刺棚中央，就是聽着箇道理主子；佢今世个憂愁，搭財物个哄騙，遮牢箇道理，就無道程。
23 撒在好土个，就是聽着箇道理貤明白主子；佢結實，有些結一百倍，有些六十倍，有些三十倍。”
> 24 Yia-su tse yüong pi-fông teh ge-he, kông, “T‛in-koh k‛o-pi ih-ke nying tsæh hao cong ze ge din:
> 25 nying kw‛eng z-‛eo, ün-kô le tsæh ba-ts‛ao ze mah cong-yiang, ziu k‛e-gao.
> 26 Teng-tao ts‛iu-miao c‛ih-deo z-‛eo, ba-ts‛ao ah yin-c‛ih.
> 27 Cü-nying-kô-keh nu-boh tseo-le kông, ‘Cü, Ng ky‛i feh-z tsæh hao cong ze ng-keh din? jong ‛ah-yi yiu ba-ts‛ao?’
> 28 Cü-nying-kô teh ge kông, ‘Keh z ün-kô tso.’ Nu-boh kông, ‘Ng iao ngô-he k‛e siu-zih ge feh?’
> 29 Ge kông, ‘Feh yüong; sang-teh ng-he siu-zih ba-ts‛ao, lin mah ah iao bæh-gao.
> 30 Keh liang-yiang tu peh ge jü-de do-ky‛i tao siu-keh. Siu-keh z-‛eo ngô we teh siu-keh cü-ts kông, Ng-he sin siu-zih ba-ts‛ao, pô-tang-pô kyi-ky‛i siao-gao: dæn-z mah siu-tsing ngô ts‛ông-li.’ ”
24 耶穌再用比方搭佢許，講，“天國可比一個人撒好種在佢田：
25 人睏時候，冤家來撒稗草在麥中央，就去爻。
26 等到抽苗出頭時候，稗草也現出。
27 主人家个奴僕走來講，‘主，爾豈不是撒好種在爾个田？從何倚有稗草？’
28 主人家搭佢講，‘箇是冤家做。’ 奴僕講，‘爾要我許去收拾佢不？’
29 佢講，‘不用；省得爾許收拾稗草，連麥也要拔爻。
30 箇兩樣都畀佢聚隊大起到收割。收割時候我會搭收割主子講，爾許先收拾稗草，把打把繫起燒爻：但是麥收拾我倉裏。’ ”
> 31 Tse yüong ih-ke pi-fông teh ge-he kông, “T‛in-koh k‛o-pi ih-leh ka-ts‛e-ts, yiu nying do-le cong ze din:
> 32 cong-ts li-min z ge ting si; do-ky‛i, kôh-yiang ts‛e z ge ting do, ziang ih-cü jü, hao peh k‛ong-cong-keh tiao djü ze ge ts-hong.”
31 再用一個比方搭佢許講，“天國可比一粒芥菜籽，有人馱來種在田：
32 種子裏面是佢頂細；大起，各樣菜是佢頂大，像一株樹，好畀空中个鳥住在佢枝蕻。”
> 33 Yi teh ge-he kông ih-ke pi-fông, “T‛in-koh k‛o-pi kao-shü, nyü-nying do-le k‛ông ze sæn-teo mah-feng cong-yiang, teng-tao tu fæh-kao.”
33 貤搭佢許講一個比方，“天國可比酵水，女人馱來囥在三斗麥粉中央，等到都發酵。”
> 34 Keh ih-ts‛ih z-kön Yia-su teh cong-nying kông tu z yüong pi-fông shih-wa; feh-z pi-fông feh teh ge kông:
> 35 hao peh sin-ts-nying kông-ku shih-wa yiu ing-nyin, ziu-z kông, “Ngô we k‛e-k‛eo yüong pi-fông shih-wa; Ngô we kông-ming jong zao t‛in-di yi-le su ing-zông z-kön.” [S. 78. 2.]
34 箇一切事幹耶穌搭衆人講都是用比方說話；不是比方不搭佢講：
35 好畀先知人講過說話有應驗，就是講，“我會開口用比方說話；我會講明從造天地以來所隱藏事幹。” [S. 78. 2.]
> 36 Yia-su ziu sæn-k‛e cong-nying, tseo-tsing oh-li: Ge meng-du tseo-le, kông, “Keh din-li ba-ts‛ao-keh pi-fông ts‛ing Ng ka-shih peh ngô-he.”
> 37 Yia-su we-teh ge-he kông, “Tsæh hao cong-keh ziu-z Nying-keh N-ts;
> 38 din ziu-z si-kæn-zông; hao cong, z t‛in-koh-keh n-ts; ba-ts‛ao z keh hyüong-ôh cü-ts-keh n-ts;
> 39 tsæh ba-ts‛ao-keh ün-kô ziu-z mo-kyü: siu-keh z-‛eo, ziu-z z-si-meh-nyih; siu-keh cü-ts, ziu-z t‛in-s.
> 40 Ziang siu-zih ba-ts‛ao tön ze ho-li siao-gao, z-si meh-nyih ah-z keh-t‛ih.
> 41 Nying-keh N-ts we ts‛a Ge-keh t‛in-s, jong Ge koh li-min k‛e siu-zih væn-pah peh nying pæn-tih teh tsôh-ôh cü-ts,
> 42 tön ge-he ze ho-lu: ze-kæn yiu ngao-ngô ts‛ih-ts‛ k‛oh-hyiang.
> 43 Keh z-‛eo tsing-dzih nying ze ge-he Vu-ts‛ing koh li-min we ziang nyih-deo kwông-liang. Yiu ng-tô we t‛ing cü-ts, ing-ke t‛ing.
36 耶穌就散去衆人，走進屋裏：佢門徒走來，講，“箇田裏稗草个比方請爾解說畀我許。”
37 耶穌回答佢許講，“撒好種个就是人个兒子；
38 田就是世間上；好種，是天國个兒子，稗草是箇兇惡主子个兒子；
39 撒稗草个冤家就是魔鬼：收割个時候，就是時世末日；收割主子，就是天使。
40 像收拾稗草斷在火裏燒爻，時世末日也是箇剔。
41 人个兒子會差佢个天使，從佢國裏面去收拾凡百畀人扳跌搭作惡主子，
42 斷佢許在火爐：在吤有咬牙切齒哭響。
43 箇時候正直人在佢許父親國裏面會像日頭光亮。有耳朵會聽主子，應該聽。”
> 44 “T‛in-koh yi k‛o-pi pao-pe k‛ông ze din-li; ih-ke nying p‛ong-djôh ziu ke-lao; ing-yü hwön-hyi ziu cün-k‛e ma ge su yiu, k‛e ma keh-ky‛iu din.
44 “天國貤可比寶貝囥在田裏；一個人碰着就蓋牢；因爲歡喜就轉去賣佢所有，去買箇丘田。
> 45 “T‛in-koh yi k‛o-pi ih-ke k‛ah-siang ze-teh zing hao-keh tsing-cü:
> 46 zing-djôh ih-leh ting pao-pe-keh, ziu cün-k‛e ma su yiu, k‛e ma keh-leh tsing-cü.
45 “天國貤可比一個客商在㙮尋好个珍珠：
46 尋着一粒頂寶貝个，就轉去賣所有，去買箇粒珍珠。
> 47 “T‛in-koh yi k‛o-pi ih-ting mông, hwæh ze he-li teo-tsing pah-yiang ng:
> 48 yi-kying mön-gao, ziu t‛a-zông-‛on zo-lôh, hao-keh kæn-tsing dong-li, feh hao tön-gao.
> 49 Z-si meh-nyih ah z-t‛ih: t‛in-s we c‛ih-le, jong tsing-dzih nying cong-yiang feng-c‛ih ôh-nying,
> 50 tön ge-he ze ho-lu: ze-kæn yiu ngao-ngô ts‛ih-ts‛ k‛oh-hyiang.”
47 “天國貤可比一頂網，豁在海裏兜進百樣魚：
48 已經滿爻，就拖上岸坐落，好个揀進桶裏，不好斷爻。
49 時世末日也是剔：天使會出來，從正直人中央分出惡人，斷佢在火爐，在吤有咬牙切齒哭響。”
> 51 Yia-su teh ge-he kông, “Keh shih-wa ng-he ming-bah feh?” Ge-he kông, “Cü, ming-bah.”
> 52 Yia-su teh ge-he kông, “Su-i væn-pah doh-shü-nying tso t‛in-koh-keh meng-du k‛o-pi ih-ke cü-nying-kô, jong ge ts‛ông-k‛u li-min sing meh-z gyiu meh-z tu do-c‛ih.”
51 耶穌搭佢許講，“箇說話爾許明白不？” 佢許講，“主，明白。”
52 耶穌搭佢許講，“所以凡百讀書人做天國个門徒可比一個主人家，從佢倉庫裏面新物事舊物事都馱出。”
> 53 YIA-SU kông-wön keh-sih pi-fông shih-wa, ziu li-k‛e keh su-ze.
> 54 Tseo-tao Z-keh peng di-fông ze ge-he jü-we-dông kao-hyüing; ge tu hyi-gyi, kông, “Keh Nying jong ‛ah-yi teh-djôh keh ts‛ong-ming teh neng-kön?”
> 55 Ge ky‛i feh-z keh moh-ziang lao-s-keh N-ts? Ge nyiang ky‛i feh-z ming-z Mô-li-ô? Ge hyüong-di ky‛i feh-z Ngô-kôh, Iah-si, Si-meng, Yiu-da?
> 56 Ge ts-me, ky‛i feh-z teh ngô-he tso di-fông djü? Su-i, Ge jong ‛ah-yi teh-djôh keh z-kön?”
> 57 Ge-he ziu yü Ge pæn-tih. Yia-su teh ge-he kông, “Sin-ts-nying ziah feh-z ze ge-z di-fông, z u-li, m-yiu feh tseng-kying.”
> 58 Ing-yü ge-he feh siang-sing, Ge ze keh su-ze feh tso to-siao gyi-z.
53 耶穌講完箇些比方說話，就離開箇所在。
54 走到自个本地方在佢許聚會堂教訓；佢都稀奇，講，“箇人從何倚得着箇聰明搭能幹？
55 佢豈不是箇木匠老司个兒子？佢孃豈不是名字馬利亞？佢兄弟豈不是雅各，約西，西門，猶大？佢姊妹，豈不是搭我許做地方住？所以，佢從何倚得着箇事幹？”
57 佢許就爲佢扳跌。耶穌搭佢許講，“先知人若不是在佢自地方，自屋裏，無有不尊敬。”
58 因爲佢許不相信，佢在箇所在不做多少奇事。
===== Mt. 18. =====
第十八章.
1 Kyi-toh ky‛ün Ge meng-du ti-sing siao-i tso nying;
7 ky‛ün ge-he liu-sing peh nying pæh-tih z-kön, feh iao k‛ön-ky‛ing siao meng-du;
15 t‛ong-ts ge-he, hyüong-di ziah-z teh-ze ge ing-ke tsa-sang de ge;
21 kyi-t‛ao hao sô-min ge;
23 yüong ih-ke wông-ti teh ge siu-‛ô nying sön-tsiang-keh pi-fông kao-hyüing ge,
32 bæn feh e-lin ge dong-de nu-boh cü-ts.
1 基督勸佢門徒低聲小意做人；
7 勸佢許留心畀人扳跌事幹，不要看輕小門徒；
15 通知佢許，兄弟若是得罪佢應該怎生待佢；
21 幾套好赦免佢；
23 用一個皇帝搭佢手下人算賬个比方教訓佢，
32 辦不愛憐佢同隊奴僕主子。
> KEH z-‛eo meng-du tseo tao Yia-su sing-pin, kông, “Ze t‛in-koh z nô-ih-ke do?”
> 2 Yia-su ziu ao ih-ke siao-nying le, peh ge gyi ze cong-yiang, kông,
> 3 “Ngô lao-zih teh ng kông, Ng-he ziah feh ke-wön sing-kah ziang siao-nying, tön feh neng tseo-tsing t‛in-koh.
> 4 Su-i væn-pah ti-sing-siao-i ziang keh siao-nying, ze t‛in-koh sön ge ting do.
> 5 Ziah yiu nying yü Ngô-keh ming-deo tsiao-tsih t‛ih-yiang-ts ih-ke siao-nying, ziu-z tsiao-tsih Ngô:
> 6 ziah yiu nying peh ih-ke siang-sing Ngô-keh siao meng-du pæn-tih, neng-ts yüong ih-bæn do-mo kwa ze ge deo-kying, dzing ze sing-he.
箇時候門徒走到耶穌身邊，講，“在天國是哪一個大？”
2 耶穌就噢一個小人來，畀佢徛在中央，講，
3 “我老實搭爾講，爾許若不改回性格像小人，斷不能走進天國。
4 所以凡百低聲小意像箇小人，在天國算佢頂大。
5 若有人爲我个名頭招接剔樣子一個小人，就是招接我：
6 若有人畀一個相信我个小門徒扳跌，甯之用一爿大磨掛在佢頭頸，沉在深海。
> 7 “Yü peh nying pæn-tih si-zông yiu ‛o! peh nying pæn-tih z-kön pih iao le; dæn-z tso-c‛ih keh z-kön cü-ts yiu ‛o!
> 8 Ziah-z ng ih-tsih siu ‛oh-tsia ih-tsih kyiah, peh ng pæn-tih, hao tsôh-Iôh tön-gao: ng neng-ts pa-kyiah zæn-zih tseo-tsing weh-ming, feh iao liang-tsih siu liang-tsih kyiah tön-lôh üong-yün ho-li.
> 9 Ziah-z ng ih-tsih ngæn peh ng pæn-tih, hao leo-c‛ih, tön-gao: ng neng-ts doh-tsih ngæn tseo-tsing weh-ming, feh iao liang-tsih ngæn tön-lôh di-nyüoh-keh ho-li.
7 “爲畀人扳跌世上有禍！畀人扳跌事幹必要來；但是做出箇事幹主子有禍！
8 若是爾一隻手或者一隻腳，畀爾扳跌，好斫落斷爻：爾甯之跛腳殘疾走進活命，不要兩隻手兩隻腳斷落永遠火裏。
9 若是爾一隻眼畀爾扳跌，好摟出，斷爻：爾甯之獨隻眼走進活命，不要兩隻眼斷落地獄个火裏。
> 10 “Ng-he yüong liu-sing, keh-sih siao meng-du cong-yiang ih-ke feh-k‛o k‛ön-ky‛ing ge; Ngô teh ng kông, ge-he-keh t‛in-s ze t‛in-zông dziang-dziang mông-djôh Ngô t‛in-zông Vu-ts‛ing-keh min.
> 11 Ing-yü Nying-keh N-ts z dih-di le kyiu sih-sæn-keh nying.
> 12 Ng-he i-s tsa-sang? Ih-ke nying yiu ih-pah-tsih yiang, ziah yiu ih-tsih mi-lu, ge ky‛i feh-z gwæn-gao keh kyiu-zih kyiu tsih, tao sæn-li k‛e zing keh-tsih mi-lu-keh?
> 13 Ziah-z zing-djôh, Ngô lao-zih teh ng kông, ge yü keh ih-tsih pi kyiu-zih kyiu tsih vong mi-lu-keh kah-nga hwön-hyi.
> 14 Ng-he T‛in-Vu-keh ts-i ah z-t‛ih; keh-sih siao meng-du lin ih-ke tu feh iao peh ge sih-gao.
10 “爾許用留心，箇些小門徒中央一個不可看輕佢；我搭爾講，佢許个天使在天上長長望着我天上父親个面。
11 因爲人个兒子特地來救失散个人。
12 爾許意思怎生？一個人有一百隻羊，若有一隻迷路，佢豈不是摜爻箇九十九隻，到山裏去尋箇隻迷路个？
13 若是尋着，我老實搭爾講，佢爲箇一隻比九十九隻朆迷路个格外歡喜。
14 爾許天父个旨意也是剔；箇些小門徒連一個都不要畀佢失爻。
> 15 “Ng-keh hyüong-di ziah yiu teh-ze ng, hao k‛e, tæn-tsih ng-z teh ge jü-de z-‛eo t‛ong-ts ge: ziah-z t‛ing ng, ng ziu teh-djôh ng-keh hyüong-di.
> 16 Ziah-z feh t‛ing, lin z-kyi tse kô ih-liang-ke nying, yiu liang-sæn-ke nying tso kyin-tsing, kyü-kyü shih-wa hao k‛ao-zih.
> 17 Ziah-z feh t‛ing ge-he, hao t‛ong-ts kong-we: ziah-z feh t‛ing kong-we, ng hao sön ge ziang bih-koh-nying teh siu-din-liang nying.
> 18 Ngô lao-zih teh ng kông, Væn-pah ze di z ng-he su kw‛eng-lao ze t‛in-zông ah we kw‛eng-lao; væn-pah ze di z ng su sih-fông ze t‛in-zông ah we sih-fông.
> 19 Ngô tse teh ng kông, Ng-he cong-yiang ziah yiu liang-ke nying ze di dong-sing-‛eh-i iao gyiu jü-bin zah-m z-kön, Ngô t‛in-zông Vu-ts‛ing pih-ding peh ge-he tso-zing.
> 20 Ing-yü feh-leng nô su-ze ziah yiu liang-sæn-ke nying yü Ngô-keh ming-deo jü-zih, Ngô ah ze ge cong-yiang.”
15 “爾个兄弟若有得罪爾，好去，單只爾自搭佢聚隊時候通知佢：若是聽爾，爾就得着爾个兄弟。
16 若是不聽，連自己再加一兩個人，有兩三個人人做見證，句句說話好靠實。
17 若是不聽佢許，好通知公會：若是不聽公會，爾好算佢像別國人搭收錢糧人
18 我老實搭爾講，凡百在地是爾許所綑牢在天上也會綑牢；凡百在地是爾所釋放在天上也會釋放。
19 我再搭爾講，爾許中央若有兩個人在地同心合意要求全備啥某事幹，我天上父親必定畀佢許做成。
20 因爲不論哪所在若有兩三個人爲我个名頭聚集，我也在佢中央。”
> 21 Keh z-‛eo Pi-teh tseo-le teh Ge kông, “Cü, hyüong-di teh-ze ngô, kyi t‛ao hao sô-min ge? tao ts‛ih-t‛ao k‛o-i feh?”
> 22 Yia-su teh ge kông, “Ngô kông feh-z Ts‛ih-t‛ao; z Ts‛ih-zih-ke ts‛ih-t‛ao.
> 23 Su-i t‛in-koh k‛o-pi ih-ke wông-ti, iao teh ge nu-boh sön-tsiang.
> 24 Ge sön z-‛eo, yiu ih-ke nying ta-le, z ky‛in wông-ti ts‛in-væn-liang nying-ts.
> 25 Yü ge m-kao hao wæn, cü-nying-kô feng-fu peh ge nying, lin ts‛i-ts n-nô teh væn-pah su-yiu, tu ma-gao, wæ tsa.
> 26 Keh nu-boh ziu p‛oh-lôh pa ge, kông, ‘Cü, kw‛ön-‛æn ngô, ngô ih-ts‛ih we wæn ng.’
> 27 Keh nu-boh-keh cü, fæh z-pe-sing fông ge c‛ih, wæ-yiu sô-wön ge tsa.
> 28 Dæn-z keh nu-boh ih tseo-c‛ih, p‛ong-djôh ih-ke dong-de nu-boh, z ky‛in ge zih-liang nying-ts: ziu bæh ge, ts‛ô ge ‛eo-long, kông, ‘Ng ky‛in ngô-keh hao wæn ngô.’
> 29 Ge-keh dong-de nu-boh ziu p‛oh-tao ge kyiah-‛ô, gyiu ge, kông, ‘Kw‛ön-‛æn ngô, ngô ih-ts‛ih we wæn ng.’
> 30 Ge feh k‛eng: ziu k‛e peh ge lôh kæn-lao, teng tao tsa wæn wön.
> 31 Yü-ts dong-de nu-boh mông-djôh keh-ky‛i z-kön, ting iu-zeo, keh z-kön ziu t‛ong-ts ge cü-nying-kô.
> 32 Nu-boh-keh cü ziu ao ge le, teh ge kông, ‘(???)ôh nu-boh, Ng-keh tsa, kyi-zin gyiu ngô, ngô ih-ts‛ih sô ng gao:
> 33 ng ky‛i feh ing-ke e-lin ng-keh dong-de nu-boh, ziang ngô e-lin ng?’
> 34 Ge-keh cü fæh-nu, peh ge nying kao-de lao-deo, teng-tao ky‛in ge-keh tsa tu wæn wön.
> 35 Ziah-z ng-he kôh-nying sing-li feh k‛eng sô-min hyüong-di-keh dzæn-c‛ü, Ngô t‛in-zông Vu-ts‛ing ah we z-t‛ih de ng-he.”
21 箇時候彼得走來搭佢講，“主，兄弟得罪我，幾套好赦免佢？到七套可以不？”
22 耶穌搭佢講，“我講不是七套；是七十个七套。
23 所以天國可比一個皇帝，要搭佢奴僕算賬。
24 佢算時候，有一個人帶來，是欠皇帝千萬兩銀子。
25 爲佢無較好還，主人家吩咐畀佢人，連妻子兒囡搭凡百所有，都賣爻，還債。
26 箇奴僕覆落拜佢，講，‘主，寬限我，我一切會還爾。’
27 箇奴僕个主，發慈悲心放佢出，還有赦完佢債。
28 但是箇奴僕一走出，碰着一個同隊奴僕，是欠佢十兩銀子：就拔佢，叉佢喉嚨，講，‘爾欠我个好還我。’
29 佢个同隊奴僕就覆到佢腳下，求佢，講，‘寬限我，我一切會還爾。’
30 佢不肯：就去畀佢落監牢，等到債還完。
31 爲之同隊奴僕望着箇起事幹，頂憂愁，箇事幹就通知佢主人家。
32 奴僕个主就噢佢來，搭佢講，‘惡奴僕，爾个債，既然求我，我一切赦爾爻
33 爾豈不應該愛憐尼爾个同隊奴僕，像我愛憐爾？’
34 佢个主發怒，畀佢人交代牢頭，等到欠佢个債都還完。35 若是爾許各人心裏不肯赦免兄弟个賺處，我天上父親也會是剔待爾許。”