====== S-DU NGÔ-KÔH-KEH SHÜ-SING. ======
使徒雅各个書信
===== Nk. 1. =====
第一章.
1 Tsao-djôh s-lin ing-ke kao-hying,
5 ing-ke tsa-sang gyiu Zông-ti,
13 bi yiu-‛oh cü-ts m-c‛ü kông z bi Zông-ti yiu-‛oh,
19 iao liu-sing t‛ing, s-ts‛eng, i-jing tsing dao-li.
26 Lao-zih gyin-zing-keh væn-ts.
1 遭着 試煉 應該 高興，
5 應該 怎生 求 上帝，
13 被 誘惑 主子 無處 講 是 被 上帝 誘惑，
19 要 留心 聽，思忖，依順 真 道理。
26 老實 虔誠个 範子。
> ZÔNG-TI teh Cü Yia-su Kyi-toh-keh nu-boh, Ngô-kôh, sia sing peh sæn-k‛e zih-nyi ts-p‛a, ts‛ing ön.
上帝 搭 主 耶穌 基督个 奴僕，雅各，寫 信 畀 散開 十二 支派，請 安。
> 2 Ngô-keh hyüong-di, ng-he tsao-djôh kôh-yiang s-lin-keh næn-deo, ing-ke kao-hying;
> 3 ing-yü hyiao-teh keh s-s ng-he siang-sing-keh s-fæh we sang-c‛ih zing-ne.
> 4 Tsih iao keh zing-ne tso zing-kong, peh ng-he tso nying jün-bi zih-coh, ih-ting feh ky‛üih.
2 我个 兄弟，爾許 遭着 各樣 試煉个 難頭，應該 高興；
3 因爲 曉得 箇 試試 爾許 相信个 試法 會 生出 忍耐。
4 只 要 箇 忍耐 做 成功，畀 爾許 做 人 全備 十足，一點 不 缺。
> 5 Ng-he cong-yiang ziah yiu nying ky‛in ts‛ong-ming ing-ke gyiu Zông-ti, ziu we teh-djôh: Zông-ti z ‛eo-‛eo s-peh cong-nying, fe p‛i-bing ge.
> 6 Tsih-z gyiu z-‛eo, iao yüong siang-sing-keh sing, hyiao nyi-‛oh: ing-yü nyi-‛oh cü-ts z ziang he-li-keh lông, bi fong c‛ü-dong, dông-le-dông-k‛e.
> 7 Keh-yiang-ts nying feh yüong siang jong Cü teh-djôh zah-m:
> 8 sæn-sing liang-i cü-ts, ge væn-pah su tso z m-ding.
5 爾許 中央 若 有 人 欠 聰明 應該 求 上帝，就 會 得着：上帝 是 厚厚 賜畀 眾人，𣍐 批評 佢。
6 只是 求 時候，要 用 相信个 心，𠏕 疑惑：因爲 疑惑 主子 是 像 海裏个 浪，被 風 吹動，蕩來蕩去。
7 箇樣子 人 不 用 想 從 主 得着 倽某：
8 三心 兩意 主子，佢 凡百 所 做 是 無定。
> 9 Ti-vi-keh hyüong-di yü sing-ky‛i kao hao kao-hying:
> 10 ze-cü yü kông-lôh ti-vi ah hao kao-hying; ing-yü ge iao ku-k‛e ziang ts‛ao-hwa.
> 11 Nyih-deo ih-c‛ih, yiu ho-nyih-keh fong c‛ü-le, ts‛ao jü-tsih k‛u-gao, hwa ah zia-gao, ge hao-k‛ön-keh yüong-mao tu mih-gao: ze-cü tso nying ah we z-t‛ih se-ba.
9 低微个 兄弟 爲 升起 高 好 高興：
10 財主 爲 降落 低微 也 好 高興；因爲 佢 要 過去 像 草花。
11 日頭 一出，有 火熱个 風 吹來，草 隨即 枯爻，花 也 謝爻，佢 好看个 容貌 都 滅爻：財主 做 人 也 會 是僣 衰敗。
> 12 Ziu s-lin-keh næn-deo we zing-ne-keh nying z yiu foh-ky‛i: ing-yü yi-kying s-lin-ku pih-ding teh-djôh weh-ming-keh bing-t‛in-kwön, ziu-z Cü su ing-hyü peh e-kying Ge cü-ts.
12 受 試煉个 難頭 會 忍耐个 人 是 有 福氣：因爲 已經 試煉過 必定 得着 活命个 平天冠，就是 主 所 應許 畀 愛敬 佢 主子。
> 13 Ziu yiu-‛oh cü-ts m-c‛ü kông, Ngô z bi Zông-ti yiu-‛oh: ing-yü Zông-ti fe bi ôh z-kön yiu-‛oh, Ge-z ah fe yiu-‛oh nying:
> 14 væn-pah ziu yiu-‛oh cü-ts z bi z-keh s-yüoh su ta-gao, su ying-yiu.
> 15 Keh s-yüoh fæh-dong, ziu sang-c‛ih ze; keh ze zing-kong, ziu sang-c‛ih s.
13 受 誘惑 主子 無處 講，我 是 被 上帝 誘惑：因爲 上帝 𣍐 被 惡 事幹 誘惑，佢自 也 𣍐 誘惑 人：
14 凡百 就 誘惑 主子 是 被 自个 私慾 所 帶爻，所 引誘。
15 箇 私慾 發動，就 生出 罪；箇 罪 成功，就 生出 死。
> 16 Ngô ts‛ing-e-keh hyüong-di, hyiao dzæn.
> 17 Væn-pah hao meh-z, væn-pah jün-bi meh-z, tu z jong zông-deo Kwông-ming-keh Vu-ts‛ing s-lôh, Ge z m-kao pin-yih, ‛ao-vu kang-ke.
> 18 Zông-ti tsiao Ge-z-keh ts-i yüong tsing dao-li sang ngô-he, peh ngô-he ze Ge su zao væn-veh ts-cong we sön zông-sing ko-ts.
16 我 親愛个 兄弟，𠏕 賺。
17 凡百 好 物事，凡百 全備 物事，都 是 從 上頭 光明个 父親 賜落，佢 是 無較 變易，毫無 更改。
18 上帝 照 佢自个 旨意 用 真 道理 生 我許，畀 我許 在 佢 所 造 萬物 之中 會 算 上新 果子。
> 19 Su-i, ngô ts‛ing-e-keh hyüong-di, ng-he kôh-nying yüong kw‛a-ting t‛ing, mæn-ting kông, mæn-ting sang-ky‛i:
> 20 ing-yü nying-keh nu-ky‛i feh neng zing-ziu Zông-ti-keh kong-nyi.
19 所以，我 親愛个 兄弟，爾許 各人 用 快點 聽，慢點 講，慢點 生氣：
20 因爲 人个 怒氣 不 能 成就 上帝个 公義。
> 21 Su-i iao t‛eh-gao ih-ts‛ih-keh we-u teh mön-c‛ih-keh ôh-doh, yüong ti-sing-siao-i tsih-ziu sing-li su cong-keh dao-li, ziu-z neng-keo kyiu ng-keh ling-weng.
21 所以 要 脫爻 一切个 穢污 搭 滿出个 惡毒，用 低心小意 接受 心裏 所 種个 道理，就是 能彀 救 爾个 靈魂。
> 22 Hyiao z p‛in z, tæn tso t‛ing dao-li-keh nying, z iao i dao-li tso.
> 23 Ing-yü væn-pah t‛ing dao-li feh tso cü-ts, z ziang ih-ke nying ze kying li-min mông z-keh min-lin:
> 24 mông-ku k‛e-gao, ziu mông-kyi ge-z-keh væn-ts z tsa-sang.
> 25 Dæn-z we k‛ao-kyiu keh jün-bi sih-fông nying-keh leh-fæh, dziang siu-lao ge, feh-z t‛ing-ku ziu mông-kyi, z i ge tso, keh nying, ge su tso z-kön z yiu foh-ky‛i.
22 𠏕 自 騙 自，單 做 聽 道理个 人，是 要 依 道理 做。
23 因爲 凡百 聽 道理 不 做 主子，是 像 一個 人 在 鏡 裏面 望 自个 面臉：
24 望過 去爻，就 忘記 佢自个 範子 是 怎生。
25 但是 會 考究 箇 全備 釋放 人个 律法，長 守牢 佢，不是 聽過 就 忘記，是 依 佢 做，箇 人，佢 所 做 事幹 是 有 福氣。
> 26 Ng-he cong-yiang ziah yiu nying sön z-kyi gyin-zing, feh æh-tsi ge k‛eo-zih, z hong-p‛in z-kyi-keh sing, ge-keh gyin-zing z bah-lôh.
> 27 Ze Zông-ti ngô-he Vu-ts‛ing min-zin kyih-zing m u-tin-keh gyin-zing, ziu-z, k‛ön-ku m-pang-keh teh kwa-vu ze ge-he wæn-næn z-‛eo, ping-ts‛ia z-kyi kying-siu feh nyin-djôh si-zông-keh tsih-le.
26 爾許 中央 若 有 人 算 自己 虔誠，不 壓制 佢 口舌，是 哄騙 自己个 心，佢个 虔誠 是 白落。
27 在 上帝 我許 父親 面前 潔淨 無 污點个 虔誠，就是，看顧 無伯‛个 搭 寡婦 在 佢許 患難 時候，并且 自己 謹守 不 染着 世上个 跡癗。
===== Nk. 2. =====
第二章.
1 Tseng-djong fu-kyü, ky‛ing-mæn gyüong-nying, z feh tsiao Yia-su-keh dao-li:
13 ing-ke yüong z-pe de nying:
14 ziah m-yiu ‛ang-ts, m-c‛ü kông yiu siang-sing,
17 keh-yiang-ts siang-sing z s,
19 z ziang ôh-kyü-keh siang-sing,
21 feh-z ziang Ô-pah-læh-hön,
25 teh Læh-‛eh.
1 尊重 富貴，輕慢 窮人，是 不 照 耶穌个 道理：
13 應該 用 慈悲 待 人：
14 若 無有 行止，無處 講 有 相信，
17 箇樣子 相信 是 死，
19 是 像 惡鬼个 相信，
21 不是 像 亞伯拉罕，
25 搭 喇合。
> NGÔ-KEH hyüong-di, ng-he siang-sing ngô-he Cü Yia-su Kyi-toh, keh-yü yüong-wa-keh Cü, siu-lao Ge-keh dao-li, hyiao liang-yiang sing de nying.
> 2 Ziah yiu nying ta kying ka-ts, tsiah wa-li i-zông, tseo-tsing ng-he jü-we-dông, yi yiu ih-ke gyüong-nying i-sæn læn-lü tseo-tsing;
> 3 ng-he we tsiao-tsih tsiah wa-li i-zông cü-ts, teh ge kông, “Ng ts‛ing zo ze hao-ting su-ze;” yi teh keh gyüong-nying kông, “Ng gyi ze-kæn, ‛oh-tsia zo ze-i ngô kyiah-teng-‛ô;”
> 4 su-i, ng-he ky‛i feh-z yiu p‛in-ky‛üoh sing, yüong ôh-i feng-pih.
我个 兄弟，爾許 相信 我許 主 耶穌 基督，箇位 榮華个 主，守牢 佢个 道理，𠏕 兩樣 心 待 人。
2 若 有 人 帶 金 戒指，着 華麗 衣裳，走進 爾許 聚會堂，貤 有 一個 窮人 衣衫 襤褸 走進；
3 爾許 會 招接 撯 華麗 衣裳 主子，搭 佢 講，“爾 請 坐 在 好點 所在；” 貤 搭 箇 窮人 講，“爾 徛 在吤，或者 坐 在倚 我 腳凳下；”
4 所以，爾許 豈 不是 有 偏曲 心，用 惡意 分別。
> 5 Ngô ts‛ing-e-keh hyüong-di, yüong t‛ing. Zông-ti ky‛i feh-z kæn-shün si-zông-keh gyüong-nying, peh ge siang-sing-keh sing fu-coh, hao tsih-djôh Ge koh-kô-keh sæn-nyih, ziu-z Ge su ing-hyü peh keh-sih e-kying Ge cü-ts?
> 6 Dæn-z ng-he z k‛ön-ky‛ing gyüong-nying. Ze-cü ky‛i feh-z æh-tsi ng-he, t‛a ng-he tao fæh-dông-zin?
> 7 Ng-he ts‛ing yü Kyi-toh-keh meng-du, ge-he ky‛i feh-z hyü-pông keh tseng-djong ming-deo?
> 8 Sing-shü kông, “Ing-ke e-sih ng-keh ling-sô ziang z-kyi,” keh-diao ting tseng-djong-keh leh-fæh, ng-he ziah pao-siu ge, ziu hao:
> 9 dæn-z ng-he ziah liang-yiang sing de nying, ziu yiu ze, z leh-fæh su ding-keh væn-nying.
> 10 Ziah yiu nying pao-siu ih-ts‛ih-keh leh-fæh, tsih væn ih-yiang, ziu-z ih-ts‛ih-keh væn-djôh-gao.
> 11 Ing-yü su kông, “Feh-k‛o kæn-ying” yi kông, “Feh-k‛o sæh-nying.” Ng shü-tsih feh væn kæn-ying, tæn-tsih sæh-nying, ah z væn-djôh ih-ts‛ih-keh leh-fæh.
> 12 Su-i ng-he kông shih-wa, tso z-kön, tu ing-ke ziang tsiang-le iao bi sih-fông nying-keh leh-fæh sing-p‛ön.
> 13 Feh ‛ang z-pe cü-ts pih-ding we ziu m z-pe-keh sing-p‛ön: sing-p‛ön z-‛eo, z-pe we teh-sing.
5 我 親愛个 兄弟，用 聽。上帝 豈 不是 揀選 世上个 窮人，畀 佢 相信个 心 富足，好 接着 佢 國家个 產業，就是 佢 所 應許 畀 箇些 愛敬 佢 主子？
6 但是 爾許 是 看輕 窮人。財主 豈 不是 壓制 爾許，拖 爾許 到 法堂前？
7 爾許 稱 爲 基督个 門徒，佢許 豈 不是 毀謗 箇 尊重 名頭？
8 聖書 講，“應該 愛惜 爾个 鄰舍 像 自己，” 箇條 頂 尊重个 律法，爾許 若 保守 佢，就 好：
9 但是 爾許 若 兩樣 心 待 人，就 有 罪，是 律法 所 定个 犯人。
10 若 有 人 保守 一切个 律法，只 犯 一樣，就是 一切个 犯着爻。
11 因爲 所 講，“不可 姦淫” 貤 講，“不可 殺人。” 爾 雖即 不 犯 姦淫，單只 殺人，也 是 犯着 一切个 律法。
12 所以 爾許 講 說話，做 事幹，都 應該 像 將來 要 被 釋放 人个 律法 審判。
13 不 行 慈悲 主子 必定 會 受 無 慈悲个 審判：審判 時候，慈悲 會 得勝。
> 14 NGÔ-KEH hyüong-di, ih-ke nying z-kyi kông yiu siang-sing, m-yiu ‛ang-ts, yiu zah-m ih-c‛ü? Keh-yiang-ts siang-sing neng-keo kyiu ge feh?
> 15 Ziah yiu hyüong-di, ‛oh ts-me, c‛ih-sing-lu-t‛i, yi ky‛üih-væh du-nyih-keh k‛eo-liang,
> 16 ng-he cong-yiang yiu nying teh ge-he kông, “Ng-he hao ön-weng k‛e; dæn-nyün ng tsiah-neng, ky‛üoh-pao;” ge-he sing-zông su ky‛üih-væh z-kyi yi m-kao peh ge; keh yiu zah-m ih-c‛ü?
> 17 Z-t‛ih, tsih-yiu siang-sing, ziah m-yiu ‛ang-ts, ziu-z s.
> 18 Ziah yiu nying kông, “Ng yiu siang-sing, ngô yiu ‛ang-ts:” ts‛ing ng peh ng m ‛ang-ts-keh siang-sing hyin-c‛ih; ngô ziu we peh ngô-keh ‛ang-ts hyin-c‛ih ngô-keh siang-sing peh ng mông.
> 19 Ng siang-sing Zông-ti z tsih-yiu ih-yü; keh z hao: ôh-kyü ah z-t‛ih siang-sing, tsih-z gæh-gæh-teo.
> 20 Hyü-veo-keh nying, ng ky‛i feh ing-ke hyiao-teh m ‛ang-ts-keh siang-sing z s?
> 21 Ngô-he tsu-tsong Ô-pah-læh-hön hyin ge-z-keh n-ts Yi-sæh ze tsi-dæn-zông, ky‛i feh-z yü ‛ang-ts sön tsing-dzih?
> 22 K‛o-kyin ge siang-sing teh ge ‛ang-ts z bing-‛ang-keh, ping-ts‛ia siang-sing z jong ‛ang-ts tso wön-jün;
> 23 su-i sing-shü su kông, Ô-pah-læh-hön siang-sing Zông-ti, ziu sön z ge-keh kong-nyi, keh shih-wa ziu yiu ing-nyin: su-i ts‛ing-hwu ge z Zông-ti-keh bong-yiu.
> 24 K‛o-kyin, nying sön kong-nyi fi-tæn jong siang-sing, ah z jong ‛ang-ts.
> 25 Wæ-yiu keh gyi-nyü Læh-‛eh siu-liu keh-sih ts‛a-s, peh ge-he jong bih-diao lu cün-k‛e, ky‛i feh-z jong ‛ang-ts sön kong-nyi?
> 26 Ziang kyi-sing m-yiu ling-weng z s, siang-sing m-yiu ‛ang-ts ah z s.
14 我个 兄弟，一個 人 自己 講 有 相信，無有 行止，有 倽某 益處？箇樣子 相信 能彀 救 佢 不？
15 若 有 兄弟，或 姊妹，出身露體，貤 缺乏 度日个 口糧，
16 爾許 中央 有 人 搭 佢許 講，“爾許 好 安穩 去；但願 爾 撯暖，喫飽；” 佢許 身上 所 缺乏 自己 貤 無較 畀 佢；箇 有 倽某 益處？
17 是僣，只有 相信，若 無有 行止，就是 死。
18 若 有 人 講，“爾 有 相信，我 有 行止：” 請 爾 畀 爾 無 行止个 相信 顯出；我 就 會 畀 我个 行止 顯出 我个 相信 畀 爾 望。
19 爾 相信 上帝 是 只有 一位；箇 是 好：惡鬼 也 是僣 相信，只是 挾挾抖。
20 虚浮个 人，爾 豈 不 應該 曉得 無 行止个 相信 是 死？
21 我許 祖宗 亞伯拉罕 獻 佢自个 兒子 以撒 在 祭壇上，豈 不是 爲 行止 算 正直？
22 可見 佢 相信 搭 佢 行止 是 並行个，并且 相信 是 從 行止 做 完全；
23 所以 聖書 所 講，亞伯拉罕 相信 上帝，就 算 是 佢个 公義，箇 說話 就 有 應驗：所以 稱呼 佢 是 上帝个 朋友。
24 可見，人 算 公義 非單 從 相信，也 是 從 行止。
25 還有 箇 妓女 喇合 收留 箇些 差使，畀 佢許 從 別條 路 轉去，豈 不是 從 行止 算 公義？
26 像 己身 無有 靈魂 是 死，相信 無有 行止 也 是 死。
===== Nk. 3. =====
第三章.
1 Feh iao sing-kao ky‛i-ngao p‛i-bing bih-ke dzæn:
5 ing-ke æh-voh z-keh k‛eo-zih, ge shü-tsih z siao ts-t‛i, neng-keo tso hyü-to hao, yi neng-keo tso hyü-to feh hao.
13 Lao-zih ts‛ong-ming-keh nying, z weng-ziu, ‛o-ky‛i, m-yiu tu-gyi teh tsang-teo.
1 不 要 心高 氣傲 批評 別個 賺：
5 應該 壓服 自个 口舌，佢 雖即 是 小 肢體，能彀 做 許多 好，貤 能彀 做 許多 不 好。
13 老實 聰明个 人，是 溫柔，和氣，無有 妒忌 搭 爭鬥。
> Ngô-keh hyüong-di, hyiao tu siang tso sin-sang, ing-yü hyiao-teh ngô-he tso sin-sang-keh, pih iao ziu kah-nga nyin-keh sing-p‛ön.
> 2 Ngô-he kôh-nying tu yiu hyü-to dzæn-c‛ü. Ziah yiu nying kông shih-wa m-yiu dzæn-c‛ü, keh-z wön-jün-keh nying, neng-keo æh-tsi ge tsing-ke kyi-sing.
> 3 Ngô-he yüong ziah-wæn fông ze mô-k‛eo iao peh ge i-jing ngô-he; ziu hao diao-dong ge tsing-ke kyi-sing.
> 4 Jün, shü-tsih z do, yi yiu gyüông-fong p‛iao-dong ge, ah we bi ting siao-keh do cün-dong, jü lao-da-keh cü-i.
> 5 Z-t‛ih, k‛eo-zih z ih-ke siao ts-t‛i, ah we kông do wa. Ih-leh ho-sing we dziah-gao to-siao jü-moh!
> 6 K‛eo-zih z ho, z mön si-zông-keh ôh-nyih ze ngô-he pah-t‛i li-min, ge we peh ngô-he mön-sing we-u, yi we dziah-pin keh væn-veh, cün-dong ge z-kyi bi di-nyüoh-keh ho dziah-ky‛i.
> 7 Pah-yiang fi-gying, tseo-siu, djong-nyi, teh shü-li-keh meh-z, tu hao æh-voh, ping-ts‛ia z yi-kying bi nying æh-voh:
> 8 tsih-yiu k‛eo-zih, m-nying neng-keo æh-voh ge; z æh-voh-feh-le-keh ôh-nyih, c‛ong-mön sæh-nying-keh doh-yiah.
> 9 Ngô-he yüong ge coh-tsæn Vu-ts‛ing Zông-ti; yi yüong ge tsiu-mô tsiao Zông-ti-keh væn-ts zao-c‛ih-le-keh nying:
> 10 coh-tsæn teh tsiu-mô tu z c‛ih ze ih-tsiang k‛eo. Ngô-keh hyüong-di, keh z-kön feh ing-ke z-t‛ih.
> 11 Shü-nyün jong ih-ke dong we üong-c‛ih din shü teh k‛u shü feh?
> 12 Ngô-keh hyüong-di, vu-hwa-ko jü, we kyih kæn-læn feh? ‛oh-tsia bu-dao jü we kyih vu-hwa-ko feh? Z-t‛ih, m-yiu ih-ke shü-nyün we liu-c‛ih ‛æn-shü teh dæn shü.
我个 兄弟，𠏕 都 想 做 先生，因爲 曉得 我許 做 先生个，必 要 受 格外 嚴个 審判。
2 我許 各人 都 有 許多 賺處。若 有 人 講 說話 無有 賺處，箇是 完全个 人，能彀 壓制 佢 整个 己身。
3 我許 用 嚼環 放 在 馬口 要 畀 佢 依順 我許；就 好 調動 佢 整个 己身。
4 船，雖即 是 大，貤 有 狂風 飄動 佢，也 會 被 頂 小个 舵 轉動，隨 老大个 主意。
5 是僣，口舌 是 一個 小 肢體，也 會 講 大 話。一粒 火星 會 着爻 多少 樹木！
6 口舌 是 火，是 滿 世上个 惡孽 在 我許 百體 裏面，佢 會 畀 我許 滿身 穢污，貤 會 着遍 箇 萬物，轉動 佢 自己 被 地獄个 火 着起。
7 百樣 飛禽，走獸，蟲蟻，搭 水裏个 物事，都 好 壓服，并且 是 已經 被 人 壓服：
8 只有 口舌，無人 能彀 壓服 佢；是 壓服不來个 惡孽，充滿 殺人个 毒藥。
9 我許 用 佢 祝讚 父親 上帝；貤 用 佢 咒罵 照 上帝个 範子 造出來个 人：
10 祝讚 搭 咒罵 都 是 出 在 一張 口。我个 兄弟，箇 事幹 不 應該 是僣。
11 水源 從 一個 洞 會 湧出 甜 水 搭 苦 水 不？
12 我个 兄弟，無花果 樹，會 結 橄欖 不？或者 葡萄 樹 會 結 無花果 不？是僣，無有 一個 水源 會 流出 鹹水 搭 淡 水。
> 13 Ng-he cong-yiang kæh-nying yiu ts‛ong-ming teh kyin-sih? ge ing-ke ti-sing-siao-i yüong hao ‛ang-yü hyin-c‛ih ge ts‛ong-ming.
> 14 Ng-he ziah-z zeng tu-gyi tsang-teo-keh doh-sing, hyiao la-t‛in, ah hyiao mao-c‛ong tsing dao-li.
> 15 Keh-‛ao tsong-ming((應爲：ts‛ong-ming)) feh-z jong zông-deo le, z jong si-zông, jong s-yüoh, jong mo-kyü le.
> 16 Ing-yü tu-gyi teh tsang-teo ze ‛ah-yi, tsôh-lön teh yiang-yiang ôh z-kön ah ze ‛ah-yi.
> 17 Tsih-z jong zông-deo le-keh ts‛ong-ming, sin z kyih-zing, ‛eo-deo ‛o-bing, weng-ziu, kw‛ön-‛ong, mön-coh z-pe teh ih-ts‛ih hao ko-ts, feh liang-yiang sing de nying, feh tso kô-hao-nying.
> 18 Kong-nyi-keh ko-ts, z iao ‛o-bing cü-ts ze-ü ‛o-bing cong ge.
13 爾許 中央 吤人 有 聰明 搭 見識？佢 應該 低心小意 用 好 行爲 顯出 佢 聰明。
14 爾許 若是 存 妒忌 爭鬥个 毒心，𠏕 賴天，也 𠏕 冒充 真 道理。
15 箇號 聰明 不是 從 上頭 來，是 從 世上，從 私慾，從 魔鬼 來。
16 因爲 妒忌 搭 爭鬥 在 何倚，作亂 搭 樣樣 惡 事幹 也 在 何倚。
17 只是 從 上頭 來个 聰明，先 是 潔淨，後頭 和平，溫柔，寬宏，滿足 慈悲 搭 一切 好 果子，不 兩樣 心 待 人，不 做 假好人。
18 公義个 果子，是 要 和平 主子 在於 和平 種 佢。
===== Nk. 4. =====
第四章.
1 Iao djü-gao t‛ön-sing,
4 fi-li z-kön,
5 kyiao-ngao sing,
11 hyüong-di hyiao liang-‛ô hyü-pông:
13 hyiao ts‛eng sang-i ih-ding we hying-wông, iao kyi-teh sing-ming z m-ding, pah-yiang z-kön iao kao-de Zông-ti-keh siu.
1 要 除爻 貪心，
4 非禮 事幹，
5 驕傲 心，
11 兄弟 𠏕 兩下 毀謗：
13 𠏕 忖 生意 一定 會 興旺，要 記得 性命 是 無定，百樣 事幹 要 交代 上帝个 手。
> NG-HE-KEH siang-tsang siang-teo z-kön jong ‛ah-yi le? Ky‛i feh-z jong ng-he-keh s-yüoh ze ng-he pah-t‛i cong-yiang kao-tsin?
> 2 Ng-he sang t‛ön-sing, z teh-feh-djôh: ng-he tu-gyi sæh-loh, ah feh neng teh-djôh: ng-he siang-tsang siang-teo, yi teh-feh-djôh; ing-yü ng-he feh gyiu.
> 3 Ng-he gyiu, ning-gyiu teh-feh-djôh, yü ng-he gyiu-dzæn, siang ze ng-he s-yüoh lön-yüong.
爾許个 相爭 相鬥 事幹 從 何倚 來？豈 不是 從 爾許个 私慾 在 爾許 百體 中央 交戰？
2 爾許 生 貪心，是 得不着：爾許 妒忌 殺戮，也 不 能 得着：爾許 相爭 相鬥，貤 得不着；因爲 爾許 不 求。
3 爾許 求，仍舊 得不着，爲 爾許 求賺，想 在 爾許 私慾 亂用。
> 4 Ng-he ying-lön-keh nön-nyü, ky‛i feh hyiao-teh kyih-kao si-zông, z ti-dih Zông-ti? Su-i siang tso si-zông-keh bong-yiu cü-ts, ziu-z Zông-ti-keh dziu-dih.
> 5 Sing-shü su kông, djü ze ngô-he li-min-keh Sing-Ling we dong tu-gyi-keh yüoh-sing feh? Ng-he ts‛eng keh shih-wa z hyü-kô feh?
> 6 Dæn-z Ge z kah-nga kô-ts‛eo eng-yü. Su-i kông, “Zông-ti gyü-jih kyiao-ngao cü-ts, s eng-yü peh ky‛in-hyü-keh nying.”
> 7 Su-i, ng-he yüong jing-voh Zông-ti: dæn-z iao gyü-jih mo-kyü, mo-kyü ziu we li-k‛e ng-he.
> 8 Ts‛ing-gying Zông-ti, Zông-ti ah we ts‛ing-gying ng-he. Ng-he ze-nying, siu iao si kön-zing; ng-he sæn-sing liang-i cü-ts, sing iao tsông kyih-zing.
> 9 Iao z ‛eng z, sing-t‛ong, di-k‛oh: ng-he-keh hyi-siao iao pin-tso t‛ong-k‛oh, ng-he-keh kw‛a-lôh iao pin-tso iu-zeo.
> 10 Ze Cü min-zin iao ti-sing-siao-i; Cü ziu we kyü ng-he zông.
4 爾許 淫亂个 男女，豈 不 曉得 結交 世上，是 抵敵 上帝？所以 想 做 世上个 朋友 主子，就是 上帝个 讎敵。
5 聖書 所 講，住 在 我許 裏面个 聖靈 會 動 妒忌个 慾心 不？爾許 忖 箇 說話 是 虛假 不？
6 但是 佢 是 格外 加湊 恩惠。所以 講，“上帝 拒絕 驕傲 主子，賜 恩惠 畀 謙虛个 人。”
7 所以，爾許 用 順服 上帝：但是 要 拒絕 魔鬼，魔鬼 就 會 離開 爾許。
8 親近 上帝，上帝 也 會 親近 爾許。爾許 罪人，手 要 洗 乾淨；爾許 三心 兩意 主子，心 要 妝 潔淨。
9 要 自 恨 自，心痛，啼哭：爾許个 喜笑 要 變做 痛哭，爾許个 快樂 要 變做 憂愁。
10 在 主 面前 要 低心小意；主 就 會 舉 爾許 上。
> 11 Hyüong-di, hyiao liang-‛ô hyü-pông. Hyü-pông hyüong-di, sing-p‛ön hyüong-di cü-ts, ziu-z hyü-pông leh-fæh, sing-p‛ön leh-fæh. Ng ziah-z sing-p‛ön leh-fæh, ziu feh-z i-jing leh-fæh-keh nying, z sing-p‛ön-keh nying.
> 12 Zao leh-fæh Cü-ts z tsih-yiu ih-yü, Ge neng-keo kyiu nying, neng-keo mih-gao nying: ng z kæh-nying, hao sing-p‛ön bih-nying?
11 兄弟，𠏕 兩下 毀謗。毀謗 兄弟，審判 兄弟 主子，就是 毀謗 律法，審判 律法。爾 若是 審判 律法，就 不是 依順 律法个 人，是 審判个 人。
12 造 律法 主子 是 只有 一位，佢 能彀 救 人，能彀 滅爻 人：爾 是 吤人，好 審判 別人？
> 13 Ng-he ze-teh kông, Kying-nying ‛oh-tsia t‛in-nyiang ngô-he tao m zing-li k‛e, ze-kæn djü ih-nyin, tso sang-i, dzæn dong-din;
> 14 ng-he feh hyiao-teh t‛in-nyiang z-kön z tsa-sang. Ng-he-keh sing-ming ziang zah-m? K‛o-pi vu-lu, dzæn-z ze-teh mah-ding sæn-k‛e.
> 15 Ng-he ing-ke kông, “Cü ziah-z k‛eng peh ngô-he tso nying, ngô-he hao t‛ih tso, ‛oh-tsia t‛ih tso.”
> 16 Yin-ze ng-he yü kyiao-ngao la-t‛in: keh-yiang-ts la-t‛in tu z feh hao.
> 17 Su-i, hyiao-teh tso hao, feh tso cü-ts, ge yiu ze.
13 爾許 在𡍲 講，今日‛ 或者 天亮 我許 到 某 城裏 去，在吤 住 一年，做 生意，賺 銅錢；
14 爾許 不 曉得 天亮 事幹 是 怎生。爾許个 性命 像 倽某？可比 霧露，暫時 在𡍲 驀停 散開。
15 爾許 應該 講，“主 若是 肯 畀 我許 做 人，我許 好 僣 做，或者 僣 做。”
16 現在 爾許 爲 驕傲 賴天：箇樣子 賴天 都 是 不 好。
17 所以，曉得 做 好，不 做 主子，佢 有 罪。
===== Nk. 5. =====
第五章.
1 Tsôh-ôh-keh ze-cü iao p‛ô Zông-ti-keh ying-væh.
7 Ngô-he ing-ke ‛ôh sin-ts-nying teh Iah-pah zing-ne-keh pông-yiang:
12 hyiao væh-zi,
13 ziu k‛u iao tao-kao, kw‛a-lôh iao ts‛ông-s,
16 iao jü-de tsiao-nying z-keh dzæn-c‛ü, ng de ngô ngô de ng tao-kao,
19 li-k‛e tsing dao-li, tseo dzæn-lu cü-ts iao peh ge-he ta-cün-le.
1 作惡个 財主 要 怕 上帝个 刑罰。
7 我許 應該 學 先知人 搭 約伯 忍耐个 榜樣：
12 𠏕 罰誓，
13 受 苦 要 禱告，快樂 要 唱詩，
16 要 聚隊 招認 自个 賺處，爾 待 我 我 待 爾 禱告，
19 離開 真 道理，走 賺路 主子 要 畀 佢許 帶轉來。
> NG-HE ze-cü, yü iao ling-djôh ng-he-keh næn-deo, iao e-pe da-k‛oh.
> 2 Ng-he-keh ze-veh yi-kying wa-gao, ng-he-keh i-zông yi-kying cü-gao.
> 3 Ng-he-keh kying-ts nying-ts z fæh-siu-gao; ping-ts‛ia keh fæh-siu we tso ‛e ng-keh te-tsing, we ziang ho ky‛üoh-tsing ng-he-keh nyüoh. Ng-he tsih-hyüoh ze-veh ze keh lôh-kyiah nyih-ts.
> 4 Pông ng-he siu-keh-keh kong-nying, ng-he yiu-yi ge-keh kong-din, ze-teh kyiao-hæn: wæ-yiu keh siu-keh cü-ts-keh kyiao-hæn yi-kying tsing keh-yü t‛in-ping-t‛in-tsiang-keh Cü ng-tô-li.
> 5 Ng-he ze si-zông yi-kying sô-wa tsôh-ôh((應爲：tsôh-lôh)); yiang-coh ng-he-keh sing, ziang cong-sang tæn-teng sæh-keh nyih-ts.
> 6 Ng-he yi-kying ding kong-nyi nying-keh ze, peh ge sæh-gao; ge ah feh tsu ng-he.
爾許 財主，爲 要 臨着 爾許个 難頭，要 哀悲 大哭。
2 爾許个 財物 已經 壞爻，爾許个 衣裳 已經 蛀爻。
3 爾許个 金子 銀子 是 發銹爻；并且 箇 發銹 會 做 害 爾个 對證，會 像 火 喫進 爾許个 肉。爾許 積蓄 財物 在 箇 落腳 日子。
4 幫 爾許 收割个 工人，爾許 遊移 佢个 工錢，在𡍲 叫喊：還有 箇 收割 主子个 叫喊 已經 進 箇位 天兵天將个 主 耳朵裏。
5 爾許 在 世上 已經 奢華 作樂；養足 爾許个 心，像 眾生 單等 殺个 日子。
6 爾許 已經 定 公義 人个 罪，畀 佢 殺爻；佢 也 不 阻 爾許。
> 7 SU-I hyüong-di, ng-he iao zing-ne, teng-tao Cü le-keh nyih-ts. Cong-din nying sô-mông din-di ting hao c‛ih-sæn, we ne-sing teng-‛eo ge, teng-tao teh-djôh zin ‛eo keh liang-t‛ao yü.
> 8 Ng-he ah ing-ke zing-ne; kyin-ku ng-he-keh sing: ing-yü Cü le-keh nyih-ts yi-kying gying-gao.
7 所以 兄弟，爾許 要 忍耐，等到 主 來个 日子。種田 人 奢望 田地 頂 好 出產，會 耐心 等候 佢，等到 得着 前 後 箇 兩套 雨。
8 爾許 也 應該 忍耐；堅固 爾許个 心：因爲 主 來个 日子 已經 近爻。
> 9 Hyüong-di, hyiao jü-de ün-‛eng, sang-teh ng-he bi sing-p‛ön: keh-yü sing-p‛ön-keh Cü z gyi ze meng-k‛eo.
> 10 Ngô-keh hyüong-di, vong Cü ming-deo kông dao-li-keh sin-ts-nying, ng-he yüong ge tso ky‛üoh-k‛u zing-ne-keh pông-yiang.
> 11 Zing-ne tao-ti cü-ts, ngô-he sön ge yiu foh-ky‛i. Ng-he yi-kying t‛ing-djôh Iah-pah-keh zing-ne, hyiao-teh Cü ts-‛eo tsa-sang, z ting z-pe, ting e-lin.
9 兄弟，𠏕 聚隊 怨恨，省得 爾許 被 審判：箇位 審判个 主 是 徛 在 門口。
10 我个 兄弟，奉 主 名頭 講 道理个 先知人，爾許 用 佢 做 喫苦 忍耐个 榜樣。
11 忍耐 到底 主子，我許 算 佢 有 福氣。爾許 已經 聽着 約伯个 忍耐，曉得 主 之後 怎生，是 頂 慈悲，頂 哀憐。
> 12 Ngô-keh hyüong-di, ting iao-kying, hyiao væh-zi, hyiao ts-tin t‛in, hyiao ts-tin di, ah hyiao ts-tin bih-yiang væh-zi: ng-he tsih iao z, kông z; feh-z, kông feh-z; sang-teh ng-he bi sing-p‛ön.
12 我个 兄弟，頂 要緊，𠏕 罰誓，𠏕 指點 天，𠏕 指點 地，也 𠏕 指點 別樣 罰誓：爾許 只 要 是，講 是；不是，講 不是；省得 爾許 被 審判。
> 13 Ng-he cong-yiang yiu ky‛üoh-k‛u cü-ts, iao tao-kao. Yiu kw‛a-lôh cü-ts, iao ts‛ông s.
> 14 Ng-he cong-yiang yiu sang-bing-keh nying, iao ts‛ing kao-we-li-keh tsiang-lao le; k‛ao-djôh Cü-keh ming-deo, yüong yiu fu ge, yü ge tao-kao:
> 15 yiu siang-sing-keh tao-kao hao kyiu keh bing-nying, Cü we peh ge nang-ky‛i; ge ziah yiu ze væn-ku, ah we peh ge sô-gao.
> 16 Ng-he kôh-nying iao jü-de tsiao-nying z-keh dzæn-c‛ü, ping-ts‛ia ng de ngô, ngô de ng, jü-de tao-kao; peh ng-he-keh bing we hao. Kong-nyi nying-keh ts‛ih-sing tao-kao ting yiu kying-dao.
> 17 Yi-li-ô z teh ngô-he sing-zing siang-dong-keh nying, ge ts‛ih-sing gyiu feh lôh yü; ziu yiu sæn-nyin ling loh-ke nyüih yü feh lôh di;
> 18 ts-‛eo ge gyiu yü; t‛in ziu lôh yü, di ah fæh-c‛ih t‛u-sæn.
13 爾許 中央 有 喫苦 主子，要 禱告。有 快樂 主子，要 唱 詩。
14 爾許 中央 有 生病个 人，要 請 教會裏个 長老 來；靠着 主个 名頭，用 油 敷 佢，爲 佢 禱告：
15 有 相信个 禱告 好 救 箇 病人，主 會 畀 佢 玍起；佢 若 有 罪 犯過，也 會 畀 佢 赦爻。
16 爾許 各人 要 聚隊 招認 自个 賺處，并且 爾 待 我，我 待 爾，聚隊 禱告；畀 爾許个 病 會 好。公義 人个 切心 禱告 頂 有 勁道。
17 以利亞 是 搭 我許 性情 相同个 人，佢 切心 求 不 落 雨；就 有 三年 零 六個 月 雨 不 落 地；
18 之後 佢 求 雨；天 就 落 雨，地 也 發出 土產。
> 19 Hyüong-di, ng-he cong-yiang ziah yiu li-k‛e tsing dao-li tseo ts‛ô-lu cü-ts, ziah yiu nying ta ge cün-le; hao hyiao-teh, peh ze-nying jong ge ts‛ô-lu tseo-cün cü-ts, z kyiu ih-ke ling-weng c‛ih s-lu, ah we tsô-ke hyü-to ze-ky‛in.
19 兄弟，爾許 中央 若 有 離開 真 道理 走 岔路 主子，若 有 人 帶 佢 轉來；好 曉得，畀 罪人 從 佢 岔路 走轉 主子，是 救 一個 靈魂 出 死路，也 會 遮蓋 許多 罪愆。